རྒྱ་གར་དང་པ་ཀི་སི་ཐན་བར་རྩོད་རྙོག་ཏུ་གྱུར་བའི་ཀ་ཤི་མིར་ཁུལ་དུ་དམག་མིའི་སྡེ་ཁག་ཅིག་གིས་དྲག་རྒོལ་བྱས་ཏེ་རྒྱ་གར་གྱི་དམག་མི་ལྔ་གྲོངས་ཡོད་འདུག
རྒྱལ་སྤྱིའི་བརྒྱུད་ལམ་ཁག་ཏུ་གནས་ཚུལ་ཐོན་པ་ལྟར་ན། ཁ་སང་ཕྱི་ཚེས་ ༡༡ ཉིན་རྒྱ་གར་གྱི་ཀཱ་ཤི་མིར་དང་པ་ཀི་སི་ཐན་ཕྱོགས་ཀྱི་དྲག་དམག་གཉིས་བར་དམག་འཁྲུག་བྱུང་སྟེ། རྒྱ་གར་གྱི་དམག་མི་ ༥ དང་གོ་མཚོན་བཟུང་བའི་དམག་མི་ (Armed Militants) ༢ བཅས་འཐབ་འཛིང་ཁྲོད་རྐྱེན་འདས་སུ་ཕྱིན་ཡོད་པ་དང་། རྒྱ་གར་གཞུང་གིས་ད་ལན་རྒྱ་གར་གྱི་དམག་མིར་གནོད་འཚེ་ཐེབས་པའི་རྒྱབ་ལྗོངས་སུ་པ་ཀི་སི་ཐན་ཡོད་པའི་སྐྱོན་བརྗོད་བྱས་ཡོད་པ་རེད།
རྒྱ་གར་གྱི་དམག་མིའི་ལས་བྱེད་ཅིག་གིས། པ་ཀི་སི་ཐན་གྱི་རྒྱལ་མཚམས་སུ་ཡོད་པའི་དོགས་གཞི་ཅན་གྱི་དྲག་དམག་ཁག་ཅིག་གིས། མེ་མདའ་འཕངས་པ་ལ་བརྟེན་ནས། རྒྱ་གར་གྱི་དམག་མི་ ༥ རྐྱེན་འདས་སུ་ཕྱིན་ཡོད། ད་རེས་ནི་ཧི་མ་ལ་ཡའི་ཁུལ་དུ་རྒྱ་གར་གྱི་རྒྱལ་སྲུང་དམག་དཔུང་ལ་རྐྱེན་ངན་གོད་ཆག་ཚབས་ཆེན་བྱུང་བ་ཞིག་ལ་ངོས་འཛིན་བྱེད་ཀྱི་ཡོད། ཅེས་བརྗོད་ཡོད་འདུག
རོའུ་ཊར་གསར་ཁང་གི་གནས་ཚུལ་ནང་། རྒྱ་གར་གཞུང་གིས། ད་ལན་ཀ་ཤི་མིར་ཁུལ་དུ་དམག་འཁྲུག་བྱུང་རྐྱེན་གཙོ་བོ་ནི། པ་ཀི་སི་ཐན་གཞུང་གིས་ས་མཚམས་ཁུལ་གྱི་དྲག་དམག་ལ་རྒྱབ་སྐྱོར་བྱེད་ཀྱི་ཡོད་པས་ཡིན་སྐོར་སྐྱོན་བརྗོད་བྱས་ཡོད། འོན་ཀྱང་། པ་ཀི་སི་ཐན་གྱིས་ཁས་ལེན་བྱས་མེད་པ་མ་ཟད། པ་ཀི་སི་ཐན་གཞུང་གིས་ཀ་ཤི་མིར་གྱི་མི་མང་ལ་གཞུང་འབྲེལ་རྒྱབ་སྐྱོར་བྱེད་ཀྱི་ཡོད་པའི་ལན་འདེབས་བྱས་ཡོད་འདུག
ད་ལྟ་ཀ་ཤི་མིར་ཁུལ་གྱི་གནད་དོན་ཛ་དྲག་ཏུ་གྱུར་ཡོད་ཅིང་། ཉེ་སྔོན་ཕྱི་ཚེས་ ༩ ཉིན་རྒྱ་གར་ཉེན་རྟོག་པས་ཁུལ་དེའི་མི་སེར་་ ༣༠༠ ལྷག་འཛིན་བཟུང་གིས་འདྲི་རྩད་བྱས་ཡོད་པ་དང་། ད་ལན་ཀ་ཤི་མིར་ཁུལ་དུ་དྲག་པོའི་གནས་ཚུལ་ལྷག་རྐྱེན་གཙོ་བོ་ནི། ཉེ་བའི་ཉིན་ཤས་རིང་ཁུལ་དེར་དྲག་དམག་སྡེ་ཁག་དེས་རྒྱ་གར་གྱི་མི་ ༤ བསད་ཡོད་པ་དང་ད་ལོ་གཅིག་པུར་ཁྱོན་མི་གྲངས་ ༢༨ རྐྱེན་འདས་སུ་བཏང་ཡོད་པ་སོགས་ལ་བརྟེན་ནས་བྱུང་བ་ཞིག་ཡིན་ཞིང་། དྲག་དམག་སྡེ་ཁག་དེས་རྒྱ་གར་ཁོངས་གཏོགས་ཀ་ཤི་མིར་རུ་དྲག་པོའི་རྒོལ་རྡུང་གི་བྱ་སྤྱོད་བསྟུད་མར་སྤེལ་གྱི་ཡོད་འདུག
ཀ་ཤི་མིར་ནི་ཕྱི་ལོ་ ༡༩༤༧ ཙམ་ནས་རྒྱ་གར་དང་པ་ཀི་སི་ཐན་གཉིས་བར་རྩོད་རྙོག་ཏུ་གྱུར་བའི་ས་ཁོངས་ཤིག་ཡིན་པ་དང་། ས་ཁུལ་དེའི་གསུམ་ཆ་གཉིས་ཙམ་རྒྱ་གར་གྱི་འཛིན་སྐྱོང་འོག་གནས་ཀྱི་ཡོད་པ་དང་གཅིག་དེ་པ་ཀི་སི་ཐན་གྱི་འཛིན་སྐྱོང་འོག་ཚུད་ཡོད་པ་རེད་ལ། ད་བར་རྒྱ་གར་དང་པ་ཀི་སི་ཐན་གཉིས་བར་ཀ་ཤི་མིར་གྱི་རྩོད་རྙོག་དང་འབྲེལ། དམག་འཁྲུག་ཆེ་གྲས་ཐེངས་ ༦ བྱུང་ཡོད་ཅིང་། མཉམ་འབྲེལ་རྒྱལ་ཚོགས་ཀྱི་ལྷན་ཚོགས་ནམ་འཛོམས་སྐབས་པ་ཀི་སི་ཐན་དང་རྒྱ་གར་བར་ཇཱ་མོ་ཀ་ཤི་མིར་གྱི་རྩོད་རྙོག་དང་འབྲེལ་ནས་ཁ་རྩོད་ཤོར་གྱི་ཡོད་པ་རེད།
གསར་འགོད་པ། བསྟན་འཛིན་ཕུར་བུ།
