རྒྱ་གར་གཞུང་གིས་རྒྱ་ནག་གི་མཉེན་ཆས་རིགས་ ༢༢༤ ལྷག་བཀག་སྡོམ་བྱས།

རྒྱ་གར་གཞུང་གིས་རྒྱལ་ཁབ་ཀྱི་བདེ་འཇགས་དང་ས་ཁོངས་བདག་དབང་། མི་མང་གི་བདག་དབང་སྲུང་སྐྱོབ་སོགས་ལ་གནོད་ཀྱི་ཡོད་པའི་ངོས་འཛིན་འོག་ཕྱི་ལོ་ ༢༠༢༠ ནས་ད་ལྟ་བར་དུ་རྒྱ་ནག་གཞུང་དང་དངོས་ཤུགས་བརྒྱུད་གསུམ་ནས་འབྲེལ་བ་ཡོད་པའི་ཁ་པར་མཉེན་ཆས་ ༢༢༤ ལྷག་བཀག་སྡོམ་བྱས་ཡོད་པ་རེད།

ཁ་སང་ཕྱི་ཚེས་ ༡༤ ཉིན་རྒྱ་གར་གྱི་གསར་ལམ་ཁག་ཏུ་གནས་ཚུལ་ཐོན་པ་ལྟར། རྒྱ་གར་གཞུང་གིས་མང་ཚོགས་ཀྱི་བདེ་འཇགས་ལ་གནོད་གཞི་དང་སྒེར་གྱི་གནས་ཚུལ་བརྐུ་འཁྱེར་བྱེད་ཀྱི་ཡོད་པའི་ངོས་འཛིན་འོག སླར་ཡང་གཞོན་སྐྱེས་ཁྲོད་སྤྱོད་རྒྱུག་ཆེ་བའི་དམག་འཐབ་སྐོར་གྱི་གློག་རྡུལ་རྩེད་ཆས་ Garena Free Fire ཡིས་མཚོན་པའི་རྒྱ་ནག་དང་འབྲེལ་བའི་ཁ་པར་གྱི་མཉེན་ཆས་ ༥༤ བཀག་སྡོམ་བྱས་ཡོད་འདུག རྒྱ་གར་གྱི་དཔལ་འབྱོར་དུས་བབ་ཀྱི་སྟེང་གནས་ཚུལ་འཁོད་པ་ལྟར་ན། རྒྱ་གར་དབུས་འཕྲུལ་རིག་དང་གློག་ཀླད་ལྷན་ཁང་(Ministry of Electronics and IT) ངོས་ནས་ད་ལན་བཀག་སྡོམ་བྱས་པའི་མཉེན་ཆས་དེ་དག་གིས། རྒྱ་གར་ནང་གི་འཛད་སྤྱོད་པའི་སྒེར་གྱི་གནས་ཚུལ་རྣམས་རྒྱ་ནག་ཚུད་པའི་ཕྱིའི་རྒྱལ་ཁབ་ལ་གནས་སྤོ་བྱེད་ཀྱི་ཡོད་པ་ཤེས་རྟོགས་བྱུང་སྟེ། གྷུ་གྷལ་བང་མཛོད་(Google playstore) གྱིས་མཚོན་པའི་མཉེན་མཛོད་ཁག་ལ་མཉེན་ཆས་དེ་དག་ནག་གསུབ་གཏོང་དགོས་པའི་བཀའ་ཁྱབ་བཏང་ཡོད་འདུག་པ་ལྟར། གསར་འགོད་པས་རྒྱ་གར་གཞུང་གིས་བཀག་སྡོམ་བྱས་པའི་མཉེན་ཆས་དེ་དག་རྒྱ་གར་གྱི་གྷུ་གྷལ་མཉེན་མཛོད་ནང་འཚོལ་བཤེར་བྱེད་སྐབས་གསལ་གྱི་མི་འདུག

མིང་བརྗོད་འདོད་མེད་པའི་རྒྱ་གར་གྱི་གཞུང་འབྲེལ་མི་སྣ་ཞིག་གིས་འགྲེལ་བརྗོད་བྱས་པ་ལྟར་ན། ད་ལན་བཀག་སྡོམ་བྱས་པའི་མཉེན་ཆས་མང་པོ་ཞིག་རྒྱ་ནག་གི་འཕྲུལ་རིག་བཟོ་ཚོང་ཁང་ཆེ་གྲས་ཊེན་སེན་ (Tencent) དང་ཨ་ལི་བྷ་བྷ་ (Alibaba)། ནེཊ་ཨི་སི་(NetEase) སོགས་ཀྱི་ཡིན་པ་མ་ཟད། འདས་ལོར་རྒྱ་གར་གཞུང་གིས་རྒྱ་ནག་གི་མཉེན་ཆས་མང་པོ་བཀག་སྡོམ་བྱས་པའི་རྐྱེན་གྱིས། བཟོ་ཚོང་ཁང་དེ་དག་གིས་སྔར་བཀག་སྡོམ་ཟིན་པའི་མཉེན་ཆས་ཀྱི་མིང་དང་རྣམ་པ་བཅས་ལ་འགྱུར་བཅོས་ཕྲན་བུ་བཏང་སྟེ་བསྐྱར་དུ་རྒྱ་གར་ནང་སྤྱོད་ཆོག་པ་བཟོས་ཡོད་སྐོར་དང་། ཡང་སྐབས་འགའ་ཤས་ལ་མཉེན་ཆས་ཀྱི་གསོག་མཛོད་ཁང་(Server)དེ་རྒྱ་ནག་ནས་ཧོང་ཀོང་དང་སིང་གྷ་པུར་ལ་གནས་སྤོས་བྱས་པ་ཙམ་ལས། མཉེན་ཆས་སྤྱོད་མཁན་གྱི་གནས་ཚུལ་རྣམས་མཐའ་མཇུག་དེར་རྒྱ་ནག་ནང་ཡོད་པའི་གསོད་མཛོད་ཁང་དུ་གསོག་གི་ཡོད་སྐོར་བརྗོད་ཡོད་འདུག དེ་བཞིན་རྒྱ་གར་གཞུང་ངོས་ནས་རྒྱ་ནག་གི་མཉེན་ཆས་དེ་དག་མཉེན་མཛོད་ནས་ནག་གསུབ་བཏང་ཟིན་ནའང་། དྲ་རྒྱ་སོགས་བརྒྱུད་ནས་ཐད་ཀར་ཕབ་ལེན་གྱིས་ཝི་པི་ཨེན་(VPN) བརྒྱུད་བཀོལ་སྤྱོད་ཐུབ་ཀྱི་ཡོད་པའི་གནས་ཚུལ་ཡང་ཤེས་རྟོགས་ཐུབ་ཡོད་སྐོར་བརྗོད་འདུག

ད་ཐེངས་འདི་རྒྱ་གར་གཞུང་གིས་རྒྱ་ནག་དང་འབྲེལ་བའི་མཉེན་ཆས་བཀག་སྡོམ་བྱེད་ཐེངས་བཞི་པ་དེ་ཡིན་པ་རེད། དེ་ཡང་ཕྱི་ལོ་ ༢༠༢༠ ཟླ་ ༦ པའི་ནང་རྒྱ་གར་གཞུང་གིས་རྒྱལ་ཁབ་ཀྱི་བདེ་འཇགས་དང་ས་ཁོངས་བདག་དབང་བཅས་ལ་ཉེན་ཁ་ཡོད་སྐོར་བརྗོད་དེ། ཐོག་མའི་ཆར་རྒྱ་ནག་གི་མཉེན་ཆས་ ༥༩ བཀག་སྡོམ་བྱས་ཡོད་ཅིང་། དེའི་རྗེས་ལོ་དེའི་ཟླ་ ༩ པའི་ནང་ཡང་བསྐྱར་རྒྱ་ནག་གི་མཉེན་ཆས་ ༡༡༨ དང་། ཕྱི་ཟླ་ ༡༡ པའི་ནང་མཉེན་ཆས་ ༤༣ བཅས་ད་བར་ཁྱོན་རྒྱ་ནག་དང་དངོས་ཤུགས་གཉིས་ནས་འབྲེལ་བ་ཡོད་པའི་ཁ་པར་མཉེན་ཆས་ ༢༢༤ ལྷག་བཀག་སྡོམ་བྱས་ཡོད་པ་རེད།

ད་ལྟའི་ཆར་རྒྱ་ནག་གཞུང་གིས་ལན་འདེབས་ལྟ་བུ་གང་ཡང་སྤྲད་མི་འདུག་ཀྱང་། ཕྱི་ལོ་ ༢༠༢༠ ལོའི་ཐག་གཅོད་དང་འབྲེལ་ནས་རྒྱ་ནག་ཕྱི་སྲིད་ལྷན་ཁང་གི་མགྲིན་ཚབ་པ་ཀྲའོ་ལི་ཅན་ཟེར་བ་དེས། རྒྱ་གར་གྱི་ཐག་གཅོད་ལ་བློ་འཚབ་ཡོད་པ་དང་། རྒྱ་གར་གཞུང་ངོས་ནས་ཚོང་འབྲེལ་དབྱེ་འབྱེད་ཀྱི་བྱེད་སྟངས་དེར་ནོར་བཅོས་བྱས་ཏེ། རྒྱལ་ཁབ་གཉིས་ཀྱི་མཉམ་ལས་ལ་དོ་ཕོག་གཏོང་མཚམས་འཇོག་དགོས་སྐོར་ཉེན་བརྡ་བཏང་ཡོད་ལ། སྐབས་དེར་རྒྱ་གར་དུ་ཡོད་པའི་རྒྱ་ནག་གི་གཞུང་ཚབ་པས་ཀྱང་། རྒྱ་གར་གཞུང་གི་རྒྱ་ནག་གི་མཉེན་ཆས་རྣམས་བཀག་སྡོམ་བྱས་པ་དེ་དབྱེ་འབྱེད་དང་འཛམ་གླིང་ཚོང་འབྲེལ་སྒྲིག་འཛུགས་ཀྱི་སྒྲིག་ཁྲིམས་དང་རྒྱབ་འགལ་དུ་ཕྱིན་པ་ཞིག་ཡིན་སྐོར་སྐྱོན་བརྗོད་བྱས་ཡོད་པ་རེད།

ད་ལན་གྱི་མཉེན་ཆས་བཀག་སྡོམ་གྱི་བཀའ་ཁྱབ་དེ་ནི། རྒྱ་གར་ནང་སྲིད་ལས་ཁུངས་ཀྱི་བསམ་འཆར་གཞིར་བཟུང་དབུས་འཕྲུལ་རིག་ལས་ཁུངས་ཀྱིས་འཕྲུག་རིག་ཁྲིམས་ཡིག་དོན་ཚན་ ༦༩ འོག་(Section 69 of IT Act) བཏང་བ་ཞིག་ཡིན་ཞིང་། མཉེན་ཆས་ ༥༤ ཁྲོད་དུ་བརྙན་ཐུང་སྒྲིག་སྦྱོར་གྱི་ཆེད་དུ་སྤྱོད་སྒོ་ཆེ་བའི་མཉེན་ཆས་ Viva Video Editor དང་། རྒྱ་གར་གཞུང་གིས་རྒྱ་ནག་གི་གློག་རྡུལ་རྩེད་ཆས་པཱབ་ཇི་ (PUBG) ཟེར་བ་བཀག་སྡོམ་བྱས་ནས་བཟུང་སྐད་གྲགས་དང་བཀོལ་སྤྱོད་བྱེད་ཤུགས་ཆེ་རུ་ཕྱིན་པའི་དམག་འཐབ་རྩེད་ཆས་ Free Fire ཞེས་པ་དེའང་ཡོད་པ་རེད།

གསར་འགོད་པ། པ་སངས་ཚེ་རིང་།