ཕྱི་ལོ་ ༢༠༢༡ ལོའི་བཙན་བྱོལ་བོད་མིའི་སྲིད་སྤྱི་གཉིས་ཀྱི་འོས་བསྡུ་ཆེན་མོའི་ནང་འཛམ་གླིང་རྒྱལ་ཁབ་ ༢༦ ནས་མི་གྲངས་ ༨༣༠༨༠ གིས་མིང་གཞུང་དེབ་འགོད་གནང་ཡོད་པ་དང་སྲིད་སྐྱོང་གི་དངོས་གཞིའི་འོས་འཕེན་མཁན་མི་གྲངས་ ༦༣༩༩༡ བྱུང་ཡོད་འདུག
དེ་རིང་ཕྱི་ཚེས་ ༡༤ ཉིན་གྱི་སྔ་དྲོའི་ཆུ་ཚོད་ ༡༠ ཐོག ཕྱི་དྲིལ་ལྷག་པ་ཚེ་རིང་ཚོགས་ཁང་དུ། དབུས་འོས་བསྡུ་ལས་ཁང་གིས་དྲ་ལམ་བརྒྱུད་ཕྱི་ལོ་ ༢༠༢༡ ལོའི་འོས་བསྡུ་ཆེན་མོའི་དངོས་གཞིའི་གྲུབ་འབྲས་གསལ་བསྒྲགས་གནང་ཡོད་པ་དང་། བོད་མི་མང་སྤྱི་འཐུས་ཚོགས་ཟུར་སྤེན་པ་ཚེ་རིང་ལགས་ལ་རྒྱལ་ཁ་ཐོབ་ཡོད་པ་ལྟར། སྲིད་སྐྱོང་གི་དངོས་གཞིའི་འོས་མི་དབུ་དཀར་ཚང་སྐལ་བཟང་རྡོ་རྗེ་ལགས་ནས་སྐུ་སྒེར་གྱི་ངོ་དེབ་དྲ་གནས་སུ། སྤེན་པ་ཚེ་རིང་ལགས་ལ་འཚམས་འདྲི་དང་སྦྲགས། ད་ལྟའི་དཀའ་རྙོག་དང་འགྱུར་འགྲོས་ཆེ་བའི་དུས་སྐབས་འདི་རུ་སྤེན་པ་ཚེ་རིང་ལགས་ཀྱི་ལས་དོན་ལེགས་འགྲུབ་ཡོང་བ་དང་སྐུ་གཟུགས་བདེ་ཐང་དང་བྱ་བ་ལམ་འགྲོ། དཀའ་ཐུབ་ལྷུར་ལེན་གནང་ཐུབ་པའི་སྨོན་འདུན་གྲངས་མེད་ཞུ་ཞེས་གསུངས་འདུག
ཐེངས་འདིའི་འོས་བསྡུའི་ཁྲོད་སྲིད་སྐྱོང་འོས་མི་སྤེན་པ་ཚེ་རིང་ལགས་ལ་འོས་གྲངས་ ༣༤༣༢༤ དང་། སྲིད་སྐྱོང་འོས་མི་དབུ་དཀར་ཚང་སྐལ་བཟང་རྡོ་རྗེ་ལགས་ལ་འོས་གྲངས་ ༢༨༩༠༧ ཐོབ་སྟེ། ཚོགས་ཟུར་སྤེན་པ་ཚེ་རིང་ལགས་སྲིད་སྐྱོང་དུ་བདམས་ཐོན་བྱུང་འདུག་ལ། དེ་བཞིན་ཆོལ་ཁ་རེ་ནས་སྤྱི་འཐུས་ ༡༠ རེ་དང་ཆོས་བརྒྱུད་རེ་ནས་སྤྱི་འཐུས་གཉིས་རེ། ཡུ་རོབ་དང་ཨ་ཧྥེ་རི་ཁ་ཁུལ་ནས་སྤྱི་འཐུས་གཉིས། ལྷོ་བྱང་ཨ་རི་ཁུལ་ནས་སྤྱི་འཐུས་ ༢། རྒྱ་བལ་འབྲུག་གསུམ་ཕུད་པའི་ཨེ་ཤ་ཡ་དང་ཨོ་སི་ཊོ་ལི་ཡའི་ཁུལ་ནས་སྤྱི་འཐུས་གཅིག་བཅས་ཁྱོན་སྤྱི་འཐུས་ ༤༥ བདམས་ཐོན་བྱུང་འདུག
གསལ་བསྒྲགས་སྐབས་དབུས་འོས་བསྡུ་ལས་ཁང་གི་འགན་འཛིན་དཔེ་ཟུར་དབང་འདུས་ཚེ་རིང་ལགས་ཀྱིས། དངོས་གཞིའི་འོས་བསྡུ་ཆེན་མོར་འོས་འཕེན་པའི་མིང་གཞུང་དེབ་འགོད་བྱེད་མཁན་གྲངས་ ༨༣༠༨༠ བྱུང་ཡོད་པ་ནས་སྲིད་སྐྱོང་གི་དངོས་གཞིའི་འོས་བསྡུའི་སྐབས་དངོས་སུ་འོས་འཕེན་གྲངས་ ༦༣༩༩༡ བྱུང་བའི་ཁྲོད་འོས་ཤོག་ ༦༠༤ རྩིས་མེད་དུ་ཕྱིན་པ་དང་། ཆ་སྙོམས་འོས་འཕེན་པའི་བརྒྱ་ཆ་ ༧༢།༢ ཆགས་ཡོད་པ་དང་། དེ་ནི་འདས་པའི་སྔོན་འགྲོ་དང་དངོས་གཞིའི་འོས་བསྡུའི་ལས་རིམ་ཁག་གི་ནང་ཆ་ཤས་ལེན་མཁན་གྱི་གྲངས་མཐོ་ཤོས་དེ་ཆགས་ཡོད་པ་དང་། བོད་མི་མང་སྤྱི་འཐུས་ལ་འོས་འཕེན་མཁན་གྱི་གྲངས་དུས་ཡུན་ཐུང་ཐུང་ཞིག་གི་ནང་ཞུ་ཐུབ་ཐབས་མེད་ཀྱང་། ཕྱིས་སུ་དབུས་འོས་བསྡུའི་ལས་ཁང་གི་དྲ་ཐོག་བརྒྱུད་གསལ་བསྒྲགས་བྱ་རྒྱུ་ཡིན་སྐོར་བརྗོད་བྱུང་།
ཡང་འོས་བསྡུའི་འགན་འཛིན་ལགས་ཀྱིས། ཐེངས་འདིའི་འོས་བསྡུའི་སྐབས་རྒྱ་ནག་ཝུ་ཧན་ནས་མཆེད་པའི་ཏོག་དབྱིབས་གཉན་རིམས་འཛམ་གླིང་གང་སར་ཁྱབ་གདལ་དུ་ཕྱིན་ཏེ་མི་རྒྱུ་གཉིས་ཀྱི་དཀའ་ཚེགས་རིམ་པར་བྱུང་ཡོད་ནའང་། བོད་མི་ཚོས་སྙིང་སྟོབས་ཞུམ་པ་མེད་པར་འོས་བསྡུའི་ལས་རིམ་ནང་མཉམ་ཞུགས་བྱས་ཡོད་པ་དང་། ཁྱོན་འཛམ་གླིང་གི་རྒྱལ་ཁབ་ ༢༦ ནང་ས་གནས་འོས་བསྡུ་ལས་ཁང་གྲངས་ ༥༨ འོག་འོས་བསྡུ་བྱ་ཡུལ་སྡེ་ཚན་གྲངས་ ༣༠༦ ནང་། དབུས་སའི་འོས་བསྡུའི་ཚོགས་མི་དང་གཟུ་དཔང་། ལས་བྱེད་བཅས་ཁྱོན་མི་གྲངས་ ༢༠༡༤ ནས་ལས་བསྡུའི་ལས་དོན་འགན་འཁུར་གནང་སྟེ་འོས་བསྡུའི་ལས་དོན་གཟེངས་སུ་ཐོན་པ་ཞུས་ཡོད་སྐོར་དང་། འདི་ལོར་འོས་བསྡུའི་སྒྲིག་གཞི་དོན་ཚན་ ༡༨ དགོངས་དོན་བཞིན་འོས་འཕེན་པའི་མིང་གཞུང་གསར་པ་གློག་ཀླད་ནང་དེབ་འགོད་གཙང་ཟིན་ཞུས་ཐུབ་ཡོད་པ་དེ་ཡིས་མ་འོངས་པའི་འོས་བསྡུའི་ལས་དོན་གྱི་རྨང་གཞི་ཙམ་དུ་མ་ཟད། གཞུང་འབྲེལ་ཡིག་ཆ་གལ་ཆེན་ཞིག་ཏུ་བཟོ་འགོད་ཐུབ་ཡོད་སྐོར་བརྗོད་སོང་།
དྲི་བ་དྲིས་ལན་གྱི་སྐབས་སུ། གསར་འགོད་པས་ད་ལྟ་བདམས་ཐོན་སྲིད་སྐྱོང་དང་སྤྱི་འཐུས་རྣམས་ལ་དམ་འབུལ་བྱེད་ས་མེད་པའི་གནས་སྟངས་ཤིག་ཆགས་ཡོད་སྟབས། དེའི་ཐད་གནས་སྟངས་གང་འདྲ་ཞིག་ཆགས་ཀྱི་ཡོད་མེད་དང་། དབུས་འོས་བསྡུ་ལས་ཁང་གི་ལས་དོན་ཆ་ཚང་བདམས་ཐོན་སྲིད་སྐྱོང་དང་སྤྱི་འཐུས་ཀྱི་དམ་འབུལ་ཞུས་ཚར་མཚམས་གྲུབ་པ་ཡིན་པས། དབུས་འོས་བསྡུ་ལས་ཁང་ནས་དམ་འབུལ་དང་འབྲེལ་དགོངས་བཞེས་ག་རེ་གནང་གི་ཡོད་མེད་བཀའ་འདྲི་ཞུས་པར། དབུས་འོས་བསྡུའི་འགན་འཛིན་ལགས་ཀྱིས། སྲིད་སྐྱོང་དང་སྤྱི་འཐུས་ཀྱི་དམ་འབུལ་ནི་བཅའ་ཁྲིམས་དོན་ཚན་ ༢༥ དང་ ༤༧ གྱི་དགོངས་དོན་བཞིན་འབྲེལ་ཡོད་སོ་སོས་ཕྱག་བསྟར་གནང་དགོས་པ་ཞིག་ཆགས་ཡོད་པ་དང་། ༧གོང་ས་རྒྱལ་བ་རིན་པོ་ཆེ་མཆོག་ནས་ཡང་དག་པའི་དམངས་གཙོ་གསོལ་རས་གནང་ཡོད་སྟབས། དེའི་མཇུག་སྐྱོང་འབྲེལ་ཡོད་ལས་འཛིན་སོ་སོས་གནང་བའི་རེ་བ་ཡོད་སྐོར་དང་། དབུས་འོས་བསྡུ་ལས་ཁང་གི་ལས་འགན་དེ་བཅའ་ཁྲིམས་ལེའུ་ ༨ པའི་དོན་ཚན་ ༩༦ ནས་མགོ་བཙུགས་པ་ཞིག་ཡིན་པ་དང་། དེ་གཞིར་བཟུང་དབུས་ས་གཉིས་ཀྱི་ལས་མི་དང་མི་མང་ཚང་མས་ཆ་ཤས་ཡག་པོ་བཞེས་ཏེ་ལབ་གླེང་རྩ་བ་ཉིད་ནས་མེད་པའི་ཐོག་ནས་སྲིད་སྐྱོང་དང་སྤྱི་འཐུས་རྣམ་པ་ཧྲ་ཐག་ཐག་བདམས་ཐོན་ཞུས་ནས་གསལ་བསྒྲགས་བྱེད་ཀྱི་ཡོད་ཀྱང་། ད་ལྟ་སྔར་བྱུང་མ་མྱོང་བའི་གོད་ཆགས་ཆེན་པོ་ཞིག་བྱུང་ཡོད་པ་དང་དེ་ནི་དངོས་ཡོད་ཡིན་པས། དེའི་ཐད་དབུས་འོས་བསྡུ་ལས་ཁང་ནས་ཐད་ཀར་བྱེད་ཐུབ་པའི་གནས་སྟངས་ཤིག་ཞུ་རྒྱུ་རྩ་བ་ཉིད་ནས་མེད་པ་དང་། དམ་འབུལ་གྱི་གནས་སྟངས་དེ་འབྲེལ་ཡོད་སོ་སོར་སྐུ་དབང་ཕུལ་ཡོད་སྟབས། སྐུ་དབང་བཞིན་གནང་དགོས་ཡོད་པའི་གནས་སྟངས་ཤིག་ཆགས་ཡོད་སྐོར་བརྗོད་བྱུང་།
གསར་འགོད་པ་ལགས་སྤྱི་སྲོོལ་ལྟར་གསར་འགྱུར་ཐོག་བདམས་ཐོན་སྲིད་་སྐྱོང་གི་སྐུ་དཔར་འཇོག་མི་དགོས་པའི་རྒྱུ་མཚན་གང་ཡིན་ནམ?
གསསར་འགོད་པ་ལགས་སྤྱི་སྲོོལ་ལྟར་གསར་འགྱུར་ཐོག་བདམས་ཐོན་སྲིད་སྲིད་་སྐྱོང་གི་སྐུ་དཔར་འཇོག་མི་དགོས་པའི་རྒྱུ་མཚན་གང་ཡིན་ནམ?དོནགྲུབ