རྒྱུད་སྨད་གངས་ཅན་རིག་གནས་སློབ་གྲྭར་བོད་ཀྱི་མཐོ་རིམ་སློབ་མར་དམིགས་པའི་བོད་ཀྱི་སྐད་ཡིག་དང་ནང་དོན་རིག་པའི་ཟབ་ཁྲིད་སྐབས་བརྒྱུད་པ་དབུ་འཛུགས་ཀྱིས་བོད་པའི་སློབ་མ་ཉེར་བརྒྱད་ལ་ཟབ་ཁྲིད་སྤྲོད་རྒྱུ་ཡིན་པ་དང་སློབ་མ་ཁག་ཅིག་ནད་ཡམས་ཀྱི་དཀའ་ངལ་འོག་མཉམ་ཞུགས་གནང་ཐུབ་མེད་པ་རེད།
དེ་རིང་ནས་བོད་མིའི་སྒྲིག་འཛུགས་ཀྱི་ཆོས་རིག་ལས་ཁུངས་དང་རྒྱུད་སྨད་གངས་ཅན་རིག་གནས་སློབ་གྲྭ་གཉིས་ཀྱི་གོ་སྒྲིག་འོག རྒྱུད་སྨད་གངས་ཅན་རིག་གནས་སློབ་གྲྭ་རུ་བོད་ཀྱི་མཐོ་རིམ་སློབ་མ་ཚོར་ཆེད་དམིགས་ཀྱིས། བོད་ཀྱི་སྐད་ཡིག་དང་ནང་དོན་རིག་པའི་ཟབ་ཁྲིད་ཐེངས་བརྒྱད་པ་དེ་མགོ་བཙུགས་ཡོད་པ་དང་། ཐེངས་འདིའི་བོད་ཀྱི་སྐད་ཡིག་དང་ནང་དོན་རིག་པའི་ཟབ་ཁྲིད་ཁྲོད། རྒྱ་གར་གྱི་མཐོ་རིམ་སློབ་གྲྭ་འདྲ་མིན་ནས་སློབ་མཐར་ཕྱིན་པའི་བོད་རིགས་སློབ་མ་བུ་མོ་གྲངས་ ༡༧ དང་བུ་ ༡༡ བཅས་ཁྱོན་སློབ་གཉེར་བ་གྲངས་ ༢༨ ཀྱིས་མཉམ་ཞུགས་བྱས་ཡོད་པ་རེད།
འདི་གའི་གསར་འགོད་པས་ཞལ་པར་བརྒྱུད་རྒྱུད་སྨད་གངས་ཅན་རིག་གནས་སློབ་གྲྭའི་སློབ་སྤྱི་དང་སྐད་ཡིག་དགེ་རྒན་གཅིག་ལྕོག་གནང་མཁན་དགེ་བཤེས་ཡོན་ཏན་ལགས་སུ་དེའི་ཐད་བཀའ་འདྲི་ཞུས་སྐབས། ཟབ་ཁྲིད་དེ་ནི་བོད་ཀྱི་མཐོ་སློབ་སློབ་མ་ཚོར་བོད་ཀྱི་སྐད་ཡིག་གཙོས་ནང་དོན་རིག་གནས་སོགས་ལ་གོ་རྟོགས་སྤེལ་སླད་འཚོག་གི་ཡོད་པ་དང་། ད་ལོའི་ཟབ་ཁྲིད་དེར་ཐོག་མར་སློབ་གཉེར་བ་གྲངས ༤༤ ཡིས་སྙན་ཞུ་འབྱོར་ཡོད་ཀྱང་། རྒྱུད་སྨད་གངས་ཅན་རིག་གནས་སློབ་གྲྭ་གནས་ཡུལ་ས་གནས་སུ་ཏོག་དབྱིབས་རིམས་ནད་ཀྱི་དཀའ་ངལ་འཕྲད་པའི་རྐྱེན་གྱིས། འདི་ལོའི་ཟླ་བ་ ༧ ཚེས་ ༡ ཉིན་ནས་འཚོག་འཆར་ཡོད་པའི་ཟབ་ཁྲིད་དེ། ཟླ་བ་གཅིག་ལྷག་གི་རིང་ཕྱིར་འགྱངས་བྱས་སྟབས། མཐར་སློབ་མ་ཕོ་མོ་གྲངས་ ༢༨ ཀྱིས་མཉམ་ཞུགས་བྱས་ཡོད་སྐོར་དང་། སློབ་མ་རྣམས་ས་གནས་ཏོག་དབྱིབས་ཛ་དྲག་ཚོགས་ཆུང་གི་ལམ་སྟོན་དང་དགོན་པའི་མཐུན་སྦྱོར་འོག ས་གནས་སུ་ཉིན་གྲངས་བཅུ་བཞིའི་རིང་ཟུར་བཀག་ཏུ་བཞག་པས། ནད་ཡམས་ཀྱིས་གནོད་འཚེ་ཐེབས་མེད་སྐོར་སོགས་འགྲེལ་བརྗོད་གནང་བྱུང་།
ལོ་ལྟར་རྒྱུད་སྨད་གངས་ཅན་རིག་གནས་སློབ་གྲྭ་རུ་འཚོག་མུས་ཡིན་པའི་བོད་ཀྱི་སྐད་ཡིག་དང་ནང་དོན་རིག་པའི་ཟབ་ཁྲིད་དེར་བོད་ཀྱི་སྐད་ཡིག་དང་། མཚན་ཉིད། གཞུང་ཆེན་བཀའ་ཕོད་ལྔ་ངོ་སྤྲོད་བྱེད་ཀྱི་ཡོད་པ་དང་། དེ་བཞིན་ཆོས་རིག་ལས་ཁུངས་དང་དང་རྒྱུད་སྨད་དགོན་པའི་ངོས་ནས་སློབ་གཉེར་བ་རྣམས་ལ་འགྲིམ་འགྲུལ་ལམ་དངུལ་དང་། སྡོད་གནས། ཞལ་ལག ཟླ་བ་རེ་རེའི་ལག་དངུལ་བཅས་གནང་གི་ཡོད་པ་རེད་འདུག
ཡང་འདི་གའི་གསར་འགོད་པས་ཁ་པར་བརྒྱུད་ཐེངས་འདིའི་ཟབ་ཁྲིད་ཁྲོད་མཉམ་ཞུགས་གནང་མཁན་སློབ་མ་བསྟན་འཛིན་བདེ་ལྡན་ལགས་སུ་ཟབ་ཁྲིད་དུ་ཞུགས་དགོས་པའི་དམིགས་ཡུལ་སོགས་ཀྱི་སྐོར་དྲིས་པར་ཁོང་གིས། དེ་སྔོན་ང་རང་བོད་ཀྱི་སྐད་ཡིག་ལ་དོ་སྣང་དེ་ཙམ་མེད་ཀྱང་། ཕྱིས་སུ་རྒྱ་གར་གྱི་མཐོ་རིམ་སློབ་གྲྭར་བསྐྱོད་དུས། ད་གཟོད་སོ་སོའི་སྐད་ཡིག་གི་གལ་ཆེའི་རང་བཞིན་ཤེས་བྱུང་བས། བོད་ཀྱི་སྐད་ཡིག་སོགས་སྦྱང་འདོད་ཀྱི་འདུན་པ་བྱུང་། ཞེས་དང་། སྟབས་ལེགས་པ་ཞིག་ལ་ངའི་རོགས་པ་ཞིག་བརྒྱུད་རྒྱུད་སྨད་དུ་བོད་ཀྱི་སྐད་ཡིག་དང་ནང་དོན་རིག་པའི་ཟླ་དྲུག་ཟབ་ཁྲིད་འཚོག་གི་ཡོད་པ་ཤེས་རྟོགས་བྱུང་བ་དང་། དེར་ཞུགས་མྱོང་ཡོད་པའི་སློབ་མ་ཞིག་གིས་ཀྱང་། ཟབ་ཁྲིད་དེར་ཞུགས་ན་བོད་ཀྱི་སྐད་ཡིག་དང་། ནང་ཆོས་ཐོག་བློ་སྐྱེད་ཡག་པོ་རག་གི་འདུག་ལབ་བྱུང་བས། ང་རང་ད་ལན་གྱི་ཟབ་ཁྲིད་འདིར་མཉམ་ཞུགས་བྱས་པ་ཡིན། ཞེས་འགྲེལ་བརྗོད་གནང་བྱུང་།
གངས་ཅན་རིག་གནས་སློབ་གྲྭ་ནི་ ༧གོང་ས་རྒྱལ་བ་རིན་པོ་ཆེ་མཆོག་གི་བཀའ་མངགས་བཞིན། ཕྱི་ལོ་ ༢༠༠༩ ལོར་འཛུགས་སྐྲུན་གྱི་ལས་གཞི་ཡོངས་སུ་གྲུབ་པ་དང་། ཕྱི་ལོ་ ༢༠༡༠ ལོ་ནས་བོད་རིགས་སློབ་ཕྲུག་དང་། དད་ལྡན་མང་ཚོགས་བཅས་ལ་ནང་ཆོས་ཟབ་ཁྲིད་མགོ་འཛུགས་བྱས་ཡོད་པ་དང་། ཕྱི་ལོ་ ༢༠༡༤ ལོ་ནས་ཆོས་རིག་ལས་ཁུངས་དང་རྒྱུད་སྨད་གངས་ཅན་རིག་གནས་སློབ་གྲྭ་གཉིས་མཉམ་རུབ་ཀྱིས་ཟླ་བ་དྲུག་གི་ཟབ་ཁྲིད་གོ་སྒྲིག་ཞུས་པ་ལྟར། ད་བར་ཟླ་དྲུག་གི་ཟབ་ཁྲིད་དེར་བོད་རིགས་སློབ་གཉེར་བ་ཁྱོན་ ༡༥༤ ཡིས་མཉམ་ཞུགས་བྱས་ཡོད་པ་རེད།
དཔལ་ལྡན།
