ཉེ་སྔོན་རྒྱ་ནག་ཁྲུང་ཆིང་གྲོང་ཁྱེར་དུ་བསྡུས་པའི་ ༢༠༢༡ ལོའི་རྒྱ་ནག་རྒྱལ་ཡོངས་ཀྱི་མཆོང་རྒྱུག་འཕེན་གསུམ་གྱི་འགྲན་བསྡུར་གྱི་སྟེང་བོད་རིགས་ཨོ་རྩལ་རྒྱང་རྒྱུག་པ་སྟོབས་རྒྱལ་ལགས་ཀྱིས་རྒྱང་ཐག་སྨི་ ༥༠༠༠ ཡི་སྐྱེས་པའི་རྒྱང་རྒྱུག་ནང་སྐར་མ་ ༡༤ དང་སྐར་ཆ་ ༠༣ ལྷག་གི་ཐོག་ནས་ཨང་དང་པོའི་རྒྱལ་ཁ་བླངས་ཡོད་འདུག
Tibetan Olympic Athlete Topgyal. Image@xinhua
ཁ་སང་རྒྱ་ནག་གི་གཞུང་འབྲེལ་མི་དམངས་དྲ་བས་གནས་ཚུལ་སྤེལ་བ་ལྟར་ན། བོད་ཀྱི་རྒྱལ་ས་ལྷ་ས་ནས་ཡིན་ཞིང་ད་ལྟ་རང་ལོ་ ༢༧ ཡིན་པའི་བོད་མི་རྒྱང་རྒྱུག་པ་སྟོབས་རྒྱལ་ལགས་ཀྱིས་འདས་པའི་ལོ་འགའ་ཤས་ནང་རྒྱ་ནག་རྒྱལ་ཡོངས་དང་། རྒྱལ་སྤྱིའི་ཨོ་ལིམ་པིག་རྩེད་འགྲན་སོགས་པའི་མིང་གྲགས་ཆེ་བའི་འགྲན་བསྡུར་ནང་ཞུགས་ཏེ་གསེར་ཟང་རྟགས་མ་མི་ཉུང་བ་ཞིག་ཐོབ་ཡོད་པ་རེད། དེ་ཡང་ཕྱི་ལོ་ ༢༠༡༦ ལོར་ལྷོ་ཨ་མེ་རི་ཁའི་རྒྱལ་ཁབ་བྷར་རྫིལ་དུ་ཚོགས་པའི་ཨོ་ལིམ་པིག་རྩེད་འགྲན་ནང་སྟོབས་རྒྱལ་ལགས་རྒྱ་ནག་གི་རྩེད་འགྲན་པའི་མིང་ཐོག་ནས་སྨི་ ༥༠༠༠ ཅན་གྱི་སྐྱེས་པའི་རྒྱང་རྒྱུག་ནང་ཞུགས་ཏེ་ཨང་ ༩༡ པ་དེ་ཆགས་ཡོད་པ་རེད།
བོད་རིགས་རྒྱང་རྒྱུག་པ་སྟོབས་རྒྱལ་ལགས་ནི། ༡༩༩༤ ལོའི་ཟླ་ ༢ པའི་ཚེས་ ༡༦ ཉིན་ལྷ་ས་སྟག་རྩེ་རྫོང་དར་རྒྱས་ཤིང་དུ་སྐྱེས་ཤིང་། ༢༠༠༩ ལོ་ནས་བོད་རང་སྐྱོང་ལྗོངས་ལུས་རྩལ་སློབ་གྲྭའི་རྒྱུག་ཤར་སྦྱོང་བརྡར་ནང་ཞུགས་ཏེ་ ༢༠༡༡ ལོར་རྒྱལ་ཡོངས་གཞོན་ནུ་ལོ་ཆུང་གི་རྒྱུག་ཤར་འགྲན་བསྡུར་ཁྲོད་གྲུབ་འབྲས་ཆེན་པོ་བླངས། ཕྱི་ལོ་ ༢༠༡༢ ལོར་ལོན་ཊོན་དུ་ཚོགས་པའི་ཨོ་རྩལ་འགྲན་ཚོགས་དང་། ཕྱི་ལོ་ ༢༠༡༦ ལོར་ལྷོ་ཨ་མི་རི་ཁའི་བྷར་རྫིལ་(Brazil)རྒྱལ་ཁབ་ཏུ་ཚོགས་པའི་རྒྱལ་སྤྱིའི་ཨོ་རྩལ་འགྲན་ཚོགས་སྟེང་མཉམ་ཞུགས་གནང་ཡོད་པ་སོགས་ད་བར་དུ་རྒྱ་ནག་ནང་ལོགས་དང་རྒྱལ་སྤྱིའི་རང་བཞིན་གྱི་འགྲན་བསྡུར་ཁྲོད་གསེར་དངུལ་གྱི་རྟགས་མ་ ༢༠ ལྷག་ཐོབ་ཡོད་འདུག
Tibetan Athletes (Public domain)
འདས་པའི་ལོ་ཤས་ནང་བོད་རིགས་ལུས་རྩལ་པ་ཁག་ཅིག་རྩེད་འགྲན་སྣ་མང་ནང་ཞུགས་ཏེ་སྙན་གྲགས་རྒྱས་བཞིན་ཡོད་པ་ལྟར། ཕྱི་ལོ་ ༢༠༡༢ ལོའི་ལོན་ཊོན་ཨོ་རྩལ་འགྲན་ཚོགས་ཐོག་བོད་མཚོ་སྔོན་ནས་ཡིན་པའི་འདུར་རྒྱུག་པ་ཆོས་དབྱངས་སྐྱིད་ལགས་དང་ལྷ་ས་སྟག་རྩེ་རྫོང་ནས་ཡིན་པའི་སྟོབས་རྒྱལ་ལགས་གཉིས་མཉམ་ཞུགས་གནང་སྟེ། ཆོས་དབྱིངས་སྐྱིད་ལགས་སུ་དངུལ་གྱི་རྟགས་མ་ཐོབ་ཡོད་པ་དང་། དེ་བཞིན་བོད་རིགས་བཀྲ་ཤིས་དབྱངས་འབུམ་ལགས་དང་། ཀླུ་མོ་མཚོ། ཆོས་སྐྱིད་སྒྲོལ་མ། ཉིག་སྒྲོལ་མ་དབྱངས་སྐྱིད། ཤེས་རབ་མཚོ་སོགས་རྒྱ་ནག་རྒྱལ་ཡོངས་དང་རྒྱལ་སྤྱིའི་རང་བཞིན་གྱི་རྩེད་འགྲན་མང་པོའི་ནང་མཉམ་ཞུགས་བྱས་ཏེ་གཟེངས་རྟགས་ཐོབ་ཡོད་པ་རེད།
གསར་འགོད་པ། པ་སངས་ཚེ་རིང་།
