བོད་ཀྱི་དམངས་གཙོ་དར་སྤེལ་ཆེད་གསར་འགྱུར་བརྒྱུད་ལམ་གྱི་འོས་འགན་གླེང་བ།

དེ་རིང་འཛམ་གླིང་གསར་འགོད་རང་དབང་ཉིན་མོ་དང་བསྟུན་དྷ་སར་རྟེན་གཞི་བྱས་པའི་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གིས་བོད་ཀྱི་དམངས་གཙོ་དར་སྤེལ་ཆེད་གསར་འགྱུར་བརྒྱུད་ལམ་གྱི་འོས་འགན་ཞེས་པའི་བརྗོད་གཞིའི་ཐོག་བགྲོ་གླེང་ཞིག་གོ་སྒྲིག་གནང་སོང་།

བགྲོ་གླེང་ཐོག་གཏམ་བཤད་གནང་མཁན་བོད་མི་མང་སྤྱི་འཐུས་ལས་ཐོག་དང་བོད་དོན་ལས་འགུལ་བསྟི་གནང་ཁང་གི་བརྡ་འཕྲིན་སྲུང་སྐྱོབ་ཚན་པའི་འགན་འཛིན་སྲི་ཐར་བློ་བཟང་རྒྱ་མཚོ་ལགས་ཀྱིས། སྤྱི་ཚོགས་ཤིག་གི་དམངས་གཙོ་གོང་འཕེལ་འགྲོ་བར་གསར་འགྱུར་བརྒྱུད་ལམ་ལ་རང་དབང་དགོས་པ་གལ་ཆེན་ཡིན་པ་དང་། སྤྱི་ཚོགས་དྲ་ལམ་ཤུགས་ཆེར་ཁྱབ་བཞིན་པའི་དུས་སྐབས་སུ་གསར་འགྱུར་བརྒྱུད་ལམ་གྱི་ཤུགས་རྐྱེན་ཇེ་ཆུང་དུ་འགྲོ་བཞིན་ཡོད་སྐོར། དེ་སྔ་ཡིན་ན་གསར་འགྱུར་བརྒྱུད་ལམ་གྱི་གཞི་རྩའི་སྒྲོམ་གཞི་དེ་བར་གནས་ལྟ་བུ་བསྡད་དེ་བདེན་པ་ལ་རྒྱབ་སྐྱོར་མ་བྱས་པར་ཕྱོགས་ཚང་མའི་བསམ་ཚུལ་སྤེལ་གྱི་ཡོད་ནའང་། ད་ལྟའི་དུས་སྐབས་སུ་གསར་འགྱུར་བརྒྱུད་ལམ་གྱིས་མདུན་ལ་ཐོན་ནས་དྲང་བདེན་ལ་བློ་སྟོབས་ཆེན་པོས་རྒྱབ་སྐྱོར་བྱ་དགོས་སྐོར་དང་། སྤྱི་ཚོགས་དྲ་ལམ་གྱིས་རང་ཉིད་ལ་བཀོལ་སྤྱོད་པ་ཇེ་མང་དུ་གཏོང་ཆེད། བཀོལ་སྤྱོད་པ་རྣམས་ལ་རང་གི་ལྟ་བའམ་དགའ་ཕྱོགས་དང་མཐུན་པའི་གནས་ཚུལ་རྣམས་མཁོ་སྤྲོད་མང་བ་བྱེད་ཀྱི་ཡོད་པ་ལས། ལྟ་བ་མི་མཐུན་པའི་གནས་ཚུལ་རྣམས་གང་ཉུང་ཉུང་སྤྲོད་ཐབས་བྱེད་ཀྱི་ཡོད་སྐོར་བརྗོད་སོང་།

དེའི་རྗེས་བོད་མི་མང་སྤྱི་འཐུས་དང་བོད་ཀྱི་དུས་བབ་རྩོམ་སྒྲིག་པ་པདྨ་མཚོ་ལགས་ཀྱིས། རང་དབང་དང་རང་བཙན་ལྡན་པའི་རྒྱལ་ཁབ་ཀྱི་གསར་འགོད་པ་དང་བསྡུར་ན། བོད་མིའི་གསར་འགོད་པ་རྣམས་ལ་འགན་ལྷག་མ་ཞིག་ཡོད་ནའང་། མཐུན་རྐྱེན་གྱི་ཆ་ནས་ཞན་པ་ཡོད་སྐོར་དང་། བཙན་བྱོལ་སྤྱི་ཚོགས་ནང་གི་གསར་འགྱུར་བརྒྱུད་ལམ་འདི་དམངས་གཙོའི་ཀ་བ་བཞི་པ་ཡིན་ཟེར་བ་ལྟར། བོད་ནང་གི་གནས་ཚུལ་རྣམས་རྒྱལ་སྤྱིའི་སྡིངས་ཆའི་ཐོག་སྐྱེལ་ཐུབ་པ་དང་། བཙན་བྱོལ་ནང་གི་གཞུང་མང་གཉིས་དབར་གྱི་ཟམ་པ་ལྟ་བུའི་ནུས་པ་ཆེ་ཤོས་ཐོན་མཁན་དེ་གསར་འགྱུར་བརྒྱུད་ལམ་ཁག་ཡིན་སྟབས། དོན་དངོས་ཐོག་གསར་འགོད་པ་ཚོས་དམངས་གཙོའི་ཐོབ་ཐང་དང་རང་དབང་རྣམས་སྲུང་སྐྱོབ་དང་ལག་བསྟར་སྔར་ལྷག་བྱ་དགོས་སྐོར་བརྗོད་སོང་།

ཕ་ཡུལ་གསར་ཁང་གི་རྩོམ་སྒྲིག་པ་ཟུར་པ་དང་བོད་ཀྱི་ཐེབས་རྩའི་འགན་འཛིན་གཞོན་པ་ཤེས་རབ་འོད་ཟེར་ལགས་ཀྱིས། ཇེམ་སི་ཧཱ་མི་ཊོན (James Hamilton)ཟེར་བ་ཞིག་གིས་གསར་འགྱུར་བརྒྱུད་ལམ་དང་དཔལ་འབྱོར་དབར་གྱི་འབྲེལ་བའི་སྐོར་གྱི་དཔེ་དེབ་ཅིག་བརྩམས་པའི་ནང་། དེང་སང་གསར་འགྱུར་དེ་དམངས་གཙོ་འཕེལ་རྒྱས་ཀྱི་ལག་ཆ་ཞིག་མིན་པར། གསར་འགྱུར་འབྲི་མཁན་དེ་སོ་སོའི་མདུན་ལམ་ཡར་རྒྱས་གཏོང་འདོད་ཡོད་མཁན་ཞིག་དང་། གསར་ཁང་གི་བདག་པོ་དེ་དཔལ་འབྱོར་གྱི་ཁེ་ཕན་དགོས་མཁན་ཞིག གསར་འགྱུར་ཀློག་མཁན་ཡིན་ནའང་རང་གི་ལྟ་གྲུབ་ལ་ཕན་པ་བཤད་མཁན་ལ་ལྟ་མཁན་ཞིག་ཆགས་ཡོད་སྐོར་གྱི་སྡོམ་ཚིག་ཅིག་བརྒྱབ་ཡོད་པ་དང་། བོད་མིའི་སྤྱི་ཚོགས་ཀྱི་གནས་སྟངས་དེ་ལྟར་ཆགས་ཡོད་མེད་ལ་མ་ལྟོས་པར། སྤྱི་ཚོགས་ནང་ཕྱོགས་ལྷུང་གི་གནས་ཚུལ་ཡོང་གི་ཡོད་པ་དང་། དེ་ལའང་ཕྱོགས་གཅིག་ནས་ལྟ་གྲུབ་ཀྱི་དབྱེ་བ་ཡོང་བཞིན་པ་དེར་གནད་འགག་དེ་ཙམ་མེད་ནའང་། ལྟ་གྲུབ་མི་འདྲ་བའི་རྐྱེན་གྱིས་མི་ཕན་ཚུན་ལ་མི་དགའ་བའི་རྣམ་པ་ཐོན་བཞིན་པ་དེ་གནས་སྟངས་ཞན་པོ་ཡིན་སྐོར་དང་། འདས་པའི་དུས་ཡུན་ནང་བོད་མིའི་སྤྱི་ཚོགས་ནང་འོས་བསྡུ་དང་ཁྲིམས་དཔོན་གྱི་གནས་ཚུལ་ཐོན་སྐབས་ཕན་ཚུན་དབར་བགྲོ་གླེང་དང་བསམ་ཚུལ་བརྗེ་ལེན་ཉུང་བ་དང་། མི་དགའ་སར་ཁ་གཏད་གཅོག་ཐབས་སོགས་མང་དུ་ཕྱིན་ཡོད་སྐོར་བརྗོད་སོང་ལ། ཨ་རི་གཙོས་པའི་རྒྱལ་ཁབ་གཞན་ནང་སྤྱི་ཚོགས་དུམ་བུར་འགྲོ་བཞིན་པའི་ཐད་ལ་གསར་ཁང་གིས་འགན་ཆེན་པོ་ལེན་གྱི་ཡོད་ནའང་། ད་ལྟའི་ཆར་བོད་མིའི་སྤྱི་ཚོགས་ནང་དེ་ལྟར་ཡོང་གི་མེད་སྟབས། གསར་ཁང་རྣམས་ཀྱིས་སྤྱི་ཚོགས་དུམ་བུར་གྱེས་བཞིན་པའི་ཐད་ལ་འགན་འཁུར་ལེན་དགོས་པ་གལ་ཆེན་དུ་མཐོང་གི་ཡོད་སྐོར་བརྗོད་སོང་།

དེ་བཞིན་རང་དབང་ཅན་གྱི་ཉམས་ཞིབ་པ་བསྟན་འཛིན་ཉིན་བྱེད་ལགས་ཀྱིས་དམངས་གཙོ་ཞེས་པ་དེ་མི་མང་དཀྱུས་མའི་ཁེ་ཕན་རྣམས་སྲུང་སྐྱོབ་ཀྱི་ཆེད་དུ་མི་མང་གིས་འོས་བསྡུ་བརྒྱུད་ནས་བཙུགས་པའི་སྲིད་གཞུང་དེ་ཡིན་དགོས་པ་དང་། གསར་འགོད་པར་གཞུང་གི་མི་སྣ་དང་ཆབ་སྲིད་པ་རྣམས་ཀྱིས་མི་མང་གི་ཁེ་ཕན་ཆེད་དུ་ལས་ཀ་བྱེད་ཀྱི་ཡོད་མེད་སྟངས་འཛིན་བྱ་རྒྱུའི་ལས་འགན་ཡོད་སྐོར་དང་། དམངས་གཙོ་ཟེར་བ་དེ་བོད་པའི་འཐབ་རྩོད་དང་ཐད་ཀར་འབྲེལ་བ་ཡོད་པ་དང་། དམངས་གཙོ་ཞིག་ལག་བསྟར་ཡང་དག་བྱེད་པར་རྒྱལ་ཁབ་ཅིག་དགོས་ཀྱི་ཡོད་པ་དང་། བཙན་བྱོལ་ནང་དམངས་གཙོ་འཛུགས་དགོས་དོན་ཡང་རྒྱལ་ཁབ་ཤོར་བའི་རྐྱེན་གྱིས་ཡིན་པ་དང་། བོད་ཀྱི་དམངས་གཙོ་ཡར་རྒྱས་ཟེར་དུས་ཤུགས་ཀྱིས་བོད་ཀྱི་འཐབ་རྩོད་དང་འབྲེལ་བ་ཆགས་ཡོད་པ་དེར་བསམ་བློ་གཏོང་གལ་ཆེ་སྐོར་བརྗོད་སོང་།

དེ་རྗེས་བོད་དོན་འཐབ་རྩོད་པ་བསྟན་འཛིན་བརྩོན་འགྲུས་ལགས་ཀྱིས། ད་ལྟའི་ཆར་བོད་མིའི་སྤྱི་ཚོགས་ནང་མཚམས་རེར་གསར་འགྱུར་བརྒྱུད་ལམ་ལས་ཀྱང་མང་ཚོགས་ཁྲོད་ནས་བྱུང་བའི་གནས་ཚུལ་རིགས་ལ་དོ་སྣང་བྱེད་མཁན་ཇེ་མང་དུ་འགྲོ་བཞིན་པའི་དུས་སྐབས་ཤིག་ཡིན་པ་དང་། དུས་སྐབས་འདིའི་ནང་གསར་འགྱུར་བརྒྱུད་ལམ་ཁག་གིས་མི་མང་ལ་གསར་འགྱུར་ཙམ་འདོན་སྤེལ་བྱ་རྒྱུ་མེད་པར། མི་མང་གི་བསམ་ཚུལ་འགྱུར་བ་གཏོང་རྒྱུའི་ཐད་ལ་བསྐྱར་ཞིབ་བྱ་དགོས་སྐོར་དང་། བོད་མིའི་སྒྲིག་འཛུགས་ཀྱི་བརྙན་འཕྲིན་ཚན་པས་སྲིད་སྐྱོང་སྔ་རྗེས་ཀྱི་ལས་རིམ་གང་ཡོད་མེད་དྲིལ་བསྒྲགས་བྱེད་བཞིན་པའི་རྐྱེན་གྱིས་མང་ཚོགས་ངོས་ནས་དེར་དོ་སྣང་བྱེད་ཤུགས་ཆུང་དུ་འགྲོ་བཞིན་ཡོད་པ་དང་། ད་ལྟའི་ཆར་མི་མང་གི་བསམ་ཚུལ་ལས་འོས་འདེམས་བྱས་པའི་མགོ་འཁྲིད་དེ་གལ་ཆེར་བརྩིས་པའི་རྐྱེན་གྱིས། མགོ་འཁྲིད་རྣམས་ཀྱིས་སོ་སོ་མུ་མཐུད་གནས་རྒྱུའི་ཆེད་དུ་མི་མང་བ་རྣམས་ཀྱི་མོས་མཐུན་ཡོད་པའི་གནས་ཚུལ་བཤད་པ་ལས་བོད་ཀྱི་རྩ་དོན་བཤད་ཀྱི་མེད་པའི་དཀའ་ངལ་ཡོད་པར་བརྟེན། བཙན་བྱོལ་ནང་གི་གསར་འགྱུར་བརྒྱུད་ལམ་ཁག་གིས་མི་མང་གི་བསམ་ཚུལ་བཤད་དེ་སྤྱི་ཚོགས་ནང་ལམ་བུ་གསར་བ་གཏོད་ཐུབ་རྒྱུ་དང་ཕྱོགས་ལྷུང་མེད་པའི་རྣམ་པ་ཐོན་རྒྱུར་འབད་བརྩོན་གནང་དགོས་སྐོར་བརྗོད་སོང་།

གཞན་ཡང་བགྲོ་གླེང་སྐབས་གཏམ་བཤད་པ་རྣམས་ཀྱིས་གསར་འགོད་པས་སྲིད་གཞུང་ཕྱི་གསལ་ནང་གསལ་ཡོང་རྒྱུར་འགན་འཁུར་ཇི་ལྟར་བྱ་དགོས་པ་དང་། བཙན་བྱོལ་བོད་མིའི་གསར་འགོད་པ་རྣམས་ཀྱིས་དམིགས་བསལ་གདོང་ལེན་བྱ་དགོས་པའི་གནད་དོན། དེ་བཞིན་སྤྱི་ཚོགས་ནང་ལྟ་བ་མ་མཐུན་པའི་རྐྱེན་གྱིས་མང་ཚོགས་ནང་གཤོག་ཁག་འགྱུར་བཞིན་པའི་ཐད་གསར་འགོད་པས་ལས་འགན་ཇི་ཡིན་དང་། གསར་འགྱུར་བརྒྱུད་ལམ་རྣམས་ཀྱིས་འགན་འཁུར་ལེན་ཕྱོགས་ཇི་ཡིན་སོགས་ཀྱི་ཐད་ལ་དྲི་བ་དྲིས་ལན་གནང་སོང་།

གསར་འགོད་པ། པ་སངས་ཚེ་རིང་།