གངས་ཤུད་ལྷམ་གྱོན་ཏེ་པེ་ཅིན་ཨོ་རྩེད་ལ་ངོ་རྒོལ་གྱི་གོམ་བགྲོད་བྱེད་བཞིན་པ།

སུད་སིའི་ནང་གནས་སྡོད་གཞས་པ་བློ་བརྟན་རྣམ་གླིང་ལགས་ནས་གངས་ཤུད་ལྷམ་གྱོན་ཏེ་སྤྱི་ལེ་ ༩༠ མ་ཟིན་ཙམ་ལ་གོམ་བགྲོད་ཀྱིས་པེ་ཅིན་ཨོ་རྩེད་འགྲན་ཚོགས་ལ་ངོ་རྒོལ་དང་སུད་སིའི་རྩེད་འགྲན་པ་རྣམས་ཨོ་རྩེད་ནང་མཉམ་ཞུགས་གནང་རྒྱུ་མེད་པའི་འབོད་སྐུལ་གནང་བཞིན་འདུག

རྒྱ་ནག་གཞུང་གིས་བོད་དང་ཤར་ཊུར་ཀི་སི་ཐན་སོགས་ནང་འགྲོ་བ་མིའི་ཐོབ་ཐང་རྡོག་རོལ་ཚབས་ཆེན་གཏོང་བཞིན་པར་ལྟོས་མེད་ཀྱིས། ཡོང་རྒྱུའི་ཕྱི་ཟླ་ ༢ པའི་ཚེས་ ༤ ཉིན་རྒྱ་ནག་གི་རྒྱལ་ས་པེ་ཅིན་དུ་དགུན་དུས་ཨོ་ལིམ་པིག་རྩེད་འགྲན་འཚོག་རྒྱུར་གྲ་སྒྲིག་བྱེད་བཞིན་པ་དང་བསྟུན། ཁ་སང་ཕྱི་ཚེས་ ༢༦ ཉིན་ནས་སུད་སིར་གནས་སྡོད་བོད་ཀྱི་གཞས་པ་བློ་བརྟན་རྣམ་གླིང་ལགས་ཀྱིས་པེ་ཅིན་དགུན་དུས་ཨོ་རྩེད་ལ་ངོ་རྒོལ་དང་། སུད་སིའི་རྩེད་འགྲན་པ་རྣམས་རྒྱ་ནག་གི་ཨོ་རྩེད་ནང་མི་ཞུགས་རྒྱུའི་དགོས་འདུན་འོག གངས་ཤུད་ལྷམ་གྱོན་དེ་སུད་སིའི་རྒྱལ་ས་བྷེན་ (Bern) ནས་རྒྱལ་སྤྱིའི་ཨོ་ལིམ་པིག་སྒྲིག་འཛུགས་ཡོད་སའི་གྲོང་ཁྱེར་ལོ་སན་(Lausanne) བར་གོམ་བགྲོད་ཀྱི་ལས་འགུལ་སྤེལ་བཞིན་ཡོད་འདུག

ཁོང་གིས་རང་གི་ངོ་དེབ་ཐོག་ལས་འགུལ་གྱི་དགོས་འདུན་སྐོར་བརྗོད་དོན། དེ་རིང་ངས་སུད་སིའི་རྩེད་འགྲན་པ་རྣམས་པེ་ཅིན་གྱི་དགུན་དུས་ཨོ་རྩེད་ནང་མི་ཞུགས་རྒྱུའི་རེ་འདུན་འདོན་གྱི་ཡོད། གང་ཡིན་ཟེར་ན། རྒྱ་ནག་གིས་བོད་མི་སྟོང་ཕྲག་མང་པོ་དམར་གསོད་དང་བོད་ཀྱི་རིག་གཞུང་རྩ་མེད་གཏོང་བཞིན་ཡོད། ཕྱི་ལོ་ ༡༩༣༦ ལོར་རྒྱལ་སྤྱིའི་ཨོ་རྩེད་སྒྲིག་འཛུགས་ཀྱིས། ཧིཊ་ལར་(Adolf Hitler)ལ་ཨོ་ལིམ་པིག་རྩེད་འགྲན་འཚོག་ཏུ་བཅུག་རྗེས། ཇེའུ་མི་རིགས་ས་ཡ་ ༦ ལྷག་དམར་གསོད་བཏང་ཡོད་པ་བཞིན། ཕྱི་ལོ་ ༢༠༠༨ ལོར་རྒྱ་ནག་ལ་ཨོ་ལིམ་པིག་འཚོག་ཏུ་བཅུག་རྗེས་བོད་མི་སྟོང་ཕྲག་མང་པོ་དམར་གསོད་དང་འཛིན་བཟུང་བཙོན་འཇུག་བྱས་ཡོད་པ་རེད། ཅེས་དང་། རྩེད་འགྲན་པ་རྣམས་པེ་ཅིན་ཨོ་རྩེད་ནང་ཞུགས་པ་དེས། རྒྱ་ནག་གིས་བོད་མི་དང་ཧོང་ཀོང་བ། ཡུ་གུར་བ་བཅས་ལ་དྲག་གནོན་བྱེད་བཞིན་པར་རྒྱབ་སྐྱོར་བྱེད་པ་མཚོན་གྱི་ཡོད་སྐོར་སོགས་བརྗོད་འདུག

བློ་བརྟན་རྣམ་གླིང་ལགས་ཀྱིས་བོད་རང་བཙན་དང་རང་དབང་། པེ་ཅིན་ཨོ་རྩེད་ལ་ངོ་རྒོལ་ཞེས་པའི་ཚིག་འབྲུ་འཁོད་པའི་གངས་ཤུད་ལྷམ་ངོ་མ་ཞིག་དང་། གངས་ཤུད་ལྷམ་གྱི་མཇུག་དེར་ལྕགས་ཐག་གིས་རྒྱ་ནག་གི་རྒྱལ་དར་ས་ལ་དྲུད་དེ་གོམ་བགྲོད་བྱེད་བཞིན་ཡོད་ལ། ཁོང་གི་གོམ་བགྲོད་ལས་འགུལ་གྱི་རྒྱང་ཐག་སྤྱི་ལེ་ ༩༠ མ་ཟིན་ཙམ་དང་། དུས་ཡུན་བདུན་ཕྲག་འགའ་ཤས་འགོར་སྲིད་པའི་ཚོད་དཔག་བྱེད་ཀྱིན་འདུག

འདི་ལོའི་ཕྱི་ཟླ་ ༡ ཚེས་ ༡༢ ཉིན་སུད་སིའི་བློན་ཆེན་ཁག་གི་ཚོགས་འདུའི་སྟེང་པེ་ཅིན་གྱི་ཨོ་རྩེད་ནང་བློན་ཆེན་གཅིག་གི་སྣེ་ཁྲིད་འོག་སྐུ་ཚབ་ཚོགས་ཆུང་ཞིག་བཅར་རྒྱུའི་ཐག་གཅོད་བྱས་ཡོད་ནའང་། ཁ་སང་ཕྱི་ཚེས་ ༢༦ ཉིན་སུད་སི་གཞུང་གིས་གསལ་བསྒྲགས་ཤིག་སྤེལ་ཏེ། སུད་སིའི་ནང་ཏོག་དབྱིབས་གཉན་རིམས་ཀྱི་གནས་སྟངས་དང་། རྒྱ་ནག་གཞུང་གིས་ཨོ་ལིམ་པིག་རྩེད་འགྲན་སྐབས་ནད་ཡམས་འགོག་སྡོམ་ཆེད། པེ་ཅིན་ལ་སླེབས་པའི་ཕྱིའི་རྒྱལ་ཁབ་ཁག་གི་ཕྱི་འབྲེལ་མི་སྣ་ཕན་ཚུན་དབར་དང་། ལྷག་པར་དུ་རྩེད་འགྲན་པའི་ལྷན་དུ་ཐུག་འཕྲད་སོགས་བྱ་མི་ཆོག་པའི་སྒྲིག་གཞི་བཟོས་པའི་རྒྱུ་མཚན་གྱིས། སུད་སིའི་སྐུ་ཚབ་མི་སྣ་གཅིག་ཀྱང་པེ་ཅིན་ཨོ་རྩེད་ལ་དངོས་སུ་བཅར་རྒྱུ་མིན་པའི་ཐག་གཅོད་བྱས་ཡོད་འདུག

འདས་པའི་ཟླ་བ་འགའ་ཤས་ནང་ཨ་རི་དང་དབྱིན་ཡུལ། ཉི་ཧོང་གཙོས་པའི་དམངས་གཙོའི་རྒྱལ་ཁབ་མི་ཉུང་བས་རྒྱ་ནག་གཞུང་གིས་བོད་དང་ཤར་ཊུར་ཀི་སི་ཐན་བཅས་ནང་མི་རིགས་རྩ་མེད་དང་འགྲོ་བ་མིའི་ཐོབ་ཐང་རྡོལ་རོལ་ཚབས་ཆེན་གཏོང་བཞིན་པར་ངོ་རྒོལ་ཆེད། རྒྱལ་ཁབ་སོ་སོའི་ཕྱི་འབྲེལ་མི་སྣ་དང་གཞུང་འབྲེལ་སྐུ་ཚབ་རྣམས་པེ་ཅིན་དུ་མངག་གཏོང་བྱ་རྒྱུ་མིན་པའི་ཐག་གཅོད་བླངས་ཡོད་པ་ལྟར། ཁ་སང་རྒྱལ་སྤྱིའི་གསར་ལམ་ཁག་ཏུ་ཡུ་རོབ་ཀྱི་རྒྱལ་ཁབ་པོར་ཅུ་གྷལ་(Portugal) གྱིས་རྒྱུ་མཚན་འགའ་ཤས་ལ་བརྟེན་ནས་ཨོ་རྩེད་ཀྱི་དབུ་འབྱེད་དང་མཇུག་བསྡོམས་མཛད་སྒོའི་སྟེང་རང་གི་ཆབ་སྲིད་སྐུ་ཚབ་མངག་གཏོང་བྱ་རྒྱུ་མིན་སྐོར་བརྗོད་ཡོད་འདུག

གསར་འགོད་པ། པ་སངས་ཚེ་རིང་།