བོད་ཀྱི་གློག་བརྙན་གཅིག་དང་བཞི་ཞེས་པ་རྒྱལ་སྤྱིའི་གློག་བརྙན་དུས་སྟོན་ཐོག་བསྟན་རྒྱུ་ཡིན་འདུག

བོད་ཀྱི་གློག་བརྙན་འཁྲབ་འཁྲིད་པ་གྲགས་ཅན་པདྨ་ཚེ་བརྟན་ལགས་ཀྱི་བུ་འཇིགས་མེད་འཕྲིན་ལས་ཀྱིས་ཕབ་སྐྲུན་བྱས་པའི་གཅིག་དང་བཞི་ཞེས་པའི་གློག་བརྙན་དེ་ནེའུ་ཡོག་གློག་བརྙན་དུས་སྟོན་ཐེངས་ ༢༠ པའི་ཐོག་བསྟན་རྒྱུ་ཡིན་འདུག

ཕྱི་ལོ་ ༢༠༢༢ ལོའི་ནེའུ་ཡོག་གློག་བརྙན་དུས་སྟོན་ཐེངས་ཉི་ཤུ་པ་ ( 20^th Anniversary New York Film Festival ) དང་བསྟུན། ཟླ་འདིའི་ཕྱི་ཚེས ༡༦ ཉིན་དགོང་མོའི་ཆུ་ཚོད་ ༨ ཐོག བོད་ཀྱི་ན་གཞོན་གློག་བརྙན་འཁྲབ་འཁྲིད་པ་འཇིགས་མེད་འཕྲིན་ལས་ལགས་ཀྱིས་འཁྲབ་འཁྲིད་བྱས་པའི་བོད་ཀྱི་གློག་བརྙན་གཅིག་དང་བཞི་ཞེས་པ་དེ་ཨ་རིའི་ནེའུ་ཡོག་གི་ཝོལ་ཊར་རེའུ་ཊི་གློག་བརྙན་ཁང་( Walter Reade Thaeter) དུ་བསྟན་རྒྱུ་ཡིན་འདུག

བོད་ཀྱི་གློག་བརྙན་གཅིག་དང་བཞི་ནི་རྩོམ་པ་པོ་འཇམ་དབྱངས་ཚེ་རིང་ལགས་ཀྱིས་བརྩམས་པའི་གཅིག་དང་བཞི་ཞེས་པའི་བརྩམས་སྒྲུང་དེར་གཞི་བཅོལ་ནས་ཕབ་སྐྲུན་བྱས་པ་ཞིག་ཡིན་ཞིང་། གློག་བརྙན་དེ་ ༢༠༡༩ ལོའི་ཟླ ༡༢ ནས་ཕབ་སྐྲུན་བྱེད་མགོ་བཙུགས་འདུག་ཀྱང་། ནད་ཡམས་ཀྱི་རྐྱེན་གྱིས་རྒྱུན་མཐུད་ཐུབ་མེད་འདུག  ཕྱི་ལོ་ ༢༠༢༠ ལོར་བསྐྱར་དུ་མགོ་འཛུགས་བྱས་ཏེ་ལོ་དེའི་ལོ་མཇུག་ཏུ་ཕབ་སྐྲུན་ལེགས་པར་གྲུབ་སྟེ། འདས་ལོའི་ཟླ ༡༠ ཚེས ༣༠ ནས་ཟླ ༡༡ ཚེས ༨ བར་ཉི་ཧོང་དུ་འཚོགས་པའི་ཊོག་ཡོའི་རྒྱལ་སྤྱིའི་གློག་བརྙན་དུས་སྟོན་ཐེངས་སོ་བཞི་པའི་( 34^th  Tokyo International Film Festival ) སྟེང་བསྟན་ཡོད་འདུག

གསར་འགྱུར་བརྒྱུད་ལམ་ཁག་ནས་གནས་ཚུལ་སྤེལ་བ་ལྟར་ན། གློག་བརྙན་དེ་ནི་བོད་ཀྱི་གློག་བརྙན་འཁྲབ་འཁྲིད་པས་ཕབ་སྐྲུན་བྱས་པའི་གློག་བརྙན་གཞན་དག་ལས། སྒྱུ་རྩལ་གསལ་སྟོན་གྱི་ནུས་པ་གཅིག་པུར་དམིགས་པ་ཙམ་མ་ཡིན་པར་གློག་བརྙན་བརྩམས་ཆོས་ཀྱི་ཕྱོགས་ཡོངས་ནས་ཡར་རྒྱས་ཕྱིན་པ་དང་། གློག་བརྙན་དེའི་ནང་བོད་ནས་བྱུང་བའི་ཁུངས་མེད་དང་། དོགས་གཞི་རང་བཞིན་ཅན་གྱི་གཏམ་རྒྱུད་ཅིག་བརྗོད་ཐབས་བྱས་ཡོད་དེ། ནགས་ཚལ་སྤྱི་གླིང་ཞིག་གི་ནང་དུ་གར་ཡོང་མི་ཤེས་པའི་མི་གསུམ་བསླེབས་ཡོད་པ་དང་། ནགས་ཚལ་སྤྱི་གླིང་དེའི་ལྟ་སྲུང་བ་དེའང་ཅི་ཡིན་འདི་ཡིན་མེད་པར་ཇག་པའི་ལས་ལ་ཞུགས་པའི་འཇིགས་རུང་གི་གཏམ་རྒྱུད་ཅིག་ཡིན་འདུག་ལ། གློག་བརྙན་དེ་ནི་ཆུ་ཚོད་༡ དང་སྐར་མ་ ༢༠ ལྷག་ཡོད་པའི་གཏམ་རྒྱུད་ཅིག་ཡིན་པ་མ་ཟད། དེར་དབྱིན་རྒྱ་གཉིས་ཀྱི་གཤམ་ཡིག་(subtitle )ཀྱང་ཡོད་འདུག

བོད་ཀྱི་ན་གཞོན་གློག་བརྙན་འཁྲབ་འཁྲིད་པ་འཇིགས་མེད་འཕྲིན་ལས་ལགས་ནི་བོད་ཀྱི་གློག་བརྙན་འཁྲབ་འཁྲིད་པ་གྲགས་ཅན་པདྨ་ཚེ་བརྟན་གྱི་བུ་ཡིན་ཞིང་། ཁོང་གིས་པེ་ཅིན་གློག་བརྙན་སློབ་གླིང་གི་འཁྲབ་ཁྲིད་སྡེ་ཚན་ནང་ཆེད་ལས་སློབ་སྦྱོང་བྱས་ཡོད་པ་དང་།  དེ་སྔོན་ཁོང་གིས་སློབ་གྲྭའི་གུང་སེང་དང་བསྟུན་ནས་བོད་ཀྱི་གློག་བརྙན་དབུགས་ལྒང་དང་། རྒྱ་ནག་གི་གློག་བརྙན་འཁྲབ་ཁྲིད་པ་ཀོམ་ཧོའི་འཁྱག་པ་སོགས་ཀྱི་གློག་བརྙན་ཕབ་སྐྲུན་གྱི་ལས་གཞིར་མཉམ་ཞུགས་བྱས་མྱོང་ཡོད་པ་དང་། ཁོང་གིས་ ༢༠༡༧ ལོར་ཁོང་ཚོས་མཐོ་སྒང་ན་གློག་བརྙན་ལས་བཞིན་འདུག་ཅེས་པའི་དངོས་བྱུང་གློག་བརྙན་ཐུང་གྲས་ཤིག་ཕབ་སྐྲུན་བྱས་ཡོད་པ་དང་། ད་ལན་གྱི་གཅིག་དང་བཞི་ཞེས་པའི་གློག་བརྙན་དེ་ནི་ཁོང་གིས་ཕབ་སྐྲུན་བྱས་པའི་གློག་བརྙན་རིང་གྲས་ཀྱི་བརྩམས་ཆོས་ཐོག་མ་དེ་ཡིན་འདུག་ལ། གློག་བརྙན་དེར་བོད་ཀྱི་གློག་བརྙན་འཁྲབ་འཁྲིད་པ་གྲགས་ཅན་པདྨ་ཚེ་བརྟན་གྱིས་ལམ་སྟོན་གནང་ཡོད་ཅིང་། གློག་བརྙན་དེའི་བརྙན་ལེན་པའང་པདྨ་ཚེ་བརྟན་གྱི་བརྙན་ལེན་པ་ལིས་སུང་ཡེ་ཡིན་འདུག

            གསར་འགོད་པ་དཔལ་ལྡན་གྱིས་ལ་དྭགས་ཀྱི་རྒྱལ་ས་གླེ་ནས་སྤེལ།