ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག་ནས་འཕགས་བོད་འབྲེལ་མཐུད་ཚོགས་པས་གཟའ་འཁོར་རེར་བོད་དོན་གླེང་མོལ་ཞེས་པའི་ལས་གཞི་སྤེལ་རྒྱུར་དགའ་བསུ་དང་སྦྲགས། བོད་མི་ཡོངས་ལ་མིང་དོན་མཚུངས་པའི་རང་སྲིད་རང་སྐྱོང་རག་ཐབས་གནང་དགོས་པའི་སྐུལ་མ་གནང་འདུག
དེ་རིང་འདི་གའི་གསར་འགོད་པས་ཁ་པར་བརྒྱུད་བདུན་རེའི་བོད་དོན་གླེང་མོལ་ཞེས་པའི་ལས་གཞིའི་དེའི་སྐོར་ལ་འཕགས་བོད་འབྲེལ་མཐུད་ཚོགས་པའི་དྷ་ས་ཁུལ་གྱི་ས་གནས་འགན་འཛིན་དང་ལས་གཞིའི་སྣེ་འཁྲིད་པ་གཅིག་ལྕོགས་གནང་མཁན་ཧི་མ་ཅལ་མངའ་སྡེའི་གཙུག་ལག་སློབ་གྲྭ་ཆེན་མོའི་སློབ་དཔོན་གཞོན་པ་སྐུ་ཞབས་སན་ཆིན་ (Sachin Srivastava) ལགས་སུ་བཀའ་འདྲི་ཞུས་སྐབས། ལས་གཞི་དེ་ནི་དྲ་ལམ་གྱི་ལས་གཞི་ཞིག་ཡིན། ང་ཚོས་གཙོ་བོ་རྒྱ་ནག་གཞུང་གིས་བོད་ནང་སྲིད་ཇུས་འདྲ་མིན་གྱི་ཐོག་ནས་ཁོར་ཡུག་དང་རིག་གཞུང་སོགས་གཏོར་བཤིག་གཏོང་གི་ཡོད་པའི་ཐད། ཆེད་མཁས་པ་གདན་འདྲེན་ཞུས་ཏེ། བགྲོ་གླེང་བྱེད་པ་དང་རྒྱལ་སྤྱིའི་སྟེང་བོད་དོན་སྐོར་གྱི་གོ་རྟོགས་སོགས་སྤེལ་རྒྱུ་ཡིན། ཞེས་དང་། ལས་གཞི་དེ་ནི་རྒྱ་གར་ཁོ་ན་ཙམ་མིན་པར་རྒྱལ་སྤྱིའི་རང་བཞིན་ཅན་ཞིག་ཡིན་པ་དང་། བདུན་རེར་འཕགས་བོད་འབྲེལ་མཐུད་ཚོགས་པས། བོད་ཀྱི་ད་ལྟའི་གནས་བབ་དང་མ་འོངས་པ་ཞེས་པའི་བརྗོད་གཞིའི་འོག་དྲ་ལམ་བརྒྱུད་བོད་དོན་་དྲིལ་བསྒྲགས་བྱས་ཏེ། རྒྱའི་བཙན་འཛུལ་འོག་ནས་བོད་ལ་རང་དབང་ཐོབ་པ་དང་གངས་རིན་པོ་ཆེ་བཅིངས་གྲོལ་གཏང་རྒྱུའི་རེ་བ་ཡོད་སྐོར་སོགས་བརྗོད་བྱུང་།
ཕྱི་ཟླ་ ༡ ཚེས་ ༢༩ ཉིན་འཕགས་བོད་འབྲེལ་མཐུད་ཚོགས་པས་ (Bharat Tibbat Sahyog Manch) གཟའ་འཁོར་རེའི་བོད་དོན་གླེང་མོལ་ཞེས་པའི་དྲ་ཐོག་གི་ལས་རིམ་གསར་པ་ཞིག་དབུ་འབྱེད་གནང་བའི་མཛད་སྒོའི་སྟེང་། བོད་མིའི་སྒྲིག་འཛུགས་ཀྱི་ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག་མཉམ་ཞུགས་གནང་སྟེ། དེ་ལྟ་བུའི་ལས་རིམ་ཞིག་དབུ་འབྱེད་གནང་བར་སྲིད་སྐྱོང་སྤེན་པ་ཚེ་རིང་མཆོག་དང་བོད་མིའི་སྒྲིག་འཛུགས་ཀྱི་ཚབ་ཞུས་ཏེ་དགའ་བསུའི་གསུང་བཤད་གནང་ཡོད་པ་དང་། སྐབས་དེར་སྐུ་ངོ་ནོར་འཛིན་སྒྲོལ་མ་མཆོག་གིས། དེ་རིང་འཕགས་བོད་འབྲེལ་མཐུད་ཚོགས་པས་མང་ཚོགས་ལ་བོད་དོན་གོ་རྟོགས་སྤེལ་སླད་གཟའ་འཁོར་རེའི་བོད་དོན་གླེང་མོལ་ཞེས་དྲ་ཐོག་གི་ལས་རིམ་ཞིག་དབུ་འབྱེད་གནང་གི་ཡོད་པ་དང་། ལས་རིམ་དེ་ནི་དུས་ཐོག་ཆར་འབབ་ལྟ་བུ་བྱུང་ཡོད་པ་མ་ཟད། ལས་རིམ་དེ་བརྒྱུད་འཕགས་བོད་འབྲེལ་མཐུད་ཚོགས་པའི་ངོས་ནས་རྒྱ་ནག་གཞུང་གིས་བོད་ནང་དབང་བསྒྱུར་དང་དྲག་གནོན་བྱས་དང་བྱེད་བཞིན་པ་རྣམས་ཐེར་འདོན་གནང་རྒྱུ་མཚོན་པའི་རྒྱ་ཆེའི་མང་ཚོགས་ལ་གོ་རྟོགས་སྤེལ་རྒྱུར་ཧ་ཅང་དགོས་མཁོ་ཅན་ཆགས་ཡོད་ལ། བོད་མི་ཡོངས་ལ་མིང་དོན་མཚུངས་པའི་རང་སྲིད་རང་སྐྱོང་ཐོབ་ཐབས་སུ་དབུ་མའི་ལམ་གྱི་སྲིད་བྱུས་གཞིར་བཞག་ཐོག་བོད་རྒྱའི་གྲོས་མོལ་བསྐྱར་གསོ་ཡོང་བར་གནོན་ཤུགས་སྤྲོད་དགོས་པ་ཡང་ཆགས་ཡོད། ངས་འཕགས་བོད་འབྲེལ་མཐུད་ཚོགས་པའི་ཚོགས་མི་ཡོངས་ནས་ལོ་མང་རིང་བོད་དོན་སླད་རྒྱབ་སྐྱོར་གནང་དང་གནང་བཞིན་པར་ཐུགས་རྗེ་ཆེ་ཞུ་བ་དང་ཆབས་ཅིག་ཏུ་ལས་རིམ་འདི་ལམ་ལྷོངས་ཡོང་བའི་སྨོན་འདུན་ཞུ་རྒྱུ་ཡིན། འཕགས་བོད་གཉིས་རྣམ་པར་རྒྱལ་གྱུར་ཅིག ཅེས་གསུངས་ཡོད་པ་རེད།
ཡང་དྲ་ལམ་གྱི་ལས་གཞི་དེ་དང་འབྲེལ་ནས་འཕགས་བོད་འབྲེལ་མཐུད་ཚོགས་པས་གསར་འགོད་བསྒྲགས་གཏམ་ཞིག་སྤེལ་བའི་ནང་། ལས་གཞི་འདི་ནི་བོད་ལ་རང་དབང་ཐོབ་པ་དང་རྒྱ་གར་མདུན་སྐྱོད་དང་གོང་འཕེལ་སོགས་ལ་དམིགས་ཏེ། རྒྱལ་སྤྱིའི་སྡིངས་ཆའི་སྟེང་རྒྱ་ནག་གི་མི་ཆོས་ལས་བརྒལ་བའི་རྒྱ་སྐྱེད་རིང་ལུགས་དང་སྲིད་ཇུས་དག་ཐེར་འདོན་བྱ་རྒྱུ་ཡིན། ཞེས་བརྗོད་འདུག འཕགས་བོད་འབྲེལ་མཐུད་ཚོགས་པ་ནི་ཕྱི་ལོ་ ༡༩༩༩ ལོར་གསར་དུ་བཙུགས་ཡོད་ཅིང་བོད་དོན་རྒྱབ་སྐྱོར་བའི་ཚོགས་པ་ཆེ་ཤོས་ཀྱི་གྲས་ཤིག་ཡིན་པ་དང་། ཚོགས་པ་དེས་ད་བར་རྒྱ་གར་དང་རྒྱལ་སྤྱིའི་སྟེང་བོད་དོན་དང་འབྲེལ་བའི་གླེང་མོལ་མཚོན་པའི་ཞི་བའི་ལས་འགུལ་མི་ཉུང་བ་ཞིག་སྤེལ་ཡོད་འདུག
གསར་འགོད་པ། སྐལ་བཟང་སྦྱིན་པ།
