ཁ་སང་༧གོང་ས་རྒྱལ་བ་རིན་པོ་ཆེ་མཆོག་ནས་འཇར་མན་སྲིད་བློན་ཨན་ཇི་ལ་མཱེ་ཁེལ་མཆོག་དང་སྦེལ་ཇམ་སྲིད་བློན་ཨེ་ལག་ཟན་ཌིར་ཌི་ཁུ་རའོ་མཆོག་རྣམ་གཉིས་ཀྱི་མཚན་ཐོག་ཏུ་ཆུ་ལོག་གོད་ཆག་བྱུང་བར་ཐུགས་གསོ་དང་གདུང་སེམས་མཉམ་སྐྱེད་ཀྱི་གསུང་འཕྲིན་སྩལ་གནང་འདུག
འདས་པའི་ཉིན་ཤས་རིང་ཡུ་རོབ་ནུབ་ཁུལ་དུ་བསྟུད་མར་ཆར་པ་བབས་ཏེ། འཇར་མན་གྱི་མངའ་སྡེ་པཱ་ལཱ་ཊི་ནཱ་ཌི(Rhineland Palatinate)དང་སར་ལན་ཌི་(Saarland)གཉིས་དང་། སྦེལ་ཇམ་བཅས་ཀྱི་ནང་ཆུ་ལོག་གི་གནོད་དོན་བྱུང་སྟེ། ཁ་སང་ཕྱི་ཚེས་ ༡༨ ཉིན་བར་འཇར་མན་ནང་གཅིག་པུར་མི་གྲངས་ ༡༥༧ བཅས་ཁྱོན་མི་གྲངས་ ༡༨༨ བརྒལ་བ་རྐྱེན་འདས་སུ་ཕྱིན་པ་དང་། མི་གྲངས་ ༡༠༠༠ ཡས་མས་གར་སོང་ཆ་མེད་དུ་གྱུར་ཡོད་སྟབས། ཁ་སང་༧གོང་ས་རྒྱལ་བ་རིན་པོ་ཆེ་མཆོག་གིས། འཇར་མན་སྲིད་བློན་ཨན་ཇི་ལ་མཱེ་ཁེལ་(Chancellor Angela Merkel) མཆོག་དང་སྦེལ་ཇམ་སྲིད་བློན་ཨེ་ལག་ཟན་ཌིར་ཌི་ཁུ་རའོ་(Alexander De Croo)མཆོག་རྣམ་གཉིས་ཀྱི་མཚན་ཐོག་ཏུ་ཆུ་ལོག་གོད་ཆག་བྱུང་བར་ཐུགས་གསོ་དང་གདུང་སེམས་མཉམ་སྐྱེད་ཀྱི་གསུང་འཕྲིན་སྩལ་གནང་འདུག
༧གོང་ས་རྒྱལ་བ་རིན་པོ་ཆེ་མཆོག་གི་གསུང་འཕྲིན་ནང་། ཡུ་རོབ་ཀྱི་ནུབ་བརྒྱུད་སྤྱི་དང་ལྷག་པར་དུ་སྦེལ་ཇམ་དང་འཇར་མན་ནང་ཆུ་ལོག་གི་གནོད་སྐྱོན་ཚབས་ཆེན་ཐེབས་པར་ངོས་རང་བློ་ཕམ་བྱུང་། ཆུ་ལོག་གིས་མི་རྒྱུ་གཉིས་ལ་གཏོར་སྐྱོན་བཟོས་ཏེ་མི་མང་སྟོང་ཕྲག་མང་པོར་དཀའ་ངལ་འཕྲད་བཞིན་ཡོད་པ་ནི་ཧ་ཅང་སེམས་འཚབ་བྱེད་དགོས་པ་ཞིག་རེད། གནོད་འཚེ་ཐེབས་པའི་མི་མང་ལ་གཞུང་ངོས་ནས་གང་ཐུབ་ཅི་ཐུབ་ཀྱིས་རོགས་རམ་གནང་ཡོད་པ་ངོས་ནས་རྟོགས་ཐུབ་ཀྱི་འདུག ངོས་ནས་འབྱུང་བའི་གོད་ཆག་འདིའི་ཁྲོད་རྐྱེན་འདས་སུ་ཕྱིན་པ་དང་གནོད་སྐྱོན་ཐེབས་མཁན་ཡོངས་ལ་གདུང་སེམས་མཉམ་སྐྱེད་དང་ཐུགས་གསོ་ཞུ་ཡི་ཡོད། ཅེས་གསུངས་འདུག
