བོད་རིགས་བུ་མོ་ཛུམ་བྷ་དང་ཡོ་ག་ཆེད་སྦྱོང་བ་ཟླ་བ་སྒྲོལ་མ་ལགས་སུ་ཧི་མ་ཅལ་མངའ་སྡེའི་གཟུགས་བཟང་མའི་འགྲན་སྡུར་ཁྲོད་ཨང་དང་པོའི་གཟེངས་རྟགས་ཐོབ་འདུག
ཟླ་འདིའི་ཕྱི་ཚེས ༥ ཉིན་རྒྱ་གར་གྱི་རང་བྱུང་གཟུགས་བཟོའི་མཐུན་ཚོགས་( Natural Body Building Union International )ཀྱི་གོ་སྒྲིག་འོག ཧི་མ་ཅལ་གྱི་ཀང་རཱ་རྫོང་ཁོངས་སུ་སྐྱེས་པ་དང་བུད་མེད་ཀྱི་གཟུགས་བཟང་འགྲན་སྡུར་ཞིག་བསྡུས་པའི་ནང་། དྷ་རམ་ས་ལའི་བདེ་ལེགས་སྨན་ཁང་གི་ཛུམ་བྷ་(Zumba)ལུས་རྩལ་ཁང་གི་ཛུམ་བྷ་དགེ་རྒན་བོད་རིགས་བུ་མོ་ཟླ་བ་སྒྲོལ་མ་ལགས་སུ་ཧི་མ་ཅལ་མངའ་སྡེའི་བུད་མེད་གཟུགས་བཟང་མའི་གཟེངས་རྟགས་(Fitness Model)ཐོབ་ཡོད་འདུག
ཟླ་བ་སྒྲོལ་མ་ལགས་ཀྱིས་འདི་གའི་གསར་འགོད་པར་ཁོང་མོས་དྲ་ལམ་ནས་འགྲན་སྡུར་དེར་ཐོ་འགོད་བྱས་ཡོད་པ་དང་། འགྲན་སྡུར་ནང་ཞུགས་པར་རྒྱ་གར་ནང་གནས་སྡོད་ཆོག་པའི་ལག་ཁྱེར་ ( Adhaar card )དང་འགྲན་ཞུགས་ཀྱི་དངུལ་སྤྲོད་དགོས་པ་དང་། འགྲན་ཞུགས་པ་སྐྱེས་པ་རྣམས་ལ་ལུས་ཀྱི་ལྗིད་ཚད་སོགས་ལ་གཞིགས་ནས་འགྲན་སྡུར་གྱི་རིམ་པ་མང་པོ་དབྱེ་ཡོད་ཀྱང་། བུད་མེད་ལ་དམིགས་བསལ་གྱི་ཚད་གཞི་མེད་པར་འགྲན་སྡུར་ཚན་པ་གཉིས་སུ་དབྱེ་ཡོད་པ་ལས་ཁོང་མོ་(Fitness model )ནང་མཉམ་ཞུགས་བྱས་ཡོད་སྐོར་བརྗོད་བྱུང་།
ད་ལྟ་རང་ལོ་ ༢༦ ཡིན་པའི་ཟླ་བ་སྒྲོལ་མ་ལགས་ནི་རྒྱ་གར་ལྷོ་ཕྱོགས་ཀོ་ལི་གྷལ་གཞིས་ཆགས་ནས་ཡིན་ཞིང་། ཁོང་མོ་ཆུང་དུས་ནས་ལུས་སྦྱོང་རིགས་ལ་དོ་དབྱིངས་ཆེན་པོ་ཡོད་ཡོད་སྟབས། རྒྱ་གར་ལྷོ་ཕྱོགས་སྦེང་ལོར་དུ་ཡོད་པའི་ཡོ་ག་ཆེད་སྦྱོང་སློབ་ཆེན་(Vivekananda ashrama)དུ་ཡོ་ག་སྦྱངས་བ་དང་། དེ་བཞིན་(Rhythmic Feet)རུ་ཛུམ་བྷ་སོགས་ལ་སློབ་གཉེར་བྱས། འདི་ལོའི་ཕྱི་ཟླ་ ༩ པ་ཙམ་ནས་བཟུང་དྷ་རམ་ས་ལའི་བདེ་ལེགས་སྨན་ཁང་གི་ཛུམ་བྷ་ལུས་རྩལ་ཁང་གཉེར་ཏེ་ཛུམ་བྷ་ལུས་སྦྱོང་སློབ་ཁྲིད་བྱེད་བཞིན་ཡོད་པ་དང་། ད་ལྟའི་ཆར་ལུས་རྩལ་ཁང་དེར་བོད་རིགས་བུད་མེད་ལུས་སྦྱོང་བ་ ༢༠ ལྷག་ཡོད་འདུག་ལ། ལུས་སྦྱོང་ཁང་དུ་ཞུགས་པར་ཟླ་རེར་ཧིན་སྒོར་ ༢༥༠༠ སྤྲོད་དགོས་ཀྱི་ཡོད་འདུག ལས་ཞོར་དུ་ཁོང་མོས་འཕྲོད་བསྟེན་དང་། ཛུམ་བྷ་ལུས་སྦྱོང་། ཡོ་ག་སོགས་ཀྱི་སྐོར་ལའང་སློབ་འཁྲིད་བྱེད་བཞིན་ཡོད་འདུག
དེང་སང་འཛམ་གླིང་ཤར་ནུབ་གང་སར་དར་ཁྱབ་འགྲོ་བཞིན་པའི་ཛུམ་བྷ་ལུས་རྩལ་ནི་ཐོག་མར་ཕྱི་ལོ་ ༡༩༩༠ ཙམ་ལ་ལྷོ་ཨ་མེ་རི་ཁའི་རྒྱལ་ཁབ་ཁོ་ལིམ་བྷི་ཡ་(Colombia)ནང་དར་མགོ་བཙུགས་ཡོད་ཅིང་། དེ་ནི་རོལ་དབྱངས་དང་ལྷན་དུ་རྐང་ལག་དང་སྐེད་པ། མགོ་སོགས་ཤུགས་ཆེན་འགུལ་དགོས་ཀྱི་ཡོད་པ་རེད། ལུས་སྦྱོང་དེ་རྩེ་སྐབས་མི་མང་པོ་ལྷན་འཛོམས་ངང་དགའ་སྐྱིད་ཀྱི་རྣམ་པས་ཁེངས་བ་ཞིག་ཡིན་པ་མ་ཟད། གཟུགས་པོའི་ལྗིད་ཚད་མགྱོགས་པོ་བཅག་ཐུབ་པ་དང་། སྙིང་ནད། ཁྲག་ཤད་ཀྱི་ནད། འཁྲིས་ནད་སོགས་ལ་ཕན་ཐོགས་ཆེན་པོ་ཡོད་འདུག ཁི་ལིམ་བྷི་ཡའི་ནང་ཐོག་མར་བཙུགས་པའི་(Zumba Fitness, LLC)ཡི་ཛུམ་བྷ་དྲ་བའི་གནས་ཚུལ་ལྟར་ན། ད་ལྟའི་ཆར་འཛམ་གླིང་གི་རྒྱལ་ཁབ་ ༡༨༦ ནང་ཛུམ་བྷ་ལུས་སྦྱོང་ཁང་བཙུགས་ཡོད་འདུག་ལ། དེང་སང་བོད་རིགས་ན་གཞོན་ཁྲོད་ཛུམ་བྷ་ཞབས་བྲོ་འཁྲབ་མཁན་ཧ་ཅང་ཇེ་མང་དུ་འགྲོ་བཞིན་འདུག
གསར་འགོད་པ། དཔལ་ལྡན།
