གངས་ལྗོངས་དཔལ་འབྱོར་ཞབས་ཞུ་ཁང་གི་གནས་སྟངས་སྐོར་ལ་ཞིབ་འཇུག་ཚོགས་ཆུང་འཛུགས་རྒྱུའི་ཐག་ཆོད་བྱུང་།

དེ་རིང་གྲོས་ཚོགས་ཚོགས་དུས་གསུམ་པའི་ལས་ཉིན་མཐའ་མའི་སྟེང་སྣར་ཐང་དཔར་ཁང་མུ་མཐུད་སྒོ་ཕྱེ་རྒྱུ་དང་སྤྱི་ལྷན་དང་དེའི་རྒྱུན་ལས་ཚུགས་མ་ཐུབ་པའི་གནས་སྟངས་འོག་འཛིན་སྐྱོང་བཀའ་ཤག་ལ་བར་བརྒལ་བཀའ་འཁྲོལ་ཐོབ་པར་ངོས་འཛིན། དེ་བཞིན་གངས་ལྗོངས་དཔལ་འབྱོར་ཞབས་ཞུ་ཁང་གི་གནས་སྟངས་སྐོར་ལ་ཞིབ་འཇུག་ཚོགས་ཆུང་འཛུགས་རྒྱུ་བཅས་ཀྱི་གྲོས་ཆོད་གསུམ་གཏན་འབེབས་བྱུང་སོང་།

དེ་རིང་བོད་མི་མང་སྤྱི་འཐུས་སྐབས་ ༡༧ པའི་གྲོས་ཚོགས་ཚོགས་དུས་ ༣ པའི་ལས་ཉིན་མཐའ་མའི་སྟེང་། ཉེ་ལམ་གྲོས་ཚོགས་ནང་གླེང་སློང་ཤུགས་ཆེར་བྱུང་བའི་གངས་ལྗོངས་དཔལ་འབྱོར་ཞབས་ཞུ་ཁང་གི་གནས་སྟངས་ལ་རྟོག་ཞིབ་ཆེད་སྤྱི་འཐུས་ལྷན་ཚོགས་ནས་ཚོགས་ཆུང་ཞིག་འཛུགས་དགོས་པ་དང་། ཕྱི་དྲིལ་སྣར་ཐང་དཔར་ཁང་དེ་ཉིད་སྒོ་རྒྱག་མི་དགོས་པ། དེ་བཞིན། སྔོན་རྩིས་སྒྲིག་གཞི་དོན་ཚན་ ༧(༥) ཆ་རྐྱེན་འོག་བར་བརྒལ་བཀའ་འཁྲོལ་ཐོབ་པར་ངོས་འཛིན་བྱ་རྒྱུའི་་གཞུང་འབྲེལ་གྲོས་ཆོད་གྲོས་འཆར་གསུམ་མང་མོས་ཀྱི་ཐོག་ནས་གཏན་འབེབས་གནང་སོང་།

དེ་ཡང་དོན་ཚན་གསུམ་ཅན་གྱི་གངས་ལྗོངས་དཔལ་འབྱོར་ཁང་དང་འབྲེལ་བའི་གཞུང་འབྲེལ་གྲོས་འཆར་ནང་། ཚོགས་གཙོ་སྦྲེལ་པོས་ཚོགས་མི་ལྔ་ལས་གྲུབ་པའི་ཚོགས་ཆུང་ཞིག་བསྐོ་འཛུགས་གནང་སྟེ། ཚོགས་ཆུང་དེས་དཔལ་འབྱོར་ཞབས་ཞུ་ཁང་ལ་ཁེ་ཉེན་གྱི་གནས་སྟངས་ཇི་ཆགས་ཐད་རྟོག་ཞིབ་དོ་ནན་བྱ་རྒྱུ་ཡིན་པ་དང་། ཚོགས་ཆུང་ངོས་ནས་གནས་ཡུལ་གཞུང་གི་ཁྲིམས་ལུགས་དང་། མ་འཛུགས་བྱ་ཕྱོགས། གངས་ལྗོངས་དཔལ་འབྱོར་ཞབས་ཞུ་ཁང་གི་ད་ལྟའི་གནས་བབ། མ་འོངས་དམིགས་ཡུལ་གཞིར་བཟུང་ཡོང་ཐུབ་མིན་གྱི་སྙན་ཐོ་ཁ་གསལ་ཞིག་འདོན་ཐུབ་པ་དགོས་ཤིང་། གྲུབ་དོན་སྙན་ཐོ་དེ་ཉིད་གྲོས་ཚོགས་ཚོགས་དུས་རྗེས་མའི་གོང་དུ་སྤྱི་འཐུས་ཚོགས་དྲུང་ལས་ཁུངས་སུ་འབུལ་དགོས་སྐོར་དང་། ཚོགས་ཆུང་གི་ཞིབ་འཇུག་སྙན་ཐོ་གཞིར་བཟུང་གྲོས་ཚོགས་ནས་ཐག་གཅོད་ཁ་གསལ་ཞིག་མ་བྱུང་བར་དུ་གངས་ལྗོངས་དཔལ་འབྱོར་ཞབས་ཞུ་ཁང་གི་ལས་དོན་རྣམས་ད་ཡོད་བཞིན་མུ་མཐུད་གནང་དགོས་སྐོར་འཁོད་འདུག་པ་ལྟར། གྲོས་འཆར་དེར་སྤྱི་འཐུས་ ༡ གིས་དགག་བྱ་དང་། སྤྱི་འཐུས་ ༣༣ གྱིས་རྒྱབ་སྐྱོར་གནང་བར་བརྟེན། ཚད་མཐོའི་མང་མོས་ཀྱི་ཐོག་ནས་གཏན་འབེབས་གནང་སོང་།

སྤྱིར་གྲོས་ཚོགས་ཀྱི་ཚོགས་ཐུན་སྔ་མའི་སྐབས་དཔལ་འབྱོར་བཀའ་བློན་སྤེན་པ་ཚེ་རིང་མཆོག་ནས་གངས་ལྗོངས་དཔལ་འབྱོར་ཞབས་ཞུ་ཁང་གི་གནས་བབ་སྐོར་ནས་གསལ་བཤད་གནང་ཡོད་ནའང་། ད་ཐེངས་སྤྱི་ལྷན་གྱི་ཚོགས་ཆུང་འཛུགས་ཕྱོགས་སོགས་ཀྱི་སྐོར་ལ་དོགས་འདྲི་དང་བགྲོ་གླེང་གནང་སྐབས། སྤྱི་འཐུས་ཟླ་བ་ཕུན་སྐྱིད་ལགས་ཀྱིས་ཚོགས་གཙོ་སྦྲེལ་པོས་འཛུགས་རྒྱུའི་ཚོགས་ཆུང་གི་མི་འགྲོའི་ཁོངས་སུ་བཀའ་སྤྱི་གཉིས་ཀའམ། ཡང་ན་ཕྱི་ནས་ཁྱད་ལས་པ་དེ་འདྲ་འཇུག་འཆར་ཡོད་མེད་དྲིས་པར། སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་ནས་སྤྱི་འཐུས་རྒྱུན་ལས་ནང་ཚོགས་མིའི་ཁོངས་སུ་སྤྱི་འཐུས་ཀྱི་ཐོག་ལ་ཁྲིམས་སྒྲིག་སོགས་ལ་རྒྱུས་མངའ་ཡོད་པའི་ཁྱད་ལས་པ་འཇུག་དགོས་པའི་བསམ་ཚུལ་བཏོན་པ་ལྟར། ཚོགས་གཙོ་སྦྲེལ་པོའི་ངོས་ནས་དེ་ལྟར་གནང་རྒྱུའི་ཐུགས་བློ་ཡོད་སྐོར་གསལ་བཤད་གནང་སོང་།

ད་ལྟའི་གྲོས་ཚོགས་ཚོགས་དུས་ཐོག་འཛིན་སྐྱོང་བཀའ་ཤག་ངོས་ནས་སྔོན་རྩིས་གཏམ་བཤད་སྐབས། སྣར་ཐང་དཔར་ཁང་གི་འགྲོ་གྲོན་དང་གྲུབ་འབྲུས་གོ་མ་མཚུངས་པའི་རྐྱེན་གྱིས་མི་རིང་བར་སྒོ་བརྒྱབ་འཆར་ཡོད་སྐོར་འགྲེལ་བརྗོད་གནང་བ་དང་བསྟུན། བོད་མི་མང་སྤྱི་འཐུས་མི་ཁག་ཅིག་གིས་སྣར་ཐང་དཔར་ཁང་གི་ལོ་རྒྱུས་དང་ཆབ་སྲིད་ཀྱི་གལ་འགངས་ལ་གཞིགས་ཏེ་སྒོ་བརྒྱབ་མི་ཉན་པའི་བསམ་ཚུལ་བཏོན་པ་དང་འབྲེལ། དེ་རིང་སྤྱི་འཐུས་ལྷན་ཚོགས་ཀྱིས་སྣར་ཐར་དཔར་ཁང་དེ་ཉིད་སྒོ་རྒྱག་མི་དགོས་པར། པར་སྐྲུན་ལས་རིགས་དང་འབྲེལ་བའི་ཆེད་ལས་མི་སྣ་གསོ་སྐྱོང་དང་། ཕྱོགས་ཡོངས་ནས་ལས་དོན་ཚགས་ཚུད་ཡོང་ཐབས་དགོས་པའི་མང་མོས་གྲོས་ཆོད་བཞག་ཡོད་ཅིང་། གྲོས་ཆོད་དེའི་སྔོན་གླེང་ནང་། ཕྱི་དྲིལ་དཔར་ཁང་དེ་ཉིད་བོད་མིའི་སྒྲིག་འཛུགས་ཀྱི་གཞུང་འབྲེལ་དཔེ་དེབ་དང་། དུས་དེབ། གསར་ཤོག འཛིན་ཤོག་བཅས་པར་སྐྲུན་བྱ་སའི་པར་ཁང་གཅིག་པུ་དེ་ཡིན་པ་དང་། གལ་ཏེ་གཞུང་འབྲེལ་ཡིག་ཆ་རྣམས་པར་ཁང་གཞན་དུ་པར་ཚེ། སྔར་བས་འགྲོ་སོང་ཆེ་བ་དང་དུས་འགོར་སོགས་སྟབས་བདེ་མེད་སྐོར་དང་། སྣར་ཐང་དཔར་ཁང་དེ་བཞིན་ཐོག་མར་༧རྒྱལ་དབང་སྐུ་ཕྲེང་དྲུག་པའི་ཞལ་བཀོད་བཞིན་སྡེ་སྲིད་སངས་རྒྱས་རྒྱ་མཚོས་དབུ་འཛུགས་གནང་བ་ཞིག་ཡིན་པ་དང་། ཕྱིས་སུ་རྒྱ་ནག་གཞུང་གིས་རིག་གནས་གསར་བརྗེ་ཟེར་བའི་སྐབས་རྩ་གཏོར་བཏང་སྟེ། དུས་ད་ལྟའང་བསྐྱར་གསོ་ཐུབ་མེད་སྐོར་དང་། འདས་པའི་ལོ་ཤས་རིང་སྣར་ཐང་དཔར་ཁང་གི་བྱུང་སོང་ཁ་མ་འདུམ་པའི་གནས་སྟངས་ཤིག་བྱུང་ཡོད་ནའང་། མ་འོངས་སྣར་ཐང་དཔར་ཁང་གི་ལས་དོན་ཡར་རྒྱས་ཚགས་ཚུད་དུ་བཏང་ནས་རྒྱུན་གནས་ཐུབ་དགོས་པ་དེ་ལོ་རྒྱུས་དང་། ལས་དོན་དངོས་ཀྱི་ཐོག་ནས་དགོས་མཁོ་གལ་ཆེར་གྱུར་ཡོད་སྐོར་འཁོད་འདུག གྲོས་ཆོད་གྲོས་འཆར་འདིར་དགག་བྱ་གནང་མཁན་སྤྱི་འཐུས་ ༡༢ དང་རྒྱབ་སྐྱོར་གནང་མཁན་ ༡༦ བྱུང་བར་བརྟེན་མང་མོས་ཀྱི་ཐོག་ནས་གཏན་འབེབས་གནང་སོང་།

ཡང་དེ་རིང་འཛིན་སྐྱོང་བཀའ་ཤག་ངོས་ནས་སྤྱི་འཐུས་རྒྱུན་ལས་ཀྱི་བསམ་ཚུལ་དང་ཚོགས་གཅོ་མཆོག་གི་ལམ་སྟོན་འོག འདས་ལོའི་ཕྱི་ཟླ་ ༥ ཚེས་ ༢༧ ནས་ཟླ་ ༡༠ ཚེས་ ༡༡ བར་སྤྱི་ལྷན་དང་དེའི་རྒྱུན་ལས་ཚུགས་མ་ཐུབ་པའི་གནས་སྐབས་སུ་བར་བརྒལ་བཀའ་འཁྲོལ་ཞུས་པ་དག སྤྱི་ལྷན་ནས་བཀའ་འཁྲོལ་ཐོབ་པར་ངོས་འཛིན་ཡོང་རྒྱུའི་གྲོས་འཆར་ཞིག་བཏོན་ཡོད་ཅིང་། གྲོས་ཆོད་ནང་། སྐབས་ ༡༧ པའི་བོད་མི་མང་སྤྱི་འཐུས་ལྷན་ཚོགས་དང་དེའི་རྒྱུན་ལས་ཚུགས་མ་ཐུབ་པའི་དམིགས་བསལ་གནས་སྟངས་བྱུང་བའི་དུས་ཡུན་ནང་། བཀའ་ཤག་གིས་བོད་མིའི་སྒྲིག་འཛུགས་ཀྱི་གཞུང་དངུལ་འདུ་འགོད་དང་། ལོ་འཁོར་སྔོན་རྩིས། དངུལ་རྩིས་སྟངས་འཛིན་བཅས་ཀྱི་སྒྲིག་གཞི་དོན་ཚན་ ༧ ནང་གསེས་ ༥ པའིི་ཆ་རྐྱེན་འོག་ནས་ཚོགས་དྲུང་ལས་ཁུངས་བརྒྱུད་བར་བརྒལ་བཀའ་འཁྲོལ་ཞུས་ཟིན་པའི་བྱུང་ཧིན་སྒོར་ ༢༧,༠༣,༥༦,༦༨༣ དང་། སོང་ཧིན་སྒོར་ ༢༠,༣༩,༥༥,༢༢༩ གྲོས་ཚོགས་སུ་སྙན་གསན་བྱུང་བ་ལྟར་བཀའ་འཁྲོལ་ཐོབ་པར་ངོས་འཛིན་བྱ་རྒྱུའི་གྲོས་ཆོད་གྲོས་འཆར། ཞེས་འཁོད་པ་དེར། དེར་སྤྱི་འཐུས་ ༨ ཀྱིས་དགག་བྱ་བཏོན་པ་དང་། སྤྱི་འཐུས་གྲངས་ ༢༣ གྱིས་རྒྱབ་སྐྱོར་གནང་སྟེ་མང་མོས་ཀྱི་ཐོག་ནས་གཏན་འབེབས་གནང་སོང་།