པ་ཀི་སི་ཐན་གྱི་པན་ཇབ་མངའ་སྡེའི་ནང་བུད་མེད་དང་བྱིས་པ་རྣམས་ལ་བཙན་གཡེམ་གྱི་དོན་རྐྱེན་མང་པོ་བྱུང་གི་ཡོད་པའི་རྐྱེན་གྱིས་མངའ་སྡེ་ཁྱོན་ཡོངས་སུ་ཛ་དྲག་གི་ཉེན་བརྡ་བཏང་ཡོད་པ་རེད།
དེ་རིང་རྒྱ་གར་གྱི་ཨན་ཌི་ཊི་བེ་ (ndtv) གསར་ཁང་གིས་གནས་ཚུལ་སྤེལ་བ་ལྟར་ན། ཟླ་འདིའི་ཕྱི་ཚེས་ ༢༠ ཉིན་པ་ཀི་སི་ཐན་གྱི་པན་ཇབ་མངའ་སྡེ་གཞུང་གིས། མངའ་སྡེ་དེའི་ནང་བུད་མེད་དང་བྱིས་པ་རྣམས་ལ་བཙན་གཡེམ་གྱི་དོན་རྐྱེན་མང་པོ་བྱུང་གི་ཡོད་པའི་གནས་སྟངས་འོག མངའ་སྡེ་ཁྱོན་ཡོངས་སུ་བཙན་གཡེམ་གྱི་གནས་སྟངས་ཛ་དྲག་ཡིན་པའི་ཉེན་བརྡ་བཏང་ཡོད་པ་རེད།
དེའི་ཐད་པན་ཇབ་ཀྱི་མངའ་སྡེའི་ནང་སྲིད་བློན་ཆེན་ཨ་ཊ་ཊཱར་ (Atta Tarar) ལགས་ཀྱིས། བཙན་གཡེམ་གྱི་དོན་རྐྱེན་ཇེ་མང་དུ་འགྲོ་ཡི་ཡོད་པ་ནི་སྤྱི་ཚོགས་དང་གཞུང་གཉིས་ལ་ཚབས་ཆེ་བའི་དོན་རྐྱེན་ཞིག་ཆགས་ཀྱི་ཡོད། དེར་བརྟེན། བཙན་གཡེམ་གྱི་དོན་རྐྱེན་མི་འབྱུང་བའི་སླད་དུ། ང་ཚོས་མངའ་སྡེ་ཁྱོན་ཡོངས་སུ་ཛ་དྲག་གི་ཉེན་བརྡ་བཏང་བ་ཡིན། ཞེས་བརྗོད་ཡོད་པ་དང་། པ་ཀི་སི་ཐན་གྱི་པན་ཇབ་མངའ་སྡེའི་ནང་ཉིན་རེར་བུད་མེད་དང་བྱིས་པ་ལ་བཙན་གཡེམ་བྱས་པའི་དོན་རྐྱེན་ཉུང་མཐར་ ༤ ནས་ ༥ བར་བྱུང་གི་ཡོད་འདུག
ད་ལྟའི་ཆར་པན་ཇབ་ནང་རྩུབ་སྤྱོད་ཀྱི་རིགས་མཚམས་འཇོག་ཡོང་ཐུབ་ཐབས་སུ། མངའ་སྡེའི་གཞུང་ངོས་ནས་རྩུབ་སྤྱོད་སྤེལ་མཁན་གྱི་མི་ཁག་ཅིག་འཛིན་བཟུང་བྱས་པ་དང་། བཙན་གཡེམ་མཚམས་འཇོག་ཅེས་པའི་ལས་འགུལ་ཞིག་སྤེལ་བཞིན་ཡོད་པ་མ་ཟད། སྤྱི་དམངས་ཀྱི་ཚོགས་སྡེ་ཁག་དང་བུད་མེད་ཀྱི་ཐོབ་ཐང་རྩོད་ལེན་པའི་ཚོགས་སྡེ། ཁྲིམས་རྩོད་པ་དང་། དགེ་རྒན་སོགས་སུ་བཀའ་འདྲི་དང་ལམ་སྟོན་ཞུ་ཡི་ཡོད་པ་མ་ཟད། ཕ་མ་རྣམས་ནས་རང་གི་བྱིས་པར་བདེ་འཇགས་སྲུང་སྐྱོབ་ཀྱི་སློབ་ཁྲིད་གནང་དགོས་པ་དང་། འབྲེལ་ཡོད་མངའ་སྡེ་གཞུང་ནས་བཙན་གཡེམ་གྱི་བྱ་སྤྱོད་སྤེལ་མཁན་རྣམས་ཀྱི་ཁྲག་རྒྱུད་མགྱོགས་མྱུར་ཞིབ་འཇུག་བྱས་ཏེ། གནོད་འཚེ་སྤེལ་མཁན་གྱི་མི་དེ་དག་འཕྲལ་དུ་འཛིན་བཟུང་བྱ་རྒྱུ་ཡིན་སྐོར་བསྒྲགས་ཡོད་འདུག
སྤྱིར་པ་ཀི་སི་ཐན་ནང་ཕོ་མོ་དབྱེ་འབྱེད་ཀྱི་ཤུགས་རྐྱེན་ཆེན་པོ་ཡོད་པ་དང་བུད་མེད་ལ་འཚེ་བའི་བྱ་སྤྱོད་སྤེལ་ཤུགས་ཆེས་ཆེ་བའི་འཛམ་གླིང་རྒྱལ་ཁབ་ཁག་གི་གྲས་ཤིག་ཡིན་པ་རེད། འདས་ལོའི་རྒྱལ་སྤྱིའི་ཕོ་མོ་དབྱེ་འབྱེད་ཀྱི་ཞིབ་འཇུག་གྲུབ་དོན་ལྟར་ན། པ་ཀི་སི་ཐན་ནི་ཕོ་མོ་དབྱེ་འབྱེད་བྱེད་ཤུགས་ཆེ་ཤོས་ཀྱི་འཛམ་གླིང་རྒྱལ་ཁབ་མཐའ་མ་༤ བ་སྟེ། འཛམ་གླིང་རྒྱལ་ཁབ་ ༡༥༦ ལས་ཨང་རིམ་ ༡༥༣ པ་དེ་ཡིན་པ་རེད་ལ། རྒྱལ་སྤྱིའི་འགྲོ་བ་མིའི་ཐོབ་ཐང་དང་བདེ་འཇགས་གླེང་སྟེགས་ཀྱི་ཞིབ་འཇུག་ཞིག་གི་ནང་། འདས་པའི་ལོ་ ༤ རིང་པ་ཀི་སི་ཐན་ནང་བུད་མེད་ཁྱོན་ ༡༤༤༥༦ ལ་བཙན་གཡེམ་གྱི་དོན་རྐྱེན་བྱུང་བའི་ཁྲོད། བུད་མེད་མང་ཤོས་ནི་པན་ཇབ་མངའ་སྡེ་ནས་ཡིན་པ་དང་། པ་ཀི་སི་ཐན་ནང་ཁྲིམས་ཀྱི་བརྒྱུད་རིམ་རིང་དྲགས་པ་དང་སྐྱེས་པའི་དབང་ཤུགས་ཆེ་དྲགས་པའི་གནས་སྟངས་འོག བཙན་གཡེམ་སོགས་ཀྱི་གནོད་འཚེ་ཕོག་པའི་བུད་མེད་རྣམས་ལ་དྲང་བདེན་གྱི་ཐག་གཅོད་ཅིག་ཡོང་ཐབས་མེད་པར་ངོས་འཛིན་བྱས་ཡོད་འདུག
གསར་འགོད་པ། སྐལ་བཟང་སྦྱིན་པ།
