བོད་རིགས་ཀརྨ་སིང་ལགས་ཨ་རིའི་གྲོང་ཁྱེར་སིན་སི་ནཱ་ཊི་ཡི་སྤྱི་ཁྱབ་ལ་འོས་འདེམས་བྱུང་།

ཀརྨ་སིང་ལགས་ཀྱིས་སྐྱབས་བཅོལ་བའི་ཕ་མ་གཉིས་ཀྱིས་རང་གི་བུ་ཕྲུག་ལ་མི་ཚེ་ཡག་པོ་ཞིག་སྐྱེལ་བཅུག་ན་འདོད་པའི་ཕུགས་བསམ་དེས། ཁོ་ཚང་སྐྱབས་བཅོལ་བ་ནས་སིན་སི་ཊིའི་སྤྱི་ཁྱབ་པའི་ཁྱིམ་ཚང་ཞིག་ཆགས་ཡོད་སྐོར་བརྗོད་འདུག

འདི་ལོའི་ཕྱི་ཟླ་ ༥ བའི་ནང་བོད་རིགས་ཨ་རི་བ་ཨབ་ཊབ་ཀརྨ་སིང་པུ་རི་ཝལ་ (Aftab Karma Singh Pureval) ལགས་ཨ་རིའི་ཨོ་ཧ་ཡོ་ (Ohio) མངའ་སྡེའི་ནང་གི་གྲོང་ཁྱེར་སིན་སིན་ན་ཊི་ (Cincinnati) ཡི་སྤྱི་ཁྱབ་ཀྱི་འོས་མིར་ལངས་ཡོད་པ་ལྟར། ཁ་སང་གྲོང་ཁྱེར་སིན་སི་ན་ཊིའི་སྤྱི་ཁྱབ་ཀྱི་འོས་བསྡུའི་གྲུབ་འབྲས་གསལ་གནང་བའི་ནང་། ཀརྨ་སིང་ལགས་སུ་འོས་གྲངས་ ༣༣༡༢༤ དང་ཁ་གཏད་འོས་མི་ཌེ་ཝི་ཌི་མན་ (DAVID MANN) ལགས་སུ་འོས་ ༡༧༢༠༧ ཆགས་ཏེ། ལོ་ན་ ༣༩ ཡིན་པའི་ཀརྨ་སིང་ལགས་ཨ་རིའི་གྲོང་ཁྱེར་དེའི་ལོ་རྒྱུས་ནང་གི་ཨེ་ཤ་ཡའི་སྤྱི་ཁྱབ་ཐོག་མ་ཆགས་ཡོད་པ་རེད།

ཀརྨ་སིང་ལགས་སུ་འོས་བསྡུའི་རྒྱལ་ཁ་ཐོབ་པ་དང་ཁོང་གིས། ང་ཚོས་གྲོང་ཁྱེར་སིན་སི་ཊིའི་ནང་ལོ་རྒྱུས་བཟོས་ཡོད། ཅེས་དང་། སྐྱབས་བཅོལ་བའི་ཕ་མ་གཉིས་ཨ་རིར་ཡོང་ནས་རང་གི་བུ་ཕྲུག་ལ་མི་ཚེ་ཡག་པོ་ཞིག་སྤྲོད་འདོད་ཡོད་པའི་ཕུགས་བསམ་དེས། ཁོ་ཚང་སྐྱབས་བཅོལ་བའི་ཁྱིམ་ཚང་ཞིག་ནས་གྲོང་ཁྱེར་སིན་སི་ཊིའི་སྤྱི་ཁྱབ་པ་ཆགས་པའི་གྲུབ་འབྲས་བྱུང་ཡོད་སྐོར་དང་། གྲོང་ཁྱེར་སིན་སི་ཊིའི་ནང་སྟོབས་འབྱོར་དང་འབྱུང་ཁུངས། མདོག་ཡོད་མེད་ལ་ཁྱད་པར་མེད་པ་དང་། གཙོ་བོ་ལས་ལ་བརྩོན་ཞིང་ཕུགས་བསམ་ལྡན་པའི་མི་ཡིས་རང་ཉིད་ཀྱི་རྨི་ལམ་མངོན་འགྱུར་བྱུང་ཐུབ་ཀྱི་ཡོད་སྐོར། དེ་བཞིན། ཁོང་གི་རྒྱལ་སྐྱོར་བ་ཚོས་གྲོང་ཁྱེར་སིན་སི་ཊིའི་ནང་ལོ་རྒྱུས་གསར་པ་ཞིག་མགོ་བརྩམས་ཡོད་སྐོར་བརྗོད་པ་དང་འབྲེལ། རང་ཉིད་ལ་འོས་བསྡུའི་བརྒྱུད་རིམ་ཁྲོད་སྒོ་ཀུན་ནས་རྒྱབ་སྐྱོར་གནང་མཁན་ཚོར་བཀའ་དྲིན་ཆེ་ཞུས་ཡོད་པ་རེད།ད་ལྟ་ཀརྨ་ལགས་ནི་ཨ་རིའི་ཨོ་ཧའོ་མངའ་སྡེའི་ཧ་མིལ་ཊོན་ (Hamilton County) རྫོང་ཁྲིམས་ཁང་གི་ཁྲིམས་དྲུང་ཆེན་མོ་ཡིན་འདུག་ལ། ཕྱི་ལོ་ ༢༠༢༥ ལོར་ཁོང་གི་ལས་ཡུན་དེ་རྫོགས་ཀྱི་ཡོད་འདུག དེ་ནི་ས་གནས་སུ་ལོ་ངོ་ ༡༠༠ ལྷག་གི་རིང་ཨ་རིའི་དམངས་གཙོ་ཚོགས་པའི་ཚོགས་མི་ཞིག་ཁྲིམས་དྲུང་ཆེན་མོར་བསླེབས་པ་ཐོག་མ་དེ་ཆགས་ཡོད་འདུག དེ་བཞིན་ཕྱི་ལོ་ ༢༠༡༨ ལོར་ཁོང་ཨ་རིའི་གྲོས་ཚོགས་འོག་མའི་འཐུས་མིར་ལངས་ཏེ་བོད་མི་ཨ་རི་བ་ཞིག་ཨ་རིའི་གྲོས་ཚོགས་འཐུས་མིར་ལངས་བ་ཐེངས་དང་པོ་ཆགས་ཡོད་པ་དང་། འོས་བསྡུའི་དྲིལ་བསྒྲགས་སྐབས་ཁོང་གིས་རང་ཉིད་ཀྱི་ཕ་མའི་མི་རིགས་ལ་བརྟེན། ཁོང་བོད་མི་ཨ་རི་བ་དང་རྒྱ་གར་ཨ་རི་བ་ཞིག་ཡིན་པར་སྤོབས་པ་སྐྱེས་ཀྱི་ཡོད་སྐོར་དང་། ཁོང་ནི་ཁོང་གི་རིག་གཞུང་དང་མི་རིགས་བཅས་ལ་ཧ་ཅང་སྤོབས་པ་ཡོད་སྐོར་བརྗོད་ཡོད་པ་རེད།

རང་ལོ་ ༣༩ ཡིན་པའི་ཀརྨ་ལགས་ཀྱི་ཨ་མ་ལགས་ཀྱིས་རྒྱ་གར་ལྷོ་ཕྱོགས་མེ་སོར་དུ་སློབ་སྦྱོང་བྱས་ཏེ། ཕྱིས་སུ་ལྡི་ལི་མཐོ་སློབ་ནང་སློབ་སྦྱོང་བྱེད་སྐབས། རྒྱ་གར་པན་ཇབ་མི་རིགས་ཡིན་པ་བྷི་རིག་ཨ་རྗེ་ཐི་སིང་ (Brig Ajit Singh) ཞེས་པ་དང་ཐུག་ནས་གཉེན་སྒྲིག་བྱས། ཕྱིས་སུ་ཨ་རིར་གནས་སྤོར་བྱས་ཏེ་ཕྱི་ལོ་ ༡༩༨༢ ལོར་ཀརྨ་ལགས་ཨོ་ཧའོ་ཞེ་ནི་ཡ་ (Xenia) གྲོང་ཁྱེར་དུ་སྐྱེས་ཡོད་པ་དང་། ཁོང་གིས་ཁྲིམས་ལུགས་རིག་པར་སློབ་སྦྱོང་བྱས་ཡོད་འདུག ཕྱི་ལོ་ ༡༩༩༤ ལོར་ཁོང་དགུང་གྲངས་ ༡༣ སྟེང་བོད་ཀྱི་རྒྱལ་ས་ལྷ་སར་ཕྱིན་ཡོད་འདུག ཕྱི་ལོ་ ༢༠༡༨ ལོར་ཁོང་གིས་(Dr. Whitney June Whitis)དང་གཉེན་སྒྲིག་བྱས་ཏེ། ལོ་གཉིས་ཡིན་པའི་བུ་ཆུང་བྷོ་དྷི་ (Bodhi) ཞེས་པ་ཞིག་ཡོད་འདུག

གསར་འགོད་པ། སྐལ་བཟང་སྦྱིན་པ།