འཛམ་གླིང་ནང་མིའི་ལུས་པོར་ཕག་སྙིང་སྤོ་འཛུགས་ཐོག་མ་ལེགས་འགྲུབ་བྱུང་།

ཨ་རིའི་མའེ་རེ་ལན་ཌི་སྨན་གྱི་གཙུག་ལག་སློབ་གྲྭས་བཅོས་སྒྲིག་བྱས་པའི་ཕག་སྙིང་ཞིག་འཆི་གསོན་གྱི་གནས་སྟངས་ལ་ཐུག་པའི་མི་ཞིག་གི་ལུས་པོར་སྤོ་འཛུགས་བྱས་པ་ལེགས་འགྲུབ་བྱུང་ཡོད་འདུག

དེ་རིང་རྒྱལ་སྤྱིའི་གསར་འགྱུར་བརྒྱུད་ལམ་ཁག་གིས་གནས་ཚུལ་སྤེལ་བ་ལྟར་ན། ཨ་རིའི་ནང་རང་ལོ་ ༥༧ ཅན་གྱི་སྐྱེས་པ་ཌ་ཝི་ཊི་ (David Bennett) ཞུ་བ་ཞིག་སྙིང་ནད་ཀྱིས་ཡུན་རིང་མནར་ཏེ་དཀའ་ངལ་བསྟུད་མར་འཕྲད་ཀྱི་ཡོད་སྟབས། ཨ་རིའི་མའེ་རེ་ལན་ཌི་སྨན་གྱི་གཙུག་ལག་སློབ་གྲྭ་ ( University of Maryland Medicine ) ཆེན་མོས་ཁོང་ལ་རྒྱུ་རྫས་བཅོས་སྒྲིག་བྱས་པའི་ཕག་པའི་སྙིང་ཞིག་གཤག་བཅོས་ཀྱི་ལམ་ནས་སྤོ་འཛུགས་བྱས་ཏེ་ཉིན་གྲངས་གསུམ་ལྷག་ཕྱིན་ཡོད་ཀྱང་། ད་ལྟ་ཁོང་ལ་དམིགས་བསལ་གྱི་དཀའ་ཁག་གང་ཡང་མེད་པར་བདེ་འཚམ་ཡིན་པར་བརྟེན།  གཤག་བཅོས་དེ་ནི་འཛམ་གླིང་ནང་རྒྱུ་རྫས་བཅོས་སྒྲིག་བྱས་ནས་མི་ལ་ཕག་པའི་སྙིང་སྤོ་འཛུགས་བྱས་པའི་གཤག་བཅོས་ཐེངས་དང་པོ་དེ་ཆགས་ཡོད་པ་མ་ཟད། ལུས་ཀྱི་ནང་ཁྲོལ་དང་དམིགས་བསལ་སྙིང་ནད་ཅན་གྱི་མི་རྣམས་ལ་རེ་བ་གསར་པ་ཞིག་བསྐྲུན་ཐུབ་ཡོད་འདུག

དེ་འབྲེལ་བྷི་བྷི་སིའི་གནས་ཚུལ་ནང་། ད་ལྟ་སྨན་པ་དང་སྨན་ཞབས་པ་རྣམས་ཀྱིས་ཉིན་ལྟར་སྐུ་ཞབས་ཌ་ཝི་ཊི་ལགས་ཀྱི་འགོག་སྲུང་མ་ལག་གི་གཙོས་སྤྱི་ཡོངས་ཀྱི་ལུས་པོའི་གནས་སྟངས་ལ་ལྟ་རྟོག་དང་སྨན་བཅོས་བྱེད་མུས་ཡིན་པ་དང་། ཨ་རིའི་མའེ་རེ་ལན་ཌི་སྨན་གྱི་གཙུག་ལག་སློབ་གྲྭའི་སྨན་པ་བྷ་ཊི་ལའེ་ ( Dr. Bartley P. Griffith) ཀྱིས། ད་ལན་གྱི་གཤག་བཅོས་འདིས། འཛམ་གླིང་ནང་མི་རིགས་ལ་ནང་ཁྲོལ་ལམ་ལུས་པོའི་དབང་པོ་འདང་ངེས་མེད་པའི་དཀའ་ཁག་སེལ་བར་གོམས་གང་མདུན་སྤོ་བྱས་ཡོད། ཅེས་བརྗོད་ཡོད་པ་དང་། ད་ལྟ་ཨ་རིའི་ནང་མི་གྲངས་འབུམ་གཅིག་ལྷག་གཤག་བཅོས་ལ་སྒུག་བཞིན་ཡོད་པ་ལས། ཉིན་རེར་མི་གྲངས་ ༡༧ འདས་གྲོངས་སུ་འགྲོ་ཡི་ཡོད་པ་རེད།

སྙིང་གཤག་བཅོས་མ་བྱས་པར་སྔ་ཉིན་དེར་སྐུ་ཞབས་ཌ་ཝི་ཊི་ལགས་ཀྱིས།  གཤག་བཅོས་མ་བྱས་ན་ཤི་དགོས་སྟབས། ཐག་གཅོད་འདི་ནི་ནག་ཁུངས་ནང་མདའ་འཕངས་པ་ལྟ་བུ་ཞིག་ཡིན་ཡང་། དེ་ནི་ངའི་ཆེས་མཐའ་མཇུག་གི་རེ་བ་ཡིན། ཞེས་བརྗོད་ཡོད་པ་དང་། སྐུ་ཞབས་ཌི་ཝི་ཊི་ལགས་སུ་ཡུན་རིང་སྙིང་ནད་ཀྱིས་མནར་ནས་དཀའ་ངལ་ཆེན་པོ་མྱངས་ཡོད་པ་མ་ཟད། ཁོང་ལ་མིའི་སྙིང་བརྗེ་བསྒྱུར་བྱེད་ཐུབ་ཀྱི་མེད་པ་ཡིན་སྟབས། འདས་ལོའི་ཕྱི་ཟླ་ ༡༢ ཚེས་ ༣༡ ཉིན་ཨ་རིའི་ཟས་རིགས་དང་ཉེས་དུག་དོ་དམ་ལྷན་ཁང་གིས། ནད་པ་འཆི་གསོན་གྱི་ཛ་དྲག་གི་གནས་སྟངས་འོག་ཆོག་མཆན་སྤྲད་པ་བརྒྱུད། ཨ་རིའི་མའེ་རེ་ལན་ཌི་སྨན་གྱི་གཙུག་ལག་སློབ་གྲྭའི་སྨན་པ་དག་གིས་བཅོས་སྒྲིག་བྱས་པའི་ཕག་སྙིང་ཞིག་ཁོང་ལ་སྤོ་འཛུགས་བྱས་ཡོད་འདུག་ལ། སྨན་བཅོས་ལྟ་སྐྱོང་ཚན་པ་དེས་ཉེ་བའི་ལོ་གཅིག་ཙམ་གྱི་རིང་ཉམས་ཞིབ་ཚད་ལྡན་གནང་བ་བརྒྱུད། གཤག་བཅོས་དེས་འཛམ་གླིང་གི་མི་མང་པོ་ཞིག་གི་ཚེ་སྲོག་སྐྱོབ་ཐུབ་པར་རེ་བ་བཅངས་ཀྱི་ཡོད་འདུག

འདས་ལོའི་ཕྱི་ཟླ་ ༡༡ ནང་ཨ་རིའི་གཙུག་ལག་སློབ་གྲྭ་ཆེན་མོ་དེས། ཀླད་པའི་བྱེད་ནུས་བེད་མེད་དུ་གྱུར་བའི་བུད་མེད་ཞིག་གི་མཁལ་མའི་ཚབ་ཏུ་རྒྱུ་རྫས་བཟོ་སྒྲིག་བྱས་པའི་ཕག་གི་མཁལ་མ་ཞིག་སྤོ་འཛུགས་བྱས་ཡོད་འདུག་ལ། སྐབས་དེའི་གཤག་བཅོས་ལེགས་འགྲུབ་བྱུང་ཡོད་སྟབས། འཛམ་གླིང་ནང་མི་རིགས་ཀྱི་ལུས་ཀྱི་ནང་ཁྲོལ་ལམ་དབང་པོ་བརྗེ་བསྒྱུར་བྱེད་པར་རེ་བ་གསར་པ་ཞིག་རྙེད་ཡོད་སྐོར་བརྗོད་ཡོད།

གསར་འགོད་པ། དཔལ་ལྡན།་