ཁ་སང་རྒྱ་ནག་གཞུང་གིས་ཐའེ་ཝན་གྱི་མཁའ་ཁུལ་དུ་དམག་དོན་གནམ་གྲུ་ ༢༩ སྡེབ་གཏོང་གིས་དྲག་པོའི་འཇིགས་སྐུལ་བྱས་ཡོད་སྟབས་ཐའེ་ཝན་གྱིས་ཀྱང་དྲག་དམག་བཏང་ནས་འགོག་རྒོལ་གྱི་སྟོབས་ཤུགས་ངོམས་ཡོད་འདུག
ཉེ་ལམ་ནས་རྒྱལ་སྤྱིའི་གཞུང་དང་གནད་དོན་དཔྱད་ཞིབ་པ་མང་པོས་རྒྱ་ནག་གཞུང་གིས་ཐའེ་ཝན་ལ་བཙན་འཛུལ་བྱེད་སྲིད་པའི་ཉེན་བརྡ་བཏང་བ་དང་སྦྲགས། ཐའེ་ཝན་མཚོ་འགག་གི་བདེ་འཇགས་ཐད་གླེང་སློང་ཤུགས་ཆེན་འབྱུང་བཞིན་ཡོད་པའི་སྐབས་འདིར། ཁ་སང་རྒྱ་ནག་གིས་ཐའེ་ཝན་གྱི་རྒྱལ་སྲུང་མཁའ་ཁུལ་དུ་དམག་དོན་གནམ་གྲུ་ ༢༩ སྡེབ་གཏོང་བྱས་ཏེ་འཇིགས་སྐུལ་བྱས་ཡོད་པ་དང་། དེ་ནི་འདི་ལོར་ཐའེ་ཝན་མཚོ་འགག་ཏུ་བཏང་བའི་དམག་རྒྱག་གནམ་གྲུ་གྲངས་མང་ཤོས་གསུམ་པ་དེ་ཆགས་ཀྱི་ཡོད་འདུག
ཁ་སང་རྒྱ་ནག་གིས་སྡེབ་གཏོང་བྱས་པའི་གནམ་གྲུའི་ཁྲོད། J-16 རྟགས་ཅན་དང་། J-11 རྟགས་ཅན KJ -30 རྟགས་ཅན་ཚུད་པའི་འཐབ་འཁྲུག་གནམ་གྲུ་ ༡༧ དང་། H-6 རྟགས་ཅན་གྱི་རྡུལ་ཕྲན་མཚོན་ཆ་བཀོལ་སྤྱོད་ཐུབ་པའི་འབར་མདེལ་གཡུག་མཁན་གྱི་གནམ་གྲུ་ ༦ དང་། Y – 9 རྟགས་ཅན་གྱི་འཐབ་འཁྲུག་གནམ་གྲུ ༡ བཅས་དམག་དོན་གནམ་གྲུ་ ༢༩ ཡིས་འཕུར་སྐྱོད་འཇིགས་སྐུལ་བྱས་ཡོད་སྟབས། དེ་རིང་ཐའེ་ཝན་བློན་ཆེན་ལས་ཁུངས་ཀྱིས། ཐའེ་ཝན་གྱིས་དྲག་པོའི་གོ་མཚོན་གྲ་སྒྲིག་བྱས་ཡོད་པ་མ་ཟད། དམག་དོན་གནམ་གྲུ་བཏང་ནས་རྒྱ་ནག་གི་འཇིགས་སྐུལ་ལ་འགོག་རྒོལ་བྱས་ཡོད་འདུག
འདས་པའི་ལོ་ཤས་ནང་རྒྱ་ནག་གིས་ཐའེ་ཝན་གྱི་མཁའ་ཁུལ་དང་མཚོ་ཁུལ་དུ་དམག་དོན་གྱི་གནམ་གྲུ་དང་འཐབ་འཁྲུག་གྲུ་གཟིངས་མངག་གཏོང་བྱས་ཏེ་ཡང་ཡང་དྲག་ཤུགས་ངོམས་ཡོད་ཅིང་། ཉེ་ཆར་འདི་ལོའི་ཕྱི་ཟླ་ ༥ ཚེས་ ༣༠ ཉིན་ཐའེ་ཝན་གྱི་མཁའ་ཁུལ་དུ་གནམ་གྲུ་ ༣༠ མངག་གཏོང་བྱས། ཡང་འདི་ལོའི་ཕྱི་ཟླ་ ༡ ཚེས་ ༢༣ ཉིན་གནམ་གྲུ་ ༣༩ མངག་གཏོང་བྱས་ཏེ། འདི་ལོ་གཅིག་པུར་རྒྱ་ནག་གཞུང་གིས་ཐའེ་ཝན་གྱི་མཁའ་ཁུལ་དུ་གྲངས་འབོར་ ༣༠ ཡས་མས་ཅན་གྱི་དམག་དོན་གནམ་གྲུ་ཐེངས་ ༣ བཏང་ཡོད་འདུག
འདི་ལོའི་ཕྱི་ཟླ ༥ ཚེས་ ༢༤ ཉིན་ཉི་ཧོང་གི་རྒྱལ་ས་ཊོག་ཡོ་རུ་ཕྱོགས་ཁག་རྒྱལ་ཁབ་བཞི་ (THE QUAD) ཡི་སྲིད་བློན་རྣམས་སྐོང་ཚོགས་གནང་སྟེ། རྒྱ་ནག་གཞུང་གིས་རྒྱ་གར་ཞི་བདེ་རྒྱ་མཚོའི་ཁུལ་དུ་སྟོབས་ཤུགས་སྐྱེད་ནས་སིམ་འཛུལ་བྱེད་མུས་ཡིན་པའི་གནད་དོན་གླེང་སློང་གནང་ཡོད་པ་དང་སྦྲགས། ཨ་རིའི་སྲིད་འཛིན་སྐུ་ཞབས་བྷའེ་ཌིན་མཆོག་གིས། རྒྱ་ནག་གཞུང་གིས་མུ་མཐུད་དུ་ཐའེ་ཝན་གྱི་མཁའ་ཁུལ་དུ་དམག་གྱི་སྟོབས་ཤུགས་ངོམས་ཏེ་སུན་གཙེར་དང་འཇིགས་སྐུལ་བྱས་ཚེ། ཨ་རིས་ཐའེ་ཝན་གྱི་བདེ་སྲུང་ཐད་ལ་རོགས་འདེགས་བྱ་རྒྱུ་ཡིན་སྐོར་བསྒྲགས་ཡོད་པ་མ་ཟད། འདི་ལོའི་ཕྱི་ཟླ་ ༥ ཚེས་ ༢༣ ཉིན་ཨ་རིའི་སྲིད་འཛིན་བྷའེ་ཌིན་མཆོག་གིས་ཉི་ཧོང་དུ་ཡུལ་དེའི་སྲིད་འཛིན་གསར་པ་ཧྥུ་མིའོ་ཀི་ཤི་ཌ་ ( Fumio Kishida) མཆོག་དང་ལྷན་དུ་གསར་འགོད་ལྷན་ཚོགས་ཤིག་བསྐོངས་པའི་ཐོག གསར་འགོད་པ་ཞིག་གིས་ཐའེ་ཝན་ལ་བཙན་འཛུལ་བྱུང་སྐབས་ཨ་རིའི་ངོས་ནས་དེར་དམག་དོན་མཉམ་ཞུགས་བྱ་རྒྱུ་ཡིན་མིན་དྲིས་པར། སྲིད་འཛིན་བྷའེ་ཌིན་མཆོག་གིས་ཨ་རིས་ཐའེ་ཝན་ལ་དེ་ལྟར་སྲུང་སྐྱོབ་བྱ་རྒྱུའི་ཁས་ལེན་བྱས་ཡོད་སྐོར་ལན་འདེབས་བྱས་འདུག་པ་མ་ཟད། རྒྱ་ནག་གིས་དམག་འཐབ་ཀྱི་ཐོག་ནས་ཐའེ་ཝན་རང་ཁོངས་སུ་འཇུག་རྒྱུའི་བསམ་བློ་དེ་རན་འཚམ་ཞིག་མིན་པ་དང་། དེ་ལྟར་བྱུང་བའི་དབང་དུ་བཏང་ན་ཐའེ་ཝན་དེ་ད་ལྟའི་ཡུ་ཀེ་རེན་ལྟར་ཆགས་ངེས་ཡིན་སྐོར་བརྗོད་འདུག་ལ། སྲིད་འཛིན་སྒེར་གྱི་བསམ་པར་རྒྱ་ནག་གིས་ཐའེ་ཝན་བཙན་འཛུལ་བྱ་རྒྱུ་མིན་ནའང་། གཙོ་བོ་རྒྱལ་སྤྱིའི་སྤྱི་ཚོགས་ཀྱིས་བཙན་འཛུལ་ལ་ཡ་ལན་ཅི་འདྲ་སྤྲོད་མིན་ལ་རག་ལས་ཀྱི་ཡོད་སྐོར་གསུངས་ཡོད་པ་རེད།
གནད་དོན་དབྱེ་ཞིབ་པ་རྣམས་ཀྱིས། རྒྱ་ནག་གིས་མི་གྲངས་ས་ཡ་ ༢༣ ལྷག་ལས་མེད་པའི་ཐའེ་ཝན་མཚོ་འགག་ཏུ་སྟོབས་ཤུགས་རྒྱ་སྐྱེད་ཐུབ་ཚེ། ནུབ་ཞི་བདེ་རྒྱ་མཚོའི་ཁུལ་དུ་སྟབས་བདེ་བོའི་ཐོག་ནས་འགུལ་སྐྱོད་བྱེད་ཐུབ་པ་མ་ཟད། ནུབ་ཞི་བདེ་རྒྱ་མཚོའི་ཁུལ་དུ་ཡོད་པའི་གྷུ་ཝམ (Guam ) མཚོ་གླིང་དང་ཨ་རིའི་ཧཱ་ཝའེ་( Hawaii) མངའ་སྡེར་ཡོད་པའི་ཨ་རིའི་དམག་སྒར་ལ་འཇིགས་སྐུལ་བྱེད་སྲིད་སྐོར་བརྗོད་ཀྱི་ཡོད་པ་རེད།
གསར་འགོད་པ། དཔལ་ལྡན།
