བོད་བརྒྱུད་ནང་བསྟན་གྱི་དགེ་འདུན་པ་མང་པོས་ཐའེ་ཝན་གནོད་ཐེབས་ས་ཁུལ་དུ་སྨོན་ལམ་གསུང་འདོན་གནང་།

ཉིན་ཤས་གོང་ཐའེ་ཝན་གྱི་གྲོང་ཁྱེར་ཆེ་ཤོས་གཉིས་པ་ཀའོ་ཞོང་ (Kaohsiung) དུ་མེ་སྐྱོན་ཚབས་ཆེན་བྱུང་སྟེ་མི་གྲངས་ ༤༦ རྐྱེན་འདས་དང་མི་ ༤༡ ལ་རྨས་སྐྱོན་ཕོག་པའི་སྐྱོན་ཆག་བྱུང་བར་བརྟེན། དེ་རིང་ཐའེ་ཝན་ནང་གནས་བཞུགས་རྒྱལ་སྤྱིའི་བོད་བརྒྱུད་ནང་བསྟན་ཞིབ་འཇུག་ཚོགས་པས་དབུ་འཁྲིད་དེ། ཆོས་བརྒྱུད་རིས་མེད་ཀྱི་མཁན་སྤྲུལ་དགེ་བཤེས་དང་དགེ་འདུན་པ་ཞལ་གྲངས་ ༦༠ ལ་ཉེ་བ་ཞིག་ཡུལ་དངོས་སུ་ཆེད་ཕེབས་ཀྱིས་བསྔོ་སྨོན་གསུང་འདོན་གནང་འདུག

ཟླ་འདིའི་ཕྱི་ཚེས་ ༡༥ ཉིན་རྒྱལ་སྤྱིའི་བརྒྱུད་ལམ་ཁག་ཏུ་གནས་ཚུལ་ཐོན་པ་ལྟར་ན། ཟླ་འདིའི་ཕྱི་ཚེས་ ༡༤ ཉིན་གྱི་ས་གནས་ཀྱི་སྔ་དྲོའི་ཆུ་ཚོད་ ༢ པ་ཡས་མས་ཤིག་ལ་ཀའོ་ཞོང་ (高雄) ཁུལ་དུ་ལོ་ངོ་ ༤༠ ཡར་སྔོན་དུ་འཛུགས་སྐྲུན་བྱས་པའི་ཁང་བརྩེགས་རྙིང་པ་ཁྲིན་ཀྲོང་ཁྲིན་ (城中城) ཞེས་པ་ཞིག་ལ་མེ་སྐྱོན་བྱུང་སྟེ་མི་ ༤༦ རྐྱེན་འདས་དང་མི་ ༤༡ ཙམ་ལ་རྨས་སྐྱོན་ཕོག་ཡོད་ཅིང་། ཐེངས་འདིའི་མེ་སྐྱོན་གོད་ཆག་དེ་ནི་ཐའེ་ཝན་གྱི་འདས་པའི་མི་ལོ་ཉེར་ལྔའི་རིང་གི་ཤི་རྨས་ཚབས་ཆེ་ཤོས་བྱུང་བའི་མེ་སྐྱོན་ཞིག་ཡིན་པར་ངོས་འཛིན་བྱས་འདུག ད་ལྟའི་ཆར་མེ་སྐྱོན་འབྱུང་རྐྱེན་ཁ་གསལ་མེད་པར་ཞིབ་འཇུག་བྱེད་བཞིན་འདུག

ཐའེ་ཝན་རྒྱལ་སྤྱིའི་བོད་བརྒྱུད་ནང་བསྟན་ཞིབ་འཇུག་ཚོགས་པའི་རྒྱུན་ལས་མཁན་པོ་རྫ་ཚེ་རིང་བཀྲ་ཤིས་ལགས་སུ་དེའི་སྐོར་བཀའ་འདྲི་ཞུས་པར་ཁོང་གིས། དེ་རིང་ཁྱོན་དགེ་འདུན་པ་ ༦༠ ཉེ་བ་ཞིག་གནོད་ཐེབས་ས་ཡུལ་རང་ལ་ཕེབས་ཏེ་བཟང་སྤྱོད་སྨོན་ལམ་གྱིས་མཚོན་པའི་གསོན་པོ་དག་ལ་སྐྱབས་འཇུག་དང་། འདས་པོ་རྣམས་ལ་བསྔོ་སྨོན་ཟབ་རྒྱས་གནང་གྲུབ་རྗེས། ཀའོ་ཞོང་གྲོང་ཁྱེར་གྱི་སྤྱི་ཁྱབ་གཞོན་པ་དང་། ཐའེ་ཝན་ནང་པའི་ལས་དོན་ཚོགས་པའི་དྲུང་ཆེ་སོགས་ཀྱང་ཆེད་ཕེབས་ཀྱིས་བོད་བརྒྱུད་ཀྱི་དགེ་འདུན་པ་རྣམ་པ་ས་གནས་དེར་དངོས་སུ་གདུང་སེམས་མཉམ་བསྐྱེད་ཆེད་དུ་ཕེབས་པར་སེམས་ཚོར་ཆེན་པོས་ཐུགས་རྗེ་ཆེ་ཞུས་འདུག་ལ། དགེ་འདུན་པ་མང་པོ་ཞིག་མ་སྐུལ་དྭང་བླངས་ཀྱིས་ཕེབས་ཡོད་པ་དང་། ཞིབ་འཇུག་ཚོགས་པ་དང་། དེ་བཞིན་འབྲེལ་ཡོད་ཆོས་ཚོགས་དག་གིས་ཀྱང་ལམ་བར་འགྲོ་སོང་དང་གསོལ་ཚིགས་སོགས་ལ་ཞལ་འདེབས་གནང་བ་སོགས་ཚང་མས་མཉམ་ཞུགས་གནང་ཡོད་སྐོར་དང་། ཐའེ་ཝན་གྱི་རྒྱལ་ཡོངས་བརྒྱུད་ལམ་ཆེ་ཁག་སན་ལཱས་ (三立) སོགས་ཀྱིས་ཀྱང་ད་ལན་བོད་ཀྱི་དགེ་འདུན་པ་རྣམ་པ་ཀའོ་ཞོང་དུ་ཆེད་ཕེབས་གནང་བའི་ཆོས་ཕྱོགས་ཀྱི་སྤྱི་ཚོགས་ཞབས་ཞུའི་ལས་དོན་ལ་དམིགས་བསལ་དོ་སྣང་བྱས་ཡོད་སྐོར་གསུངས་བྱུང་།

Firefighters and medical workers walk past a damaged residential building following a fire in Kaohsiung. Photo: Woo Swee Kay/Reuters]

ཡང་གསར་འགོད་པས་ནམ་རྒྱུན་ཐའེ་ཝན་རྒྱལ་སྤྱིའི་བོད་བརྒྱུད་ནང་བསྟན་ཞིབ་འཇུག་ཚོགས་པའི་ངོས་ནས་ས་གནས་སུ་སྐྱོན་ཆག་འདི་རིགས་བྱུང་སྐབས་ཆོས་ཕྱོགས་ཀྱི་མཛད་པ་ག་རེ་སྐྱོང་གནང་གི་ཡོད་མེད་སྐོར་དྲིས་པར་ཁོང་གིས། ཐའེ་ཝན་རྒྱལ་སྤྱིའི་བོད་བརྒྱུད་ནང་བསྟན་ཞིབ་འཇུག་ཚོགས་པ་ཞེས་པ་དེ་ནི་ཐའེ་ཝན་ལ་ཡོད་པའི་ཐའེ་ཝན་རྒྱལ་ཡོངས་རང་བཞིན་གྱི་གཞུང་འབྲེལ་ངོས་ལེན་ཡོད་པའི་ཚོགས་པ་ཞིག་ཡིན་ཞིང་། ཐའེ་ཝན་ལ་མཚོན་ན། བོད་བརྒྱུད་ནང་བསྟན་གྱི་ཚབ་མཚོན་གྱི་ཚོགས་པ་འདྲ་བོ་ཞིག་ཆགས་བསྡད་ཡོད་པ་མ་ཟད། ཚོགས་པ་དེ་བཙུགས་ནས་ད་ལྟ་བར་དུ་ལོ་ ༡༠ ལྷག་འགྲོ་ཡི་ཡོད་པ་རེད། ཞིབ་འཇུག་ཚོགས་པའི་དམིགས་ཡུལ་དང་ལས་དོན་གཙོ་བོ་གཅིག་ནི་ཐའེ་ཝན་གྱི་སྤྱི་ཚོགས་ལ་ཕན་ཐོགས་རྒྱུའི་ལས་ཀ་བྱ་རྒྱུ་དང་། ཐའེ་ཝན་གྱི་སྤྱི་ཚོགས་ནང་བོད་བརྒྱུད་ནང་བསྟན་དང་བོད་པའི་ཆེ་མཐོང་སོགས་༧གོང་ས་མཆོག་གིས་དུས་རྒྱུན་དུ་ནས་བོད་པ་ག་པར་ཡོད་རུང་བོད་པ་མི་རེ་ངོས་རེ་ནས་བོད་མིའི་ངོ་ཚབ་མཚོན་གྱི་ཡོད་པ་གསུངས་པ་ལྟར། སོ་སོའི་ཆོས་དང་རིག་གཞུང་དེ་ཚོ་མི་རིགས་གཞན་གྱི་ཁྱབ་ཁོངས་ལ་སྤེལ་དགོས་པ་དང་། མི་རིགས་གཞན་གྱི་སྤྱི་ཚོགས་སུ་རྒྱུན་གནས་བྱ་དགོས་དུས། ས་གནས་དེ་གའི་སྤྱི་ཚོགས་ལ་སེམས་ཁུར་བྱ་རྒྱུ་དེ་གནད་འགག་ཞིག་མཐོང་སྟེ། ཕྱི་ལོ་ ༢༠༡༡ དང་ ༢༠༡༢། ༢༠༡༣ ལོར་ཐའེ་ཝན་ནང་རང་བྱུང་གི་གནོད་འཚེ་ས་ཡོམ་དང་། གནམ་གྲུ་ལྷུང་བ། མེ་འཁོར་དོན་རྐྱེན་སོགས་བྱུང་སྐབས། ཞིབ་འཇུག་ཚོགས་པའི་སྤྱི་ཚོགས་ཞབས་ཞུ་ཚན་པས་སྣེ་ཁྲིད་དེ་ཐའེ་ཝན་ལ་ཡོད་པའི་བླ་མ་དང་དགེ་འདུན་པ་སོགས་བོད་བརྒྱུད་ནང་བསྟན་ཚོགས་པ་ཡུལ་དངོས་སུ་ཕེབས་ཏེ་ཞལ་འདོན་བཏོན་པ་དང་གདུང་སེམས་མཉམ་བསྐྱེད་གནང་ཡོད་པ་རེད། ཞིབ་འཇུག་ཚོགས་པས་དེ་སྔོན་སྤེལ་བའི་སྤྱི་ཚོགས་ཞབས་ཞུ་དང་འབྲེལ་བའི་ལས་འགུལ་ལ་ཐའེ་ཝན་གྱི་སྲིད་འཛིན་ཚེ་ཡེན་ཝུན་(蔡英文)མཆོག་གིས་བསྟོད་བསྔགས་གནང་བ་དང་། གསར་འགྱུར་བརྒྱུད་ལམ་ཁག་གིས་དོ་སྣང་གནང་བ་སོགས་ཐེངས་མང་བྱུང་ཡོད་སྐོར་སོགས་གསུངས་བྱུང།

ད་ཐེངས་མེ་སྐྱོན་ཕོག་སའི་ཐོག་བརྩེགས་ ༡༣ ཅན་གྱི་ཁང་བརྩེགས་ཁྲིན་ཀྲོང་ཁྲིན་གྱི་ཐོག་བརྩེགས་ ༡ ནས་ ༥ བར་དུ་ཚོང་ཁང་དང་གློག་བརྙན་ཁང་སོགས་ཡོད་ཅིང་། ཐོག་བརྩེགས་ ༧ ནས་ ༡༡ བར་དུ་ཁྱིམ་ཚང་གི་སྡོད་ཁང་ ༡༢༠ ཡོད་འདུག ཁང་བརྩེགས་དེར་ཕྱི་ལོ་ ༡༩༩༠ ལོའི་ནང་མེ་སྐྱོན་བྱུང་བའི་རྐྱེན་གྱིས་ཚོང་ཁང་དང་གློག་བརྙན་ཁང་ཚང་མ་སྒོ་བརྒྱབ་ཡོད་ཅིང་། དུས་དེ་ནས་བཟུང་ད་བར་ཁང་བརྩེགས་དེ་འཚོ་བ་ཅུང་ཞན་པའི་མི་ཉམ་ཐག་མང་པོ་ཞིག་ལ་ཁང་གླ་དམའ་བོའི་ཐོག་གཡར་པོ་བྱས་ཡོད་འདུག

གསར་འགོད་པ། བསྟན་འཛིན་ཕུར་བུ།