དཔལ་ས་སྐྱ་༧གོང་མ་ཁྲི་ཆེན་མཆོག་གིས་གཙོ་བོ་བླ་མ་རྣམ་པ་དང་དགེ་འདུན་པ་རྣམ་པའི་ཐུགས་སྨོན་སོགས་ཀྱི་བྱིན་རླབས་ལ་བརྟེན་ནས། ཁོང་རིན་པོ་ཆེ་མཆོག་ཡུན་རིང་འཚོ་བཞུགས་ཐུབ་པར་རེ་བ་དང་ཡིད་ཆེས་ཡོད་སྐོར་གསུངས།
དེ་རིང་ཕྱི་ཟླ་ ༩ ཚེས་ ༧ ཉིན་དཔལ་ས་སྐྱ་༧གོང་མ་ཁྲི་ཆེན་རྡོ་རྗེ་འཆང་ཆེན་པོ་མཆོག་དགུང་གྲངས་ ༧༧ ལ་ཕེབས་པའི་སྐུའི་འཁྲུངས་སྐར་གྱི་དུས་ཆེན་ཡིན་པ་ལྟར། དེ་རིང་སྔ་དྲོ་ཆུ་ཚོད་ ༩།༣༠ ཙམ་སྟེང་ལྡི་ར་རྡུན་ཁུལ་དུ་རྟེན་གཞི་བྱས་པའི་དཔལ་ས་སྐྱའི་ཆོས་སྒར་གྱི་བླ་མ་དང་དགེ་འདུན་པ་སོགས་འདུས་སྤྱི་ཡོངས་ནས་༧ས་སྐྱ་གོང་མ་ཁྲི་ཆེན་མཆོག་ལ་བརྟན་བཞུགས་བསྟར་འབུལ་ཞུས་ཏེ་མགོན་པོ་གང་ཉིད་ཀྱི་འཁྲུངས་སྐར་སྲུང་གཙི་ཞུས་གནང་སོང་།
བརྟན་བཞུགས་སྐབས་ས་སྐྱ་༧གོང་མ་ཁྲི་ཆེན་མཆོག་གིས། དེ་རིང་ངའི་སྐྱེས་སྐར་ཉིན་བརྟན་བཞུགས་ཟབ་རྒྱས་གནང་བ་དང་ལྷག་པར་དུ་ཕྱོགས་མཐའ་གྲྭ་ཚང་ཁག་ནས་རྟེན་འབྲེལ་གནང་མཁན་མང་པོ་བྱུང་། ལྷག་དོན་དུ་ཐའེ་ཝན་འཇམ་དབྱངས་ཆོས་ཚོགས་ནས་དགོན་པ་མང་པོར་ཚེ་སྦྱོར་གསུངས་བ་དང་སྨོན་ལམ་བྱས་པ་སོགས་ཀྱི་ཁུར་ཆེན་པོ་བླངས་བར་འབྲེལ་ཡོད་ཚང་མར་གོ་སྐབས་འདི་བརྒྱུད་ང་སྒེར་ངོས་ནས་ཐུགས་རྗེ་ཆེ་ཞུ་རྒྱུ་ཡིན། དེ་རིང་ཡ་མཚན་པ་ཞིག་ལ་ངའི་ཕྱི་རྩིས་དང་བོད་རྩིས་ཀྱི་སྐྱེས་སྐར་གཉིས་ཉིན་གཅིག་ལ་འཁེལ་འདུག ང་རང་སྐྱེས་པ་ནས་བཟུང་ད་བར་དུས་གཉིས་མཉམ་པོར་འཁེལ་བ་བྱུང་མྱོང་ཡོད་པ་མ་རེད་བསམ་གྱི་འདུག བོད་ནང་ཕྱི་རྩིས་མེད་པ་དང་རྒྱ་གར་ནང་བསླེབས་པ་ནས་ངས་དྲན་གསོ་བྱས་ན་ཕལ་ཆེ་བྱུང་མྱོང་མེད། ནམ་རྒྱུན་ཡིན་ན་བདུན་ཕྲག་གཅིག་གཉིས་ཀྱི་ཁྱད་པར་འགྲོ་ཡི་རེད་དེ། ད་རེས་དུས་གཅིག་ལ་འཁེལ་ཡོད་སྟབས། སྐྱེས་སྐར་གྱི་རྟེན་འབྲེལ་འདི་བྱས་ན་ཡག་པོ་འདུག་བསམ་ནས་བྱས་པ་ཡིན།
སྤྱིར་བཏང་ད་ལྟ་ང་ལོ་ཆེན་པོར་བསླེབས་ཚར་བ་རེད། གང་ཡིན་ཟེར་ན། སྤྱི་རྩིས་བྱས་པ་ཡིན་ན། ཕྱི་ལོ་ ༡༩༤༥ ཟླ་ ༩ ཚེས་ ༧ ཉིན་སྐྱེས་པ་རེད། བོད་རྩིས་བྱས་པ་ཡིན་ན། ཤིང་བྱའི་ལོའི་བོད་ཟླ་ ༨ ཚེས་ ༡ ཉིན་སྐྱེས་པ་རེད། ང་རང་ཚོ་བོད་པའི་རྩིས་སྟངས་བྱས་ན་ལོ་ ༧༧ བསླེབས་པ་རེད། ཕྱི་རྒྱལ་གྱི་རྩིས་སྟངས་བྱས་ན་ལོ་༧༦ ཟིན་པ་རེད། གང་ལྟར་ད་ལྟ་བར་དུ་འཚོ་ཐུབ་པ་ནི་གཙོ་བོ་བླ་མ་ཐུགས་རྗེ་ཆེན་པོའི་བཀའ་དྲིན་དང་ལྷག་པར་དུ་སྐྱབས་གནས་དགེ་འདུན་འདུས་ཚོགས་ནས་ཐུགས་སྨོན་གནང་ནས་ཕྱིན་པ་རེད། ད་རེས་ཡིན་ཡང་ཉིན་གསུམ་རིང་བརྟན་བཞུགས་སྒྲུབ་སྦྱངས་གནང་སྟེ་དེ་རིང་བརྟན་བཞུགས་ཟབ་རྒྱས་གནང་བ་ཡིན་སྟབས། ངས་རང་དབང་གི་ཐོག་ནས་ང་རང་འདི་ཙམ་རིང་སྡོད་ཀྱི་ཡིན་ལབ་ཐུབ་ཀྱི་མེད་ཀྱང་། ཆོས་ཐམས་ཅན་རྟེན་ཅིང་འབྲེལ་བར་འབྱུང་བ་དང་རྒྱུ་རྐྱེན་རྟེན་གནས་ལས་འབྱུང་བ་ཡིན་སྟབས། གཙོ་བོ་བླ་མ་རྣམ་པ་དང་ལྷག་པར་དུ་དགེ་འདུན་པས་ཐུགས་སྨོན་གནང་བའི་ཐུགས་རྗེ་བྱིན་རླབས་ལ་བརྟེན་ནས། ཡུན་རིང་པོར་འཚོ་ཐུབ་པའི་དགེ་མཚན་གཏན་གཏན་ཡོང་གི་ཡོད་པར་ང་རང་ལ་རེ་བ་དང་ཡིད་ཆེས་ཡོད། ཅེས་གསུངས།
ཡང་ཁ་སང་ཕྱི་ཚེས་ ༦ ཉིན་ཨོ་གླིང་རྒྱལ་ས་ཁན་བྷི་རཱའི་ནང་རྟེན་གཞི་བྱས་པའི་ས་སྐྱ་བློ་གསལ་གླིང་ཆོས་ཚོགས་ཀྱིས། དྲ་ལམ་ས་སྐྱ་གོང་མ་ཁྲི་ཆེན་མཆོག་གི་འཁྲུངས་སྐར་སྲུང་གཙི་ཞུས་གནང་ཡོད་པ་དང་། མཛད་རིམ་ཐོག་༧གོང་མ་ཁྲི་ཆེན་མཆོག་གི་རྒྱ་ནག་གི་དབང་སྒྱུར་སྔོན་དང་དེའི་རྗེས་ཀྱི་སྐུ་ཚེ་མཛད་རིམ་ཚུད་པའི་བརྙན་ཞིག་གཟིགས་འབུལ་ཞུས་ཡོད་ཅིང་། ཨོ་གླིང་སྐུ་ཚབ་དོན་གཅོད་ཀརྨ་སེངྒ་ལགས་ཀྱི་གཙོས་དཔལ་ས་སྐྱའི་བླ་ཆེན་ཁག་ཅིག་དང་དད་ལྡན་སློབ་མ་ཁག་ཅིག་བཅས་ནས་མཉམ་ཞུགས་གནང་ཡོད། དེ་བཞིན། ཐའེ་ཝན་དང་འབྲུག་སོགས་འཛམ་གླིང་ཡུལ་གྲུ་གང་སར་༧གོང་མ་ཁྲི་ཆེན་མཆོག་གི་འཁྲུངས་སྐར་སྲུང་གཙི་དང་འབྲེལ་བའི་ཤིས་ཚིག་དང་གླུ་གཞས་གསར་གཏོང་བ་སོགས་རྣམ་པ་འདྲ་མིན་གྱི་ཐོག་ནས་སྲུང་གཙི་གནང་གི་འདུག
དཔལ་ས་སྐྱ་༧གོང་མ་ཁྲི་ཆེན་རིན་པོ་ཆེ་མཆོག་ནི་བོད་རབ་བྱུང་ཤིང་བྱའི་ལོའི་བོད་ཟླ་ ༨ ཚེས་ ༡ དང་ཕྱི་ལོ་ ༡༩༤༧ ཕྱི་ཟླ་ ༩ ཚེས་ ༧ ཉིན་སྐུ་འཁྲུངས་ཤིང་། ཕྱི་ལོ་ ༡༩༥༡ ལོར་༧གོང་ས་རྒྱལ་བ་རིན་པོ་ཆེ་མཆོག་གིས་ས་སྐྱའི་ཁྲི་རབས་ ༤༡ བར་བསྐོ་བཞག་མཛད་པ་ནས་ཕྱི་ལོ་ ༢༠༡༧ ཟླ་ ༣ བར་ལོ་ངོ་ ༦༦ རིང་དཔལ་ས་སྐྱ་པའི་ཁྲི་འཛིན་མཛད་གནང་ཡོད་པ་རེད།
གསར་འགོད་པ། སྐལ་བཟང་སྦྱིན་པ།
ངས་རང་དབང་གི་ཐོག་ནས་ང་རང་འདི་ཙམ་རིང་སྡོད་ཀྱི་ཡིན་ལབ་ཐུབ་ཀྱི་མེད་ཀྱང་། ཆོས་ཐམས་ཅན་རྟེན་ཅིང་འབྲེལ་བར་འབྱུང་བ་དང་རྒྱུ་རྐྱེན་རྟེན་གནས་ལས་འབྱུང་བ་ཡིན་སྟབས། གཙོ་བོ་བླ་མ་རྣམ་པ་དང་ལྷག་པར་དུ་དགེ་འདུན་པས་ཐུགས་སྨོན་གནང་བའི་ཐུགས་རྗེ་བྱིན་རླབས་ལ་བརྟེན་ནས། ཡུན་རིང་པོར་འཚོ་ཐུབ་པའི་དགེ་མཚན་གཏན་གཏན་ཡོང་གི་ཡོད་པར་ང་རང་ལ་རེ་བ་དང་ཡིད་ཆེས་ཡོད།