བོད་མིའི་སྒྲིག་འཛུགས་ཀྱི་ཏོག་དབྱིབས་ཛ་དྲག་ལས་དོན་ཚོགས་ཆུང་གིས་བོད་མིའི་ནང་ཏོག་དབྱིབས་རིམས་ནད་ཀྱི་ནད་རྟགས་ཐོན་མཁན་མང་པོ་ཞིག་ཟུར་བཀག་ཏུ་མ་བསྡད་པར་མི་མང་འདུ་འཛོམས་བྱེད་ས་ཁག་ཏུ་འགྲོ་ཡི་ཡོད་པས་རང་གཞན་ཚང་མའི་འཕྲོད་བསྟེན་སླད་ངེས་པར་དུ་ཟུར་བཀག་ལ་སྡོད་དགོས་པའི་རེ་སྐུལ་གནང་འདུག
དེ་རིང་བོད་མིའི་སྒྲིག་འཛུགས་ཀྱི་ཏོག་དབྱིབས་ཛ་དྲག་ལས་དོན་ཚོགས་ཆུང་གིས་གསར་འགོད་གསལ་བསྒྲགས་ཐེངས་ ༩༦ བ་སྤེལ་སྐབས། འདས་པའི་བདུན་ཕྲག་གཅིག་ནང་ཏོག་དབྱིབས་ནད་པ་གསར་པ་ ༤༡༤ བྱུང་ཡོད་པ་དང་། བོད་མི་ ༡ འདས་གྲོངས་སུ་ཕྱིན། དེ་བཞིན་རྒྱ་གར་ནང་གི་ས་གནས་ཁག་ ༡༥ དང་བལ་ཡུལ་ནང་གི་ས་གནས་ ༤ ནང་རང་ཁྱིམ་དུ་ཟུར་བཀག་སྡོད་མཁན་བོད་མི་ ༥༧༡ དང་། ཚོགས་སྡེའི་ཟུར་བཀག་ཁང་དུ་མི་གྲངས་ ༡༦༦ བཅས་ཁྱོན་ཟུར་བཀག་ཁང་དུ་བོད་མི་ ༧༣༧ ཡོད་འདུག
འཕྲོད་བསྟེན་ལས་ཁུངས་ཀྱི་དྲུང་གཞོན་བསྟན་འཛིན་ཀུན་བཟང་ལགས་ཀྱིས། དབུས་བོད་མིའི་སྒྲིག་འཛུགས་སོགས་ཀྱིས་བོད་མི་ཚོར་ཏོག་དབྱིབས་རིམས་ནད་ཀྱི་སྔོན་འགོག་ལམ་སྟོན་གནང་བ་བཞིན། རང་གཞན་ཚང་མའི་བདེ་འཇགས་སོགས་ཀྱི་སླད། དོགས་གཟོན་དང་ནད་ཡམས་ཀྱི་སྔོན་འགོག་ཐབས་ལམ་ལ་བསྟེན་དགོས་པ་དང་། བོད་མི་འདུས་སྡོད་ས་གནས་ཁག་དང་བོད་པའི་གཞིས་ཆགས་ཁག་ཏུ་ལོག་མཁན་རྣམས་ཀྱིས། རང་རེའི་སྤྱི་ཚོགས་སུ་ནད་ཡམས་ཁྱབ་གདལ་དང་བོད་མི་རྣམས་ལ་ནད་ཡམས་ཀྱི་དཀའ་ངལ་མི་འཕྲད་སླད་ཟུར་བཀག་ཏུ་སྡོད་དགོས། དེ་བཞིན་ཉེ་ལམ་ཏོག་དབྱིབས་ཀྱི་ནད་རྟགས་ཐོན་མཁན་མང་པོ་ཞིག་རང་ཁྱིམ་དུ་ཟུར་བཀག་ལ་མ་བསྡད་པར་མི་དམངས་འདུ་འཛོམས་བྱེད་ས་ཁག་ཏུ་སྐྱོད་ཀྱི་ཡོད་སྟབས། ཏོག་དབྱིབས་རིམས་ནད་འགོས་མཁན་ཚོས་རང་གཞན་ཚང་མའི་བདེ་འཇགས་དང་འཕྲོད་བསྟེན་གྱི་སླད་དུ། རང་གནས་སུ་ཟུར་བཀག་ལ་བསྡད་དགོས་པའི་རེ་སྐུལ་སོགས་གནང་སོང་།
གསར་འགོད་གསལ་བསྒྲགས་སྟེང་སྨན་པ་མཚམས་གཅོད་ལགས་ཀྱིས། རྒྱལ་ཁབ་མང་པོ་ཞིག་གི་ནང་དུ་རིམས་ནད་ཁྱབ་གདལ་ཤུགས་ཆེན་ཕྱིན་ཏེ། རྒྱལ་སྤྱིའི་ཁྱོན་ཡོངས་ཀྱི་མི་མང་ལ་དཀའ་ངལ་ཤུགས་ཆེན་འཕྲད་བཞིན་ཡོད་སྟབས། རྒྱལ་སྤྱིའི་སྤྱི་སྒེར་གྱི་ཚོགས་པ་མང་པོས་རིམས་ནད་ཁྱབ་གདལ་དུ་མི་འགྲོ་བའི་སླད་དུ་སྔོན་འགོག་གི་ཐབས་ལམ་ཁག་ལ་བསྟེན་མུས་ཡིན་པ་རེད། རིམས་ནད་ཀྱི་འཇུག་སྒོ་ནི་ཁ་དང་རྣ་གཉིས་ཆགས་ཀྱི་ཡོད་པས། བོད་མི་ཚོས་ཁ་རས་ཡག་པོ་གྱོན་དགོས་པ་དང་། རིམས་ནད་ནི་མི་ནས་མི་བརྒྱུད་ནས་འགོས་ཁྱབ་བྱུང་གི་ཡོད་སྟབས། མི་དང་མིའི་བར་དུ་སྤྱི་ཚོགས་རྒྱང་བཀྱེད་ཀྱི་བར་ཐག་བཞག་དགོས་པ་དང་། ལག་པ་སོགས་ཡང་ཡང་གཙང་སེལ་བྱ་དགོས་ཤིང་། ས་ཕྱོོགས་གང་སར་འགྲུལ་བཞུད་བྱས་ནས་བོད་མིའི་གཞིས་ཆགས་སོགས་སུ་ལོག་མཁན་རྣམས་ཀྱིས་ངེས་པར་དུ་ཟུར་བཀག་དང་བརྟག་དཔྱད་ལེགས་པོ་བྱ་དགོས་པའི་ལམ་སྟོན་སོགས་གནང་སོང་།
དེའི་རྗེས་སུ་ཕྱི་ལུགས་སྨན་པ་བསྟན་འཛིན་བརྩོན་འགྲུས་ལགས་ཀྱིས། བོད་མི་ཚོས་སྔོན་འགོག་སྨན་ཁབ་བརྒྱག་རྒྱུ་གལ་ཆེན་ཡིན་སྟབས། ངེས་པར་དུ་ཏོག་དབྱིབས་རིམས་ནད་ཀྱི་སྔོན་འགོོག་སྨན་ཁབ་བརྒྱག་དགོས་པ་དང་། བོད་མིའི་ཁྲོད་དུ་ད་དུང་འགོག་ཁབ་བརྒྱབ་མེད་རིགས་ཡོད་ཚེ་ནང་ཁུལ་དུ་རོགས་རམ་བྱས་ཏེ་ངེས་པར་དུསྔོན་འགོག་སྨན་ཁབ་རག་ཐབས་བྱ་དགོས་པ་དང་། དགུན་ཚོང་ཚར་ནས་གཞིས་ཆགས་ཁག་ཏུ་ལོག་མཁན་གྱི་བོད་མི་རྣམས་ཀྱིས་ས་གནས་ཁག་གི་ཏོག་དབྱིབས་རིམས་ནད་ཀྱི་སྒྲིག་ལམ་བཞིན་ཤར་སྐྱོད་བྱ་དགོས་པའི་ལམ་སྟོན་གནང་སོང་།
ཏོག་དབྱིབས་ཛ་དྲག་ལས་དོན་ཚོགས་ཆུང་གི་གསལ་བསྒྲགས་ལྟར་ན། ད་ལྟ་བར་དུ་རྒྱ་བལ་གཉིས་ནང་བོད་མི་ཏོག་དབྱིབས་ནད་པ་མི་གྲངས་ ༨༣༧༧ བྱུང་བའི་ཁྲོད་དྲག་སྐྱེད་ཟིན་པ་ ༧༦༧༧ དང་། རྐྱེན་འདས་སུ་ཕྱིན་པ་ ༡༦༣། ད་ལྟ་ཏོག་ནད་ཀྱིས་མནར་བཞིན་པའི་བོད་མི་གྲངས་ ༥༣༧ ཡོད་འདུག
གསར་འགོད་པ། དཔལ་ལྡན།
