ང་ཚོ་ཕན་ཚུན་འབྲེལ་བ་ཡོད་པའི་གནས་སྟངས་ལ་བརྟེན་ནས་འགྲོ་བ་མི་རྣམས་ལ་གཅིག་མཚུངས་ཀྱི་འདུ་ཤེས་ཏན་ཏན་ཡོང་ཐུབ་ཀྱི་རེད།

༧གོང་ས་མཆོག་ནས་གཉན་འཕྲེང་ཅན་གྱི་དུས་སྐབས་འདིར་འཛམ་གླིང་འདིའི་ནང་ཡོད་པའི་མི་སུ་འདྲ་ཞིག་ཡིན་རུང་གཞི་རྩའི་འགྲོ་བ་མི་ཡིན་པ་གཅིག་གྱུར་གྱི་འདུ་ཤེས་དགོས་པ་ཧ་ཅང་གལ་ཆེ་བ་དང་གཞན་དོན་བསམ་པས་སེམས་སུ་བདེ་སྐྱིད་ཡོང་བ་དང་རང་དོན་ཁོ་ན་བསམ་པས་སེམས་མ་སྐྱིད་པ་ཡོང་གི་ཡོད་སྐོར་གསུངས་སོང་།

དེ་རིང་སྔ་དྲོའི་ཆུ་ཚོད་ ༩ ཐོག་༧གོང་ས་མཆོག་གིས་སེམས་དང་སྲོག་གི་ཚོགས་པས་གོ་སྒྲིག་ཞུས་དོན་ལྟར། ཚན་རིག་པ་གཉིས་དང་ལྷན་དུ་དུས་ཚོད་གཉན་འཕྲེང་ཅན་གྱི་སྐབས་སུ་རེ་བ་དང་སྙིང་སྟོབས། བྱམས་བརྩེ་བཅས་དྭང་དུ་ལེན་པ་(Embracing Hope, Courage and Compassion in Times of Crisis) ཞེས་པའི་བརྗོད་གཞིའི་ཐོག་བགྲོ་གླེང་དང་དྲི་བར་བཀའ་ལན་སྩལ་གནང་སོང་ལ། སེམས་དང་སྲོག་གི་ལྟེ་གནས་ཁང་གི་ཚོགས་གཙོ་(Susan Bauer-wu) ལགས་ཀྱིས་དྲ་ལམ་བརྒྱུད་ཕེབས་བསུ་དང་འབྲེལ་སེམས་དང་སྲོག་གི་ལྟེ་གནས་ཁང་ནས་གཉན་འཕྲེང་ཅན་གྱི་སྐབས་སུ་རེ་བ་དང་སྙིང་སྟོབས། བྱམས་བརྩེ་བཅས་དྭང་དུ་ལེན་པའི་བརྗོད་གཞི་འདི་ནི་ང་ཚོ་ཚང་མར་ཧ་ཅང་དགོས་མཁོ་ཆེ་བ་དང་ཕན་ཐོགས་ཡོད་པ་ཞིག་ཆགས་ཀྱི་ཡོད་སྐོར་ངོ་སྤྲོད་གནང་སོང་།

ཐོག་མར་ཨ་རིའི་ཁེ་ལི་ཧྥོར་ནི་ཡ་གཙུག་ལག་སློབ་གཉེར་ཁང་གི་སློབ་དཔོན་དང་སེམས་སུ་དཀའ་ངལ་འཕྲད་སྐབས་གདོང་ལེན་བྱ་རྒྱུའི་སྐོར་ལ་ཉམས་ཞིབ་གནང་མཁན་ (Elissa Epel) ལགས་ཀྱིས། ཡིད་རྟོན་མེད་པའི་སྣང་ཚུལ་ནི་ཆོས་ཉིད་ཡིན་པས་གཡོལ་ཐབས་མེད་ཀྱང་། དེའི་ཐོག་ནས་སེམས་འཚབ་དང་དངངས་སྐྲག་ཤུགས་ཆེན་པོ་མ་ཡོང་བའི་ཐབས་ཤེས་གང་ཡོད་པ་རེད་ཅེས་བཀའ་འདྲི་ཞུས་པར། ༧གོང་ས་རྒྱལ་བ་རིན་པོ་ཆེ་མཆོག་གིས། དེ་རིང་འདིར་ཚན་རིག་པ་ཚོ་དང་མཉམ་དུ་དྲ་རྒྱ་ཐོག་ནས་གྲོས་བསྡུར་བྱེད་པར་ངོས་རང་ཧ་ཅང་དགའ་པོ་བྱུང་བ་མ་ཟད། གོ་སྐབས་བཟང་པོ་ཞིག་ཡིན་པར་ངོས་འཛིན་བྱེད་བཞིན་ཡོད། ཡིད་རྟོན་མེད་པའི་གནས་སྟངས་ཞེས་པ་ནི་ང་ཚོ་ནང་པའི་བསམ་བློ་གཏོང་སྟངས་ཀྱི་ཆ་ནས་ཆོས་གང་དང་གང་ཡིན་ནའང་མི་རྟག་པ་དང་། མི་རྟག་པ་ནི་ག་དུས་ཡིན་ནའང་འགྱུར་བ་འགྲོ་བཞིན་ཡོད་པ་དང་། མ་འོངས་པ་ནི་ལྐོག་གྱུར་ཆགས་ཀྱི་ཡོད་པ་རེད། དེ་ནི་དངོས་པོའི་གཤིས་ལུགས་རེད། ད་ལྟའི་ཆར་ང་ཚོར་འཕྲད་བཞིན་པའི་གནམ་གཤིས་འགྱུར་ལྡོག་གིས་མཚོན་པའི་དཀའ་ངལ་གྱི་རིགས་ཁ་ཤས་ནི་རང་བྱུང་རེད། དཀའ་ངལ་རིགས་ཁ་ཤས་ནི་ང་ཚོ་མིས་བཟོས་པའི་དཀའ་ངལ་ཆགས་ཀྱི་ཡོད་རེད། རི་ལུང་དུ་གནས་པའི་སྟག་གཟིག་ལྟ་བུ་ཤ་གཟན་སེམས་ཅན་ཡིན་ནའང་གྲོད་ཁོག་རྒྱག་དུས་སེམས་ཅན་གསོད་ཀྱི་མ་རེད། ཡིན་ནའང་ང་ཚོ་འགྲོ་བ་མིའི་རིགས་ནི་སྐབས་རེར་དགོས་མེད་ཀྱི་རྣམ་རྟོག་སྐྱེས་པ་དང་། ངོས་རང་གི་བསམ་ཚུལ་ལ་བསམ་བློ་གུ་དོག་པོ་བྱས་པའི་དབང་གིས་ང་ཚོའི་འཛམ་བུ་གླིང་འདིའི་ནང་དུ་དཀའ་ངལ་མང་པོ་ཞིག་མིས་བཟོ་ཡི་འདུག དེ་ཡང་ལོ་ངོ་བརྒྱ་ཕྲག་ཁ་ཤས་ཀྱི་གོང་དུ་མིས་དཀའ་ངལ་བཟོས་ཡོད་རེད། ད་ལྟའི་དུས་རབས་འདི་ལའང་མིས་དཀའ་ངལ་བཟོས་ཡོད་རེད། དཔེར་ན་དམག་ཆེན་དང་པོ་དང་གཉིས་པ་ལྟ་བུ་རེད། དེའི་ཐོག་ལ་དཀའ་ངལ་བཟོས་པ་ཙམ་མ་ཡིན་པར་གོ་མཚོན་བཟོ་བའི་དོོན་དུ་དངུལ་འབོར་ཆེན་བེད་སྤྱོད་བཏང་ཡོད་རེད། ཅེས་དང་། ང་ཚོས་དྲག་རྩུབ་བྱེད་པ་ནི་མིའི་རང་བཞིན་ལྷན་སྐྱེས་དང་འགལ་བ་ཞིག་ཆགས་ཀྱི་ཡོད་པ་རེད། དེ་ཡང་དུས་ཚོད་ལ་ག་དུས་ཡིན་ནའང་འགྱུར་བ་འགྲོ་བཞིན་ཡོད་དུས། ང་ཚོས་ཆོས་རབ་ཏུ་རྣམ་འབྱེད་ཀྱི་ཤེས་རབ་ལ་བརྟེན་ནས་སེམས་ཀྱི་ཞི་བདེ་མ་འཁྲུགས་པ་དང་། སྲ་བརྟན་དུ་གཏོང་བ་དང་། དེ་ལ་བརྟེན་ནས་སོ་སོའི་མི་ཚེ་དོན་ལྡན་དང་། སྤྱི་ཚོགས་ནང་ཞི་བདེ་བག་ཕེབས་ཡོད་པ་བཟོ་དགོས་པ་དང་། དེ་ལས་རྒྱ་ཆེ་ས་ནས་ང་ཚོ་འགྲོ་བ་མི་ཡོངས་ཀྱིས་འཛམ་གླིང་ཞི་བདེ་ཅན་ཞིག་བསྐྲུན་ཐུབ་པ་ཏན་ཏན་ཡོང་གི་རེད། འདས་པའི་གནས་ཚུལ་འདས་ཟིན་པ་རེད། འདས་པའི་དུས་རབས་ནང་སོ་སོའི་མི་རིགས་དང་སོ་སོའི་རྒྱལ་ཁབ་ལ་བསམ་བློ་མང་པོ་བཏང་ཡོད་པ་རེད། ད་ལྟའི་ཆར་འཛམ་གླིང་སྤྱི་དང་འགྲོ་བ་མིའི་རིགས་སྤྱི་ལ་སེམས་ཁུར་ལེན་དགོས་པ་དངོས་ཡོད་གནས་ཚུལ་ཆགས་ཡོད། དེ་ལྟ་བུའི་བསམ་བློ་གཏོང་སྟངས་ནི་ངོས་རང་སྒེར་ལ་མཚོན་ནའང་ཧ་ཅང་ཕན་ཐོགས་ཆེན་པོ་བྱུང་། བསམ་བློ་ཡག་པོ་བཏང་བ་ཡིན་ན་གོ་མཚོན་དང་དམག་མི་ངེས་པར་དུ་དགོས་ཀྱི་ཡོད་མ་རེད། ང་ཚོ་ཕན་ཚུན་འབྲེལ་བ་ཡོད་པའི་གནས་སྟངས་ལ་བརྟེན་ནས་འགྲོ་བ་མི་རྣམས་ལ་གཅིག་མཚུངས་ཀྱི་འདུ་ཤེས་ཏན་ཏན་ཡོང་ཐུབ་ཀྱི་རེད། ཅེས་བཀའ་ལན་གནང་སོང་།

དེ་ནས་སེམས་ཁམས་དང་དེའི་ནང་གི་སེམས་བྱུང་ཕྲ་རག་གི་སྐོར་ལ་ཉམས་ཞིབ་གནང་མཁན་དང་ཨེ་རི་རྫོ་ནཱ་མངའ་སྡེའི་གཙུག་ལག་སློབ་གཉེར་ཁང་གི་སློབ་དཔོན་མཱ་ཁིལ་ལཱ་ནི་སའོ་ཊ་ལགས་ཀྱིས(Michelle “Lani” Shiota) ལགས་ཀྱིས། འཛམ་གླིང་འདིའི་གནས་སྟངས་ག་རེ་ཡིན་པ་ཤེས་བཞིན་པའི་སྐབས་མ་བརྗེད་པའི་ཐོག་ནས་ང་རང་ཚོའི་སེམས་ཀྱི་ཞི་བདེ་མ་བརླག་པ་ག་འདྲ་བྱ་དགོས་སྐོར་བཀའ་འདྲི་ཞུས་པར་༧གོང་ས་མཆོག་གིས། དེང་སང་གནམ་གཤིས་ཀྱི་འགྱུར་བ་འགྲོ་སྟངས་གཙོས་པའི་འཛམ་གླིང་སྤྱིའི་དཀའ་ངལ་དེ་དག་གིས། ད་ལྟའི་ཆར་ང་ཚོར་གཅིག་གྱུར་གྱི་འདུ་ཤེས་བཅངས་པར་དྲན་སྐུལ་ཤུགས་ཆེན་པོ་གཏང་ཡོང་གི་འདུག དེར་བརྟེན་ཕན་ཚུན་འགྲན་སེམས་བྱས་ནས་བསྡད་པ་ལས་ཐུན་མོང་དུ་ནུས་པ་འདོན་པ་དེ་གལ་ཆེ་བ་ཡོད་པ་རེད། རྒྱུ་མཚན་ནི་ང་ཚོ་མཉམ་དུ་འཚོ་དགོས་ཀྱི་ཡོད་རེད། རང་གཅེས་འཛིན་གྱི་སོ་སོའི་ཁེ་ཕན་ཁོ་ནར་བསམ་བློ་བཏང་ནས་གོ་མཚོན་མང་པོ་བཟོས་པ་དང་འགྲོ་སོང་ཚང་མ་དེ་ལ་བཏང་ནས་མཐའ་མ་མི་གསོད་པ་དེ་འདྲ་བྱས་ན་ཕན་ཐོགས་མེད་པ་རེད། འདས་པའི་མི་རབས་སྔ་མ་ཚོས་གོ་མཚོན་བཟོས་པའི་དོན་དུ་དངུལ་དང་དམག་མི་བཟོས་པའི་སླད་དུ་འགྲོ་སོང་མང་པོ་བཏང་བ་རེད། དེའི་དབང་གིས་གྲུབ་འབྲས་ནི་སྡུག་བསྔལ་མང་བ་དང་མི་མང་པོ་གསོད་རེས་བཏང་ཡོང་གི་འདུག དེས་ན། ང་ཚོ་གོ་མཚོན་མེད་པའི་ཐོག་ནས་མཉམ་དུ་འཚོ་དགོས་པ་ལས་ཐབས་ལམ་གཞན་པ་ཡོད་མ་རེད། ཐོག་མར་ང་ཚོས་ངེས་པར་དུ་དྲན་དགོས་པ་ཞིག་ལ་ཁོང་ཁྲོ་ཟེར་བ་དེ་བེད་སྤྱོད་མེད་པ་རེད། ཁོང་ཁྲོའི་དབང་གིས་དངངས་སྐྲག་ཡོང་གི་ཡོད་པ་རེད། ཞེ་སྡང་གི་དབང་གིས་བྱུང་བའི་དངངས་སྐྲག་གིས་དྲག་རྩུབ་ཀྱི་བྱ་སྤྱོད་མང་པོ་བྱུང་གི་ཡོད་པ་རེད། ང་ཚོར་དགོས་པ་ནི་ནང་གི་སེམས་ཀྱི་ཞི་བདེ་དགོས་ཀྱི་ཡོད་པ་རེད། དེ་ཡང་དད་པ་ཙམ་མིན་པར་རྒྱུ་མཚན་གཞི་ལ་བཞག་ནས་བསམ་བློ་བཏང་ནས་ཞི་བདེ་བསྐྲུན་དགོས་རྒྱུ་དེ་རེད། འཛམ་གླིང་འདིའི་ནང་ཡོད་པའི་མི་སུ་འདྲ་ཞིག་ཡིན་རུང་གཞི་རྩའི་འགྲོ་བ་མི་ཡིན་པ་གཅིག་གྱུར་གྱི་འདུ་ཤེས་དགོས་པ་ནི་ངེས་པར་དུ་སེམས་སུ་ངེས་དགོས་པ་དེ་ཧ་ཅང་གིས་གལ་ཆེན་པོ་རེད། གཞན་དོན་བསམ་པས་སེམས་སུ་བདེ་སྐྱིད་ཡོང་བ་དང་རང་དོན་ཁོ་ན་བསམ་པས་སེམས་མ་སྐྱིད་པ་ཡོང་གི་ཡོད་པ་རེད། ཇི་ཙམ་གྱིས་གཞན་དོན་གྱི་བློ་བསྐྱེད་པའི་ཚོད་ཀྱིས། རང་གི་སེམས་ལ་ཞི་བདེ་རང་བཞིན་གྱིད་ཡོང་གི་ཡོད་སྐོར་སོགས་བཀའ་ལན་སྩལ།

ཡང་ཨེ་རི་རྫོ་ནཱ་མངའ་སྡེའི་གཙུག་ལག་སློབ་གཉེར་ཁང་གི་སློབ་དཔོན་མཱ་ཁིལ་ལཱ་ནི་སའོ་ཊ་ལགས་ཀྱིས། ད་ལྟ་དུས་རབས་ཉེར་གཅིག་ཆགས་ཡོད་དུས་མིའི་སེམས་དང་སྤྱོད་པ་ལ་ཉམས་ཞིབ་བྱེད་མཁན་དབང་རྩའི་ཚན་རིག་པ་དང་སེམས་ཁམས་ཚན་རིག་པ། སྨན་བཅོས་ཞིབ་དཔྱོད་ཚན་རིག་པ་དེ་དག་གིས་རྟོག་ཞིབ་བྱེད་དགོས་པའི་གནད་དོན་གསར་པ་ག་རེ་ཡོད་སྐོར་བཀའ་འདྲི་ཞུས་པར་༧མགོན་པོ་མཆོག་གིས། བྱང་ཆུབ་སེམས་པ་དང་སྟོང་ཉིད་ཀྱི་ལྟ་བ་ཟེར་བ་ནི་ཡིད་བློའི་སྒང་ནས་སྒྲུབ་ཀྱི་ཡོད་རེད། སྒོ་ལྔའི་ཤེས་པ་མ་རེད། སྒོ་ལྔའི་ཤེས་པས་ཕྱི་ལོགས་ཀྱི་གནས་ཚུལ་མཐོང་བསྡད་པ་རེད། དེའི་རྐྱེན་གྱིས་སེམས་ལ་དགའ་སྡུག་གི་ཚོར་བ་ཡོང་བ་དེ་ཡིད་བློའི་སྟེང་ནས་ཡོང་གི་ཡོད་པ་རེད། དེར་བརྟེན། སྒོ་ལྔའི་ཤེས་པ་མ་ཡིན་པའི་ཡིད་བློའི་འགྲོ་སྟངས་དེ་ཀླད་པ་དང་འབྲེལ་བ་གང་འདྲ་ཡོད་མེད་ཀྱི་ཐོག་ལ་རྟོག་ཞིབ་དང་། ཀླད་པར་འགྱུར་བ་བཏང་ནས་སེམས་ཁམས་རིག་པ་འགྱུར་བ་གཏོང་རྒྱུ་ཁག་པོ་རེད་དེ། དབང་པོའི་ཤེས་པ་དང་ཡིད་ཀྱི་རྣམ་ཤེས་ཀྱི་འགྲོ་སྟངས་དེ་ཚོའི་ཐོག་ལ་ཀླད་པའི་ཚན་རིག་པ་དང་མཉམ་དུ་གོ་བསྡུར་བྱས་ནས། ཚན་རིག་པ་སེམས་ཁམས་རིག་པའི་ཐོག་ལ་དོ་སྣང་ཡོད་མཁན་ཚོས་སྤྱིར་སངས་རྒྱས་པའི་ཆོས། ཡང་སྒོས་ན་ལེནྜའི་མཁས་དབང་ཚོའི་ལུང་ཙམ་ལ་སྐྱབས་སུ་མཆིས་པ་མིན་པར་རིགས་པའི་ལམ་ལ་བརྟག་དཔྱད་བྱེད་དགོས་ཀྱི་ཡོད་སྐོར་གསུངས་སོང་།

གསར་འགོད་པ། བསྟན་འཛིན་ཕུར་བུ།