༸གོང་ས་མཆོག་ནས་བུད་མེད་རྣམས་ལ་གཞན་ཕན་གྱི་བསམ་བློ་ཡངས་པོ་ཡོད་པས་འཛམ་གླིང་ཞི་བདེ་ཡི་ལས་དོན་གོང་འཕེལ་དུ་གཏོང་བར་ཡིད་ཆེས་བརྟན་པོ་ཡོད་སྐོར་གསུངས་ཏེ་ཡུ་རོབ་གྲོས་ཚོགས་ཀྱི་ཚོགས་གཙོ་གསར་པར་འཚམས་འདྲིའི་གསུང་འཕྲིན་སྩལ་གནང་འདུག
ཟླ་འདིའི་ཕྱི་ཚེས་ ༡༡ ཉིན་ཡུ་རོབ་མཐུན་ཚོགས་ཀྱི་ཚོགས་གཙོ་སྐུ་ཞབས་ཌ་ཝི་ཊི་( David Sassoli ) མཆོག་ནད་གཞི་ཡི་རྐྱེན་པས་དགུང་ལོ་ ༦༥ སྟེང་སྐུ་གྲོངས་ཡོད་སྟབས། ཟླ་འདིའི་ཕྱི་ཚེས་༡༩ ཉིན་ཡུ་རོབ་མཐུན་ཚོགས་ཀྱི་རྒྱལ་ཁབ་མེལ་ཊ་( Malta ) ཡི་གྲོས་ཚོགས་འཐུས་མི་ལྕམ་སྐུ་རོ་བྷིར་ཊ ( Roberta Metsola) ལགས་ཡུ་རོབ་གྲོས་ཚོགས་ཀྱི་ཚོགས་གཙོར་བདམས་ཐོན་བྱུང་ཡོད་པ་ལྟར། ཁ་སང་༧གོང་ས་སྐྱབས་མགོན་ཆེན་པོ་མཆོག་གིས་ལྕམ་རོ་བྷིར་ཊ་ལགས་ལ་འཚམས་འདྲིའི་གསུང་འཕྲིན་ཞིག་སྩལ་ཏེ། མགོན་པོ་གང་ཉིད་དང་བོད་མི་རྣམས་ལ་ཐུགས་ཁུར་གནང་བར་ཐུགས་རྗེ་ཆེ་གསུངས་པ་དང་འབྲེལ། ཁོང་མོའི་མ་འོངས་པའི་ལས་དོན་ཐམས་ཅད་ལམ་ལྷོངས་ཡོང་བའི་ཐུགས་སྨོན་མཛད་འདུག
དེ་ཡང་གསུང་འཕྲིན་ནང་དུ་༸གོང་ས་མཆོག་གིས། ལྕམ་སྐུ་རོ་བྷིར་ཊ་ལགས་ནི་ཡུ་རོབ་གྲོས་ཚོགས་ཀྱི་ཚོགས་གཙོ་གཞོན་ཤོས་དང་བུད་མེད་ཀྱི་ཚོགས་གཙོ་གསུམ་པ་ཆགས་ཡོད་ལ། ངོས་ནས་བུད་མེད་རྣམས་ནི་སྐྱེས་པ་ལས་ལྷག་པར་གཞན་ཕན་དང་སེམས་ཁུར་གྱི་འདུ་ཤེས་ཆེ་བ་ཡོད་པར་ངོས་འཛིན་བྱེད་ཀྱི་ཡོད། དེར་བརྟེན་བུད་མེད་རྣམས་ནས་འཛམ་གླིང་ནང་སྔར་ལས་ལྷག་པའི་ཞི་བདེ་བསྐྲུན་ཐུབ་པར་ཡིད་ཆེས་བྱེད་ཀྱི་ཡོད། ངོས་རང་འཛམ་གླིང་གི་རྒྱལ་ཁབ་ཕན་ཚུན་དབར་མཉམ་སྦྲེལ་དང་། གུས་བརྩི་སྔར་ལྷག་དགོས་པ་མཐོང་མཁན་ཞིག་ཡིན་སྟབས། རྒྱལ་ཁབ་དང་མི་རིགས་ཕན་ཚུན་བར་དུ་གཅིག་ཕན་གཅིག་གྲོགས་དང་མཉམ་འབྲེལ་གྱི་སྒོ་ནས་འཚོ་སྡོད་བྱེད་པའི་ཡུ་རོབ་མཉམ་འབྲེལ་རྒྱལ་ཁབ་ཁག་ལ་ཡིད་སྨོན་ཤོར་མྱོང་ཡོད། ཅེས་གསུངས་འདུག
ཡང་༧གོང་ས་མཆོག་གིས། རྙོག་འཛིན་གྱིས་ཁེངས་པའི་འཇིག་རྟེན་འདིའི་ཁྲོད་དུ། ཕུགས་རྒྱང་རིང་པོར་བསམ་བློ་གཏོང་མཁན་གྱི་མགོ་འཁྲིད་ཅིག་མཁོ་ངེས་ཆེ་བའི་སྐབས་འདིར། ངོས་ནས་འགྲོ་བ་མིའི་བར་དུ་བྱུང་མུས་ཡིན་པའི་བཀའ་རྙོག་དེ་དག་ཕན་ཚུན་གུ་ཡངས་དང་འགྲིག་མཐུན་གྱི་ལམ་ནས་གྲོས་མོལ་ཡོང་རྒྱུར་ཡིད་ཆེས་བརྟན་པོ་ཡོད། ཅེས་གསུངས་འདུག
ཡང་༧གོང་ས་སྐྱབས་མགོན་ཆེན་པོ་མཆོག་གིས། ངོས་རང་ནས་ཕྱི་ལོ་ ༡༩༨༨ ལོར་བོད་རྒྱ་གཉིས་མོས་ཀྱི་ལམ་ནས་བོད་ཀྱི་དཀའ་རྙོག་སེལ་ཐབས་ཀྱི་གྲོས་འཆར་བཏོན་ཡོད་པ་མ་ཟད། གུ་ཡངས་དང་འགྲིག་མཐུན་གྱི་ཆོད་སེམས་དེའི་ཐོག་ནས་རྒྱ་ནག་དང་ལྷན་གཉིས་ཕན་གྱི་ལམ་ནས་བོད་ཀྱི་གནད་དོན་སེལ་སླད་དུ། གཞུང་འབྲེལ་ཐོག་ནས་དམིགས་བསལ་ཡུ་རོབ་གྲོས་ཚོགས་བདམས་པ་ཡིན། ཞེས་གསུངས་སོང་།
ད་ལྟ་དགུང་ལོ་༤༣ ཡིན་པའི་ལྕམ་རོ་བྷི་ཊ་ལགས་ནི་ཡུ་རོབ་ཀྱི་རྒྱལ་ཁབ་ཆུང་ཤོས་གྲས་མེལ་ཊ་ ( Malta) ནས་ཡིན་ཞིང་། ཁོང་མོ་ནི་ཕྱི་ལོ་ ༢༠༡༣ ལོར་བདམས་ཐོན་བྱུང་བའི་ཡུ་རོབ་གྲོས་ཚོགས་ཀྱི་འཐུས་མི་ཐོག་མ་དེ་ཡིན་འདུག ཕྱི་ལོ ༢༠༢༠ ལོར་ཡུ་རོབ་གྲོས་ཚོགས་ཀྱི་ཚོགས་གཞོན་དུ་བདམས་ཐོན་བྱུང་རྗེས། ཟླ་བ་འདིའི་ཕྱི་ཚེས་ ༡༩ ཉིན་ཡུ་རོབ་གྲོས་ཚོགས་ཀྱི་ཚོགས་གཙོར་བདམས་ཐོན་བྱུང་ཡོད་འདུག་ལ། ཁོང་མོ་ནི་ཡུ་རོབ་གྲོས་ཚོགས་ཀྱི་ཚོགས་གཙོ་གཞོན་ཤོས་དང། མེལ་ཊ་རྒྱལ་ཁབ་ནས་གྲོས་ཚོགས་ཀྱི་ཚོགས་གཙོ་བྱེད་མཁན་ཐོག་མ་དེའང་རེད་འདུག
གསར་འགོད་པ། དཔལ་ལྡན།
