ཡོངས་འཛིན་གླིང་མཆོག་སྤྲུལ་རིན་པོ་ཆེ་མཆོག་གིས་སེང་གྷ་ལའི་ནང་དུ་མཛད་འཕྲིན་སྐྱོང་བཞིན་པ།

ཟླ་འདིའི་ཕྱི་ཚེས་ ༢༦ ཉིན་༧སྐྱབས་རྗེ་ཡོངས་འཛིན་གླིང་མཆོག་སྤྲུལ་རིན་པོ་ཆེ་སིང་གྷ་ལའི་(Sri Lanka)ཡུལ་དུ་ཆིབས་བསྒྱུར་བསྐྱངས་ཏེ་ཡུལ་དེའི་ནང་པའི་བླ་ཆེན་རྣམ་པར་མཇལ་འཕྲད་དང་ནང་པའི་གནས་ཆེན་ཁག་ཏུ་གནས་མཇལ་སོགས་ཀྱི་མཛད་འཕྲིན་སྐྱོང་བཞིན་འདུག

H.E. Ling Rinpoche was kindly invited for lunch with the most Venerable Makulewe Wimala Mahanayake Thero, Head of the Ramanna Order, in Meergama, Sri Lanka (28/01/2022). They enjoyed an enthusiastic discussion about Vinaya.
Photos by Tenzin Khentse

ཁ་སང་ཕྱི་ཚེས་ ༢༨ ཉིན་སིང་གྷ་ལའི་རྒྱལ་ཁབ་ནང་གི་ཆོས་བརྒྱུད་ཆེན་པོ་གསུམ་གྱི་ནང་ཚན་ (Amarapura Maha Nikaya) གྱི་དབུ་ཁྲིད་བླ་ཆེན་མཧཱ་ཀུ་ལེ་ཝེ་ཝི་མ་མ་ལ་མཧཱ་ནི་ཀ་ཡ་མཆོག་དང་མཇལ་འཕྲད་གནང་སྟེ། དུས་ཡུན་ཆུ་ཚོད་ ༡ ཙམ་གྱི་རིང་གཞི་གསུམ་གྱི་ཆོ་གའི་སྐོར་ལ་བཀའ་སྡུར་ལྷུགས་པོ་གནང་ཡོད་འདུག་ལ། འདི་ག་བོད་ཀྱི་དུས་བབ་གསར་འགོད་པས་ཡོངས་འཛིན་གླིང་མཆོག་སྤྲུལ་རིན་པོ་ཆེའི་ཕྱག་མཛོད་བསྟན་འཛིན་མཁྱེན་བརྩེ་ལགས་སུ་རིན་པོ་ཆེ་མཆོག་གི་མཛད་འཕྲིན་སྐོར་བཀའ་འདྲི་ཞུས་པར་ཁོང་གིས། དེ་སྔ་ནས་གླིང་རིན་པོ་ཆེ་མཆོག་སིང་གྷ་ལའི་རྒྱལ་ཁབ་ཏུ་ཕེབས་རོགས་ཟེར་ནས་སྙན་གསེང་ཞུས་ཡོད་ཀྱང་། གླིང་རིན་པོ་ཆེ་མཆོག་ལ་ཕྱི་རྒྱལ་གྱི་ལུང་པ་གཞན་པ་མང་པོའི་ནང་མཛད་འཆར་མང་པོ་ཡོད་པ་དང་། ཏོག་དབྱིབས་ནད་ཡམས་ཀྱི་རྐྱེན་གྱིས་ཕེབས་ཐུབ་མེད་པ་རེད། ད་ལན་སིང་གྷ་ལའི་ནང་ནད་ཡམས་མེད་པ་དང་རྒྱ་གར་ནས་ཕྱིའི་རྒྱལ་ཁབ་ཀྱི་མི་ཡོང་ཆོག་པ་ཆགས་པར་བརྟེན་སིང་གྷ་ལའི་རྒྱལ་ཁབ་ནང་ཕེབས་ཡོད་པ་རེད། ད་ལན་ཕེབས་དོན་གཙོ་བོ་ནི། སིང་གྷ་ལ་ནི་ནང་པའི་རྒྱལ་ཁབ་ཅིག་ཡིན་ཞིང་རྒྱ་གར་གྱི་རྗེས་སུ་ནང་པའི་གནས་རྙིང་ཤོས་ཤིག་ཆགས་ཀྱི་ཡོད་རེད་ལ། ལོ་ངོ་སྟོང་ཕྲག་གཉིས་ལྷག་ཙམ་ཕྱིན་པའི་གནས་རྩ་ཆེན་པོ་མང་པོ་མཇལ་རྒྱུ་ཡོད་པ་མ་ཟད། ནང་པའི་རྒྱལ་ཁབ་འདིར་ཆོས་བརྒྱུད་ཆེན་པོ་གསུམ་ཡོད་པ་དང་ད་ལན་ནང་པའི་བླ་ཆེན་རྣམ་པར་མཇལ་འཕྲད་དང་བཀའ་སྡུར་བགྲོ་གླེང་གནང་བ། དེ་བཞིན་ཆོས་གསུང་འདོན་སོགས་ཀྱི་མཛད་འཕྲིན་སྐྱོང་བཞིན་ཡོད་པ་དང་། རིན་པོ་ཆེ་མཆོག་ཡུལ་དེའི་ནང་ཆིབས་སྒྱུར་བསྐྱངས་བ་ཐེངས་དང་པོ་ཆགས་ཀྱི་ཡོད་སྐོར་གསུངས་བྱུང་ལ། ཟླ་འདིའི་ཕྱི་ཚེས་ ༢༧ ནས་ཉིན་གྲངས་ ༡༠ ཙམ་རིང་རིན་པོ་ཆེ་མཆོག་ནས་ཡུལ་དེའི་ནང་མཛད་འཕྲིན་སྐྱོང་གནང་རྒྱུ་ཡིན་འདུག

H.E. Ling Rinpoche, reincarnation of the teacher of Dalai Lama reaches Sri Lanka

༧སྐྱབས་རྗེ་ཡོངས་འཛིན་གླིང་མཆོག་སྤྲུལ་རིན་པོ་ཆེ་ཟླ་འདིའི་ཕྱི་ཚེས་ ༢༦ ཉིན་རྒྱ་གར་གྱི་རྒྱལ་ས་ལྡི་ལི་ནས་མཁའ་ལམ་བརྒྱུད་སེང་གྷ་ལའི་རྒྱལ་ས་ཁོ་ལོམ་བྷོ་རྒྱལ་སྤྱིའི་གནམ་ཐང་ (Colombo International Airport) དུ་ཞབས་སོར་འཁོད་སྐབས། ཡུལ་དེའི་ཆོས་བརྒྱུད་ཆེན་པོ་ (Amarapura Maha Nikaya) སོགས་ཀྱི་སྐུ་ཚབ་དང་། རྒྱལ་སྤྱིའི་ནང་པའི་ལྷན་ཚོགས་ (International Buddhist Confederation) ཀྱི་ཚོགས་གཙོ་གཞོན་པ་སོགས་ཀྱིས་ཕེབས་བསུ་སྣེ་ལེན་ཞུས་ཡོད་པ་དང་། ཕྱི་ཚེས་ ༢༧ ཉིན་ཁོ་ལོམ་བྷོའི་ནང་ཡོད་པའི་ཆོས་བརྒྱུད་ཆེན་པོ་ (Amarapura Maha Nikaya) ཀྱི་ལྟེ་གནས་སུ་གཟིགས་སྐོར་དང་། ཆོས་བརྒྱུད་དེའི་བསྟན་བདག་ (Dodampahala Chandrasiri Mahanayake Thero) མཆོག་གི་དབུས་པའི་ཆོས་བརྒྱུད་ཁག་གི་དབུ་ཁྲིད་རྣམས་དང་མཇལ་འཕྲད་གནང་སྟེ་དམ་ཆོས་འདུལ་བའི་ཉམས་བཞེས་སྐོར་བགྲོ་གླེང་གནང་ཡོད་འདུག

༧སྐྱབས་རྗེ་ཡོངས་འཛིན་གླིང་མཆོག་སྤྲུལ་རིན་པོ་ཆེ་ཨ་རི་དང་ཁེ་ན་ཌ། ཨི་ཛི་རལ་ (Israel) དང་ཧོ་ལན་ཌི་ (Holland)། སི་པེན་ (Spain)། དབྱིན་ཡུལ་ (United Kingdom)། ཧྥ་རན་སི་ (France)། ཕྱི་སོག་ (Mongolia)། ཐའེ་ཝན་ (Taiwan)། ཉི་ཧོང་ (Japan)། ནེའུ་ཛི་ལན་ཌི་ (New Zealand)། ཨོ་སི་ཊོ་ལི་ཡ་ (Australia) དང་རྒྱ་བལ་གཉིས་སོགས་འཛམ་གླིང་རྒྱལ་ཁབ་ཁག་མང་པོའི་ནང་དུ་ཆིབས་བསྒྱུར་བསྐྱངས་ཏེ་ཆོས་ཕྱོགས་ཀྱི་མཛད་འཕྲིན་རྒྱ་ཆེར་བསྐྱངས་དང་སྐྱོང་མུས་ཡིན་འདུག

གསར་འགོད་པ། བསྟན་འཛིན་ཕུར་བུ།