བྱང་ཀོ་རི་ཡའི་ནང་རྒྱལ་ཡོངས་ཁྱིམ་སྡོད་བཀག་རྒྱ་བསྡམས་ཡོད་འདུག

བྱང་ཀོ་རི་ཡར་སྨན་བཅོས་ལྟ་སྐྱོང་སོགས་ཀྱི་མཐུན་རྐྱེན་ཞན་པོ་ཡོད་པ་མ་ཟད་སྤྱི་ཡོངས་ནས་ཏོག་དབྱིབས་འགོག་ཁབ་བརྒྱབ་མེད་པས་གཉན་རིམས་ཁྱབ་གདལ་དུ་ཕྱིན་ན་གཞུང་མང་གཉིས་ལ་དཀའ་ངལ་ཆེན་པོ་འཕྲད་ཉེན་ཡོད་འདུག

འདས་པའི་ལོ་ ༢ ལྷག་རིང་རྒྱ་ནག་ཝུའུ་ཧན་ནས་མཆེད་པའི་ཏོག་དབྱིབས་གཉན་རིམས་ཀྱིས་འཛམ་གླིང་ཁྱོན་ཡོངས་ཀྱི་མི་རྒྱུ་གཉིས་ལ་བསམ་ཡུལ་ལས་འདས་པའི་གྱོང་གུད་ཆེན་པོ་ཐེབས་ཡོད་པ་ལྟར། དེ་རིང་ཨེ་ཤ་ཡའི་ཤར་ཕྱོགས་སུ་ཆགས་པའི་བྱང་ཀོ་རི་ཡའི་མགོ་འཁྲིད་ཀིམ་ཇུང་ཨན་གྱིས་ཡུལ་དེའི་ནང་ཏོག་དབྱིབས་ནད་འབུའི་ངོ་བོ་འགྱུར་བའི་ཨོ་མི་ཁུ་རོན་འགོས་ཁྱབ་ཀྱི་རྐྱེན་གྱིས་རྒྱལ་ཡོངས་སུ་ཁྱིམ་སྡོད་བཀག་རྒྱ་བསྡམས་ཡོད་པ་དང་།  ད་ལྟའི་ཆར་ནད་པ་ག་ཚོད་ཐོན་ཡོད་མེད་ཀྱི་གྲངས་ཀ་གསལ་པོ་མེད་ཀྱང་། ཡུལ་དེའི་ནང་སྨན་བཅོས་ཀྱི་སྒྲོམ་གཞི་ཡག་པོ་མེད་པའི་ཁར། རྒྱལ་སྤྱིའི་ཏོག་དབྱིབས་འགོག་ཁབ་ཀྱི་རོགས་རམ་ཡང་དྭང་ལེན་བྱས་མེད་པས་གཉན་རིམས་འགོས་ཁྱབ་འགྲོ་ཉེན་ཆེན་པོ་ཡོད་འདུག

དེ་རིང་བྱང་ཀོ་རི་ཡའི་དབུས་གཞུང་འབྲེལ་གསར་ཁང་( The official Korean Central News Agency ) གིས་གནས་ཚུལ་སྤེལ་བ་ལྟར་ན། ཟླ་འདིའི་ཕྱི་ཚེས་ ༩ ཉིན་བྱང་ཀོ་རི་ཡའི་རྒྱལ་ས་ཕོང་ཡེང་ ( Pyongyang) གི་ཚ་བ་འཕར་བའི་མི་ཁག་ཅིག་ལ་བརྟག་དཔྱད་བྱས་པ་བརྒྱུད། དེ་དག་ལ་ཏོག་དབྱིབས་ཀྱི་ཨོ་མི་ཁུ་རོན་འགོས་ཡོད་པ་ཤེས་རྟོགས་བྱུང་ཡོད་སྟབས། ཀིམ་ཇུང་ཨན་གྱིས་བྱང་ཀོ་རི་ཡའི་གྲོང་ཁྱེར་ཆ་ཚང་སྒོ་རྒྱ་བསྡམ་དགོས་པ་མ་ཟད། རིམས་ནད་འགོག་སྲུང་གི་སླད་ལས་གནས་གཉེར་མཁན་རྣམས་ཚན་པ་དབྱེ་བགོས་ཀྱིས་ཟུར་བཀག་ཏུ་འདུག་དགོས་པའི་བཀའ་བཏང་ཡོད་འདུག་ལ། ཀིམ་གྱིས་མི་མང་རྣམས་ཀྱི་བློ་སེམས་ཆིག་སྒྲིལ་གྱི་ཐོག་ནས་མཉམ་རུབ་བྱས་ན་རིམས་ནད་ལས་རྣམ་པར་རྒྱལ་ཐུབ་རྒྱུ་ཡིན་སྐོར་སོགས་བསྒྲགས་ཡོད་ཀྱང་། ཏོག་དབྱིབས་ནད་པའི་གྲངས་འབོར་སོགས་ཕྱིར་བསྒྲགས་བྱས་མེད་པ་རེད་འདུག

འདས་པའི་ལོ་ངོ་གཉིས་ལྷག་གི་ནང་དུ་འཛམ་གླིང་ཤར་ནུབ་ཀུན་ཏུ་ཏོག་དབྱིབས་གཉན་རིམས་ཀྱིས་དཀའ་ངལ་ཧ་ཅང་ཚབས་ཆེན་འཕྲད་ཡོད་ཀྱང་། བྱང་ཀོ་རི་ཡའི་ནང་དུ་ཏོག་དབྱིབས་ནད་པ་གཅིག་ཀྱང་ཐོན་མེད་ཚུལ་དང་། ཡང་ནད་པ་གཅིག་ཐོན་ཡོད་ཀྱང་སྲོག་ཐོག་བཏང་ཡོད་སྐོར་གྱི་གནས་ཚུལ་བརྒྱུད་ལམ་ཁག་ཏུ་བསླེབས་སོང་། གང་ལྟར་ནམ་རྒྱུན་ནས་ཡུལ་དེའི་ནང་ཕྱི་མི་བཀག་སྡོམ་དང་ནང་མི་འགྲོ་སྐྱོད་ལ་སྟངས་འཛིན་ཤུགས་ཆེན་བྱེད་བཞིན་ཡོད་སྟབས། རྒྱལ་ཁབ་གཞན་དང་བསྡུར་ན་བྱང་ཀོ་རི་ཡ་ནི་ཏོག་དབྱིབས་འགོས་ཁྱབ་མ་བྱུང་བའི་རྒྱལ་ཁབ་གཅིག་པུ་ལྟ་བུ་ཞིག་ཏུ་ངོས་འཛིན་བྱེད་མཁན་ཡོད་པ་རེད།

ཨ་རིའི་གསར་འགྱུར་དུས་དེབ་( US News) ཀྱིས་དེ་འབྲེལ་གནས་ཚུལ་སྤེལ་བའི་ནང་དུ། བྱང་ཀོ་རིའི་ནང་ཏོག་དབྱིབས་འགོས་ཁྱབ་དེ་མཐུན་ཕྱོགས་རྒྱལ་ཁབ་རྒྱ་ནག་ནས་འགོས་ཡོད་པར་ངོས་འཛིན་བྱེད་ཀྱི་ཡོད་འདུག  འདི་ལོའི་ཟླ་དང་པོའི་ནང་བྱང་ཀོ་རི་ཡའི་གྲོང་ཁྱེར་སི་ནུ་ཇུ(Sinuiju ) དང་རྒྱ་ནག་གི་གྲོང་ཁྱེར་དན་ཏུང་( Dandong)  གྱི་ཚོང་སྒོ་བསྐྱར་དུ་ཕྱེས་ཏེ།  ཡུལ་གཉིས་བར་གྱི་ཚོང་འདྲེན་མགོ་བརྩམས་ཡོད་ཀྱང་། འདི་ལོའི་ཕྱི་ཟླ་ ༤ ཟླ་དཀྱིལ་ནས་ཡུལ་གཉིས་ཀྱི་མཐའ་མཚམས་སུ་ཁེལ་བའི་རྒྱ་ནག་ལོའོ་ལིན་ ( Liaoning) ཞིང་ཆེན་ནང་གཉན་རིམས་ཁྱབ་གདལ་དུ་ཕྱིན་ཏེ་གནས་སྐབས་ཚོང་འབྲེལ་མཚམས་བཞག་ཡོད་འདུག

འཛམ་གླིང་རྒྱལ་ཁབ་ཁག་གིས་སོ་སོའི་མི་མང་ལ་ཏོག་དབྱིབས་གཉན་རིམས་ཀྱི་འགོག་ཁབ་ཐོབ་རྒྱུར་འབད་བརྩོན་ཆེན་པོ་བྱེད་མུས་ཡིན་ཡང་། བྱང་ཀོ་རི་ཡའི་མི་གྲངས་ས་ཡ་ ༢༦ ལྷག་ལ་འགོག་ཁབ་ཐོབ་མེད་ཀྱང་མངོན་གསལ་དོད་པའི་ངང་ནས་ཨ་རི་སོགས་ནས་ཏོག་དབྱིབས་རིམས་ནད་ཀྱི་འགོག་ཁབ་མཁོ་འདོན་བྱ་རྒྱུའི་རེ་བ་བྱས་མེད་པ་དང་། འདས་པའི་ལོ་གཉིས་ཀྱི་རིང་ལ་འཛམ་གླིང་གི་གསར་འགོད་རང་དབང་སྡུག་ཤོས་གྲས་སུ་གཏོགས་པའི་བྱང་ཀོ་རི་ཡ་དང་ཨེ་རི་ཊི་རི་ཡ་( Eritrea ) གཉིས་ཀྱིས་ཏོག་དབྱིབས་འགོག་ཁབ་བརྒྱབ་མེད་པ་མ་ཟད། འདས་ལོར་བྱང་ཀོ་རི་ཡས་རྒྱལ་སྤྱིའི་ཏོག་དབྱིབས་འགོག་ཁབ་ཀྱི་ལས་གཞིའི་ཁྲོད་ནས་བྱང་ཀོ་རི་ཡར་འགོག་ཁབ་ས་ཡ་ ༣ ཙམ་སྤྲད་པ་བླངས་མེད་པ་དང་།  དེ་བཞིན་ནོ་ཝ་ཝེག་སི་(Novavax) འགོག་ཁབ་འབུམ་ ༢། ༥ ལྷག་སྤྲད་པ་དེའང་དྭང་ལེན་བྱས་མེད་པ་རེད་འདུག

གསར་འགོད་པ། དཔལ་ལྡན།