གཞུང་ཞབས་ཟུར་བ་རྩེ་དྲུང་རྒྱལ་མཚན་ཆོས་ལྡན་ལགས་དགུང་གྲངས་ ༡༠༣ སྟེང་འདས་གྲོངས་སུ་ཕྱིན་ཡོད་འདུག

ཟླ་འདིའི་ཕྱི་ཚེས་ ༡༢ ཉིན་གྱི་དགོང་མོའི་ཆུ་ཚོད་ ༢ ཙམ་ལ་ཨ་རིར་དགུང་ལོ་ ༡༠༣ ཐོག་གཞུང་ཞབས་ཟུར་པ་རྩེ་དྲུང་རྒྱལ་མཚན་ཆོས་ལྡན་ལགས་འདས་གྲོངས་སུ་ཕྱིན་ཡོད་པ་དང་། ད་ལྟ་ཁོང་དགོངས་པ་རྫོགས་ཏེ་ཉིན་ལྔ་བ་འགྲོ་ཡི་ཡོད་པ་རེད།

གཞུང་ཞབས་ཟུར་པ་རྩེ་དྲུང་རྒྱལ་མཚན་ཆོས་ལྡན་ལགས་དགོངས་པ་རྫོགས་པའི་ཐད། ཟླ་འདིའི་ཕྱི་ཚེས་ ༡༤ ཉིན་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་གཙོས་མང་གཙོའི་ཀ་བ་གསུམ་གྱི་མཛད་གཙོ་རྣམ་པ་ལྷན་འཛོམས་ཀྱིས་བཀའ་ཤག་ཚོགས་ཁང་དུ་དམ་པ་ཁོང་ལ་མྱ་ངན་གུས་འདུད་མཚོན་སླད་གཞུང་འབྲེལ་མཆོད་འབུལ་སྨོན་ལམ་ཞིག་ཚོགས་ཡོད་པ་དང་། སྐབས་དེར་སྲིད་སྐྱོང་སྤེན་པ་ཚེ་རིང་མཆོག་གིས་དམ་པ་ཁོང་གི་ནང་མི་ཉེ་འབྲེལ་རྣམས་ལ་ཐུགས་གསོ་གནང་བའི་ནང་། དེ་རིང་ང་ཚོས་མཆོད་འབུལ་སྨོན་ལམ་ཚོགས་དགོས་དོན་ནི། བོད་རང་བཙན་ཡོད་པའི་སྐབས་ནས་བཟུང་གཞུང་ཞབས་སྲི་ཞུ་གནང་མྱོང་མཁན་རྩེ་དྲུང་སྐུ་ངོ་རྒྱལ་མཚན་ཆོས་ལྡན་ལགས་དགུང་ལོ་ ༡༠༠ ལྷག་ཕེབས་རྗེས་དགོངས་པ་རྫོགས་པའི་ཡིད་སྐྱོའི་གནས་ཚུལ་ཐོན་སོང་། ཁོང་ལ་ལོ་རྒྱུས་ཀྱི་གནས་བབ་ཐོག་ནས་བལྟས་ན། བོད་རང་བཙན་ཡོད་པའི་སྐབས་ཀྱི་རྩེ་དྲུང་ཡིན་པར་བརྟེན། དེ་རིང་ང་ཚོ་བོད་མིའི་སྒྲིག་འཛུགས་ཀྱི་མང་གཙོའི་ཀ་བ་གསུམ་གྱིས་དབུས་པའི་བོད་ཕྱི་ནང་གཉིས་ཀྱི་བོད་མི་ཡོངས་ཀྱིས་ཁོང་གིས་བོད་སྡེ་པ་གཞུང་དང་། བཙན་བྱོལ་དུ་འབྱོར་ནས་དྷ་རམ་ས་ལར་༧གོང་ས་རྒྱལ་བ་རིན་པ་ཆེ་མཆོག་གིས་དབུ་ཁྲིད་པའི་བཙན་བྱོལ་བོད་གཞུང་དང་། གཞན་ཡང་བོད་མི་འདུས་སྡོད་ས་གནས་མང་པོའི་ནང་ཞབས་ཞུ་བསྒྲུབས་པར་བཀའ་དྲིན་རྗེས་དྲན་དང་། ཁོང་སླར་ཡང་འཕགས་པ་སྤྱན་རས་གཟིགས་ཀྱི་འདུལ་ཞིང་ལ་སྐྱེ་བའི་སླད་མཆོད་འབུལ་སྨོན་ལམ་ཚོགས་པ་རེད། ཅེས་གསུངས་ཡོད།

ད་དུང་སྲིད་སྐྱོང་མཆོག་གིས། ཁོང་ནི་བོད་བསྟན་སྲིད་མི་རིགས་ཀྱི་ཆེད་དུས་ཡུན་རིང་ཤོས་ཞབས་འདེབས་ཞུ་མཁན་ཆགས་ཀྱི་ཡོད་པས། ཁོང་གི་ལྟོས་ཤུལ་ནང་མི་ཡོངས་ལ་བོད་མིའི་སྒྲིག་འཛུགས་ཀྱི་མང་གཙོ་ཀ་བ་གསུམ་དང་བོད་ཕྱི་ནང་གཉིས་ཀྱི་བོད་མི་ཚང་མས་ཐུགས་གསོ་ཞུ་རྒྱུ་ཡིན། ད་བར་དུ་ཁོང་གིས་དོན་དངོས་སུ་༧གོང་ས་མཆོག་གི་དགོངས་གཞི་དང་མཐུན་པ་དང་། བོད་མི་མང་གི་བདེ་སྡུག་སླད་སྐུ་ངལ་བསྐྱོན་ཏེ་མི་ཚེ་དོན་དང་ལྡན་པ་སྐྱེལ་གནང་ཡོད་པ་རེད། ཁོང་གི་ལྟོས་ཤུལ་ནང་མི་ཁྱེད་རང་ཚོ་ཡིན་ནའང་སྤོབས་པ་བྱེད་དགོས་པ་རེད། ཁོང་ལྟ་བུའི་པ་ལགས་འཁྲུངས་ནས་བོད་བསྟན་སྲིད་ཀྱི་དོན་དུ་ཞབས་ཕྱི་ཞུས་གནང་བ་དེར་ཕྲུ་གུ་ཚོས་ཀྱང་སྐལ་བ་བཟང་པོ་རྩིས་དགོས་རེད་བསམ་གྱི་འདུག ཤུལ་ལུས་ནང་མི་རྣམས་ཀྱི་ཀྱང་པ་ལགས་ཀྱིས་བྱས་རྗེས་བཞག་པ་ལྟར་བོད་སྤྱི་པའི་དོན་དུ་ཕྱག་ལས་གནང་རྒྱུ་དང་། ཁོང་གི་མི་ཚེ་ལ་བལྟས་ཏེ་བོད་ཕྱི་ནང་གཉིས་ཀྱི་བོད་མི་རྣམས་ལ་སེམས་ཤུགས་སྤར་རྒྱུ་དང་། བོད་སྤྱི་བའི་དོན་སྒྲུབ་པར་སྔར་ལྷག་འབད་བརྩོན་བྱ་དགོས་ཤིང་། ལྷག་པར་དུ་ད་ལྟའི་ཆར་ཛ་དྲག་པའི་དུས་ཚོད་སྐབས་བོད་མི་ཡིན་ནོ་ཅོག་ལ་འགན་ཞིག་ཡོད་པར་བརྟེན། ཁོང་ནང་བཞིན་༧གོང་ས་མཆོག་དབུས་པའི་ང་ཚོ་ཚང་མ་ཚེ་རིང་ནད་མེད་ཡོང་བ་དང་། བོད་བསྟན་འགྲོའི་ཆེད་དུ་ཞབས་ཕྱི་ཞུ་ཐུབ་པའི་རེ་བ་དང་སྨོན་ལམ་ཞུ་ཡི་ཡོད། ཅེས་གསུངས་སོང་།

རྩེ་དྲུང་རྒྱལ་མཚན་ཆོས་ལྡན་ལགས་ནི། ཕྱི་ལོ་ ༡༩༢༠ ལོར་མན་གྲོ་གུང་དཀར་སྲིབ་ན་བྱང་མ་རུ་ཕ་བྱང་ཆུབ་ཕུན་ཚོགས་ལགས་དང་མ་སྐལ་བཟང་སྒྲོལ་མ་ལགས་ཀྱི་བུ་བཞིའི་ནང་གསེས་གསུམ་པར་འཁྲུངས་ཤིང་། ཕྱི་ལོ་ ༡༩༣༠ ལོར་ལྷ་སར་སློབ་གྲྭར་བསྐྱོད། ཕྱི་ལོ་ ༡༩༣༥ ལོར་གདན་ས་ཆེན་པོ་བཀྲ་ཤིས་ལྷུན་པོར་བསྐྱོད་དེ་དཀྱིལ་ཁང་གྲྭ་ཚང་གི་མཚན་ཉིད་མཁན་པོ་དཀའ་ཆེན་འགྱུར་མེད་མཆོག་གིས་ཐོག་མར་སྐྱབས་འགྲོ་སེམས་བསྐྱེད་དང་དག་ཡིག་ངག་སྒྲོན་བཅས་ཀྱི་དཔེ་འཁྲིད་གནང། དེ་ནས་ཁོང་གི་སློབ་མ་དཀའ་ཆེན་པདྨ་མཆོག་གི་དྲུང་ནས་དག་ཡིག་དང་སུམ་རྟགས། སྙན་ངག་ལེའུ་གཉིས་པ། ལམ་རིམ་སོགས་ཀྱི་དཔེ་འཁྲིད་ཞུས་ཏེ་སྙན་ངག་རིག་གནས་སོགས་ལ་མཁས་པར་སྦྱངས། ཕྱི་ལོ་ ༡༩༤༦ ལོར་རྩེ་དྲུང་དུ་བསྐོ་བཞག་བྱུང་ཞིང་། ཕྱི་ལོ་ ༡༩༤༨ ལོར་སྐུ་སྒེར་མཛོད་སྦུག་གི་ལས་བྱ་དང་སྤྱན་བབས་ཕོ་བྲང་གི་ཁང་གཉེར་གཅིག་ལྕོགས་གནང་། དེ་ནས་ཕྱི་ལོ་ ༡༩༥༩ ཟླ་ ༣ ཚེས་ ༢༠ དགོང་དྲོར་སྐྱབས་བཅོལ་དུ་ཕེབས་ནས་གསོག་སྒར་དུ་ཞབས་ཕྱི་ཞུས་པ་དང་། ཕྱི་ལོ་ ༡༩༦༤ ལོར་ཤེས་རིག་དྲུང་ཆེ་གནང་མྱོང་བ་དང་༧གོང་ས་མཆོག་གི་མཛད་རྣམ་ངོས་ཀྱི་ཡུལ་དང་ངོས་ཀྱི་མིང་མང་ཞུ་དག་དང་དཔར་སྐྲུན་ཞུས་ཤིང་། ཕྱི་ལོ་ ༡༩༦༧ ལོར་ལྡི་ལི་དོན་གཅོད་ཁང་དུ་ནང་སྲིད་སྡེ་ཚན་གྱི་འགན་འཛིན་དང་དངུལ་གཉེར་གཅིག་ལྕོགས་གནང་། ད་དུང་ཕྱི་ལོ་ ༡༩༦༩ ལོར་ནང་སྲིད་དྲུང་ཆེར་གནང་ཞིང་། ཕྱི་ལོ་ ༡༩༧༦ ལོར་ཀོ་ལི་གྷལ་གྱི་གཞིས་འགོར་གནང་། དེ་ནས་ཕྱི་ལོ་ ༡༩༨༠ ཟླ་ ༥ ཚེས་ ༨ ཉིན་ལུགས་ཟུང་བསམ་གྲུབ་གླིང་གི་གཞིས་འགོར་བསྐོས། དེ་བཞིན་ཕྱི་ལོ་ ༡༩༨༢ ཟླ་ ༥ ཚེས་ ༡༥ ཉིན་མོན་གྷོ་འདོད་རྒུ་གླིང་གི་གཞིས་འགོར་བསྐོས་པ་དང་ཕྱི་ལོ་ ༡༩༨༩ ལོར་མོན་གྷོ་གཏན་སློབ་ཀྱི་སློབ་སྤྱིར་གནང་ཡོད་པ་རེད། ཕྱི་ལོ་ ༡༩༩༢ ལོར་ལས་བྱེད་རྒས་ཡོལ་དུ་ཕེབས་ཡོད་པ་རེད།