བྲག་མགོ་ནས་བོད་མི་བཅུ་གྲངས་ཤིག་འཛིན་བཟུང་བྱས་ཡོད་འདུག

རྒྱ་ནག་གཞུང་གིས་བྲག་མགོ་དགོན་པའི་སྟོན་པ་དང་བྱམས་པའི་སྐུ་བརྙན། ད་དུང་མ་ཎི་ལག་འཁོར་བཅས་གཏོར་བཤིག་བཏང་བ་དང་འབྲེལ། སེར་སྐྱ་བཅུ་ལྷག་འཛིན་བཟུང་གིས་ཉེས་རྡུང་བཏང་ཡོད་འདུག

འདི་གའི་གསར་འགོར་པས་རྒྱ་གར་ནང་གནས་བཞུགས་དགེ་འདུན་པ་ཁག་ཅིག་ལ་བཀའ་འདྲི་ཞུས་ཏེ་རྒྱུས་ལོན་བྱུང་བའི་གནས་ཚུལ་ལྟར་ན། ཉེ་ལམ་རྒྱ་ནག་གཞུང་གིས་བྲག་མགོའི་ནང་རིག་གནས་གསར་བརྗེ་བསྐྱར་སྤེལ་ལྟ་བུའི་ཆོས་དད་རང་དབང་ལ་བཀག་སྡོམ་གྱིས་དྲག་གནོན་བྱས་པ་དང་ལྷན་དུ། ད་ལྟ་གསར་དུ་བྲག་མགོ་དགའ་ལྡན་རབ་བརྟན་རྣམ་རྒྱལ་གླིང་དགོན་པའི་ཆོས་རའི་ཉེ་འཁྲིས་སུ་ཡོད་པའི་མཐོ་ཚད་ལ་ཐོག་བརྩེགས་ ༣ ཅན་གྱི་རྗེ་བཙུན་བྱམས་པ་མགོན་པོའི་སྐུ་བརྙན་ཞིག་ཀྱང་གཏོར་བཤིག་བཏང་ཡོད་པའི་གནས་ཚུལ་ཐོན་པ་མ་ཟད། བོད་མིའི་ལུས་ངག་ཡིད་ཀྱི་དད་རྟེན་དུ་གྱུར་བའི་སངས་རྒྱས་ཀྱི་སྐུ་གཏོར་བཤིག་བཏང་བའི་དོན་རྐྱེན་དང་འབྲེལ། བྲག་མགོའི་དགོན་གྲོང་གཉིས་ཀྱི་སེར་སྐྱ་མི་མང་ ༡༠ ལྷག་འཛིན་བཟུང་གིས་ཉེས་རྡུང་བཏང་ཡོད་འདུག

གནས་ཚུལ་མཁོ་སྤྲོད་པས། འཛིན་བཟུང་བྱས་པའི་མི་དེ་དག་གི་ཁྲོད། དགོན་པའི་མཁན་པོ་དཔལ་དགའ་ལགས་དང་ཕྱག་མཛོད་ཉི་མ་ལགས། གྲྭ་བཀྲ་ཤིས་རྡོ་རྗེ་ལགས་དང་ཉི་མ་ལགས། དེ་བཞིན། སངས་རྒྱས་ཀྱི་སྐུ་རྟེན་དེ་དག་དང་འབྲེལ་བའི་ལྷ་རིས་པའི་བུ་བཀྲོལ་པ་ལགས། རྣམ་འགྱུར་ཡག་པོ་མེད་ཚུལ་བརྗོད་དེ། ལྷ་མོ་དབྱངས་སྐྱིད་དང་ཚེ་རིང་བསམ་འགྲུབ་བཅས་ཁྱོན་དྲུག་ཙམ་འཛིན་བཟུང་བྱས་ཡོད་ཀྱང་། དམ་དྲག་འོག་བོད་མི་གཞན་རྣམས་ཀྱི་མིང་དང་གནས་སྟངས་ཇི་ཆགས་ཤེས་རྟོགས་ཐུབ་ཁག་པོ་ཡིན་པ་དང་། དགུན་ཁའི་གནམ་གཤིས་གྲང་བའི་སྐབས་དང་བསྟུན་ནས། ལྷ་མོ་དབྱངས་སྐྱིད་ལགས་ཀྱི་ལུས་སྟེང་དུ་ཆུ་འཁྱག་བཤོས་ནས་མནར་གཅོད་བཏང་ཡོད་སྐོར་སོགས་གསུངས་བྱུང་།

འདས་ལོའི་ཕྱི་ཟླ་ ༡༡ ཚེས་ ༣ ཉིན་ས་གནས་སྲིད་གཞུང་གི་དམར་ཤོག་མགོ་ཁྲིད་ཚོས་བྲག་མགོ་དགོན་པའི་འཛིན་སྐྱོང་འོག་ཡོད་པའི་དགེ་ལྡན་ནང་བསྟན་སློབ་གྲྭར་ཡིག་ཆ་ཚད་ལྡན་མེད་པར་བརྙད་ནས་སྒོ་བརྒྱབ་བཅུག་ཡོད་པ་དང་། ཕྱི་ཟླ་ ༡༢ ཚེས་ ༢༣ ཉིན་བྱེས་ཀྱི་འབྲས་སྤུངས་བློ་གསལ་གླིང་གི་ཏྲེ་ཧོར་བྲག་མགོ་ཐོས་བསམ་དགའ་ཚལ་གྱིས། རྒྱ་ནག་གཞུང་གིས་ས་གནས་བོད་མི་རྣམས་ཀྱིས་རྒྱུན་དུ་ཕྱག་སྐོར་ར་དང་། ཁ་འདོན་དགེ་སྒྲུབ་བྱེད་སའི་དགོན་པའི་ཉེ་འདབས་ཀྱི་མ་ཎི་ལག་འཁོར་གྲངས་ ༤༥ དང་མཐོ་ཚད་སྨིད་༩༩ ལྷག་ཅན་གྱི་ཐུབ་དབང་གི་སྐུ་བརྙན་ཞིག་ཡོད་པ་སོགས་གཏོར་བཤིག་བཏང་ཡོད་པ་མ་ཟད།  མ་ཎི་དར་ལྕོག་དང་སྒོ་དར་སོགས་བཙན་གྱིས་ཕབ་བཅུག་ནས་མེར་སྲེག་བཏང་དུ་བཅུག་ཡོད་སྐོར་གསལ་བསྒྲགས་སྤེལ།

རྒྱ་ནག་གཞུང་གིས་གཏོར་བཤིག་བཏང་བའི་ཐུབ་དབང་གི་སྐུ་བརྙན་དེ་ནི། ཕྱི་ལོ་ ༢༠༡༥ ཟླ ༡༠ ཚེས་ ༥ ཉིན་བྲག་མགོའི་མི་མང་གིས་རྒྱ་སྒོར་ས་ཡ་ ༤༠ ལྷག་གི་འགྲོ་གྲོན་བཏང་སྟེ་གསར་བཞེངས་གནང་ཡོད་པ་དང་། སྐུ་བརྙན་བཞེངས་པར་སྲིད་གཞུང་གི་ཆོག་མཆན་ཡིག་ཆ་ཚད་ལྡན་ཡོད་འདུག་ལ། དེ་བཞིན་དགེ་ལྡན་ནང་བསྟན་སློབ་གྲྭར་ཡིག་ཆ་ཚད་ལྡན་ཡོད་ཀྱང་། གསར་འགོད་པས་རྒྱུས་ལོན་བྱུང་བ་ལྟར་ན། ད་ལྟ་བོད་ཁམས་ཡོངས་སུ་རྒྱ་ནག་གཞུང་གིས་བོད་བརྒྱུད་ནང་བསྟན་རྒྱ་ནག་ཅན་དུ་བསྒྱུར་བ་ཞེས་པའི་སྲིད་ཇུས་ལག་བསྟར་གྱི་གནས་སྟངས་འོག འདས་ལོའི་ཕྱི་ཟླ་ ༡༠ ནང་བྲག་མགོ་རྫོང་སྲིད་གཞུང་ནང་ཉག་རོང་དུ་སྐྱེས་པའི་ཝང་ཏུང་ཧྲིན་(王东升) ཟེར་བའི་བོད་རིགས་ཤིག་ས་གནས་དམར་ཤོག་དྲུང་ཆེ་རུ་གནས་སྤོར་བྱས་ཡོད་པ་དང་། སྐབས་དེར་ཁོས། རང་གིས་བྱ་བ་གང་ཞིག་བསྒྲུབ་འདོད་ན་དེ་ལ་དབུས་གཞུང་གི་རྒྱབ་སྐྱོར་ཡོད་ཟེར་བའི་སྐད་ཆ་ཞིག་བཤད་རྗེས། ཟླ་གཅིག་ཙམ་ལས་མ་འགོར་བར་དགེ་ལྡན་ནང་བསྟན་སློབ་གྲྭ་སྒོ་བརྒྱབ་པའི་གནས་ཚུལ་བྱུང་ཡོད་ལ། མང་ཚོགས་ཁྲོད་རྫོང་སྲིད་གཞུང་གི་མགོ་ཁྲིད་གསར་བར་མི་དགའ་བའི་ཚོར་ཤུགས་ཆེན་པོ་ཡོད་པ་འབྲེལ་ཡོད་བོད་མི་ཞིག་གིས་འདི་གར་འགྲེལ་བརྗོད་གནང་བྱུང་། བོད་མིའི་རང་གིས་རིག་གཞུང་དང་སྐད་ཡིག་སོགས་སྲུང་སྐྱོབ་བྱེད་ཐུབ་མིན་ནི་ས་གནས་མགོ་ཁྲིད་ཀྱི་བྱ་སྤྱོད་ལ་ཧ་ཅང་རག་ལས་པ་ཞིག་ཀྱང་ཡིན་པ་རེད།

ཝང་ཏུང་ཧྲིན་(王东升) ཟེར་བའི་དམར་ཤོག་དཔོན་རིགས་ཁོས།  ཕྱི་ལོ་ ༢༠༡༦ ལོར་གསེར་རྟ་བླ་རུང་ཆོས་སྒར་གྱི་གྲྭ་ཤག་ ༤༥༠༠ དང་ཕྱི་ལོ་ ༢༠༡༧ ལོར་གྲྭ་ཤག་ ༣༢༢༥ ཙམ་གཏོར་བཤིག་དང་། དེ་བཞིན་དུ་ཕྱི་ལོ་ ༢༠༡༧ ལོར་ཕྱོགས་མཐའ་ཁག་གི་གྲྭ་བཙུན་ ༣༧༢༩ དང་། ཕྱི་ལོ་ ༢༠༡༧ ལོར་གྲྭ་བཙུན་ ༨༩༥ བཅས་བཙན་གྱིས་ཕྱིར་ཕུད་བཏང་ཡོད་པ་རེད་ལ། ཕྱི་ལོ་ ༢༠༡༦ ཟླ་ ༡༢ པའི་ནང་ཁོ་གསེར་རྟ་ཕྱོགས་ཀྱི་དམར་ཤོག་ཚོགས་པའི་དྲུང་ཆེ་གཞོན་པར་བསྐོས་པ་དང་། དེ་རྗེས་གསེར་རྟ་རྫོང་གི་རྫོང་དཔོན་དུ་བསྐོས་ཡོད་འདུག

གསར་འགོད་པ། སྐལ་བཟང་སྦྱིན་པ།