བོད་མི་ཚོས་ནད་རྟགས་ཡོད་མེད་ལ་མ་ལྟོས་པར་རིམས་ནད་འདི་སྣང་མེད་དུ་མི་འཇོག་མི་ཉན་པར། སྤྱི་སྒེར་ཚང་མའི་བདེ་འཇགས་ཀྱི་སླད་དུ་ངེས་པར་སྔོན་འགོག་གི་ཐབས་ལམ་སོགས་ལ་བསྟེན་ནས་ཡིད་གཟབ་གནང་དགོས་པ་སོགས་ཀྱི་ལམ་སྟོན་གནང་།
ཁ་སང་ཕྱི་དྲོར་བོད་མིའི་སྒྲིག་འཛུགས་ཀྱི་ཏོག་དབྱིབས་ཛ་དྲག་ལས་དོན་ཚོགས་ཆུང་གིས་གསར་འགོད་གསལ་བསྒྲགས་ཐེངས་ ༩༤ བ་སྤེལ་སྐབས། འདས་པའི་བདུན་ཕྲག་གཅིག་ནང་ཏོག་དབྱིབས་ནད་པ་གསར་པ་ ༤༢༩ བྱུང་ཡོད་པ་དང་། རྒྱ་གར་ནང་གི་ས་གནས་ཁག་ ༡༠ ནང་རང་ཁྱིམ་དུ་ཟུར་བཀག་འོག་སྡོད་མཁན་བོད་མི་ ༤༧༦ དང་། ཚོགས་སྡེའི་ཟུར་བཀག་ཁང་དུ་མི་གྲངས་ ༣༣༦ བཅས་ཁྱོན་ཟུར་བཀག་ཁང་དུ་བོད་མི་ ༨༡༢ ཡོད་འདུག
བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱི་དྲུང་གཞོན་བསྟན་འཛིན་ཀུན་བཟང་ལགས་ཀྱིས། དྷ་ས་གཙོ་བྱས་པའི་བོད་མིའི་འདུས་སྡོད་ཀྱི་ས་གནས་ཁག་ཏུ་ཏོག་དབྱིབས་རིམས་ནད་ཁྱབ་བརྡལ་འགྲོ་མུས་ཡིན་པས། བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས། རྒྱ་བལ་ནང་གི་ས་གནས་མགོ་འཛིན་རྣམས་ལ་ཏོག་དབྱིབས་རིམས་ནད་ཀྱི་ལམ་སྟོན་སོགས་གནང་ཡོད་པ་དང་། དེང་སྐབས་ཏོག་དབྱིབས་རིམས་ནད་ཀྱི་གཉན་སྲིན་གྱི་ངོ་བོ་འགྱུར་བའི་གཉན་སྲིན་གསར་པ་དེ་ཁྱབ་བརྡལ་ཤུགས་ཆེན་འགྲོ་ཡི་ཡོད་སྟབས། ཏོག་དབྱིབས་ལས་དོན་ཛ་དྲག་ཚོགས་ཆུང་གི་ལམ་སྟོན་པ་སྨན་པ་ཚེ་བརྟན་ལགས་ཀྱིས། ཏོག་ནད་ཀྱི་གཉན་སྲིན་གསར་པ་དེ་སྔ་མའི་གཉན་སྲིན་དང་མི་འདྲ་བར་འགོས་ཁྱབ་མྱུར་པོ་ཡོད་སྟབས། མི་མང་རྣམས་ཀྱིས་ཡིད་གཟབ་ཀྱི་སྒོ་ནས། ཁ་རས་སོགས་གྱོན་དགོས་པ་དང་། མི་ཚོགས་ཀྱི་ཁྲོད་དུ་འགྲིམས་འགྲུལ་བྱ་རྒྱུར་འཛེམས་གཟོན་གནང་དགོས་པའི་ལམ་སྟོན་ཕེབས་ཡོད་པའི་སྐོར་དང་། ཉེ་ལམ་རྒྱ་གར་ནང་གི་བོད་མི་གནས་སྡོད་བྱ་ཡུལ་མང་པོར་རང་ལོ ༡༥ ནས་༡༧ བར་གྱི་ཕྲུ་གུ་ཚོར་ཏོག་དབྱིབས་རིམས་ནད་ཀྱི་སྔོན་འགོག་སྨན་ཁབ་རྒྱག་མགོ་བཙུགས་ཡོད་པ་དང་། དེ་བཞིན་རྒས་འཁོགས་དང་། སྨན་ཞབས་པ། གདོང་མཆོང་མི་སྣ་རྣམས་ལ་ནུས་སྤར་སྨན་ཁབ་ ( Booster vaccine ) རྒྱག་བཞིན་ཡོད་པ་དེར། མི་མང་རྣམས་ཀྱིས་རང་འགན་བླངས་པའི་ཐོག་ནས་སྨན་ཁབ་ཡག་པོ་རྒྱག་མུས་ཡིན་ཡང་། སྔོན་འགོག་སྨན་ཁབ་ཐོབ་མེད་པའི་བྱིས་པ་རྣམས་ཀྱི་ཕ་མ་ཚོས་ཐུགས་ཁུར་ཆེ་ཤེས་ཀྱི་ཐོག་ནས། རང་རང་གི་བྱིས་པར་སྔོན་འགོག་སྨན་ཁབ་རྒྱག་གི་འཇུག་དགོས་པ་དང་། ཉེ་ལམ་བོད་པའི་སྤྱི་ཚོགས་ཁྲོད་དུ་ནད་པའི་གྲངས་འབོར་འཕར་མུས་ཡིན་སྟབས། ནད་པ་དང་འབྲེལ་འདྲིས་བྱུང་བའི་མི་རྣམས་ཀྱིས་རང་གཞན་ཚང་མའི་བདེ་འཇགས་དང་ཁེ་ཕན་གྱི་སླད་དུ་ཏོག་ནད་འགོས་ཡོད་མེད་བརྟག་དཔྱད་དང་ཟུར་བཀག་ཏུ་འདུག་དགོས་པའི་རེ་སྐུལ་སོགས་ཞུས་གནང་སོང་།
གསར་འགོད་གསལ་བསྒྲགས་སྟེང་སྨན་པ་མཚམས་གཅོད་ལགས་ཀྱིས། ཉེ་ལམ་རྒྱ་གར་ནང་དུ་ཏོག་དབྱིབས་རིམས་ནད་ཀྱི་ནད་གཞི་ཁྱབ་བརྡལ་ཤུགས་ཆེན་ཕྱིན་ཡོད་ཀྱང་། དེང་སྐབས་ཁྱབ་བརྡལ་འགྲོ་མུས་ཡིན་པའི་གཉན་སྲིན་གསར་པ་དེ་སྣང་མེད་དུ་བཞག་ནས་བརྟག་དཔྱད་སོགས་མི་བྱེད་པའི་རིགས་ཡོང་གི་འདུག་པས། ཉེན་ཚབས་ཡོད་མེད་ལ་མ་ལྟོས་པར་རང་རང་གི་འཕྲོད་བསྟེན་གྱི་བདེ་འཇགས་ལ་དོ་སྣང་གི་ཐོག་ནས་བརྟག་དཔྱད་བྱས་ཏེ། ཟས་དང་སྤྱོད་ལམ་གཙང་མར་བསྟེན་དགོས་པ་དང་། ད་ལན་གྱི་ནད་ཡམས་དེ་ནི་དམིགས་བསལ་ཁ་དང་སྣ་གཉིས་བརྒྱུད་ནས་འགོས་ཀྱི་ཡོད་སྟབས། རྒྱུན་དུས་ནས་ཁ་རས་ཡག་པོ་གྱོན་དགོས། དེ་བཞིན་ཕྱོགས་མཐའ་ཁག་ནས་ཡོང་བའི་མི་མང་གིས་ངེས་པར་དུ་ས་གནས་བོད་མི་འདུས་སྡོད་ཁུལ་དུ་ཟུར་བཀག་འོག་སྡོད་དགོས་པའི་ལམ་སྟོན་གནང་སོང་།
དེའི་རྗེས་ཕྱི་ལུགས་སྨན་པ་བསྟན་འཛིན་བརྩོན་འགྲུས་ལགས་ཀྱིས། ད་ལྟ་རྒྱ་གར་ནང་དུ་ཏོག་དབྱིབས་རིམས་ནད་ཀྱི་ནད་པའི་གྲངས་འབོར་འཕར་ཡང་། ད་ལྟ་ཏོག་ནད་ཀྱིས་མནར་མུས་ཡིན་པའི་ནད་པ་རྣམས་ལ་ཁ་ཟས་ཀྱི་བྲོ་བ་དང་སྣས་དྲི་མ་མི་ཚོར་བ་ཞིག་མིན་པར། མིད་པ་ན་བ་དང་ཚ་བ་འཕར་བ། སྣ་ཆུ་ལུད་པའི་ནད་རྟགས་ཙམ་ལས་མེད་ཀྱང་། སྔོན་འགོག་སྨན་ཁབ་གཉིས་ཀ་བརྒྱབ་ཟིན་པའི་མི་ལ་ལར་སྲོག་རླུང་མི་འདང་བ་སོགས་ཀྱི་དཀའ་ངལ་འོག་ནས་རྐྱེན་འདས་སུ་ཕྱིན་པའི་རིགས་ཀྱང་འདུག་པས། ཚང་མས་ནད་རྟགས་མེད་པའི་རྐྱེན་བྱས་ནས་སྣང་མེད་དུ་གཏན་ནས་འཇོག་མི་རུང་བ་དང་། ཉེ་ལམ་བདེ་ལེགས་སྨན་ཁང་དུ་ཆམ་ནད་ཕོག་པའི་ནད་པ་མང་པོ་ཞིག་སྨན་པ་བསྟེན་གཏུགས་བྱེད་དུ་ཡོང་གི་འདུག་པས། ས་གནས་མི་མང་ལ་ཛ་དྲག་གི་ནད་གཞི་མེད་ན། སྨན་ཁང་སོགས་སུ་སྨན་པ་བསྟེན་གཏུགས་ཉུང་ཙམ་དང་། བོད་མི་ཚོས་འགྲིམ་འགྲུལ་རིགས་ཉུང་ཙམ་བྱ་དགོས་སྐོར་གྱི་ལམ་སྟོན་གནང་སོང་།
ཏོག་དབྱིབས་ཛ་དྲག་ལས་དོན་ཚོགས་ཆུང་གི་གསལ་བསྒྲགས་ལྟར་ན། ད་ལྟ་བར་དུ་རྒྱ་བལ་གཉིས་ནང་བོད་མི་ཏོག་དབྱིབས་ནད་པ་གྲངས་ ༧༤༨༩ བྱུང་བའི་ཁྲོད་དྲག་སྐྱེད་ཟིན་པ་ ༦༨༣༢ དང་། རྐྱེན་འདས་སུ་ཕྱིན་པ་ ༡༦༢ ། ད་ལྟ་ཏོག་ནད་ཀྱིས་མནར་བཞིན་པའི་བོད་མི་གྲངས་ ༤༩༥ ཡོད་འདུག་ལ། འདས་པའི་ཆུ་ཚོད་ཉེར་བཞིའི་ནང་རྒྱ་གར་དུ་ནད་པ་གསར་བ་འབུམ ༢། ༦༤ བྱུང་བའི་ཁྲོད་མི་གྲངས་ ༣༡༥ རྐྱེན་འདས་སུ་ཕྱིན་པ་དང་། ཨོ་མི་ཁུ་རོན་ན་མཁན་གྱི་ནད་པ་གྲངས་ ༥༧༥༣ ལྷག་བྱུང་སྟེ། ད་ལྟ་རྒྱ་གར་ནང་དུ་ཏོག་དབྱིབས་རིམས་ནད་ཀྱི་ནད་རླབས་གསུམ་པ་ཁྱབ་བརྡལ་འགྲོ་མུས་ཡིན་པ་རེད་འདུག
གསར་འགོད་པ། དཔལ་ལྡན།
