འདི་ལོ་ཡང་རྔོན་པ་རུ་ཁག་གིས་དབྱར་སྐྱིད་རྐང་བྲོ་གླུ་གཞས་འགྲན་བསྡུར་གྱི་རྒྱལ་ཁ་བླངས་སོང་།
ཁ་སང་ཕྱི་ཚེས་ ༡༥ ཉིན་བོད་ཀྱི་ཟློས་གར་ཚོགས་པ་དབུ་བརྙེས་ནས་ལོ་ངོ་ ༦༣ འཁོར་བའི་དུས་དྲན་དང་བསྟུན། རྔོན་པ་རུ་ཁག་དང་རྒྱ་ལུ་རུ་ཁག་དབར་དབྱར་སྐྱིད་ཀྱི་རྐང་བྲོ་གླུ་གཞས་དང་གཏམ་བརྗོད་ཀྱི་འགྲན་བསྡུར་བསྡུས་པའི་ཐོག་སྐུ་མགྲོན་གཙོ་བོ་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་ཕེབས་ཏེ། མང་ཚོགས་ངོས་ནས་འདི་ལོའི་དབྱར་སྐྱིད་ཀྱི་གཏམ་བརྗོད་ཀྱི་གོ་བ་ལེན་ཐུབ་པ་བྱས་ཏེ་བོད་ཀྱི་རྩ་དོན་དང་བོད་སྤྱི་པའི་དོན་ལ་ལས་ཀ་བྱ་དགོས་སྐོར་གསུངས་སོང་།
སྲིད་སྐྱོང་སྤེན་པ་ཚེ་རིང་མཆོག་གིས་གསུང་བཤད་གནང་དོན། ཞབས་ལོ་ ༢༥ ལྷག་ཞབས་ཕྱི་ཞུ་མཁན་ཁོང་རྣམ་པ་(ཟློས་གར་གྱི་ལས་བྱེད་)ཚང་མ་ལ་ཐུགས་རྗེ་ཆེ་ཞུ་རྒྱུ་ཡིན། རྒན་རབས་ཚོས་དཀའ་ལས་བརྒྱབ་མེད་ན་ད་ལྟའི་མི་རབས་ལ་གོ་སྐབས་འདི་ཡོང་རྒྱུ་མེད་པ་གསལ་པོ་རེད། དེ་ཡིན་དུས་རྒན་རབས་ཚོས་སྐུ་ལས་བསྐྱོན་བཞག་པ་ད་ལྟ་གྲུབ་ཐོབ་ཐང་སྟོང་རྒྱལ་པོའི་སྐུ་བརྙན་བཞེས་གནང་མཁན་དང་། སྔོན་མ་ནས་ཕྱག་ལས་གནང་ནས་(སྐུ་བརྙན་)བཞེས་གནང་མཁན་ཚང་མ་ལ་བཀའ་ཤག་སྐབས་བཅུ་དྲུག་པ་དང་ང་རང་སྒེར་ངོས་ནས་ཐུགས་རྗེ་ཆེ་ཞུ་རྒྱུའི་འདོད་པ་བྱུང་སོང་། དབྱར་སྐྱིད་ཀྱི་ལས་རིམ་འདི་ལོ་གཅིག་ནང་ལ་ཚང་མས་སྒུག་སྡོད་རྒྱུ་ཞིག་རེད། ལྷག་པར་དུ་རོལ་དབྱངས་དང་ཟློས་གར་ལ་དགའ་པོ་ཡོད་མཁན་ཚོས་དུས་རྒྱུན་དུ་ནས་གསར་པ་འདྲ་བོ་ག་རེ་ཡོད་ན་ཞེས་སྒུག་བསྡད་རྒྱུའི་གནས་སྟངས་ཤིག་རེད། དེ་ནས་ད་ལོ་ཡིན་ནའང་ཚང་མས་སོ་སོའི་ནུས་པའི་རྩལ་སོགས་བསྟན་ནས། གཏམ་བརྗོད་ལྟ་བུ་ཡིན་ན་གཉིས་ཀས་ཡག་ཐག་ཆོད་བསྟན་སོང་བསམ་སོང་། མིག་ཆུའང་ཏོག་ཙམ་འཁོར་བྱུང་། དངོས་ཡོད་གནས་ཚུལ་རེད། ང་རང་ཚོ་འདིར་ཡོད་མཁན་ཚང་མས་དགོངས་པ་བཞེས་དགོས་རྒྱུའི་གནས་སྟངས་ཤིག་ཆགས་བསྡད་ཡོད་རེད་བསམ་གྱི་ཡོད། རྒྱ་ཆེའི་མང་ཚོགས་ངོས་ནས་བསམ་བློ་གཏང་དགོས་པ་ཆགས་ཀྱི་རེད། སྤྱིར་བཏང་ལས་རིམ་འདི་རྗེས་ལ་ཁོང་ཚོས་འགྲེམས་ཚོང་བྱེད་ཀྱི་ཡོད་པར་བརྟེན། མང་ཚོགས་ནང་ལོགས་ལའང་བལྟ་རྒྱུའི་གོ་སྐབས་ཏན་ཏན་ཡོང་གི་རེད། གཏམ་བརྗོད་གཉིས་ཀྱི་གོ་བ་དེ་མང་ཚོགས་ནང་ལ་ལོན་པའི་ཐོག་ནས་མང་ཚོགས་ཀྱི་ངོས་ནས་ཡིན་ནའང་ང་ཚོའི་རྩ་དོན་གྱི་ལས་ཀ་བྱ་རྒྱུ་དང་། བོད་སྤྱི་པའི་དོན་ལ་ལས་ཀ་བྱ་རྒྱུའི་ཕྱར་གྲུ་མཉམ་འདེགས་དང་ནུས་པ་མཉམ་སྤུངས་བྱ་རྒྱུ་གལ་ཆེན་པོ་ཡིན་པ་དེ་བསྟན་པ་རེད། ང་ཚོ་ལས་ཀྱི་སྣེ་མོ་བར་བཤད་མི་དགོས་པ་རེད། ཅེས་གསུངས་སོང་།
ཡང་སྲིད་སྐྱོང་མཆོག་གིས་ཟློས་གར་གྱི་འགན་འཛིན་བསྐོ་ཕྱོགས་ཐད་ལ་བཀའ་ཤག་གི་དགོངས་པ་གང་འདྲ་ཡོད་མེད་ཐད། ཟློས་གར་གྱི་འགན་འཛིན་གསར་པ་དོན་གྲུབ་ལགས་བསྐོ་གཞག་བྱས་རྗེས་དུས་ཡུན་ཞེ་དྲག་འགྲོ་ཡི་མེད། བར་ལམ་ཞིག་ནས་ང་ཚོར་ཟློས་གར་འགན་འཛིན་བསྐོ་རྒྱུ་དེ་ལ་བར་ཆད་ལྟ་བུ་འཕྲད་གྱིན་བསྡད་རྗེས་ཟླ་བ་ཁ་ཤས་ཕྱིན་སོང་། ད་ལྟ་དོན་གྲུབ་ལགས་བསྐོ་གཞག་བྱུང་རྗེས་འཛིན་སྐྱོང་གི་ལས་དོན་ཡག་ཐག་ཆོད་ཡོང་རྒྱུར་ང་ཚོས་རེ་བ་ཞུ་ཡི་ཡོད། དེ་ནས་རིག་གཞུང་གི་ལས་དོན་དེ་དག་རིག་གཞུང་དང་འབྲེལ་བའི་ལས་བྱེད་ཀྱིས་བྱེད་དགོས་པའི་གནད་དོན་རེད། མ་འོངས་པར་བཀའ་ཤག་གིས་བསམ་བློ་གཏོང་སྟངས་དེ། སྒྲིག་འཛུགས་གང་འདྲ་ཞིག་ཡིན་ནའང་། ལྷག་པར་དུ་རིག་གཞུང་དང་འབྲེལ་བ་ཡོད་ན་རིག་གཞུང་གི་ཚན་པ་དེའི་ལས་ཀྱི་སྣེ་མོ་བས་འགན་འཁྱེར། འཛིན་སྐྱོང་དེ་ཟློས་གར་ཟུར་པ་དང་ཟློས་གར་ནང་ལོགས་ལ་ཡོད་མཁན་མང་ཆེ་བས་རེ་བ་དེ་ག་རང་རྒྱག་གི་འདུག འགན་འཛིན་ལྷན་ཚོགས་ཀྱི་ཐག་གཅོད་དེ། འཛིན་སྐྱོང་གི་ལས་དོན་དེ་བོད་མིའི་སྒྲིག་འཛུགས་རང་ནས་གཏོང་ཐུབ་ན་ཡག་པོ་འདུག་ཅེས་གསུང་(གི་འདུག) ང་ཚོའི་རྒན་ལགས་ཟུར་པ་ཚོས་ཀྱང་བརྡ་གཅིག་བཏང་གནང་སོང་། བརྡ་དེ་གོ་བརྡ་འཕྲོད་སོང་ཞུ་རྒྱུ་ཡིན། མ་འོངས་པར་ང་ཚོས་ཟློས་གར་གྱི་ལས་དོན་གང་བྱས་པ་ཡིན་ནའང་། ཟློས་གར་ཟུར་པ་དང་རྒན་པ་ཚོ་མཉམ་དུ་འབྲེལ་བ་མུ་མཐུད་ནས་གཞག་རྒྱུ་དང་། དེ་ཚོའི་ཐོག་ནས་ཟློས་གར་ཟུར་པ་དང་རྒན་པ་ཚོས་མཐུན་འགྱུར་གནང་རྒྱུ་ཡོད་ན་གོ་སྐབས་ག་དུས་ཡིན་ནའང་བཟོ་ཆོག་གི་རེད། ཅེས་གསུངས་སོང་།
འདི་ལོའི་དབྱར་སྐྱིད་ཀྱི་རྐང་བྲོ་གླུ་གཞས་ཀྱི་འགྲན་བསྡུར་ཀྱི་གཟུ་དཔང་ནི་རྫོང་གསར་བཤད་གྲྭ་མཐོ་སློབ་ཀྱི་ཞིབ་འཇུག་སློབ་མའི་ངེས་སྟོན་པ་རྒན་སྤྲེལ་ནག་པ་བློ་གྲོས་དཔལ་བཟང་ལགས་དང་། བོད་ཀྱི་ཟློས་གར་ཚོགས་པའི་འགན་འཛིན་ཟུར་པ་དང་ལས་བྱེད་འདེམས་བསྐོ་ལྷན་ཁང་གི་དྲུང་ཆེ་ཚེ་རིང་དབྱངས་སྐྱིད་ལགས། བོད་ཀྱི་ཟློས་གར་ཚོགས་པའི་དགེ་རྒན་ཟུར་པ་དང་གཞས་པ་ཚེ་རིང་བློ་གྲོས་ལགས་བཅས་གསུམ་ཡིན་ཞིང་། འགྲན་བསྡུར་ཁྲོད་རྐྱང་གཞས་དང་འཁྲབ་གཞས་ཁག་གཉིས་བཅས་ཚན་པ་གསུམ་ཀར་རྔོན་པ་རུ་ཁག་ལ་ཨང་དང་པོ་ཐོབ་པ་དང་། གཏམ་བརྗོད་ཐད་རུ་ཁག་གཉིས་ལ་ཨང་རིམ་གཅིག་མཚུངས་ཐོབ་སྟེ། ཁྱོན་བསྡོམས་ཨང་གྲངས་ ༣༠༠ ནས་རྒྱ་ལུ་རུ་ཁག་ལ་ཨང་གྲངས་ ༢༣༠ དང་། རྔོན་པ་རུ་ཁག་ལ་ཨང་གྲངས་ ༢༣༦ ཐོབ་སོང་།
གསར་འགོད་པ། པ་སངས་ཚེ་རིང་།
