བོད་ཀྱི་རྒྱལ་ས་ལྷ་ས་ནས་ཉིང་ཁྲི་བར་གྱི་མྱུར་སྐྱོད་མེ་འཁོར་ཤར་གཏོང་བྱས་ཏེ་ཟླ་གཅིག་ཏག་ཏག་ཕྱིན་པའི་ནང་འགྲུལ་བ་ཁྲི་ ༡༠།༦ སྐྱེལ་འདྲེན་བྱས་ཡོད་ཅེས་རྒྱ་ནག་གཞུང་གིས་དྲིལ་བསྒྲགས་བྱས་འདུག་ལ་བོད་ཉིང་ཁྲི་ས་ཁུལ་དུ་དམག་དཔུང་རྒྱ་སྐྱེད་བཞིན་ཡོད་པའི་གནས་ཚུལ་ཡང་ཐོན་བཞིན་འདུག
ཀྲུང་གོའི་བོད་ལྗོངས་དྲ་བ་ཟེར་བ་དེའི་ནང་། མྱུར་སྐྱོད་མེ་འཁོར་དེས་ཉིན་རེར་ཆ་སྙོམས་མི་གྲངས་ ༣༥༠༠ རེ་སྐྱེལ་འདྲེན་བྱེད་ཀྱི་ཡོད་སྐོར་དང་། དེ་ནི་ཡུལ་སྐོར་སྤྲོ་འཆམ་པ་དང་། ཞོར་ལས་ལ་སྐྱོད་མཁན། སློབ་མ་བཅས་ལ་གཙོ་བོ་དམིགས་ནས་མི་མང་གི་འཚོ་བར་རོགས་རམ་བྱེད་ཀྱི་ཡོད་ཚུལ་དང་། ས་གནས་མི་མང་གི་འཚོ་བར་འགྲུལ་བཞུད་སྟབས་བདེ་དང་འཚོ་བ་ཡར་རྒྱས་གཏོང་བར་ཁེ་ཕན་ཆེ་ཚུལ་བསྒྲགས་འདུག
འདི་གའི་གསར་འགོད་པས་བོད་ཀྱི་སྲིད་ཇུས་ཉམས་ཞིབ་ཁང་གི་ཉམས་ཞིབ་པ་ཚེ་དབང་རྡོ་རྗེ་ལགས་སུ་ལྷ་ས་ནས་ཉིང་ཁྲི་བར་བཟོས་པའི་མེ་འཁོར་ལྕགས་ལམ་དེའི་དགོས་དམིགས་སོགས་ཀྱི་སྐོར་དྲིས་པར་ཁོང་གིས། རྒྱ་ནག་གཞུང་གིས་ལྷ་ས་ནས་ཉིང་ཁྲི་གཙོ་བོ་འགྱུར་བའི་ས་གནས་གཞན་ཁག་ལའང་མེ་འཁོར་ལྕགས་ལམ་བཟོ་སྐྲུན་བྱས་པ་དང་། ད་ལྟ་ལྷ་ས་ནས་སྐྱིད་རོང་ལའང་མེ་འཁོར་ལྕགས་ལམ་འཛུགས་རྒྱུའི་ལས་གཞི་ཞིག་འགྲོ་མུས་ཡིན་པ་དང་། བོད་ནང་དུ་རྒྱ་ནག་གཞུང་གིས་འཛུགས་སྐྲུན་གྱི་རྣམ་གྲངས་ཇེ་མང་དུ་བཏང་དོན་ནི། དབང་བསྒྱུར་དང་དོ་དམ་བྱེད་བདེ་བའི་ཆེད་དུ་རེད། ལྕགས་ལམ་དེ་བཙུགས་ནས་མི་མང་གི་འགྲོ་འདུག་སྟབས་བདེ་ཆགས་ཡོད་ཀྱང་། ཕུགས་རྒྱང་རིང་པོའི་ཐོག་ནས་བསམ་བློ་བཏང་ན་དེའི་རྒྱབ་ལྗོངས་ལ་ཐབས་ཇུས་རང་བཞིན་ཅན་དང་། དམག་དོན་རང་བཞིན་ཅན་གྱི་གནད་དོན་ཡོད་པ་རེད། རྒྱ་ནག་གཞུང་གིས་བོད་འདི་བརྟན་ལྷིངས་དགོས་ཟེར་ནས་མཐའ་མཚམས་ཁག་ལ་ལྟ་རྟོག་ནན་པོ་བྱེད་པ་དང་། ལྷག་པར་རྒྱ་གར་གྱི་ཨ་རུ་ཎ་ཅལ་མངའ་སྡེ་སོགས་རྒྱ་ནག་གི་ཆ་ཤས་ཡིན་པའི་འཁྱོག་བཤད་དེའི་རྫུན་རྐུབ་མི་བརྡོལ་ཆེད། མཐའ་མཚམས་ཁག་ལ་མེ་འཁོར་ལྕགས་ལམ་བེད་སྤྱད་ནས་མི་གྲངས་ཕོན་ཆེན་དབོར་འདྲེན་བྱེད་མུས་ཡིན་པ་རེད། ཅེས་བརྗོད་བྱུང་།
ཁོང་གིས་མུ་མཐུད། གཉིས་ནས་ད་ལྟ་རྒྱ་དཀར་ནག་གི་འབྲེལ་ལམ་ཧ་ཅང་སྡུག་པོ་ཆགས་ཡོད་དུས། གལ་ཏེ་རྒྱ་དཀར་ནག་གཉིས་ཀྱི་བར་ལ་དམག་འཁྲུག་བྱུང་ཚེ། མེ་འཁོར་ལྕགས་ལམ་དེ་ནི་རྒྱ་ནག་གི་དམག་མི་ཕོན་ཆེན་འགྲེམས་འཇོག་དང། གོ་མཚོན་དབོར་འདྲེན་ཆེད་དུ་ཡིན་པ་རེད། དེས་བོད་ནང་གི་ཁོར་ཡུག་ལ་དོ་ཕོག་དང་། རྒྱ་རིགས་མང་པོ་ཞིག་མཐའ་མཚམས་ཁག་ལ་དབོར་འདྲེན་བྱས་པ་དེས། རྒྱ་གར་གྱི་བདེ་སྲུང་དང་བརྟན་ལྷིངས་ལ་དོ་ཕོག་ཤུགས་ཆེན་འགྲོ་ཡི་ཡོད། ཅེས་བརྗོད་བྱུང་།
ལྷ་ས་ནས་ཉིང་ཁྲི་བར་གྱི་ལྕགས་ལམ་དེ་ཕྱི་ལོ་ ༢༠༡༤ ལོ་ནས་མགོ་འཛུགས་བྱས་ཤིང་། སྤྱིའི་ལམ་ཐག་ལ་སྤྱི་ལེ་ ༤༣༤ ཙམ་ཡོད་ཅིང་། བོད་ཉིང་ཁྲི་ནི་རྩོད་རྙོག་ཆེ་བའི་རྒྱ་གར་གྱི་ཨ་རུ་ཎ་ཅལ་མངའ་སྡེ་དང་ས་འབྲེལ་ཆགས་ཡོད་པ་དང་། ཉིན་ཤས་གོང་དུ་འབྲེལ་ཡོད་བོད་མི་ཞིག་གིས་འདི་གའི་གསར་འགོད་པར། རྒྱ་ནག་གཞུང་གིས་རྒྱ་དཀར་ནག་གི་མཐའ་མཚམས་ས་ཐིག་ (LAC ) ཁོངས་སུ་གཏོགས་པའི་བོད་ཀྱི་གྲོང་པའི་བྱིས་པ་དང་རྒན་འཁོགས་ཕུད། ཕོ་མོ་ཚང་མར་དམག་སྦྱོང་སྤྲད་ཡོད་པ་དང། བོད་ཀྱི་ས་མཚམས་ཁག་གི་ཁྱིམ་ཚང་རེ་རེའི་ཁྱིམ་མི་གཅིག་ངེས་པར་དུ་བཅིངས་གྲོལ་དམག་མིར་ཞུགས་བཅུག་སྟེ། ཨ་རུ་ཎ་ཅལ་དང་ལ་དྭགས་ཁུལ་གྱི་རྒྱ་དཀར་ནག་བར་རྩོད་རྙོག་ཅན་དུ་གྱུར་བའི་ས་མཚམས་སྲུང་སྐྱོབ་བྱ་དགོས་པའི་བཙན་བཀའ་བཏང་ཡོད་པ་དང་། བོད་དམག་རྣམས་ས་མཐོ་ས་དང་ས་རྒྱུས་ཡོད་སའི་རྒྱ་དཀར་ནག་གི་ས་ཐིག་ཁུལ་དུ་མངག་གཏོང་བཀོད་སྒྲིག་བྱེད་ཀྱི་ཡོད་སྐོར་བརྗོད་བྱུང་།
དཔལ་ལྡན།
