བལ་ཡུལ་གྱི་ཡུལ་མི་བརྒྱ་ཆ་ ༥༠ ལ་ཏོག་དབྱིབས་གཉན་རིམས་ཕོག།

བལ་ཡུལ་གྱི་རྒྱལ་ས་ཀ་ཐིན་མན་གྲུ་ཁུལ་གྱི་བོད་མི་ ༤༦ ཙམ་ལ་ཏོག་དབྱིབས་གཉན་རིམས་ཕོག་ཡོད་འདུག

རྒྱ་གར་རྒྱལ་ཡོངས་ནང་ཏོག་དབྱིབས་གཉན་རིམས་ཀྱི་ནད་རླབས་གཉིས་པ་ཁྱབ་གདལ་ཤུགས་ཆེར་འགྲོ་བཞིན་པ་དང་བསྟུན། ཁྱིམ་མཚེས་རྒྱལ་ཁབ་བལ་ཡུལ་ནང་དུའང་ཉིན་རེར་ཛ་དྲག་ཇེ་ཆེར་སོང་སྟེ། ད་ལྟ་རྒྱལ་ས་ཀ་ཐི་མན་གྲུ་གཙོས་པའི་རྒྱལ་ཡོངས་ཀྱི་གཞུང་སྒེར་གྱི་སྨན་ཁང་ནང་ནད་པའི་ཆེད་སྲོག་རླུང་དང་ཉལ་ཁྲི་འདང་ངེས་མེད་རྐྱེན་རྒྱལ་ཁབ་ཀྱི་སྨན་བཅོས་ལྟ་སྐྱོང་སྦོ་ལུག་པའི་གནས་སྐབས་སུ་ལྷུང་ཡོད་འདུག

འདི་གའི་གསར་འགོད་པས་ཞལ་པར་བརྒྱུད་བལ་ཡུལ་གྱི་སྐུ་ཚབ་དོན་གཅོད་ཚུལ་ཁྲིམས་རྒྱ་མཚོ་ལགས་སུ་བལ་ཡུལ་ནང་གནས་སྡོད་བོད་མི་རྣམས་ཀྱི་གནས་སྟངས་སྐོར་དྲིས་ཁོང་གིས། ད་ལྟའི་ཆར་ང་ཚོར་ཤེས་རྟོགས་བྱུང་བ་ལྟར་ན། ནད་རླབས་གཉིས་པ་འདིའི་ནང་རྒྱལ་ས་ཀ་ཐིན་མན་གྲུ་ཁུལ་དུ་བོད་མི་ ༤༦ ཙམ་ལ་ཏོག་དབྱིབས་གཉན་རིམས་ཕོག་ཡོད་ཅིང་། དེའི་ཁྲོད་ནས་རང་ལོ་ ༧༦ སོན་པའི་བོད་མི་ཞིག་འདས་གྲོངས་སུ་ཕྱིན་ཡོད་པ་རེད། ཅེས་དང་། ད་ལྟའི་ཛ་དྲག་གི་གནས་སྟངས་ལ་དཔག་ནས་གངས་ཅན་བདེ་རྩའི་ངོས་ནས་བལ་ཡུལ་ནང་གནས་སྡོད་བོད་མི་རྣམས་ལ་འཕྲོད་བསྟེན་ལམ་སྟོན་སོགས་གནང་མུས་ཡིན་པ་དང་། ད་ལན་གཉན་རིམས་འགོ་མཁན་མང་ཆེ་བ་རང་ཁྱིམ་དུ་ཟུར་བཀག་བྱས་ནས་བསྡད་ཡོད་པ་དང་། སྒྲིག་འཛུགས་ངོས་ནས་མཆོད་འཇོར་ཁུལ་དང་། ཡང་ཁ་འཐོར་མི་མང་མཐུན་རྐྱེན་མེད་མཁན་ཚོའི་ཆེད་དུ་སུན་དྷར་ཇལ་(Sundarijal)ཁུལ་དུ་འགོག་དབྱེ་ཟུར་འཇོག་ཁང་བཅས་བཙུགས་ཡོད་པ་མ་ཟད། མི་རིང་བར་མི་གྲངས་ ༤༠ ལྷག་གཤོང་སའི་ཟུར་འཇོག་ཁང་གཞན་ཞིག་ཀྱང་འཛུགས་རྒྱུ་ཡིན་སྐོར་དང་། ས་གནས་མགོ་འཛིན་བརྒྱུད་དོན་གཅོད་ནས་ཤེས་རྟོགས་བྱུང་བའི་བོད་མི་ནད་པ་རྣམས་ལ་སྔར་བཞིན་མུ་མཐུད་སྨན་རྩིས་ཁང་གི་ལུས་སེམས་གསོ་བྱེད་ཀྱི་སྨན་རིགས་མཁོ་སྤྲོད་བྱེད་མུས་ཡིན་སྐོར་འགྲེལ་བརྗོད་གནང་བྱུང་།

བལ་ཡུལ་གྱི་སྲིད་བློན་ཀེ་པི་ཤར་མ་ཨོ་ལི་ (KP Sharma Oli) ཡིས་ཟླ་འདིའི་ཕྱི་ཚེས་ ༨ ཉིན་ཨ་རིའི་སི་ཨེན་ཨེན་གསར་ཁང་གི་བཅར་འདྲིའི་སྟེང་བལ་ཡུལ་གྱི་གནས་སྟངས་ཛ་དྲག་པོ་མེད་སྐོར་བརྗོད་པ་དེར་རྒྱལ་ནང་དུ་སྐྱོན་བརྗོད་ཤུགས་ཆེན་པོ་ཕོག་ཡོད། འོན་ཀྱང་། ཟླ་འདིའི་ཕྱི་ཚེས་ ༡༠ ཉིན་སྲིད་བློན་ཨོ་ལི་ཡིས་དབྱིན་ཡུལ་གྱི་གྷར་ཌིན་གསར་ཁང་གི་དྲ་ཚིགས་སྟེང་ཡོངས་ཁྱབ་ཀྱི་འབོད་སྐུལ་རྩོམ་ཡིག་ཅིག་སྤེལ་བའི་ནང་། ངས་འཕྲིན་འདི་འབྲི་བཞིན་པའི་གནས་སྐབས་འདིར། ངའི་རྒྱལ་ཁབ་ཀྱིས་ཏོག་དབྱིབས་གཉན་རིམས་ཀྱི་ནད་རླབས་གསར་པ་ཞིག་ལ་གདོང་ལེན་བྱེད་བཞིན་ཡོད། ཏོག་དབྱིབས་ནད་པ་འཕར་བཞིན་པ་དེས་ང་ཚོའི་བློ་སྟོབས་ཅན་གྱི་སྨན་པ་དང་། སྨན་ཞབས་པ། འཕྲོད་བསྟེན་མི་སྣ། དང་བླངས་བ་སོགས་སྨན་བཅོས་ཀྱི་སྒྲོམ་གཞི་ཡོངས་ལ་དོ་ཕོག་ཚབས་ཆེན་གཏོང་བཞིན་འདུག ཅེས་དང་། ངས་རྒྱལ་སྤྱིའི་སྤྱི་ཚོགས་ངོས་ནས་ང་ཚོར་ནད་ཡམས་འདིར་ཁ་གཏད་གཅོག་ཆེད་སྔོན་འགོག་སྨན་ཁབ་དང་། སྨན་བཅོས་མ་ལག སྲོག་རླུང་གི་ཡོ་བྱད་སོགས་ཀྱི་ཐད་ནས་རོགས་སྐྱོར་གནང་རྒྱུའི་འབོད་སྐུལ་ཞུ་བཞིན་ཡོད། ཅེས་བརྗོད་ཡོད་པ་རེད།

འདི་ལོའི་ཕྱི་ཟླ་ ༢ དང་ ༣ པའི་ནང་བལ་ཡུལ་རྒྱལ་ཡོངས་ནང་ཉིན་རེར་ཏོག་དབྱིབས་ནད་པ་གསར་པ་ ༡༠༠ མ་གཏོགས་ཐོན་གྱི་མེད་ནའང་། རྒྱ་གར་ལྟར་ཕྱི་ཟླ་ ༤ པའི་ཟླ་མགོ་ནས་བཟུང་ཉིན་རེ་བཞིན་ཏོག་དབྱིབས་གཉན་རིམས་ཤུགས་ཆེར་ཁྱབ་གདལ་ཕྱིན་ཏེ། ཁ་སང་མི་འབོར་ས་ཡ་ ༣༠ ལྷག་ཡོད་པའི་བལ་ཡུལ་ནང་ཁྱོན་ནད་པ་གསར་པ་ཁྲི་ ༡ མ་ཟིན་ཙམ་ཐོན་ཡོད་ཅིང་། འདས་པའི་བདུན་ཕྲག་གཅིག་ནང་ཆ་སྙོམས་ཀྱིས་ཉིན་ལྟར་མི་གྲངས་ ༨༠༠༠ ལ་གཉན་རིམས་འགོས་ཡོད་འདུག བལ་ཡུལ་གཞུང་གི་གྲངས་ཐོ་ལྟར་ན། ཏོག་དབྱིབས་གཉན་རིམས་བརྟག་དཔྱད་བྱས་པའི་མི་གྲངས་ཁྲོད་ནས་བརྒྱ་ཆ་ ༥༠ མ་ཟིན་ཙམ་ལ་གཉན་རིམས་འགོས་ཡོད་པ་ཤེས་རྟོགས་བྱུང་ཡོད་འདུག་ལ། འདས་པའི་བདུན་ཕྲག་གཅིག་གི་ནད་ཡམས་འཕར་ཚད་ཀྱི་བརྒྱ་ཆ་དེ་ ༡༢༠༠ ལ་ཐོན་ཡོད་འདུག

ཉིན་རེར་ཏོག་དབྱིབས་ནད་པ་མང་དྲགས་པའི་རྐྱེན་གྱིས་བལ་ཡུལ་གྱི་གཞུང་སྒེར་གྱི་སྨན་ཁང་ནང་སྲོག་རླུང་འདང་ངེས་མེད་པའི་དཀལ་ངལ་འཕྲད་མུས་ཡིན་པ་དང་། བལ་ཡུལ་གྱི་རྒྱལ་ཡོངས་གསར་ཁང་ཆེ་གྲས་ཀ་ཐི་མན་གྲུ་ཆ་འཕྲིན་(Kathmandu Post) གྱི་གནས་ཚུལ་ལྟར། བལ་ཡུལ་རྒྱལ་ཡོངས་ནང་ཁྱོན་སྨན་ཁང་ ༡༨༥ ཡོད་པའི་ཁྲོད་ནས་སྨན་ཁང་ ༢༦ ཙམ་ལ་མ་གཏོགས་སྲོག་རླུང་མཁོ་འདོན་ཁང་ (Oxygen Plant) མེད་ཅིང་། དེ་དག་ཁྲོད་ནས་ཀྱང་མང་པོ་ཞིག་གིས་ད་ལྟ་སྲོག་རླུང་མཁོ་འདོན་བྱེད་ཐུབ་ཀྱི་མེད། དེའི་ཐོག་དུས་རྒྱུན་རྒྱ་གར་ནི་བལ་ཡུལ་གྱི་སྨན་བཅོས་ཀྱི་ཅ་དངོས་ནང་འདྲེན་བྱ་སའི་རྒྱལ་ཁབ་གཙོ་བོ་དེ་ཡིན་ནའང་། ད་ལྟ་རྒྱ་གར་རང་ཉིད་ལ་སྲོག་རླུང་འདང་ངེས་མེད་པའི་དཀའ་ངལ་ནང་ལྷུང་ཡོད་སྟབས། རྒྱ་གར་གྱིས་བལ་ཡུལ་ལ་སྲོག་རླུང་མཁོ་སྤྲོད་བྱེད་ཐུབ་ཀྱི་མེད་སྟབས། ཁ་སང་ཕྱི་ཚེས་ ༡༡ ཉིན་རྒྱ་ནག་གིས་བལ་ཡུལ་ལ་སྲོག་རླུང་(Oxygen Cylinder) ༤༠༠ སྤྲད་ཡོད་པ་མ་ཟད། ཡོང་རྒྱུའི་བདུན་ཕྲག་གསུམ་རྗེས་ད་དུང་སྲོག་རླུང་ ༣༥༠༠ སྦྱིན་རྒྱུ་ཡིན་སྐོར་བསྒྲགས་ཡོད་འདུག

དབྱེ་ཞིབ་པས་ད་ཐེངས་བལ་ཡུལ་ནང་དུའང་ཏོག་དབྱིབས་ཤུགས་ཆེར་ཁྱབ་གདལ་འགྲོ་བཞིན་པའི་རྐྱེན་རྩ་གཅིག་དེ་རྒྱ་གར་ཡིན་པར་འདོད་ཀྱི་ཡོད། དེ་ཡང་རྒྱ་གར་དང་ས་འབྲེལ་ཡིན་པའི་བལ་ཡུལ་གྲོང་ཁྱེར་ནེ་པལ་གྷན་ཇི་(NepalGanj) ཟེར་བའི་ཁུལ་དུ་ཏོག་དབྱིབས་གཉན་རིམས་ཤུགས་ཆེར་ཁྱབ་གདལ་ཕྱིན་ཡོད་ཅིང་། ཁུལ་དེ་ཕྱོགས་གཉིས་ཀྱི་ས་མཚམས་ཡིན་སྟབས་ཕར་འགྲོ་ཚུར་འོང་མང་བ་ཡོད་ལ། ལྷག་པར་དུ་འདས་པའི་བདུན་ཕྲག་འགའ་ཤས་ནང་རྒྱ་གར་ནང་ལས་ཀ་གཉེར་བཞིན་པའི་བལ་པོ་རྣམས་ཁུལ་དེ་བརྒྱུད་རང་ཡུལ་དུ་ཕྱིར་ལོག་བྱེད་ཀྱི་ཡོད་སྟབས། དེ་དག་བརྒྱུད་ནས་གཉན་རིམས་འགོས་ཡོད་པར་རྗོད་ཀྱི་འདུག་ལ། དེ་མིན་བལ་ཡུལ་ནང་འདས་པའི་བདུན་ཕྲག་འགའ་ཤས་གོང་འོས་བསྡུ་དང་ཆོས་ལུགས་ཀྱི་དུས་ཆེན་སོགས་པའི་རྐྱེན་དང་། ལྷག་པར་དུ་གཞུང་མང་གཉིས་ནས་ཏོག་དབྱིབས་གཉན་རིམས་ཀྱི་སྔོན་འགོག་ཐབས་ལམ་དག་ལག་བསྟར་ཚགས་ཚུད་བྱས་མེད་པའི་རྐྱེན་གྱིས་ཡིན་སྐོར་བརྗོད་ཡོད་འདུག

དེ་བཞིན་བལ་ཡུལ་གྱིས་སྔོན་འགོག་སྨན་ཁབ་བགོ་འགྲེམ་གྱི་ལས་གཞི་སྤེལ་ཟིན་ཡང་། ཉེ་ལམ་རྒྱ་གར་ནང་གནས་སྟངས་ཛ་དྲག་ཆགས་པའི་རྐྱེན་གྱིས་བལ་ཡུལ་ནང་དུའང་སྔོན་འགོག་སྨན་ཁང་འདང་ངེས་མེད་པའི་གནས་སྟངས་སོགས་ཀྱི་རྐྱེན་པས་གནས་སྐབས་རིང་འགོག་ཁབ་ཀྱི་ལས་གཞི་དེ་མཚམས་འཇོག་བྱ་དགོས་བྱུང་ཡོད་པ་རེད། ད་ལྟའི་ཆར་བལ་ཡུལ་གྱི་མི་འབོར་གྱི་བརྒྱ་ཆ་ ༧།༢ ལ་ཉུང་མཐར་འགོག་ཁབ་ཐེངས་གཅིག་ཐོབ་ཡོད་འདུག

ཁ་སང་ཕྱི་ཚེས་ ༡༡ ཉིན་གཅིག་པུར་བལ་ཡུལ་ནང་ཁྱོན་ཏོག་དབྱིབས་ནད་པ་གསར་པ་ ༩༣༡༧ ཐོན་ཏེ། ད་བར་གྱི་ནད་གྲངས་དེ་འབུམ་ ༤།༡༣ ལ་བསྐྱལ་ཡོད་པ་དང་།  ད་བར་བལ་ཡུལ་ནང་གཉན་རིམས་འདིའི་རྐྱེན་པས་མི་གྲངས་ ༤༣༠༠ ལྷག་རྐྱེན་འདས་སུ་བཏང་ཡོད་འདུག

གསར་འགོད་པ། པ་སངས་ཚེ་རིང་།