གཞུང་འབྲེལ་མ་ཡིན་པའི་ཚོགས་པ་ཁག་ནས་དམར་ཤོག་ཚོགས་པའི་དུས་སྟོན་ལ་ངོ་རྒོལ།

དེ་རིང་རྒྱ་ནག་དམར་ཤོག་ཚོགས་པ་བཙུགས་ནས་ལོ་ངོ་ ༡༠༠ འཁོར་བའི་ཉིན་མོ་དང་བསྟུན་བཙན་བྱོལ་ནང་དུ་ཡོད་པའི་བོད་ཀྱི་གཞུང་འབྲེལ་མ་ཡིན་པའི་ཚོགས་པ་ཁག་གིས་ས་གནས་ཁག་གི་རྒྱ་ནག་གཞུང་ཚབ་མདུན་དུ་ངོ་རྒོལ་སྐད་འབོད་དང་མཚོན་དོན་རང་བཞིན་གྱི་འཁྲབ་སྟོན་ལས་འགུལ་སོགས་རྣམ་པ་འདྲ་མིན་གྱི་ཐོག་ནས་ལས་འགུལ་སྤེལ་བཞིན་འདུག

Students for a Free tibet Protests on the 100th Anniversary of CPC 1st July 2021 at Mcleodganj. (Tibet Times)

དེ་རིང་སྔ་དྲོ་ཆུ་ཚོད་ ༡༡ ཙམ་ལ་བཞུགས་སྒར་དུ་རྟེན་གཞི་བྱས་པའི་བོད་རང་བཙན་སློབ་ཕྲུག་ཚོགས་པའི་རྒྱ་གར་ཚན་པ་ངོས་ནས། རྒྱ་ནག་གི་སྲིད་འཛིན་ཞི་ཅིང་ཕིན་གྱི་གདོང་འབག་གྱོན་པའི་མི་ཞིག་དམར་པོ་ཁྲག་གིས་ཁེངས་པའི་ཁྲུས་གཞོང་ཞིག་ནང་ཞུགས་པའི་འཁྲབ་སྟོན་རང་བཞིན་གྱི་ལས་འགུལ་ཞིག་སྤེལ་སོང་བ་དང་། ལས་འགུལ་དེར་གཉའ་གནོན་དང་མནར་གཅོད་ཀྱི་དུས་རབས་ཤིག་ཅེས་མིང་བཏགས་ཡོད་འདུག ལས་འགུལ་དང་འབྲེལ་ནས་བོད་རང་བཙན་སློབ་ཕྲུག་ཚོགས་པའི་འགན་འཛིན་རིག་འཛིན་ཆོས་སྒྲོན་ལགས་ཀྱིས། རྒྱ་ནག་དམར་ཤོག་གཞུང་གིས་འདས་པའི་ལོ་ ༡༠༠ ནང་བོད་གཙོས་པའི་རྒྱ་ནག་གི་མངའ་འོག་ཏུ་ཡོད་པའི་རྒྱལ་ཁབ་ནང་འགྲོ་བ་མིའི ཐོབ་ཐང་དང་རང་དབང་ཐོག་རྡོག་རོལ་ཚབས་ཆེན་བཏང་ཡོད་པ་དང་། ད་ལན་གྱི་ལས་འགུལ་འདིའི་བརྒྱུད་ནས་ལོ་ ༡༠༠ ཟིན་ཡོད་ནའང་བོད་མིའི་ཐོག་དྲག་གནོན་བྱས་པ་དེ་བརྗེད་ཐབས་མེད་པ་ཞིག་དང་། བོད་མིའི་ངོས་ནས་བོད་དོན་བདེན་མཐའ་མ་གསལ་བར་དུ་མུ་མཐུད་ནས་འཐབ་རྩོད་བྱ་རྒྱུ་ཡིན་སྐོར་སོགས་བརྗོད་སོང་ལ། ཡིག་ཐོག་བསྒྲགས་གཏམ་ཞིག་སྤེལ་བའི་ནང་། ཕྱི་ལོ་ ༢༠༢༢ ལོའི་དགུན་དུས་ཨོ་ལིམ་པིག་རྩེད་འགྲན་དེ་རྒྱ་ནག་ལ་འཚོག་རྒྱུ་བྱས་པ་དེ་ཨོ་རྩལ་གྱི་གཞི་རྩའི་རིན་ཐང་དང་འགལ་གྱི་ཡོད་པ་མ་ཟད། ད་ལྟ་རྒྱལ་སྤྱིའི་ཨོ་རྩལ་ལྷན་ཚོགས་ཀྱིས་ནོར་འཁྲུལ་བྱས་ཟིན་ནའང་། འཛམ་གླིང་གི་སྲིད་གཞུང་དང་རྩེད་འགྲན་པ་རྣམ་པས་རྒྱ་ནག་གི་དྲག་སྤྱོད་ལ་ཁ་གཏད་དུ་ལངས་ནས་པེ་ཅིང་གི་ཨོ་རྩལ་དེར་མཉམ་ཞུགས་མི་བྱ་རྒྱུའི་ཐག་གཅོད་བྱ་དགོས་སྐོར་གྱི་སྐུལ་འདེད་བྱས་ཡོད་འདུག

དེ་བཞིན་དེ་རིང་སྔ་དྲོ་དབུས་བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཙོ་ཚོགས་གཞོན་གཙོས་པའི་རྒྱུན་ལས་རྣམ་པ་དང་ལྡི་ལིའི་ས་གནས་བོད་ཀྱི་གཞོན་ལྷན་གྱི་ཚོགས་མི། དེ་བཞིན་བོད་རང་བཙན་འཐབ་རྩོད་པ་བསྟན་འཛིན་བརྩོན་འགྲུས་ལགས་ཀྱིས་གཙོས་དང་བླངས་བོད་མི་ཁག་གཅིག་གིས་རྒྱ་གར་གྱི་རྒྱལ་ས་ལྡི་ལིར་ཡོད་པའི་རྒྱ་ནག་གི་གཞུང་ཚབ་ཁང་མདུན་དུ། རྒྱ་ནག་དམར་ཤོག་ཚོགས་པ་མགོ་བཙུགས་ནས་ལོ་ ༡༠༠ འཁོར་བར་ངོ་རྒོལ་སྐད་འབོད་ལས་འགུལ་ཞིག་སྤེལ་ཡོད་འདུག་ཅིང་། དེ་རིང་དབུས་བོད་ཀྱི་གཞོན་ནུ་ལྷན་ཚོགས་ངོས་ནས་དེ་འབྲེལ་གྱི་བསྒྲགས་གཏམ་ཞིག་སྤེལ་བའི་ནང་། རྒྱ་ནག་དམར་ཤོག་ཚོགས་པ་འདི་ཉིད་ཐོག་མར་མི་ཉེས་མེད་གཉོམ་ཆུང་གྲངས་ལས་འདས་པའི་ཚེ་སྲོག་ལ་བརྟེན་ནས་གསར་འཛུགས་བྱས་པ་ཞིག་དང་། དམར་ཤོག་ཚོགས་པའི་འདས་ཟིན་པའི་ལོ་རྒྱུས་ནི་འགྲོ་བ་མིའི་ཐོབ་ཐང་རྡོག་རོལ་གྱིས་མཚོན་པའི་ཚབས་ཆེའི་གནད་དོན་གྱིས་ཁེངས་ཡོད་པ་ནི་བློ་འཚབ་རང་བཞིན་དུ་མཆིས། དམར་ཤོག་ཚོགས་པས་བོད་སར་བཙན་འཛུལ་བྱས་ཏེ་བོད་མི་ས་ཡ་གཅིག་ལྷག་དམར་གསོད་བཏང་བའི་དངོས་དོན་དེ་ང་ཚོའི་དྲན་ངོགས་ནས་བརྗེད་ཐབས་མེད་ལ། ང་ཚོས་འདས་པོ་ཁོང་རྣམ་པའི་མངོན་འདོད་འགྲུབ་ཆེད་རང་དབང་འཐབ་རྩོད་ཀྱི་ནུས་པ་སྔར་བས་མཐོར་འདེགས་བྱ་རྒྱུ་ཡིན། ཞེས་དང་། རྒྱ་ནག་དམར་ཤོག་ཚོགས་པ་འདི་ཉིད་བོད་ཀྱི་རིག་གཞུང་དང་ངོ་བོ་ཙམ་དུ་མ་ཟད། འཛམ་གླིང་ཁྱོན་ཡོངས་ཀྱི་བདེ་འཇགས་ལ་ཉེན་ཁ་ཆེན་པོ་ཡིན་པས། དམངས་གཙོའི་རྒྱལ་ཁབ་ཚང་མས་མཉམ་རུབ་ཀྱི་ཐོག་ནས་རྒྱ་ནག་དམར་ཤོག་ཚོགས་པའི་དྲག་སྤྱོད་ལ་རྒོལ་བརྡུང་བྱེད་པའི་སྟོབས་ཤུགས་བསྐྱེད་དགོས། ཞེས་བཀོད་འདུག

Tibetan Activities protest on the occasion of CCP’s centenary celebration in front of the Chinese Embassy in New Delhi. Image:Tibetan Youth Congress

གཞན་ཡང་། དབུས་བོད་ཀྱི་བུད་མེད་ལྷན་ཚོགས་ངོས་ནས་དེ་རིང་དགོང་མོ་བཞུགས་སྒར་དྷ་སའི་ཁྲོམ་གཞུང་དུ་མར་མེ་ཁྲོམ་སྐོར་གྱི་ལས་འགུལ་ཞིག་སྤེལ་གཏན་འཁེལ་ཡོད་ཅིང་། ཚོགས་པའི་རྒྱ་རྒོལ་བསྒྲགས་གཏམ་ནང་། དེ་རིང་དམར་ཤོག་གི་དབང་འགྱུར་(བསྒྱུར་)འོག་ལོ་བརྒྱ་འཁོར་བར་རྒྱ་དམར་གཞུང་གིས་བསུ་བ་ཞུ་ཡི་ཡོད་ཀྱང་། རང་དབང་དང་དྲང་བདེན་ལ་དགའ་བའི་རྒྱལ་སྤྱིའི་མི་མང་ཡོངས་ནས་རྒྱ་དམར་གྱི་སྡུག་རྩུབ་དང་མནར་གཅོད་ཀྱི་སྲིད་ཇུས་ལ་ཐ་(མཐའ་)གཅིག་ཏུ་ངོ་རྒོལ་བྱ་དགོས། ཞེས་དང་དང་། རྒྱ་ནག་གཞུང་གིས་ངོས་ནས་བོད་ཀྱི་ཆབ་སྲིད་བཙོན་པ་རྣམས་པ་གང་མྱུར་ཀློད་གྲོལ་དགོས་པ་དང་། ༧གོང་ས་མཆོག་གི་སྐུའི་ཡང་སྲིད་ཐད་ཐེ་བྱུས་བྱ་མི་ཆོག་པ། དེ་བཞིན་ཕྱི་ལོ་ ༢༠༢༢ ལོོའི་པེ་ཅིང་གི་དགུན་དུས་ཨོ་ལིམ་པིག་ལ་ངོ་རྒོལ་ཡོད་པ་སོགས་གནད་དོན་དྲུག་གི་སྟེང་ནས་རྒྱ་ནག་གཞུང་ལ་ངོ་རྒོལ་སྐྱོན་བརྗོད་བྱས་ཡོད་འདུག

Tibetan NGO’s Statement on Celebration of CPC Centenary

འདས་པའི་བདུན་ཕྲག་གཅིག་ནང་རྒྱ་ནག་གཞུང་གིས་བོད་དང་རྒྱ་ནག་གི་ས་ཁུལ་ཕལ་ཆེ་བའི་ནང་རྒྱ་ནག་དམར་ཤོག་ཚོགས་པ་མགོ་བཙུགས་ནས་ལོ་ ༡༠༠ འཁོར་བའི་དུས་དྲན་སྲུང་གཙིའི་མིང་ཐོག་ནས་ཆབ་སྲིད་དྲིལ་བསྒྲགས་ཀྱི་ལས་འགུལ་གཞི་རྒྱ་ཆེ་བ་ཞིག་སྤེལ་མུས་ཡིན་ཞིང་། དེ་རིང་རྒྱ་ནག་གི་རྒྱལ་ས་པེ་ཅིན་གྱི་གནམ་བདེ་སྒོ་མོ་ཆེ་ཐང་ཆེན་དུ་མཛད་སྒོ་གཞི་རྒྱ་ཆེ་བ་ཞིག་སྤེལ་བའི་ཐོག སྲིད་འཛིན་ཞི་ཅིང་ཕིན་གྱིས། རྒྱ་ནག་གིས་ད་བར་རྒྱལ་ཁབ་གཞན་གྱི་མི་རིགས་སུ་གང་ལའང་བརྙས་བཅོས་དང་། མནར་གཅོད། དབང་བསྒྱུར་བྱས་མྱོང་མེད་ཅེས་འཁྱོག་བཤད་བྱས་འདུག་པ་མ་ཟད། རྒྱ་ནག་དེ་སྤྱི་ཚོགས་རིང་ལུགས་ཁོ་ན་སྐྱོབ་ཐུབ་ལ། རྒྱ་ནག་དེ་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཁོ་ནས་ཡར་རྒྱས་གཏོང་ཐུབ་སྐོར་དང་། རྒྱ་ནག་ལ་བརྙས་བཅོས་དང་མནར་གཅོད་གཏོང་ཐབས་བྱེད་མཁན་སུ་འདྲ་ཞིག་ཡིན་རུང་ཁོང་ཚོའི་མགོ་བོ་ལྕགས་གྱང་ལ་བརྡུང་ངེས་ཡིན་སྐོར་གྱི་འཇིགས་སྐུལ་ཡང་བྱས་ཡོད་འདུག