ཟླ་འདིའི་ཕྱི་ཚེས་ ༩ ཉིན་བོད་རྔ་བ་ཁུལ་ཟུང་ཆུ་རྫོང་གཙོ་ཚང་དགོན་གྲོང་རྡལ་གྱི་བོད་ལུགས་གསོ་རིག་སྨན་པ་ ༣ དང་སྤྱི་གཉེར་བ་ ༢། ཁྲིམས་ལུགས་ངོ་ཚབ་པ་ ༡ བཅས་ཀྱིས་བོད་སྨན་གྱིས་ཡུལ་སྐོར་བར་མགོ་སྐོར་བཏང་ཡོད་པའི་ཉེས་འཛུགས་འོག་འཛིན་བཟུང་བྱས་ཏེ་འདྲི་རྩད་བྱེད་བཞིན་ཡོད་འདུག
ཁ་སང་རྒྱ་ནག་གི་གཞུང་འབྲེལ་དྲ་ལམ་དུ་གནས་སྤེལ་བ་ལྟར་ན། ཉེ་སྔོན་ས་གནས་ཀྱི་ཡུལ་སྐོར་བ་མི་ཉུང་བ་ཞིག་གིས་ཉེན་རྟོག་པར་ཁ་པར་བརྒྱུད་ཞུ་གཏུག་བྱས་པ་ལྟར། ཟླ་འདིའི་ཕྱི་ཚེས་ ༩ ཉིན་གྱི་སྔ་དྲོར། ཟུང་ཆུ་རྫོང་གི་ཉེན་རྟོག་པ་ ༦༠ ཡིས་ཟུང་ཆུ་རྫོང་གཙོ་ཚང་དགོན་གྲོང་རྡལ་གྱི་བོད་ལུགས་གསོ་རིག་གི་ཡུལ་སྐོར་ཉོ་སྒྲུབ་ཚོང་ར་(ཧེང་ཐའེ་སྨན་རྫས་ཁང་)ཞེས་པ་དེར་འདྲི་རྩད་བཀག་སྡོམ་བྱས་ཡོད་པ་མ་ཟད། སྨན་རྫས་ཁང་དེའི་བོད་ལུགས་གསོ་རིག་གི་སྨན་པ་ ༣ དང་། ཞབས་ཞུའི་མི་སྣ་ ༢༧ འཛིན་བཟུང་བྱས་པ་དང་། ལག་ཐོགས་ཁ་པར་ ༣༡ དང་དངུལ་ལེན་འཕྲུལ་ཆས། གློག་ཀླད། འཛིན་ཤོག་སོགས་བཀག་སྡོམ་བྱས་ཡོད་འདུག ད་ལྟའི་ཆར་སྨན་པ་ ༣ དང་སྤྱི་གཉེར་བ་གཉིས། ཁྲིམས་་ལུགས་ངོ་ཚབ་པ་གཅིག་བཅས་མུ་མཐུད་བཀག་ཉར་བྱས་ཏེ་འདྲི་རྩད་བྱེད་བཞིན་ཡོད་འདུག
གཞུང་ཕྱོགས་ཀྱི་གནས་ཚུལ་ནང་། ཞུ་གཏུག་བྱེད་མཁན་ཡུལ་སྐོར་བ་ཚོས་ས་གནས་ཀྱི་སྨན་རྫས་ཚོང་ཁང་སྐོར་ཞིག་གིས་བོད་སྨན་རིན་གོང་མཐོན་པོ་བྱས་ནས་བཙོང་གི་ཡོད་ཀྱང་། སྨན་ལ་དེ་བཞིན་གྱི་རིན་ཐང་མེད་པའི་ཚོར་སྣང་བྱུང་སྐོར་བཤད་ཡོད་པ་དང་། ཉེན་རྟོག་པས་འདྲི་རྩད་སོགས་བྱས་རྗེས་དོགས་གཞི་ཅན་གྱི་སྨན་པ་གསུམ་ལ་སྨན་པའི་ལག་ཁྱེར་མེད་པ་མ་ཟད་ཉམས་མྱོང་ཡང་མེད་སྐོར་དང་། ཁོང་ཚོ་གསུམ་གྱིས་ཡུལ་སྐོར་བར་ནད་གཞི་བརྟག་དཔྱད་བྱེད་ཁུལ་གྱིས་ཡུལ་སྐོར་བའི་ཉོ་སྒྲུབ་ནུས་པ་མི་འདྲ་བར་གཞིགས་ནས། རིན་གོང་མི་འདྲ་བ་དང་བཅོས་ཡུན་མི་འདྲ་བའི་སྨན་ཤོག་སྤྲོད་ཀྱི་ཡོད་ཚུལ་དང་། ཡུལ་སྐོར་བས་སྨན་གྱི་གྲུབ་ཆ་ཤེས་སུ་མི་འཇུག་པའི་ཆེད། རྒྱ་སྨན་གྱི་རིགས་མང་པོ་བླངས་རྗེས། མགྱོགས་མྱུར་ངང་མཉམ་བསྲེས་བྱས་ནས་ཕྱེ་མར་བཟོས་རྗེས་ཡུལ་སྐོར་བར་སྤྲོད་ཀྱི་ཡོད་ཚུལ་དང་། དེ་ལྟར་བྱས་པའི་དམིགས་ཡུལ་ནི་ཡུལ་སྐོར་བས་རྒྱ་སྨན་གྱི་གྲུབ་ཆ་ཤེས་ཐབས་བྲལ་བ་དང་ཕྱིར་སློག་བྱ་རུ་མི་འཇུག་པའི་ཆེད་དུ་ཡིན་སྐོར་སོགས་དང་། བོད་ལུགས་གསོ་རིག་གི་སྨན་རྫས་ཚོང་ཁང་དེས་འདི་ལོའི་ཕྱི་ཟླ་ ༣ ནས་ལས་དོན་གཉེར་ཏེ་ད་བར་དུ་རྒྱ་སྒོར་ཁྲི་ ༡༠༠ ལྷག་ཙམ་ཟིན་གྱི་ཡོད་ལུགས་བརྗོད་འདུག 
གསར་འགོད་པ། པ་སངས་ཚེ་རིང་།
མདོ་ལས།
གང་སེམས་སྨན་པ་དེ་སྨན་པ།།
ལུས་ཀྱི་སྨན་པ་སྨན་པ་མིན།།
ཡིད་འཆོས་པ་ནི་ཤེས་པ་དཀའ།།