ཧྥི་ལི་པིན་གྱི་དམག་སྤྱོད་གནམ་གྲུ་ཞིག་ལ་བརྡབ་སྐྱོན་བྱུང་།

ཧྥི་ལི་པིན་གྱི་དམག་སྤྱོད་གནམ་གྲུ་ཞིག་ལ་གློ་བུར་བརྡབ་སྐྱོན་བྱུང་སྟེ་དམག་མི་གཙོ་བོར་གྱུར་བའི་འགྲུལ་བ་ ༥༠ རྐྱེན་འདས་དང་མི་ ༥༣ ལ་རྨས་སྐྱོན་ཕོག་ཡོད་འདུག

དེ་རིང་བྷི་བྷི་སི་གསར་ཁང་གིས་གནས་ཚུལ་སྤེལ་བ་ལྟར་ན།  ལྷོ་ཤར་ཨེ་ཤ་ཡའི་རྒྱལ་ཁབ་ཧྥི་ལི་པིན་(Philippines)གྱི་གྲོང་ཁྱེར་མན་ཌ་ནའོ(Mindanao)ནས་གནམ་སྤྱོད་གནམ་གྲུ་(Lockheed C-130)ཨང་རྟགས་ཅན་ཞིག་མངའ་སྡེ་སུ་ལུ་(Sulu)རུ་འཕུར་སྐྱོད་བྱེད་སྐབས། ཇོ་ལོ་(Jolo)གླིང་ཕྲན་དུ་འབྱོར་ལ་ཉེ་སྐབས་གློ་བུར་དུ་བརྡབ་སྐྱོན་བྱུང་སྟེ། གནམ་གྲུ་དེའི་ནང་ཁྱོན་འགྲུལ་བ་ ༩༦ ཡོད་པའི་ཁྲོད་ནས་མི་གྲངས་ ༥༠ རྐྱེན་འདས་དང་། མི་ ༥༣ ལ་རྨས་སྐྱོན་ཕོག དམག་མི་ ༥ བོར་བརླག་ཏུ་ཕྱིན་ཡོད་འདུག་ལ། འགྲུལ་བ་ཕལ་ཆེར་བ་རྨང་གཞིའི་དམག་སྦྱོང་ཐོན་པའི་དམག་མི་རྐྱང་རྐྱང་ཡིན་པ་དང་། གནམ་གྲུ་སར་མ་ལྷུང་གོང་དུ་དམག་མི་འགའ་ཤས་ཤིག་གནམ་གྲུ་ནས་མཆོངས་ཡོད་འདུག

ཧྥི་ལི་པིན་གྱི་སྲིད་འཛིན་རོ་ཌིར་གྷོ་ཌུ་ཊིར་ཊི (Rodrigo Duterte)ཡིས། གནམ་གྲུ་བརྡབ་སྐྱོན་ཤོར་བར་བློ་ཕམ་ཆེན་པོ་ཡོད་པ་དང་མི་མང་ཚོའི་བདེ་འཇགས་ཀྱི་ཆེད་དུ་སྨོན་ལམ་འདེབས་ཀྱི་ཡིན། ཞེས་གསུངས་འདུག ཇོ་ལོ་གླིང་ཕྲན་གྱི་དམག་སྤྱི་ཨེ་ཌི་གྷུར་ཌི་ཨི་རི་ཝཱ་ལོ་(Major Gen Edgard Arevalo)ཞེས་པ་ཞིག་གིས། གནམ་གྲུ་བརྡབ་སྐྱོན་གང་འདྲ་ཕྱིན་ཡོད་མེད་ཀྱི་གནས་ཚུལ་ཞིབ་དཔྱོད་བྱེད་ཀྱི་ཡོད་པ་དང་གནམ་གྲུ་ལ་རྒོལ་རྡུང་ཕོག་པའི་རྟགས་མཚན་མེད་སྐོར་བརྗོད་ཡོད་འདུག

གཞན་ཡང་། སི་ཨན་ཨན་སོགས་ཀྱི་ནང་གནས་ཚུལ་ཐོན་པ་ལྟར་ན།  གནམ་གྲུ་བརྡབ་སྐྱོན་ཤོར་རྗེས་མྱུར་སྐྱོབ་སྡེ་ཚན་འཕྲལ་དུ་ས་གནས་སུ་ཕྱིན་ཏེ། མེ་བསད་པ་དང་གསོན་པོར་ལུས་པའི་འགྲུལ་བ་རྣམས་ཉེ་འཁོར་སྨན་ཁང་དུ་བསྐྱལ་ཡོད་འདུག དམག་མི་ ༤༩ དང་མི་དཀྱུས་མ་ ༤ ལ་རྨས་སྐྱོན་ཕོག་འདུག དེ་བཞིན་རྐྱེན་འདས་ཕྱིན་པའི་ཁྲོད་དམག་མི་ ༤༧ དང་། མི་དཀྱུས་མ་ ༣ ཡོད་འདུག

དམག་སྤྱོད་གནམ་གྲུ་ཨང་རྟགས་(C-130) ཅན་དེར་དོན་རྐྱེན་བྱུང་བ་ད་ལན་ཐེངས་དང་པོ་རེད་མི་འདུག ཕྱི་ལོ་ ༡༩༩༣ ལོར་ཡང་གནམ་སྤྱོད་གནམ་གྲུ་དེ་ཡུལ་དེའི་མངའ་སྡེ་མཱ་ནི་ལཱ་(Manila)རུ་གློ་བུར་བརྡབ་སྐྱོན་བྱུང་སྟེ་དམག་མི་ ༣༠ རྐྱེན་འདས་སུ་ཕྱིན་ཡོད་འདུག གཞན་ཡང་།  ཕྱི་ལོ་ ༢༠༠༠ ལོར་མང་སྤྱོད་གནམ་གྲུ་ཞིག་ལ་བརྡབ་སྐྱོན་བྱུང་སྟེ་མི་ ༡༣༡ རྐྱེན་འདས་སུ་ཕྱིན་ཡོད་པ་དང་། ཕྱི་ལོ་ ༢༠༠༨ ལོར་ཡང་ཡུལ་དེའི་དམག་སྤྱོད་གནམ་གྲུ་གཞན་ཞིག་ལ་བརྡབ་སྐྱོན་བྱུང་སྟེ་དམག་མི་ ༡༡ རྐྱེན་འདས་སུ་ཕྱིན་ཡོད་འདུག

གསར་འགོད་པ། བསྟན་འཛིན་ཕུར་བུ།