ཁ་སང་ཕྱི་ཚེས་ ༡༨ ཉིན་རྒྱ་ནག་གི་གཞུང་འབྲེལ་ཤིན་ཧྭ་གསར་ཁང་སོགས་ཀྱི་གནས་ཚུལ་ལྟར་ན། བོད་ཧིན་ས་མཚམས་སུ་འཁེལ་བའི་བོད་ཀྱི་མེ་ཏོག་རྫོང་ཁོངས་ཀྱི་ཡར་ཀློང་གཙང་པོའི་བརྒྱུད་ཁུལ་དུ་རྒྱ་ནག་གཞུང་གིས་རིང་ཚད་ལ་སྤྱི་ལེ་ ༦༧ ལྷག་ཡོད་པའི་མྱུར་ལམ་གསར་པ་ཞིག་འཛུགས་བསྐྲུན་གྲུབ་ཡོད་འདུག
རྒྱ་ནག་གཞུང་གིས་མྱུར་ལམ་དེ་འཛུགས་བསྐྲུན་སྐབས་སྐྱེ་ཁམས་ཁོར་ཡུག་སྲུང་སྐྱོབ་གལ་གནད་དུ་བཟུང་སྟེ། ཐོག་མའི་ལས་གཞི་ཡི་འཆར་གཞི་ལྟར་ན་འཛུགས་བསྐྲུན་སྐབས་སྐྱེ་ཁམས་སྲུང་སྐྱོབ་ཁོ་ནའི་ཆེད་འགྲོ་གྲོན་རྒྱ་སྒོར་ས་ཡ་ ༧༥ ཙམ་གཏང་རྒྱུའི་ཚད་ཐིག་བཟུང་ཡོད་ནའང་། དངོས་སུ་འཛུགས་བསྐྲུན་བྱེད་སྐབས་ཚད་གཞི་ལས་བརྒལ་ཏེ་རྒྱ་སྒོར་ས་ཡ་ ༣༠ ཙམ་སྐྱེ་ཁམས་སྲུང་སྐྱོབ་ཆེད་བཏང་ཡོད་པ་དང་། ཁྱོན་སྐྱེ་ཁམས་དང་ཆུ་བོ་སྲུང་སྐྱོབ་ཆེད་རྒྱ་སྒོར་ས་ཡ་ ༡༡༠ ཙམ་ཞིག་འགྲོ་གྲོན་བཏང་ཡོད་པ་དང་། མྱུར་ལམ་དེ་ནི་རྐང་ལམ་ཞིག་ལ་གཞི་བཅོལ་དེ་འཛུགས་བསྐྲུན་བྱས་ཡོད་པ་དང་། མྱུར་ལམ་དེའི་ས་བབ་མཐོ་ཤོས་དང་དམའ་ཤོས་གཉིས་ཀྱི་བར་རྨི་ཊུར་ ༢༨༩༢ ཀྱི་ཁྱད་པར་ཡོད་སྐོར་སོགས་བཀོད་འདུག
འདི་གའི་གསར་འགོད་པས་བོད་ཀྱི་སྲིད་བྱུས་ཉམས་ཞུབ་ཁང་གི་ཁོར་ཡུག་ཚན་པའི་ཉམས་ཞིབ་པ་ཛམ་ལྷ་བསྟན་པ་རྒྱལ་མཚན་ལགས་སུ་དེའི་སྐོར་བཀའ་འདྲི་ཞུ་སྐབས་ཁོང་གིས། རྒྱ་ནག་གཞུང་གིས་བོད་ཁུལ་དུ་འཛུགས་བསྐྲུན་གྱི་ལས་གཞི་རྒྱ་ཆེན་སྤེལ་གྱི་ཡོད་པ་དང་། ལྷག་པར་དུ་བོད་ཁྱོན་ཡོངས་ནས་ཆེས་ཐོན་ཁུངས་འཛོམས་ས་དང་གནམ་གཤིས་བཟང་ས། སའི་གནས་བབ་ཕུན་སུམ་ཚོགས་པ་ཡོད་པའི་ཀོང་པོ་ཉིང་ཁྲི་ས་ཁུལ་དེ་བཞིན་ཉེ་བའི་ལོ་ངོ་བཅུ་ཕྲག་འགའ་ནས་བཟུང་གལ་ཆེན་ཏུ་བརྩིས་ཏེ་ལྕགས་ལམ་འཛུགས་བསྐྲུན་དང་གཞུང་ལམ་རྒྱ་བསྐྱེད། ཡུལ་སྐོར་སྤྲོ་འཆམ་ས་ཚིགས་གསར་བཟོ་དང་ཉིང་ཁྲི་གྲོང་ཁྱེར་དུ་བསྒྱུར་བ། དེ་བཞིན་ཆུ་མཛོད་གསར་འཛུགས་སོགས་ཀྱི་འཛུགས་བསྐྲུན་ཧ་ཅང་རྒྱ་ཆེན་བྱེད་ཀྱི་ཡོད་སྟབས། ས་ཁུལ་དེར་གནས་པའི་རྩ་ཆེན་གྱི་རི་དྭགས་དང་གཅན་གཟན་མང་པོ་ཞིག་ས་གནས་སུ་སྡོད་མི་ཐུབ་པ་དང་རྩ་མེད་འགྲོ་བ། རྒྱ་ནག་གཞུང་གིས་འཛུགས་སྐྲུན་གྱི་ལས་གཞི་གང་འདྲ་ཞིག་སྤེལ་བ་ཡིན་ནའང་། དེའི་མཉམ་དུ་རྒྱ་རིགས་འབོར་ཆེན་གནས་སྤོ་བྱས་ཏེ་ས་གནས་བོད་མི་རྣམས་ཀྱི་འཚོ་བའི་རྟེན་གཞི་འཕྲོག་འགྲོ་བ་མ་ཟད། བོད་མི་གྲངས་ཉུང་དུ་བསྒྱུར་འགྲོ་བ། མྱུར་ལམ་དེ་དག་ལ་བརྟེན་ནས་རྒྱ་རིགས་འབོར་ཆེན་ས་གནས་སུ་གནས་སྤོ་བྱེད་ཐུབ་པ་དང་། ཞིང་ལས་དང་གཏེར་ཁ་སྔོག་འདོན་གྱི་ལས་གཞི་རྒྱ་ཆེར་སྤེལ་རྒྱུ་ཡིན་པ་བརྗོད་མ་དགོས་པ་ཞིག་ཡིན་སྟབས། མྱུར་ལམ་འཛུགས་བསྐྲུན་དེ་ནི་ས་གནས་ཀྱི་ཁོར་ཡུག་དང་བོད་མིའི་རིག་གཞུང་སོགས་ལ་དོ་ཕོག་ཆེན་པོ་འགྲོ་གཞིར་འགྱུར་འགྲོ་བ་ཞིག་ཡིན་སྐོར་འགྲེལ་བརྗོད་གནང་བྱུང་།
ཕྱི་ལོ་ ༢༠༡༤ ལོ་ནས་རྒྱ་ནག་གི་ (China Huaneng Group) གྱིས་མྱུར་ལམ་གྱི་ལས་གཞི་མགོ་འཛུགས་བྱས་ཏེ། ལོ་ངོ་བདུན་ཙམ་གྱི་རིང་རྒྱ་སྒོར་དུང་ཕྱུར་ ༢༠ ཙམ་གྱི་འགྲོ་སོང་འོག་ཉིང་ཁྲི་གྲོང་ཁྱེར་ནས་པད་མ་རྫོང་གཉིས་མྱུར་ལམ་དེས་མཐུད་ཡོད་འདུག སྔོན་ཆད་ཉིང་ཁྲི་གྲོང་ཁྱེར་ནས་མེ་ཏོག་རྫོང་ལ་འགྲོ་བར་སྤོ་མེས་རྫོང་བརྒྱུད་ཁྱོན་སྤྱི་ལེ་ ༣༤༦ ཙམ་ལ་འགྲུལ་བཞུད་བྱ་དགོས་ནའང་། རིང་ཚད་ལ་སྤྱི་ལེ་ ༦༧།༢ ཡོད་པའི་ད་ལྟའི་མྱུར་ལམ་གསར་པ་དེ་འཛུགས་བསྐྲུན་བྱས་པ་ལ་བརྟེན་ནས་ཉིང་ཁྲི་གྲོང་ཁྱེར་དང་མེ་ཏོག་རྫོང་གཉིས་ཀྱི་བར་ལ་སྤྱི་ལེ་ ༡༨༠ ཙམ་ཉུང་འཕྲི་བྱས་ཡོད་འདུག
རྒྱ་ནག་གཞུང་གིས་མཐའ་མཚམས་ཁུལ་ཡར་རྒྱས་གཏོང་བ་དང་སྲུང་སྐྱོབ་བྱེད་པ་སོགས་ལ་ཁ་གཡར་ནས་བོད་ཧིན་ས་མཚམས་སུ་མྱུར་ལམ་དང་གྲོང་སྡེ་གསར་བསྐྲུན་སོགས་འཛུགས་བསྐྲུན་གྱི་ལས་གཞི་རྒྱ་ཆེན་སྤེལ་ཏེ། ས་མཚམས་ཁ་གསལ་མེད་པའི་ཁུལ་དུ་མཐའ་དམག་འགྲེམས་འཇོག་ཤུགས་ཆེར་བྱེད་ཀྱི་ཡོད་ནའང་། འདས་ལོར་བོད་ཧིན་ས་མཚམས་ཀྱི་ལ་དྭགས་ཁུལ་དུ་རྒྱ་གར་གཞུང་གིས་མྱུར་ལམ་ཞིག་འཛུགས་བསྐྲུན་བྱེད་བཞིན་པར་རྒྱ་ནག་གཞུང་གིས་ངོ་རྒོལ་བྱས་ཏེ། བོད་ཧིན་ས་མཚམས་སུ་རྒྱ་དཀར་ནག་གཉིས་ཀྱི་མཐའ་མཚམས་དམག་གི་དབར་འདས་པའི་ལོ་ངོ་ ༤༠ ཙམ་གྱི་བྱུང་མྱོང་མེད་པའི་གདོང་ཐུག་བྱུང་སྟེ་རྒྱ་གར་ཕྱོགས་ནས་དམག་མི་ ༢༠ ཙམ་དང་རྒྱ་ནག་གི་དམག་མི་ ༥ རྐྱེན་འདས་སུ་ཕྱིན་ཡོད་ཕྱོགས་སོ་སོས་བསྒྲགས་ཡོད་པ་རེད།
