བཀའ་ཤག་གིས་རྒྱ་ནག་གཞུང་གི་བོད་རིགས་རྒྱ་བསྒྱུར་གྱི་སྲིད་ཇུས་དང་བོད་ནང་གི་ཛ་དྲག་གནས་སྟངས་མཚམས་འཇོག་ཡོང་བར་བོད་མིའི་སྟོབས་ཤུགས་ཆིག་སྒྲིལ་དང་ནུས་པ་མཉམ་སྤུངས་བྱ་དགོས་པ་མ་ཟད། བོད་མིའི་སྒྲིག་འཛུགས་ཀྱི་དམངས་གཙོའི་ཀ་བ་གསུམ་དང་། རང་དབང་ལྡན་པའི་སྡེ་ཚན་ཁག་གིས་རང་གི་འགན་དབང་ཆ་བགོས་བཞིན་ལག་བསྟར་ཚགས་ཆུད་དགོས་སྐོར་གསུངས་འདུག
ཁ་སང་ཕྱི་ཚེས་ ༢༩ ཉིན་སྲིད་སྐྱོང་སྤེན་པ་ཚེ་རིང་མཆོག་གིས་གྲོས་ཚོགས་ཀྱི་སྔ་དྲོའི་ཚོགས་ཐུན་སྟེང་བཀའ་ཤག་གི་གཞུང་འབྲེལ་གསལ་བཤད་སྙན་སྒྲོན་ཞུས་པའི་ནང་། འཛིན་སྐྱོང་བཀའ་ཤག་ངོས་ནས་སྲིད་འཛིན་ཞི་ཅིན་ཕིང་གི་མིང་ཐོག་ལ་བོད་ནང་གི་ཛ་དྲག་གནས་སྟངས་སྐོར་གྱི་དྲན་ཐོ་ཡིག་ཆ་ཞིག་འབུལ་རྒྱུ་བྱས་ཡོད་ཀྱང་། རྒྱུ་མཚན་དུ་མའི་དབང་གིས་ཡིག་ཆ་དེ་གནས་སྐབས་ཕྱིར་འཐེན་བྱས་ཏེ་དུས་ཚོད་སྟབས་འགྲིག་པོ་ཞིག་ལ་འབུལ་རྩིས་ཡོད་སྐོར་གསལ་བཤད་གནང་བར། སྤྱི་འཐུས་མི་ཉུང་བས་དྲན་ཐོ་ཡིག་ཆ་དེ་ཉིད་ཕུལ་མ་ཐུབ་པའི་རྒྱུ་མཚན་གང་ཡིན་དང་། རྒྱ་ནག་གི་སྲིད་འཛིན་ལ་མ་ཕུལ་གོང་གྲོས་ཚོགས་ལ་སྙན་སྒྲོན་ཞུ་དགོས་པའི་བསམ་ཚུལ་དང་དོགས་འདྲི་བྱས་སོང་།
བཀའ་ཤག་གི་ཤོག་གྲངས་ ༡༤ ཅན་གྱི་གཞུང་འབྲེལ་གསལ་བཤད་དེ་ཉིད་བོད་ཀྱི་བདེན་མཐའ་གསལ་ཐབས་དང་། བཙན་བྱོལ་བོད་མིའི་སྤྱི་ཚོགས་བདེ་དོན་ཞེས་དུམ་བུ་གཉིས་སུ་ཕྱེས་ཏེ། དུམ་བུ་དང་པོའི་ནང་བོད་རྒྱ་གྲོས་མོལ་གཙོས་པའི་བོད་ནང་གི་ཛ་དྲག་གི་གནས་སྟངས་དང་། རྒྱ་ནག་གི་སྲིད་ཇུས། བཀའ་ཤག་སྐབས་ ༡༦ པའི་ཐབས་ཇུས་དང་ལངས་ཕྱོགས་བཅས་འགྲེལ་བརྗོད་བྱས་ཡོད་འདུག དེ་ཡང་བོད་རྒྱ་གྲོས་མོལ་སྐོར་ནས་བཀའ་ཤག་གི་གསལ་བཤད་ནང་། དབུ་མའི་ལམ་གྱི་དམིགས་ས་གཙོ་བོ་ནི། བོད་མི་རིགས་ཀྱི་ངོ་བོ་སྲུང་འཛིན་དང་། འགྲོ་བ་མིའི་ཐོབ་ཐང་སོར་ཆུད། བོད་ཀྱི་ཁོར་ཡུག་སྲུང་སྐྱོབ་བཅས་ཀྱི་ཐོག་ལ་ཡིན་པས། སྐབས་དུས་སོ་སོའི་གནས་སྟངས་དང་། འགྱུར་འགྲོས་ལ་དཔག་པའི་ཐབས་ཇུས་བསྒྱུར་བཅོས་དགོས་ཀྱི་ཡོད་པ་སྨོས་མེད་ཡིན་པ་དང་། རྒྱ་ནག་གཞུང་གིས་བོད་ནང་གི་སྔོན་འགྲོའི་སློབ་གྲྭ་ནས་མཐོ་རིམ་སློབ་གྲྭའི་བར་རྒྱ་སྐད་ཁྱབ་སྤེལ་དང་། བོད་པའི་སློབ་མ་རྣམས་གཏན་འཇགས་སློབ་གྲྭའི་ནང་བཅུག་པ། བོད་ཡིག་སློབ་གཉེར་བྱ་སའི་མཐོ་སློབ་ཀྱི་སློབ་ཚན་བསྒྱུར་བཅོས་གཏོང་བ། དེ་བཞིན་བོད་བརྒྱུད་ནང་བསྟན་རྒྱ་ནག་ཅན་དུ་སྒྱུར་བཞིན་པ་བཅས་འདས་པའི་ལོ་བཅུ་ཕྲག་གཅིག་ལྷག་ནང་རྒྱ་ནག་གཞུང་གིས་བོད་ནང་བོད་མིའི་ངོ་བོ་རྩ་གཏོར་གཏོང་བའི་སྲིད་ཇུས་འཆར་གཞི་ལྡན་པ་ལག་བསྟར་བྱས་ཏེ། ད་ལྟའི་བོད་ནང་གི་གནས་སྟངས་དེ་ཛ་དྲག་ཏུ་གྱུར་ཡོད་སྐོར་དང་། རྒྱ་ནག་གཞུང་གི་བོད་རིགས་རྒྱ་བསྒྱུར་གྱི་སྲིད་ཇུས་དེའི་མཇུག་འབྲས་བཟློག་ཐབས་བྱེད་དགོས་པ་དང་། དེ་ལྟར་བྱེད་པར་བོད་མིའི་སྟོབས་ཤུགས་ཆིག་སྒྲིལ་དང་། ནུས་པ་མཉམ་སྤུངས་བྱ་དགོས་པ་མ་ཟད། བོད་མིའི་སྒྲིག་འཛུགས་ཀྱི་དམངས་གཙོའི་ཀ་བ་གསུམ་དང་། རང་དབང་ལྡན་པའི་སྡེ་ཚན་ཁག་གིས་རང་གི་འགན་དབང་ཆ་བགོས་བཞིན་ལག་བསྟར་ཚགས་ཆུད་དགོས་སྐོར་གསལ་འདུག
དེ་བཞིན་བཀའ་ཤག་གི་གསལ་བཤད་ནང་ཨུ་རུ་སུས་ཡུ་ཁེ་རེན་ནང་བཙན་འཛུལ་བྱེད་བཞིན་པའི་སྐོར་ནས། ཨུ་ར་སུས་ཡུ་ཁེ་རེན་ལ་བཙན་འཛུལ་བྱས་པ་དེས། མ་འོངས་པར་རྒྱལ་སྤྱིའི་འབྲེལ་ལམ་བསྐྱར་སྒྲིག་ཡོང་ངེས་ཀྱི་བསླབ་བྱ་གཏིང་ཟབ་ཅིག་བསྟན་ཡོད་པ་དང་། རང་དབང་མང་གཙོའི་(དམངས་གཙོའི་)ཡུལ་ལུང་ཁག་གི་ཕྱི་འབྲེལ་དང་། ཚོང་འབྲེལ། དམག་དོན་སོགས་ཀྱི་སྲིད་ཇུས་ལ་ཁྱོན་ཡོངས་ནས་འགྱུར་བ་ངེས་ཅན་ཞིག་འགྲོ་སྲིད་པའི་ཚོད་དཔག་བྱེད་ཆོག་པས། བཀའ་ཤག་གིས་དེ་འགྱུར་འགྲོས་དང་བསྟུན་པའི་གོ་སྐབས་དམ་འཛིན་བྱས་ཏེ། ལས་གཞི་འཆར་འགོད་དང་ལག་བསྟར་བྱེད་ཀྱི་ཡིན། ང་ཚོས་འབུ་ཆེས་ཆུང་ཟོས་ཀྱི་གནས་སྟངས་ཐ་ཞན་འདི་མགྱོགས་ནས་མྱུར་དུ་ཞི་བའི་སྨོན་ལམ་འདེབས་ཀྱི་ཡོད་ལ། དམག་འཁྲུག་གི་ཁྲོད་དུ་འདས་གྲོངས་ཕྱིན་པ་རྣམས་ལ་མྱ་ངན་རྗེས་དྲན་དང་། རྨས་སྐྱོན་ཕོག་པ་དང་། བཙན་བྱོལ་དུ་གྱར་བ་རྣམས་ལ་གདུང་སེམས་མཉམ་བསྐྱེད་བྱེད་ཀྱི་ཡོད། ལོ་ངོ་བཅུ་ཕྲག་དྲུག་ལྷག་གི་གོང་རོལ་དུ་བོད་མི་ཚོས་སྡུག་བསྔལ་འདི་རིགས་མྱངས་ཟིན་པ་དང་། ང་ཚོ་ད་དུང་ཡང་རང་གི་ཕ་ཡུལ་དུ་ལོག་པའི་གོ་སྐབས་མ་ཐོབ་པར་མི་ཡུལ་ལུང་པར་གྱར་ནས་ལྷག་ཡོད། ང་ཚོར་ལུང་པ་འཕྲོག་པའི་སེམས་ངལ་དང་། གཞན་ཡུལ་འགྲིམས་པའི་ལུས་ངལ་གྱི་མྱོང་བ་ངོ་མ་དེ་ཡོད་པས། ཁོང་ཅག་རྣམས་ལ་ང་ཚོའི་སྡུག་བསྔལ་དེ་ལྟ་བུ་མི་ཡོང་བའི་རེ་སྨོན་ཞུ་གི་ཡོད། ང་ཚོས་དུས་ནམ་ཡང་བཙན་འཛུལ་ལ་ངོ་རྒོལ་དང་། གཉའ་གནོན་ཕོག་མཁན་ལ་གདུང་སེམས་མཉམ་བསྐྱེད་ཞུ་གི་ཡོད། ཅེས་འཁོད་འདུག་ལ། བཀའ་ཤག་སྐབས་ ༡༦ པའི་ངོས་ནས་རང་དབང་ལ་དགའ་བའི་རྒྱལ་ཁབ་ཀྱི་གཞུང་མང་ལ་འཆར་གཞི་དང་དམིགས་འབེན་ལྡན་པའི་ཐོག་ནས་འབྲེལ་བ་སྔར་ལྷག་ཞུ་རྒྱུ་ཡིན་སྐོར་དང་། དེ་བས་བོད་དོན་རྒྱབ་སྐྱོར་ཚོགས་པ་དང་། བོད་རིགས་ཚོགས་པའི་ནུས་ཤུགས་གོང་སྤེལ་དེ་གལ་ཆེན་འཛིན་གྱི་ཡོད་སྐོར་གསལ་བཤད་བྱས་ཡོད་འདུག
གཞན་ཡང་བཀའ་ཤག་སྐབས་བཅུ་དྲུག་པས་སྔར་གྱི་བོད་རྒྱ་གྲོས་མོལ་ཚོགས་ཆུང་ཕྱིར་བསྡུ་བྱས་ཏེ་བོད་རྒྱ་གྲོས་མོལ་གྱི་གཏན་འཇགས་ཐབས་ཇུས་ཚོགས་ཆུང་ཞིག་གསར་འཛུགས་བྱས་ཏེ། ད་ལྟའི་ཆར་ཐབས་ཇུས་ཚོགས་ཆུང་གི་སྔོན་འགྲོའི་གྲ་སྒྲིག་རྣམས་སྒྲུབ་བཞིན་ཡོད་པ་དང་། འདི་ལོ་ནས་བོད་དོན་དང་བླངས་ཞུ་གཏུག་ལས་འགུལ་གྱི་ལས་དོན་ཁག་དངོས་སུ་འགོ་རྩོམ་རྒྱུ་ཡིན་པ་མ་ཟད། དེའི་ཆེད་དུ་ཕྱི་དྲིལ་ལས་ཁུངས་སུ་འབྲེལ་ཡོད་ལས་བྱེད་ཁག་ཅིག་ལ་ལས་བགོས་བྱས་ཟིན་པ་དང་། ཞུ་གཏུག་ལས་འགུལ་སྤེལ་བའི་སྐབས་སུ་དང་བླངས་ཞུ་གཏུག་ལས་འགུལ་བ་རྣམས་ཀྱིས་བོད་མིའི་སྒྲིག་འཛུགས་ཀྱི་སྲིད་ཇུས་ལངས་ཕྱོགས་འགྲེལ་བརྗོད་བྱས་རྗེས། སོ་སོ་སྒེར་གྱི་ལངས་ཕྱོགས་འགྲེལ་བརྗོད་བྱས་ཚེ། དེར་བཀའ་ཤག་གིས་འགལ་ཟླར་གཟིགས་ཀྱི་མེད་སྐོར་འཁོད་ཡོད་ཅིང་། དེའི་ཐད་སྤྱི་འཐུས་སྐོར་ཞིག་གིས་རྒྱབ་སྐྱོར་དང་དགའ་བསུ་ཞུས་ཡོད་ནའང་། སྤྱི་འཐུས་ཁག་ཅིག་གིས་དང་བླངས་ཞུ་གཏུག་ལས་འགུལ་བ་རྣམས་བོད་མིའི་སྒྲིག་འཛུགས་ཀྱི་འགྲོ་གྲོན་བཏང་བའི་ཐོག་ནས་ཞུ་གཏུག་ལས་འགུལ་ནང་ཞུགས་ཀྱི་ཡོད་སྟབས། ཞུ་གཏུག་སྐབས་སྒེར་གྱི་ལངས་ཕྱོགས་བརྗོད་རྒྱུ་དེ་འོས་འབབ་ཡིན་མིན་ཐད་དོགས་སློང་གནང་སོང་།
དེ་བཞིན་བཀའ་ཤག་སྐབས་ ༡༦ པའི་གཞུང་འབྲེལ་གསལ་བཤད་ཁྲོད་དུ། བཙན་བྱོལ་བོད་མིའི་སྤྱི་ཚོགས་ཀྱི་བདེ་དོན་སྐོར་ལ་འཁོད་དོན། བོད་དོན་འཐབ་རྩོད་དང་། སྤྱི་ཚོགས་བདེ་དོན་གྱི་ལས་དོན་ནུས་ལྡན་ཚགས་ཚུད་ཡོང་བའི་རྨང་གཞི་གལ་ཆེ་ཤོས་དེ་ནི་བོད་མིའི་སྒྲིག་འཛུགས་ཚགས་ཚུད་ཡོང་དགོས་པ་དེ་རེད། མང་གཙོའི་ལམ་སྲོལ་ནང་སྒྲིག་འཛུགས་ཚགས་ཚུད་ཡོང་བ་ལ་ཁྲིམས་ཀྱིས་(ཀྱི་)དབང་བསྒྱུར་དགོས་ཀྱི་ཡོད། ཁྲིམས་ཀྱིས་(ཀྱི་)དབང་བསྒྱུར་ཟེར་དུས། ཁྲིམས་སྒྲིག་ཚང་མ་མང་ཚོགས་ཀྱི་མངོན་འདོད་དང་ཁེ་ཕན་ལ་མཐུན་པ་ཞིག་དགོས་ཀྱི་ཡོད། དེ་བཞིན་དུ་ཁྲིམས་སྒྲིག་གི་ནང་མང་གཙོའི་ཀ་བ་གསུམ་གྱིས་མཚོན་པའི་སྡེ་ཚན་ཁག་འགན་དབང་ཆ་བགོས་དང་ཚོད་འཛིན་གསལ་པོ་ཡོད་དགོས་ཀྱི་རེད། དེ་ལས་གལ་ཆེ་བ་ནི་ཚང་མས་ཁྲིམས་སྒྲིག་ལ་བརྩི་བཀུར་དང་། སོ་སོའི་འགན་དབང་གི་ས་མཚམས་ཏག་ཏག་ཟིན་ཐུབ་པ་དགོས་ཀྱི་རེད། འགན་དབང་གི་ས་མཚམས་ཏག་ཏག་ཅིག་ཟིན་ཐུབ་པ་ཡིན་ན། ཁྲིམས་བཟོ་དང་། ཁྲིམས་འཛིན། འཛིན་སྐྱོང་བཅས་མང་གཙོའི་ཀ་བ་གསུམ་ཕན་ཚུན་འགན་དབང་ལྗིད་མཉམ་སྟངས་འཛིན་ཡོང་ཐུབ་ཀྱི་རེད། དེ་ལ་བརྟེན་ནས་སྒྲིག་འཛུགས་ཚགས་ཚུད་པོ་དང་ནུས་ལྡན་ཡོང་ཐུབ་ཀྱི་རེད། ཅེས་འཁོད་འདུག
བཀའ་ཤག་གི་སྤྱི་ཚོགས་བདེ་དོན་དང་འབྲེལ་བའི་སྲིད་ཇུས་ལངས་ཕྱོགས་ཁྲོད་དུ། རིང་མིན་བཀའ་ཤག་ངོས་ནས་བཙན་བྱོལ་བོད་མིའི་མི་འབོར་གྲངས་བཤེར་ཞིག་བྱ་གཏན་འཁེལ་བྱུང་ཡོད་སྐོར་དང་། གཞན་ཡང་བོད་མིའི་གཞིས་སྒར་དང་སློབ་གྲྭ་ཁག་ཟླ་སྒྲིལ་གཏོང་ཕྱོགས། རང་ཁྱིམ་མེད་པའི་བཙན་བྱོལ་བོད་མི་རྣམས་ཀྱི་ཆེད་དུ་སྡོད་ཁང་བགོ་འགྲེམ་གྱི་ལས་གཞི། བོད་མིའི་སྒྲིག་འཛུགས་ཀྱི་སྤྱི་ཚོགས་དང་འབྲེལ་བའི་ལས་ཁུངས་ཁག་གི་ལས་དོན་རྣམས་དྲ་ཐོག་ནས་བྱེད་ཐུབ་པའི་ཨི་འཛིན་སྐྱོང་ (E-governance) བཅས་ཀྱི་ལས་གཞི་ཁག་གསལ་ཡོད་འདུག
གསར་འགོད་པ། དཔལ་ལྡན།
