ཧྥ་རན་སིའི་སྲིད་འཛིན་ལས་ཐོག་སྐུ་ཞབས་ཨེམ་མཱ་ནོལ་མཱག་རོན་མཆོག་ལ་སྲིད་འཛིན་གྱི་རྒྱལ་ཁབ་ཐོབ་པར་༧གོང་ས་རྒྱལ་བ་རིན་པོ་ཆེ་མཆོག་ནས་འཚམས་འདྲིའི་གསུང་འཕྲིན་སྩལ་ཏེ་ཧྥ་རན་སི་མི་མང་གི་རེ་བ་དང། མངོན་འདོད། དེ་བཞིན་འཛམ་གླིང་འདིར་སྔར་ལས་ལྷག་པའི་ཞི་བདེ་དང་འཆམ་མཐུན་ཡོང་བའི་ལས་དོན་ལམ་ལྷོངས་ཡོང་པའི་ཐུགས་སྨོན་མཛད་འདུག
ཁ་སང་ཧྥ་རན་སིའི་སྲིད་འཛིན་གྱི་དངོས་གཞིའི་འོས་བསྡུའི་གྲུབ་འབྲས་གསལ་བསྒྲགས་གནང་ཡོད་པ་དང་། ཡུལ་དེའི་གཡས་ཕྱོགས་རིང་ལུགས་སམ་རྒྱལ་ཞེན་རིང་ལུགས་སྲིད་དོན་ཚོགས་པ་ (FN) ཡི་སྲིད་འཛིན་འོས་མི་ལྕམ་ལི་ཕིན་ལགས་སུ་འོས་གྲངས་བརྒྱ་ཆ་ ༤༡།༨ དང་། གུ་ཡངས་སྲིད་དོན་ཚོགས་པའི་སྲིད་འཛིན་འོས་མི་སྐུ་ཞབས་མཱག་རོན་མཆོག་ལ་འོས་གྲངས་བརྒྱ་ཆ་༥༨།༢ བཅས་སྟེ་བསྐྱར་དུ་སྲིད་འཛིན་རྒྱལ་ཁ་ཐོབ་ཡོད་པ་དང་། ལྕམ་ལི་ཕིན་ལགས་ཀྱི་རྒྱབ་སྐྱོར་བ་དང་སྟོད་གོས་སེར་པོའི་ལས་འགུལ་བ་སོགས་ནས་ངོ་རྒོལ་བྱེད་བཞིན་ཡོད་འདུག
དེ་རིང་༧གོང་ས་རྒྱལ་བ་རིན་པོ་མཆོག་ནས་སྐུ་ཞབས་མཱག་རོན་མཆོག་ལ་སྩལ་བའི་གསུང་འཕྲིན་ནང་། བོད་མི་ཚོས་འགྲོ་བ་མིའི་རིགས་སྤྱི་ཡོངས་ལ་ཁེ་ཕན་ཡོད་པའི་གནའ་བོའི་ནང་པའི་ཆོས་ལུགས་བདག་གཅེས་དང་སྲུང་སྐྱོང་བྱེད་པར་ཧྥ་རན་སིའི་སྲིད་འཛིན་དང་མི་མང་གྱི་མཛའ་བརྩེ་དང་སྐུལ་ཅག་ཐོབ་པ་ནི་བོད་མི་ཚོའི་བསོད་ནམས་ཉག་ཅིག་ཡིན། ངོས་ཀྱིས་བོད་མི་ཡོངས་ཀྱི་ཚབ་བྱས་ཏེ། གོ་སྐབས་འདི་བརྒྱུད་ནས་ཁྱེད་ལ་འཚམས་འདྲི་ཞུ་བ་དང་། ཁྱེད་ཀྱི་བྱ་གཞག་ཐམས་ཅད་ལམ་ལྷོངས་ཡོང་བའི་སྨོན་འདུན་ཞུ། ངོས་ནས་ཁྱེད་ཀྱིས་ཧྥ་རན་སི་མི་མང་གི་རེ་བ་དང། མངོན་འདོད། དེ་བཞིན་འཛམ་གླིང་འདིར་སྔར་ལས་ལྷག་པའི་ཞི་བདེ་དང་འཆམ་མཐུན་ཡོང་བའི་ལས་དོན་ལམ་ལྷོངས་ཡོང་པའི་སྨོན་འདུན་ཞུ། ཞེས་གསུངས་འདུག
ད་ལྟ་དགུང་ལོ་ ༤༤ ཡིན་པའི་སྐུ་ཞབས་མཱག་རོན་མཆོག་ལ་ཕྱི་ལོ ༢༠༡༧ ལོའི་སྲིད་འཛིན་འོས་བསྡུའི་དངོས་གཞིའི་ཁྲོད་འོས་གྲངས་བརྒྱ་ཆ་ ༦༥།༥ ཐོབ་སྟེ། ཧྥ་རན་སིའི་ལོ་རྒྱུས་ནང་གི་སྲིད་འཛིན་ལོ་ན་གཞོན་ཤོས་དེ་ཆགས་ཡོད་པ་རེད། འདི་ལོར་ཡང་ཁོང་ལ་བསྐྱར་དུ་འོས་ཤོག་གི་རྒྱལ་ཁ་ཐོབ་ཡོད་པ་དང་། འདས་པའི་ལོ་ཤས་རིང་ཁོང་གིས་ཡུ་རོབ་རང་སྐྱོང་གནས་བབ་མཐོར་འདེགས་གཏོང་ཐབས་ལ་འབད་བརྩོན་ཆེན་པོ་བྱས་ཏེ་ཕན་འབྲས་གང་ལེགས་ཐོན་ཡོད་པ་དང་། ཁོང་གིས་འོས་བསྡུའི་དྲིལ་བསྒྲགས་སྐབས་གཞུང་ཁྲལ་སོགས་ཆག་ཡང་གཏང་འཆར་ཡོད་པ་མ་ཟད། སྤྱི་ཚོགས་བདེ་དོན་གྱི་སྒྲོམ་གཞི་བསྐྱར་སྒྲིག་བྱ་རྒྱུའི་ཁས་ལེན་གནང་ཡོད་པ་ལྟར་མི་མང་གིས་དེ་བཞིན་རེ་བ་ཆེན་པོ་བྱེད་ཀྱི་ཡོད་འདུག
སྐུ་ཞབས་མཱག་རོན་མཆོག་གིས་ཨུ་རུ་སུས་ཡུ་ཀེ་རན་ལ་བཙན་འཛུལ་བྱེད་མུས་ཡིན་པ་དེར་ཡུ་རོབ་མཐུན་ཚོགས་ཀྱིས་ནུས་པ་མཉམ་སྤུངས་བྱ་དགོས་པ་དང་། ཨུ་རུ་སུའི་ཁྲིམས་མཐུན་མ་ཡིན་པའི་བཙན་རྒོལ་ལ་ངོ་རྒོལ་ཆེན་པོ་བྱས་ཡོད་སྟབས། སྐུ་ཞབས་མཱག་རོན་མཆོག་ལ་འོས་བསྡུའི་རྒྱལ་ཁ་ཐོབ་རྗེས། ཡུ་ཀེ་རན་གྱི་སྲིད་འཛིན་ཛ་ལན་སི་ཀ་ཡེ་ཡི་སྒེར་གྱི་ཊི་ཝེ་ཊར་དུ། སྐུ་ཞབས་མཱག་རོན་ལགས་ནི་ཡུ་ཀེ་རན་གྱི་གྲོགས་པོ་ངོ་མ་དེ་ཡིན་ལ། ཁོང་ཉིད་བསྐྱར་དུ་སྲིད་འཛིན་དུ་འོས་འདེམས་བྱུང་བར། ངས་ཧྥ་རན་སིའི་མི་མང་གི་ཆེད་དུ་ཁོང་གིས་ལས་དོན་གནང་བ་ལམ་ལྷོངས་ཡོང་བའི་སྨོན་འདུན་ཞུ། ངས་ཁོང་གི་རྒྱབ་སྐྱོར་ལ་ཡི་རངས་ཞུ་རྒྱུ་དང་། ང་ཚོ་ལྷན་དུ་སྟོབས་ཤུགས་དང་གཅིག་སྒྲིལ་ལྡན་པའི་ཡུ་རོབ་དང་ཐུན་མོང་གི་རྒྱལ་ཁ་གསར་པའི་ཕྱོགས་སུ་མདུན་སྐྱོད་བྱེད་ཀྱིན་ཡོད་པའི་ངེས་ཤེས་སྐྱེ་ཡི་འདུག ཅེས་གསུངས་འདུག
ལྕམ་མ་ལི་ཕིན་ (Le Pen)ལགས་ནི་ཧྥ་རན་སིའི་གཡས་ཕྱོགས་རིང་ལུགས་སམ་རྒྱལ་ཞེན་རིང་ལུགས་སྲིད་དོན་ཚོགས་པ་ (FN) ཡི་འགན་འཛིན་དང་། ཡུ་རོབ་གྲོས་ཚོགས་ཀྱི་འཐུས་མི་ཟུར་པ་ཞིག་ཡིན་འདུག་ལ། ཁོང་མོ་ནི་ཨུ་རུ་སུ་དང་འབྲེལ་ལམ་དམ་ཟབ་ཡོད་སྟབས། ཨ་རི་དང་ཡུ་རོབ་མཐུན་ཕྱོགས་རྒྱལ་ཁབ་ཚོས་ལི་ཕིན་གྱིས་ཧྥ་རན་སི་ནུབ་ཆིངས་སྒྲིག་འཛུགས་ན་ཕྱིར་འབུད་བྱ་རྒྱུའི་ཀུན་སློང་ཡོད་པའི་སེམས་འཚབ་བྱེད་ཀྱིན་ཡོད་འདུག ༢༠༡༧ ལོར་ཧྥ་རན་སིའི་སྲིད་འཛིན་གྱི་འོས་མིར་ལངས་ནས་དངོས་གཞིའི་འོས་མིར་འདེམས་ཐོན་བྱུང་ཡོད་ཀྱང་། ལོ་དེར་ཁོང་མོ་ཨུ་རུ་སུའི་རྒྱལ་ས་མོ་སི་ཁོ་རུ་ཕྱིན་ནས་སྲིད་འཛིན་པུ་ཊིན་ལ་ཐུག་འཕྲད་བྱས་པ་མ་ཟད། ཁོང་མོའི་འོས་བསྡུའི་ཁྱབ་བསྒྲགས་སྐབས་སུ་ཨུ་རུ་སུའི་ལྐོག་ནས་དཔལ་འབྱོར་རོགས་རམ་བྱས་པའི་དོགས་གཞི་ཡོད་པ་དང་། པུ་ཊིན་གྱིས་ལི་ཕིན་ལ་རྒྱབ་སྐྱོར་ཡོད་པའི་རྣམ་འགྱུར་མངོན་གསལ་དུ་བསྟན་པ་སོགས་བྱུང་ཡོད་འདུག་ལ། ཁོང་མོས་ཧྥ་རན་སིར་གནས་སྤོར་བྱས་ཏེ་སྐྱབས་བཅོལ་དུ་ཡོང་མཁན་ཚོ་བཀག་སྡོམ་བྱ་འཆར་ཡོད་པ་མ་ཟད། ཕྱི་རོལ་དུ་ཁ་ཆེའི་བུད་མེད་རྣམས་ཀྱིས་མགོ་དཀྲིས་བཀག་སྡོམ་བྱ་རྒྱུ་ཡིན་པའི་འོས་བསྡུའི་དྲིལ་བསྒྲགས་བྱས་ཡོད་པ་དང་། ཁོང་མོ་ཐེངས་གཉིས་ལ་ཧྥ་རན་སིའི་སྲིད་འཛིན་གྱི་དངོས་གཞི་འོས་མིར་ཚུད་ཡོད་ཀྱང་། གཉིས་ཀ་ཕམ་ཡོད་འདུག
འདི་ལོའི་འོས་བསྡུ་ཆེན་མོའི་བརྗོད་དོན་གཙོ་བོ་ཁག་ནི། འདི་ལོའི་ཟླ་གཉིས་པའི་ནང་ཨུ་རུ་སུས་ཡུ་ཀེ་རེན་ལ་བཙན་འཛུལ་བྱས་པའི་སྐོར་དང་། ཁོར་ཡུག་གི་གནད་དོན། སྐྱབས་བཅོལ་གནས་སྤོར། རྒྱལ་སྲུང་བཅས་ཀྱི་ཐོག་ལ་གླེང་སློང་ཤུགས་ཆེན་པོ་བྱས་ཡོད་ཅིང་། འདི་ལོར་མི་གྲངས་ས་ཡ་ ༤༨།༧ ཙམ་གྱིས་འོས་ཤོག་འཕངས་ཏེ། འོས་ཤོག་གི་བརྒྱ་ཆ་ ༦༣། ༢ ཟིན་ཡོད་ཀྱང་། ཕྱི་ལོ ༢༠༡༧ ལོའི་དངོས་གཞིའི་འོས་བསྡུ་དང་བསྡུར་ན་བརྒྱ་ཆ་ ༢ གིས་ཇེ་ཉུང་དུ་ཕྱིན་འདུག
གསར་འགོད་པ། དཔལ་ལྡན།
