༧གོང་ས་རྒྱལ་བ་རིན་པོ་ཆེ་མཆོག་གིས་གནམ་གཤིས་འགྱུར་ལྡོག་གི་ཉེན་ཁ་ནི་རྒྱལ་ཁབ་གཅིག་ཙམ་མིན་པར་ཚང་མར་གནོད་འཚེ་ཐེབས་ཀྱི་ཡོད་པར་བརྟེན་ཚང་མས་རང་བྱུང་ཁམས་དང་སའི་གོ་ལར་བདག་གཅེས་བྱེད་དགོས་པའི་གསུང་འཕྲིན་སྩལ་གནང་འདུག
དེ་ཡང་༧གོང་ས་རྒྱལ་བ་རིན་པོ་མཆོག་གིས་སྩལ་བའི་གསུང་འཕྲིན་ནང་དུ། དེ་རིང་འཛམ་གླིང་སའི་གོ་ལའི་ཉིན་མོར་ང་ཚོ་ཚང་མ་སྤྲོ་སྣང་ལྡན་པའི་ངང་ནས་འཚོ་འདོད་པར་དྲན་སྐུལ་ཞིག་བྱས་ཡོད་ཅིང་། དེ་ནི་འགྲོ་བ་མི་གཅིག་པུ་མ་ཡིན་པར་བྱ་བྱེའུ་དང་ཐ་ན་འབུ་སྲིན་ཕྲ་མོ་དེ་དག་ཀྱང་སྤྲོ་སྣང་ལྡན་པའི་ངང་ནས་འཚོ་འདོད་ཀྱི་ཡོད་སྟབས། ང་ཚོ་ཚང་མས་ཐུན་མོང་གི་འཚོ་གནས་ལ་སེམས་ཁུར་བྱ་དགོས་ཀྱི་ཡོད་པ་རེད། ང་ཚོ་འགྲོ་བ་མིའི་རིགས་ལ་དབང་པའི་ཆེས་ཕུལ་བྱུང་གི་རྣམ་དཔྱོད་དེས་བྱ་བ་བཟང་པོ་བསྒྲུབ་རྒྱུའི་གོ་སྐབས་མང་དག་ཅིག་བྱིན་ཡོད་ཀྱང་། དེང་གི་འཇིག་རྟེན་གྱི་གནས་སྟངས་ལ་བལྟས་ཚེ། ང་ཚོས་སྔར་ལས་ལྷག་པ་བྱ་ཐུབ་དགོས་ཤིང་། ང་ཚོར་ནང་སེམས་ཀྱི་རིན་ཐང་སྐོར་གྱི་ཤེས་ཡོན་སློབ་གསོ་མང་དག་ཅིག་མཁོ་གལ་ཆེན་པོ་ཡོད་པ་རེད། ཅེས་གསུངས་འདུག
ཡང་༧གོང་ས་མཆོག་གིས། ང་ཚོའི་གོ་ལ་འདི་ནི་རང་དབང་ལྡན་པ་ཞིག་ཡིན་ཡང་། གནམ་གཤིས་འགྱུར་ལྡོག་གིས་རྒྱལ་སྤྱིའི་ཚོང་འབྲེལ་ལ་མཉམ་ཞུགས་བྱེད་པར་གནོད་སྐྱོན་ཐེབས་ཀྱི་ཡོད་སྟབས། དེས་འགྲོ་བ་མིའི་རིགས་ཀྱི་ཁེ་ཕན་སྲུང་སྐྱོབ་བྱེད་དགོས་པ་གསལ་སྟོན་བྱེད་ཀྱི་ཡོད་ཅིང་། ང་ཚོས་གོ་ལ་ཡོངས་ཀྱི་ཁེ་ཕན་གཙོ་བོར་གཟུང་དགོས་པ་རེད། ད་ལྟ་ང་ཚོས་རྡོ་སྣུམ་བེད་སྤྱོད་ཉུང་ཙམ་གཏོང་ནས། ཉི་མ་དང་རླུང་ལ་བསྟེན་ནས་བྱུང་བའི་བསྐྱར་གསོ་བྱ་རྒྱུ་ཡོད་པའི་ནུས་ཤུགས་དེ་དག་བཀོལ་དགོས་ཤིང་། ཤིང་ནགས་གཅོད་བྲེག་བྱེད་པ་མཚམས་འཇོག་དང་སྔར་ལས་ལྷག་པའི་ཁོར་ཡུག་སྲུང་སྐྱོབ་བྱས་ཏེ། རྩིས་ཤིང་འདེབས་བཙུགས་དང་གཅེས་ཉར་བྱེད་དགོས་པ་ཡིན། ངོས་རང་གི་མི་ཚེའི་ནང་དུའང་བོད་དང་དྷ་རམ་ས་གཉིས་སུ་གངས་འབབ་ཐེངས་ཇེ་ཉུང་དུ་ཕྱིན་པ་ར་སྤྲོད་གསལ་པོ་བྱུང་ལ། ཚན་རིག་པ་དག་གིས་ངོས་རང་ལ་བོད་ལ་སོགས་པའི་ས་ཁུལ་ཁག་ཅིག་རྗེས་མར་བྱེ་ཐང་དུ་འགྱུར་ཉེན་ཡོད་སྐོར་བཤད་བྱུང་བས། ངོས་རང་གིས་ཉེན་འཚེ་ཐེབས་སླ་བའི་བོད་ཀྱི་ཁོར་ཡུག་སྲུང་སྐྱོབ་བྱེད་དགོས་པའི་སྐད་ཆ་བཤད་རྒྱུར་དམ་བཅའ་བཞག་ཡོད། ཅེས་གསུངས་འདུག
ཡང་མགོན་པོ་གང་ཉིད་ཀྱིས། ང་ཚོའི་མི་ཚེའི་ནང་བྱ་བ་ལམ་ལྷོངས་ཡོང་རྒྱུར་རེ་བ་བཅོལ་ཞིང་། རེ་བ་དང་མ་འོངས་པར་འབྲེལ་ནས་ཡོད། སྤྱིར་འབྱུང་འགྱུར་གྱི་གནས་སྟངས་རྣམས་ཁག་ཐེག་དཀའ་ཞིང་རེ་བ་བཟང་ཕྱོགས་ནས་རྒྱག་པ་ནི་སྡུག་ས་ནས་བལྟས་པ་ལས་བཟང་བ་ཡོད་ཀྱང་། སའི་གོ་ལའི་ཚ་དྲོད་འཕར་གྱིན་ཡོད་དུས། གཞོན་སྐྱེས་མང་པོས་མཉམ་ལས་བརྒྱུད་ཐབས་ལམ་འཚོལ་མུས་ཡིན། ཁོང་ཚོ་ནི་ང་ཚོའི་རེ་བ་ཡིན་པ་རེད། ཅེས་དང་། དེང་གི་ཆར་གནམ་གཤིས་འགྱུར་ལྡོག་གི་རྐྱེན་པས་ང་ཚོར་དཀའ་ཁག་ཆེན་པོ་ཞིག་བྱུང་གི་ཡོད། ང་ཚོས་ཕན་ཚུན་འགྱུར་བ་གཏོང་བར་རོགས་རམ་བྱེད་དགོས་པ་རེད། ང་ཚོ་འཇིག་རྟེན་གཅིག་ཏུ་འཚོ་བའི་འགྲོ་བ་མི་ཞིག་ཡིན་སྟབས། ང་ཚོས་ཚང་མ་སྤྲོ་སྐྱིད་ལྡན་པའི་ངང་ནས་མཉམ་རུབ་ཀྱི་འཚོ་བ་རོལ་རྒྱུར་འབད་བརྩོན་བྱེད་དགོས་ལ། གནམ་གཤིས་འགྱུར་ལྡོག་གི་ཉེན་ཁ་ནི་རྒྱལ་ཁབ་གཅིག་ཙམ་མིན་པར། ཚང་མར་གནོད་འཚེ་ཐེབས་ཀྱི་ཡོད་སྟབས། ང་ཚོས་ངེས་པར་དུ་རང་ཅག་གི་གཞིས་ཁྱིམ་གཅིག་པུར་གྱུར་བའི་རང་བྱུང་ཁམས་དང་སའི་གོ་ལར་བདག་གཅེས་བྱེད་དགོས་པ་རེད། ཅེས་གསུངས་འདུག
གསར་འགོད་པ། དཔལ་ལྡན།
