རྒྱ་ནག་གི་དཔོན་རིགས་དང་ཁྱིམ་མི་རྣམས་ཨ་རིར་སློབ་སྦྱོང་བྱེད་པར་ཡོང་མི་ཆོག་པའི་གྲོས་འཆར་བཏོན།

ཞི་ཅིན་ཕིན་གྱི་གཙོས་རྒྱ་ནག་དམར་ཤོག་ཚོགས་པའི་དམག་སྲིད་གཉིས་ཀྱི་དཔོན་རིགས་ ༢༠༠༠ ལྷག་གི་ཁྱིམ་མི་གཉེན་ཉེ་དང་བཅས་པ་ཨ་རིར་སློབ་སྦྱོང་བྱེད་པར་ཡོང་མི་ཆོག་པའི་གྲོས་འཆར་བཏོན་འདུག

དེ་རིང་ཨེ་ཕོག་དུས་བབ་གསར་ཁང་གིས་གནས་ཚུལ་སྤེལ་བ་ལྟར་ན། ཁ་སང་ཨ་རིའི་གྲོས་ཚོགས་འོག་མའི་སྤྱི་མཐུན་ཚོགས་པའི་གྲོས་ཚོགས་འཐུས་མི་ལྕམ་ཝི་ཁེ་ཧར་ཛུ་ལར་ (Vicky Hartzler) ལགས་ཀྱིས་གྲོས་འཆར་ཅིག་བཏོན་ནས། རྒྱ་ནག་གི་སྲིད་འཛིན་ཞི་ཅིན་ཕིན་གྱི་གཙོས་དམར་ཤོག་ཚོགས་པའི་མཐོ་རིམ་དཔོན་རིགས་དང་ཁོ་ཚོའི་ནང་མི་བུ་ཕྲུག་དང་བཅས་པ་ཨ་རིའི་སློབ་གྲྭ་ཆེན་མོ་ཁག་ཏུ་སློབ་སྦྱོང་བྱེད་པར་ཡོང་རྒྱུ་བཀག་སྡོམ་བྱ་དགོས་སྐོར་གྱི་གྲོས་འཆར་ཤོག་ངོས་གསུམ་ཅན་ཞིག་བཏོན་གནང་ཡོད་འདུག

ཕྱི་ལོ་ ༢༠༢༢ ལོར་མཐོ་རིམ་ཤེས་ཡོན་རྒྱ་ནག་དམར་ཤོག་ཚོགས་པ་ནས་སྲུང་སྐྱོབ་ཅེས་པའི་གྲོས་འཆར་དེའི་ནང་། རྒྱ་ནག་གི་སྲིད་འཛིན་ཞི་ཅིན་ཕིན་གྱི་གཙོས་རྒྱ་ནག་དམར་ཤོག་ཚོགས་པའི་དབུས་ཆབ་སྲིད་ལྷན་ཚོགས་ཀྱི་འཐུས་མི་བདུན་དང་ཉེར་ལྔ་བཅས་ཚུད་པའི་རྒྱ་ནག་རྒྱལ་ཡོངས་མི་དམངས་འཐུས་མི་ཚོགས་ཆེན་གྱི་དམར་ཤོག་ཚོགས་པའི་དཔོན་རིགས་ཡོངས་དང་། ཁོ་ཚོའི་བཟའ་ཟླ་དང་བྱིས་པ། ཕ་མ་དང་སྤུན་ཉེ། དེ་བཞིན་ཚ་བོ་ཚ་མོ་སོགས་ཀྱིས་སློབ་ཕྲུག་གི་ཐོངས་མཆན་འོག་ཨ་རི་ནས་སློབ་སྦྱོང་བྱེད་པ་དང་ཞིབ་འཇུག་སོགས་ཀྱི་ཐོངས་མཆན་ཚང་མ་བཀག་སྡོམ་བྱས་ཏེ། འཛམ་གླིང་ན་ཆེས་ཕུལ་དུ་བྱུང་བའི་ཨ་རིའི་ཤེས་ཡོན་སློབ་གསོ་རྒྱ་ནག་དམར་ཤོག་ཚོགས་པའི་མཐོ་རིམ་དཔོན་རིགས་དང་ཁོ་ཚོའི་ནང་མི་གཉེན་ཉེ་དག་གིས་མཁོ་སྒྲུབ་བྱ་རྒྱུ་མཚམས་འཇོག་དགོས་སྐོར་སོགས་བརྗོད་འདུག

བྱེ་བྲག་ཏུ་གྲོས་འཆར་དེའི་ནང་། གྲོས་འཆར་འདི་ཉིད་གཏན་འབེབ་བྱུང་བའི་ཉིན་ནས་བཟུང་། རྒྱ་ནག་དམར་ཤོག་ཚོགས་པའི་མགོ་ཁྲིད་ཞི་ཅིན་ཕིན་དང་། དམར་ཤོག་ཚོགས་པའི་དྲུང་ཆེ་དག དབུས་ཆབ་སྲིད་ལྷན་ཚོགས་ཀྱི་འཐུས་མི་རྣམས་དང་དམག་སྲིད་ཀྱི་མཐོ་རིམ་དཔོན་རིགས། དབུས་སྒྲིག་ཁྲིམས་ཞིབ་དཔྱོད་ལས་ཁུངས་ཀྱི་དཔོན་རིགས། རྒྱལ་ཡོངས་མི་དམངས་ཚོགས་ཆེན་གྱི་འཐུས་མི་དང་ཁོ་ཅག་གི་ནང་མི་བཅས་ཨ་རིར་སློབ་སྦྱོང་གི་སླད་དུ་ཡོང་བའི་ཐོབ་ཐང་མེད། ཅེས་བཀོད་འདུག

གྲོས་འཆར་དེ་དང་འབྲེལ་ནས་སྐུ་ཞབས་ཝི་ཁེ་ཧར་ཛུ་ལར་ལགས་ཀྱིས། རྒྱ་ནག་དམར་ཤོག་ཚོགས་པས་མི་རིགས་རྩ་གཏོར་དང་དྲག་སྤྱོད་ཀྱི་བྱ་བ་གཞན་མང་པོ་སྒྲུབ་བཞིན་ཡོད་ནའང་། ཁོ་ཚོས་ད་དུང་རང་རང་གི་བྱིས་པ་རྣམས་ཨ་རིར་ཡོད་པའི་འཛམ་གླིང་གི་ཕུལ་བྱུང་རང་བཞིན་གྱི་ཤེས་ཡོན་སྦྱོང་སླད་ཨ་རིར་མངག་གཏོང་བྱེད་མུས་ཡིན་པ་རེད། དེ་ངེས་པར་དུ་མཚམས་འཇོག་བྱེད་དགོས་ཀྱི་འདུག ཅེས་བརྗོད་ཡོད་པ་དང་། ཕྱི་ལོ་ ༢༠༢༠ ནས་ ༢༠༢༡ བར་རྒྱ་རིགས་ཁོ་ནའི་སློབ་མ་ཁྱོན་ ༣༡༧༠༠༠ ཡིས་ཨ་རིའི་སློབ་གྲྭ་ཆེན་མོ་ཁག་གི་ནང་དུ་སློབ་གཉེར་བྱས་ཡོད་པ་དང་དེའི་ཁྲོད་ཞི་ཅིན་ཕིན་གྱི་བུ་མོ་ཞི་མེན་ཙེ་ (Xi Mingze) ཡང་ཚུད་ཡོད་འདུག

ཞི་ཅིན་ཕིན་གྱི་བུ་མོས་ཕྱི་ལོ་ ༢༠༡༤ ལོར་ཨ་རིའི་ཧ་ཝར་ཌི་གཙུག་ལག་སློབ་གྲྭ་ཆེན་མོ་རུ་གཙུག་ལག་རབ་འབྱམས་པའི་སློབ་མཐར་ཕྱིན་རྗེས། ཕྱི་ལོ་ ༢༠༡༩ ལོར་སླར་ཡང་ཧ་ཝར་ཌི་རུ་འབུམ་རམས་པའི་སློབ་མགོ་བརྩམས་དེ་ད་ལྟ་མུ་མཐུད་ཨ་རིའི་ནང་སློང་སྦྱོང་བྱེད་ཀྱི་ཡོད་པ་དང་། གྲོས་ཚོགས་འཐུས་མི་ཝི་ཁེ་ཧར་ཛུ་ལར་ལགས་ཀྱིས། ཞི་ཅིན་ཕིན་དང་རྒྱ་ནག་དམར་ཤོག་ཚོགས་པས་མི་རིགས་རྩ་གཏོར་གྱི་བྱ་སྤྱོད་སྤེལ་གྱི་ཡོད་ཀྱང་། ཁོའི་བུ་མོར་ཧ་ཝར་ཌི་ནས་སློབ་སྦྱོང་ཐོབ་ཡོད། ཨ་རིས་རང་གི་རྒྱལ་ཁབ་གཏོར་བཤིག་གཏོང་ཐབས་སུ་འབད་བརྩོན་བྱེད་མཁན་དག་ལ་རོགས་པ་བྱེད་དགོས་དོན་མེད། ཅེས་བརྗོད་ཡོད་པ་དང་། གྲོས་ཚོགས་འཐུས་མི་ལྕམ་ཝི་ཁེ་ཧར་ཛུ་ལར་ལགས་ཀྱིས་ཨ་རི་རྒྱ་ནག་གི་གསང་ཉུལ་འོག་ནས་སྐྱོབ་དགོས་ཅེས་པའི་གྲོས་ཆོད་ཀྱི་གཙོས་རྒྱ་ནག་གཞུང་ལ་ཁ་གཏད་གཅོག་ཐབས་ཀྱི་གྲོས་ཆོད་མང་དག་ཅིག་བཏོན་གནང་ཡོད་པར་བརྟེན། ཕྱི་ལོ་ ༢༠༢༠ ལོར་རྒྱ་ནག་གཞུང་གིས་ཨ་རིའི་གྲོས་ཚོགས་འཐུས་མི་ ༡༡ གིས་ཧོང་ཀོང་དང་འབྲེལ་ནས་རྒྱ་ནག་གི་ནང་སྲིད་ཐད་ཇུས་གཏོགས་བྱས་པ་དང་འོས་འཚམ་མིན་པའི་སྤྱོད་ཚུལ་མངོན་པ་སོགས་ཀྱི་རྒྱུ་མཚན་དྲངས་ཏེ། ཨ་རིའི་གྲོས་ཚོགས་འཐུས་མི་དེ་དག་རྒྱ་ནག་ཏུ་ཡོང་མི་ཆོག་པ་དང་། རྒྱ་ནག་ནང་ཚོང་ལས་དང་ས་ཁང་བདག་གཉེར་བྱེད་སོགས་མི་ཆོག་པའི་ཉེས་ཆད་བཅད་ཡོད་པ་དང་། དེའི་ཁྲོད་ད་ལན་གྲོས་འཆར་འདོན་མཁན་ཝི་ཁེ་ཧར་ཛུ་ལར་ལགས་ཀྱང་ཚུད་ཡོད་འདུག

ད་ཐེངས་ནི་ཟླ་འདིའི་ནང་ཨ་རིས་རྒྱ་ནག་དམར་ཤོག་ཚོགས་པའི་དཔོན་རིགས་ཚོར་ཉེས་ཆད་ཀྱི་གྲོས་འཆར་བཏོན་པ་ཐེངས་གཉིས་པ་དེ་ཆགས་ཀྱི་ཡོད་པ་ལྟར།  ཟླ་འདིའི་ཕྱི་ཚེས་ ༩ ཉིན་ཨ་རིའི་གྲོས་ཚོགས་འོག་མའི་སྤྱི་མཐུན་ཚོགས་པའི་གྲོས་ཚོགས་འཐུས་མི་རྒན་གྲས་ཁག་ཅིག་གིས། རྒྱ་ནག་གི་བྱ་སྤྱོད་མཚམས་འཇོག་ཅེས་གྲོས་འཆར་ཞིག་བཏོན་པ་བརྒྱུད། ཞི་ཅིན་ཕིན་གྱི་གཙོས་རྒྱལ་ཡོངས་འཐུས་མི་ཚོགས་ཆེན་གྱི་དམར་ཤོག་ཚོགས་པའི་ལས་བྱེད་པ་ཡོངས་དང་ཁོ་ཚོའི་ཁྱིམ་མི་ཡོངས་ཨ་རིར་ཡོང་རྒྱུ་བཀག་འགོག་དང་ཨ་རིའི་དཔལ་འབྱོར་འཁོར་རྒྱུག་གི་ལམ་ལུགས་ནང་ཞུགས་མི་ཆོག་པ། ཨ་རིའི་ནང་ས་ཁང་ཉོ་སྒྲུབ་དང་ཚོང་ལས་སོགས་གཉེར་མི་ཆོག་པའི་ཉེས་ཆད་བཅད་ཡོད་པ་མ་ཟད། གྲོས་འཆར་དེའི་ནང་རྒྱ་ནག་དམར་ཤོག་ཚོགས་པའི་འཐུས་མི་ཁྱོན་ ༢༠༠༠ ལྷག་ཚུད་ཡོད་སྐོར་བརྗོད་འདུག

གསར་འགོད་པ། སྐལ་བཟང་སྦྱིན་པ།