༸གོང་ས་སྐུ་ཕྲེང་བཅུ་གསུམ་པ་ཆེན་པོ་མཆོག་གིས་ཕྱི་ལོ་ ༡༩༡༣ ལོར་ཆུ་གླང་རྩ་ཚིག་བསྒྲགས་ཏེ་ལོ་ངོ་ ༡༠༩ འཁོར་བའི་ཉིན་མོ་སྲུང་གཙི་གནང་།
དེ་རིང་བཞུགས་སྒར་དྷ་སའི་བོད་ཀྱི་གསོལ་མགྲོན་ཁང་དུ། བོད་རང་བཙན་སློབ་ཕྲུག་ཚོགས་པས་༸གོང་ས་སྐུ་ཕྲེང་བཅུ་གསུམ་པ་ཆེན་པོ་མཆོག་གིས་ཕྱི་ལོ་ ༡༩༡༣ ལོར་ཆུ་གླང་རྩ་ཚིག་བསྒྲགས་ཏེ་ལོ་ངོ་ ༡༠༩ འཁོར་བའི་ཉིན་མོ་དང་བསྟུན། ལོ་འཆར་ཅན་ལྟར་བོད་རང་བཙན་ཉིན་མོ་ཞེས་པ་སྲུང་གཙིའི་གཏམ་བཤད་ལས་རིམ་ཞིག་གོ་སྒྲིག་བྱས་པའི་སྟེང་། བོད་ཀྱི་དཔེ་མཛོད་ཁང་གི་རིག་གཞུང་ཉམས་ཞིབ་ཁང་དང་པར་སྐྲུན་སྡེ་ཚན་གྱི་འགན་འཛིན་ན་ག་སངས་རྒྱས་བསྟན་དར་ལགས་ཀྱིས། ང་ཚོས་ལོ་རྒྱུས་ལ་སློབ་སྦྱོང་ཡག་པོ་བྱས་ན་གནས་ཚུལ་མང་པོ་ཞིག་གསལ་པོ་ཆགས་ངེས་ཡིན་སྐོར་དང་། མི་མང་པོས་དེ་རིང་གི་ཉིན་མོ་འདི་ཆབ་སྲིད་ཀྱི་ལས་འགུལ་ཞིག་ལ་དགོངས་སྲིད་ཀྱང་། དོན་དངོས་ཐོག་འདི་ནི་ལོ་རྒྱུས་ལ་དྲན་གསོ་བྱེད་པའི་ཉིན་མོ་གལ་ཆེན་ཞིག་ཡིན་སྐོར་སོགས་གསུངས་སོང་།
དེ་ཡང་ན་ག་སངས་རྒྱས་བསྟན་དར་ལགས་ཀྱིས་བོད་རང་བཙན་སླར་གསོའི་ཡོངས་ཁྱབ་གསལ་བསྒྲགས་ཀྱི་བརྗོད་དོན་དང་གནད་འགག་སྐོར་ནས་བརྗོད་དོན། ༸སྐྱབས་མགོན་རིན་པོ་ཆེ་མཆོག་གི་རྩ་ཚིག་དེ་བོད་རྒྱལ་ཁབ་འདི་གཞན་རྒྱལ་ཁབ་སུ་གཅིག་གི་ཀྱང་འོག་ཏུ་མེད་པ་ཧ་ཅང་གསལ་པོ་བཀའ་གནང་ཡོད་པ་མ་ཟད། དེའི་ནང་ལ་དོན་ཚན་ ༥ ཡོད་པ་རེད། ཕྱིས་སུ་ང་ཚོས་དེར་ཉམས་ཞིབ་བྱེད་པའི་སྐབས། མདོར་བསྡུས་ན་རང་བཙན་གཙང་མ་ཡིན་པའི་སླར་ཡང་གསལ་བསྒྲགས་བྱས་པ་ཞིག་ལ་ངོས་འཛིན་བྱེད་ཀྱི་ཡོད་པ་རེད། ངོས་འཛིན་བྱས་པ་ནང་བཞིན་ང་ཚོས་ཆུ་གླང་རྩ་ཚིག་ལ་ཞིབ་མོར་སློབ་སྦྱོང་བྱས་ན་ནང་དོན་ཡང་དེ་ལྟར་ཆགས་ཀྱི་ཡོད་པ་རེད། ཅེས་དང་། མི་མང་པོ་ཞིག་གིས་དེ་རིང་གི་ཉིན་མོ་དེ་ཆབ་སྲིད་ཀྱི་ལས་འགུལ་ཞིག་ལ་དགོངས་སྲིད་ཀྱི་རེད་ཀྱང་། དོན་དངོས་ཐོག་འདི་ནི་ལོ་རྒྱུས་ཀྱི་དྲན་གསོ་ཆེན་པོ་ཞིག་ཆགས་བསྡད་ཡོད་པ་རེད། ཅེས་དང་། རྒྱལ་དབང་བཅུ་གསུམ་པ་མཆོག་གིས་ཕྱི་ལོ་ ༡༩༨༥ ལོར་སྩལ་བའི་སྦུག་ཐམ་རྩ་ཚིག་དང་། ཕྱི་ལོ་ ༡༩༡༣ ལོར་སྩལ་བའི་ཆུ་གླང་རྩ་ཚིག་བཅས་གཉིས་ཀར་དོན་ཚན་ ༥ ཡོད་པའི་ཁྲོད་ནས། དོན་ཚན་ ༤ མ་གཏོགས་ཕལ་ཆེ་བ་བརྗོད་དོན་གཅིག་མཚུངས་ཡིན་སྐོར་དང་། ༸གོང་ས་སྐུ་ཕྲེང་བཅུ་གསུམ་པས་དགུང་ལོ་ ༢༠ ཐོག་སྦུག་ཐམ་རྩ་ཚིག་སྩལ་སྐབས་བོད་ལ་ཟིང་ཆ་དེ་ཙམ་མེད་པའི་རྐྱེན་གྱིས་བོད་རང་བཙན་གསལ་བསྒྲགས་གནང་རྒྱུའི་དགོས་པ་གཟིགས་མེད་པ་དང་། འོན་ཀྱང་ཕྱི་ལོ་ ༡༩༡༣ ལོར་ཆུ་གླང་རྩ་ཚིག་སྩལ་སྐབས་དམིགས་བསལ་དོན་ཚན་ལྔ་ཡོད་པའི་ཁྲོད་ནས་དོན་ཚན་ ༤ པ་དེར་ཆབ་སྲིད་ཀྱི་གལ་གནད་ཡོད་སྐོར་དང་། དེ་མིན་དོན་ཚན་གཞན་རྣམས་ཆོས་ཕྱོགས་དང་འཛིན་སྐྱོང་། སྤྱི་ཚོགས་ཀྱི་བདེ་དོན་སོགས་ཀྱི་སྐོར་ལ་ཡིན་སྐོར་འགྲེལ་བརྗོད་བྱས་སོང་།
རྒན་ན་ག་སངས་རྒྱས་བསྟན་དར་ལགས་ཀྱིས་ཆུ་གླང་རྩ་ཚིག་གི་ནང་དོན་ངོ་སྤྲོད་གནང་སྐབས། བཀའ་ཚིག་དོན་ཚན་བཞི་པའི་ནང་ཕྱི་ལོ་ ༡༩༠༤ ནས་ ༡༩༡༣ བར་གྱི་གནས་ཚུལ་རྣམས་རྒྱབ་རྟེན་དུ་བྱས་ཏེ་བོད་རྒྱལ་ཁབ་འདི་རང་བཙན་ཡིན་པའི་གསལ་བསྒྲགས་བྱས་ཡོད་སྐོར་དང་། བཀའ་ཚིག་དོན་ཚན་དེའི་ནང་ཚིག་བོད་རང་དབང་ལྡན་པ་ཡིན་ཞེས་འཁོད་པ་དེ་ནི་བོད་རང་བཙན་ཡིན་པ་གོ་ཡི་ཡོད་པ་དང་། རང་དབང་ཞེས་པ་དེ་རང་བཙན་ལ་གོ་ཆོག་པ་ཡིན། དཔེར་ན་རྒྱ་གར་གྱིས་རང་བཙན་རྩོད་ལེན་བྱེད་སྐབས་སུ་ Freedom Struggle དང་Freedom Fighter ཞེས་བརྗོད་ཀྱི་ཡོད་པ་རེད། དེ་དུས་རང་དབང་དང་རང་བཙན་གཉིས་གོ་དོན་གཅིག་པ་རེད། དེ་བཞིན་དབྱིན་སྐད་ནང་ Nation དང་ state ཟེར་བ་གོ་དོན་ལོགས་ཀ་ཡིན་ནའང་། སྐབས་རེར་གོ་དོན་གཅིག་ཡིན་པའང་ཡོད། རྩ་ཚིག་དོན་ཚན་དེའི་ནང་རང་ས་བརྟན་སྲུང་ཟེར་བ་དང་། རང་ས་རང་སྐྱོང་། རང་སྡེ་རང་སྲུང་བྱ་རྒྱུ། རྒྱལ་ཁབ་ལ་སྙན་གསེང་ཞུ་རྒྱུ་ལྟ་བུ་འཁོད་ལ། སྐུ་ངོ་ཞྭ་སྒབ་པས་དེ་རང་བཙན་གསལ་བསྒྲགས་རེད་ཟེར་དགོས་པའི་དོན་དག་ཕལ་ཆེར་འདི་ལ་ཐུག་ཡོད་ས་རེད། ཅེས་བརྗོད་སོང་།
ཡང་རྒན་ན་ག་སངས་རྒྱས་བསྟན་དར་ལགས་ཀྱིས་བོད་དེ་ལོ་རྒྱུས་ཀྱི་ཐོག་ནས་རྒྱ་ནག་གི་ཆ་ཤས་མིན་པའི་སྐོར་ནས་གཏམ་བཤད་སྤེལ་སྐབས། རྒྱའི་ལོ་རྒྱུས་མཁས་དབང་ལིག་ཧན་ཁྲིན་གྱིས་རྒྱའི་ཡིག་ཆ་རྙིང་པ་ལ་གཞི་བཟུང་སྟེ་རྒྱ་ནག་གི་མིང་དང་ཆིང་རྒྱལ་རབས་སྐབས་ཀྱི་བོད་རྒྱའི་འབྲེལ་བའི་སྐོར་གྱི་དཔེ་དེབ་བོད་ནི་གནའ་སྔ་མོ་ནས་རྒྱ་ནག་གི་ཆ་ཤས་མིན་ཞེས་པ་ངོ་སྤྲོད་གནས་སྐབས། རྩོམ་པ་པོས་ལོ་རྒྱུས་ཀྱི་བསྡོམས་ནང་། མིང་རྒྱལ་རབས་གཞུང་དམངས་གཉིས་ཀྱིས་བོད་ནི་མིང་རྒྱལ་རབས་ཀྱི་ཆ་ཤས་ཡིན་པའི་ཡིག་ཚང་གཅིག་གི་ནང་ཡང་བྲིས་མེད་པ་མ་ཟད། བོད་ནི་མིང་རྒྱལ་རབས་ཀྱི་ཆ་ཤས་ཡིན་པ་བསམ་བློ་ནང་དྲན་མྱངས་མེད། བོད་ནི་རྒྱ་ནག་གི་མིང་རྒྱལ་རབས་སྐབས་སུ་རང་བཙན་རྒྱལ་ཁབ་ཅིག་ཡིན། བོད་ནི་མིང་རྒྱལ་རབས་དུས་སྐབས་ནས་རྒྱ་ནག་གི་ཆ་ཤས་རེད་ཟེར་བ་ནི་རྒྱ་ནག་དམར་པོ་གཞུང་གིས་ལོག་འགྲེལ་བྱས་པ་ཁོ་ན་ཡིན། ལྷག་པར་དུ་རྒྱའི་ཡིག་ཚང་ནང་གི་རྟེན་འབུལ། ཆོ་ལོ་སྩལ་བ་སོགས་ལ་ཞིབ་འཇུག་མཐར་ཕྱིན་པ་བྱས་ཏེ། དེང་སྐབས་རྒྱ་ནག་གི་བོད་ཀྱི་ལོ་རྒྱུས་ལ་ལོག་འགྲེལ་ལོག་སྨྲ་ཚར་བཅད་ཡོད། ཅེས་འཁོད་ཡོད་སྐོར་བརྗོད་སོང་། རྒྱ་ཡིག་ཐོག་བརྩམས་པའི་དཔེ་དེབ་དེ་ལྟའི་ཆར་སི་པེན་དུ་གནས་འཁོད་སངས་རྒྱས་སྐྱབས་ལགས་ཀྱིས་བོད་འགྱུར་བྱས་ཏེ་བོད་ཀྱི་དཔེ་མཛོད་ཁང་ནས་པར་སྐྲུན་བྱ་འཆར་ཡོད་པ་དང་། དཔེ་ཆའི་དབྱིན་འགྱུར་མ་དེ་ཉིད་རྩོམ་པ་པོ་རང་ཉིད་ཀྱིས་སྒྱུར་མུས་ཡིན་པ་རེད་འདུག
བོད་རང་བཙན་སློབ་ཕྲུག་ཚོགས་པའི་རྒྱ་གར་ཚན་པའི་འགན་འཛིན་རིག་འཛིན་ཆོས་སྒྲོན་ལགས་ཀྱིས། ཚོགས་པའི་དེ་གའི་ངོས་ནས་ཕྱི་ལོ་ ༢༠༡༣ ནས་བཟུང་ལོ་ལྟར་ཟླ་ ༢ ཚེས་ ༡༣ ཉིན་བོད་ཀྱི་རང་བཙན་ཉིན་མོ་ཞེས་པ་སྲུང་གཙི་ཞུས་ཡོད་པ་དང་། སྲུང་གཙི་ཞུ་རྒྱུའི་དམིགས་ཡུལ་དེ་ལོ་རྒྱུས་ཀྱི་གལ་གནད་གསལ་སྟོན་དང་། ན་གཞོན་མི་རབས་རྣམས་ལ་ལོ་རྒྱུས་ཀྱི་དྲན་གསོ་འདི་བརྒྱུད་ནས་སྙིང་སྟོབས་ཆེར་བསྐྱེད་ཡོང་ཆེད་ཡིན་སྐོར་དང་། ལས་འགུལ་འདི་བོད་རང་བཙན་མ་ཐོབ་བར་དུ་རྒྱུན་སྐྱོང་བྱ་རྒྱུ་ཡིན་སྐོར་བརྗོད་སོང་ལ། སློབ་ཕྲུག་ཚོགས་པའི་ལས་འཆར་དོ་དམ་པ་ལེགས་ལྡན་ལགས་ཀྱིས། དེ་རིང་གི་ལས་འགུལ་འདིའི་འཆར་སྣང་ནི་༸གོང་ས་རྒྱལ་བ་རིན་པོ་ཆེ་མཆོག་རང་བཙན་ལྡན་པའི་བོད་ལ་ཕྱིར་ཕེབས་གནང་རྒྱུ་དེ་ཡིན་སྐོར་འགྲེལ་བརྗོད་བྱས་སོང་།
གསར་འགོད་པ། པ་སངས་ཚེ་རིང་།
ལོ་ཚིགས་ནོར་འདུག་གདའ།