ཁ་སང་ཕྱི་ཚེས་ ༢༦ ཉིན་ལྷོ་ཨ་ཧྥི་རི་ཁའི་ཆོས་དཔོན་ཌེ་སི་མོན་ཊུ་ཊུ་མཆོག་སྐུ་གྲོངས་པའི་གནས་ཚུལ་གསན་པ་དང་། ༧གོང་ས་རྒྱལ་བ་རིན་པོ་ཆེ་མཆོག་གིས། དམ་པ་ཁོང་གི་སྲས་མོ་ལྕམ་མི་ཧྥོ་ཊུ་ཊུ་ (Rev. Mpho Tutu) ལགས་ཀྱི་མཚན་ཐོག་ཏུ་ཐུགས་གསོའི་གསུང་འཕྲིན་ཞིག་སྩལ་ཏེ། དམ་པ་ཁོང་གི་ཤུལ་ལུས་ནང་མི་ཡོངས་ལ་ཐུགས་གསོ་ཞུས་གནང་འདུག
མགོན་པ་གང་ཉིད་མཆོག་གིས་གསུང་འཕྲིན་ནང་། ངོས་ཀྱི་སེམས་བསམ་པའི་ཐུགས་གསོ་འདི་དང་ལེན་གནང་རོགས་ཞུ། དེ་བཞིན། ཁྱེད་ཀྱི་ཡུམ་ཆེན་དང་ནང་མི་གཞན་དག་ལའང་ངོས་ཀྱི་ཁོང་གི་སླད་དུ་སྨོན་ལམ་རྒྱག་གི་ཡོད་པ་ཞུ་རོགས། ཁྱེད་ཀྱིས་མཁྱེན་གསལ་རེད། ངོས་དང་ཁྱེད་ཀྱི་ཡབ་ཆེན་དམ་པ་ངེད་གཉིས་ཀྱིས་ལོ་མང་རིང་འགྱུར་མེད་ཀྱི་གྲོགས་པོའི་བརྩེ་འདང་རོལ་རྒྱུ་བྱུང་།
ཕྱི་ལོ་ ༢༠༡༥ ལོར་དྷ་རམ་ས་ལ་མཚོན་པའི་ལྷན་འཛོམས་དུས་སྐབས་མང་པོའི་ཁྲོད། ངེད་གཉིས་ཀྱིས་འཛམ་གླིང་ནང་ཞི་བདེ་དང་བདེ་སྐྱིད་བསྐྲུན་ཐབས་ཐད་བསམ་ཚུལ་བརྗེ་རེས་བྱ་རྒྱུ་བྱུང་བ་ངོས་ནས་དྲན་གྱི་འདུག ངེད་གཉིས་ཀྱིས་ཆོས་ཕྱོགས་དང་གྲོགས་པོའི་བརྩེ་འདང་ལ་ཧ་ཅང་གཅེས་སྤྲད་བྱས་ཡོད།
ཨར་ཆི་བྷི་ཤོབ་ཌེ་སི་མོན་ཊུ་ཊུ་མཆོག་གིས་སྐུ་ཚེ་ཧྲིལ་པོ་རང་གི་མཆེད་གྲོགས་གཅེན་གཅུང་ཕོ་མོ་རྣམས་ཀྱི་ཐུན་མོང་གི་ཁེ་ཕན་སླད་དུ་བློས་བཏང་གིས་ཞབས་འདེགས་ཞུས་ཡོད། དམ་པ་ཁོང་ནི་དོ་དམ་པའི་འགྲོ་བ་མིའི་བདེ་སྡུག་ལ་ཐུགས་ཁུར་དང་བློ་རྩ་བརྟན་པོའི་སྒོ་ནས་འགྲོ་བ་མིའི་ཐོབ་ཐང་སྲུང་སྐྱོབ་མཁན་ཞིག་རེད། ཁོང་གིས་རྩོད་རྙོག་འདུམ་འགྲིག་དང་བདེན་པའི་དོན་དུ་གནང་བའི་ཕྱག་ལས་དག་ནི། འཛམ་གླིང་མི་མང་པོ་ཞིག་ལ་སེམས་ཤུགས་བསྐྱེད་ཡུལ་ཆགས་བསྡད་ཡོད།
དམ་པ་ཁོང་གི་སྐུ་ཚེའི་དགོངས་པ་རྫོགས་པ་ནི། ང་ཚོར་མཚོན་ན་མི་ཚེ་དོན་དང་ལྡན་པ་སྐྱེལ་ཐུབ་པའི་རླབས་ཆེན་གྱི་སྐྱེས་བུ་ཞིག་སྐུ་གཤེགས་པ་ཡིན། ཁོང་གིས་རང་ཉིད་བློས་གཏོང་གིས་གཞན་ལ་ཞབས་འདེགས་ཞུས་པ་དང་དམིགས་བསལ་གྱིས་ཉམ་ཐག་གི་རིགས་ལ་ཞབས་འདེགས་ཞུས་ཡོད། ང་ཚོས་དམ་པ་ཁོང་ལ་རྗེས་སུ་ཡི་རང་ཞུ་རྒྱུ་དང་། ཁོང་སྐུ་འཚོ་བཞུགས་སྐབས་མི་གཞན་ལ་ཕན་ཐོགས་མཁན་ཞིག་ཆགས་པ་ནང་ལྟར། ང་ཚོས་ཁོང་གི་སྙིང་སྟོབས་རྒྱུན་འཛིན་གྱིས་གཞན་ལ་རོགས་རམ་བྱེད་ཐུབ་མཁན་ཞིག་ཏུ་འགྱུར་བར་བལྟ་དགོས། ཞེས་གསུངས།
ནོ་བྷེལ་ཞི་བདེ་གཟེངས་རྟགས་བཞེས་མྱོང་མཁན་ཡི་ཤུའུ་ཆོས་དཔོན་དམ་པ་ཌེ་སི་མོན་ཊུ་ཊུ་མཆོག་ཕྱི་ལོ་ ༢༠༡༢ དང་ ༢༠༡༥ གཉིས་ལ་ཆེད་དུ་བཞུགས་སྒར་དྷ་རམ་ས་ལར་ཕེབས་ཏེ། ༧གོང་ས་མཆོག་ལ་མཇལ་བཅར་ཞུས་མྱོང་བ་དང་། ཕྱི་ལོ་ ༢༠༡༡ ལོར་ཆོས་དཔོན་དམ་པ་ཊུ་ཊུ་མཆོག་དགུང་གྲངས་ ༨༠ ཕེབས་པའི་འཁྲུངས་སྐར་སྟེང་༧གོང་ས་མཆོག་གདན་ཞུ་གནང་ཡོད་ཀྱང་། སྐབས་དེར་ལྷོ་ཨ་ཧྥི་རི་ཁ་གཞུང་གིས་རྒྱ་ནག་གཞུང་གི་གནོད་ཤུགས་འོག་༧གོང་ས་མཆོག་ལ་ཐོངས་མཆན་སྤྲད་མེད་པ་རེད། ༧གོང་ས་མཆོག་དང་དམ་པ་ཁོང་རྣམ་གཉིས་ཀྱིས་མཛད་པའི་བདེ་སྐྱིད་ཀྱི་དེབ་ཅེས་པའི་དཔེ་དེབ་ཅིག་ལྗགས་རྩོམ་གནང་ཡོད་པར་རྒྱལ་སྤྱིའི་སྟེང་གདེང་འཇོག་ཆེན་པོ་ཐོབ་ཡོད།
གསར་འགོད་པ། སྐལ་བཟང་སྦྱིན་པ།
དམ་པ་ཁོང་གི་སྐུ་ཚེའི་དགོངས་པ་རྫོགས་པ་ནི། ང་ཚོར་མཚོན་ན་མི་ཚེ་དོན་དང་ལྡན་པ་སྐྱེལ་ཐུབ་པའི་རླབས་ཆེན་གྱི་སྐྱེས་བུ་ཞིག་སྐུ་གཤེགས་པ་ཡིན། ཁོང་གིས་རང་ཉིད་བློས་གཏོང་གིས་གཞན་ལ་ཞབས་འདེགས་ཞུས་པ་དང་དམིགས་བསལ་གྱིས་ཉམ་ཐག་གི་རིགས་ལ་ཞབས་འདེགས་ཞུས་ཡོད། ང་ཚོས་དམ་པ་ཁོང་ལ་རྗེས་སུ་ཡི་རང་ཞུ་རྒྱུ་དང་། ཁོང་སྐུ་འཚོ་བཞུགས་སྐབས་མི་གཞན་ལ་ཕན་ཐོགས་མཁན་ཞིག་ཆགས་པ་ནང་ལྟར། ང་ཚོས་ཁོང་གི་སྙིང་སྟོབས་རྒྱུན་འཛིན་གྱིས་གཞན་ལ་རོགས་རམ་བྱེད་ཐུབ་མཁན་ཞིག་ཏུ་འགྱུར་བར་བལྟ་དགོས། ཞེས་གསུངས།