ཀུན་བཟང་སྒྲོལ་མ་ལགས་ཀྱིས་དབྱིན་ཡིག་ཏུ་བསྒྱུར་བའི་བོན་གྱི་ལམ་རིམ་སུམ་བརྒྱ་ཉི་ཤུ་པ་དབུ་འབྱེད་གནང་།

ཝཱ་རཱ་ཎ་སི་ཧིན་རྡུ་གཙུག་ལག་སློབ་གཉེར་ཁང་གི་འབུམ་རམས་པའི་སློབ་གཉེར་བ་རྔ་བ་ཀུན་བཟང་སྒྲོལ་མ་ལགས་ཀྱིས་དབྱིན་སྒྱུར་བྱས་པའི་བྱང་ཆུབ་སྒྲུབ་ཐབས་ཀྱི་བོན་ཚིགས་སུ་བཅད་པ་ལམ་རིམ་སུམ་བརྒྱ་ཉི་ཤུ་པ་ཞེས་པ་དབུ་འབྱེད་གནང་ཡོད་པ་རེད།

ཟླ་འདིའི་ཕྱི་ཚེས་ ༢༡ ཉིན་གཡུང་དྲུང་བོན་གྱི་གདན་ས་དཔལ་གཤེན་བསྟན་སྨན་རིའི་གླིང་གི་བོན་གྱི་དཔེ་མཛོད་ཁང་དུ། ༧ཞྭ་དཀར་བསྟན་པའི་གཙུག་རྒྱན་སྐྱབས་རྗེ་རྒྱལ་བ་སྨན་རིའི་ཁྲི་འཛིན་ ༣༤ རིན་པོ་ཆེ་མཆོག་ནས་ཝཱ་རཱ་ཎ་སི་ཧིན་རྡུ་གཙུག་ལག་སློབ་གཉེར་ཁང་གི་འབུམ་རམས་པའི་སློབ་གཉེར་བ་རྔ་བ་ཀུན་བཟང་སྒྲོལ་མ་ལགས་ཀྱིས་དབྱིན་སྒྱུར་བྱས་པའི་བྱང་ཆུབ་སྒྲུབ་ཐབས་ཀྱི་བོན་ཚིགས་སུ་བཅད་པ་ལམ་རིམ་སུམ་བརྒྱ་ཉི་ཤུ་པ་ཞེས་པ་དབུ་འབྱེད་མཛད་ཡོད་པ་དང་། བྱང་ཆུབ་སྒྲུབ་ཐབས་ཀྱི་བོན་ཚིགས་སུ་བཅད་པ་ལམ་རིམ་སུམ་བརྒྱ་ཉི་ཤུ་པ་ནི་མེ་སྟོན་ཤེས་རབ་འོད་ཟེར་གྱིས་མཛད་པ་ཞིག་ཡིན་འདུག  དཔེ་དེབ་དབུ་འབྱེད་སྐབས་སྨན་རིའི་གླིང་གི་དགེ་བཤེས་རྣམ་པ་དང་། ཚོགས་སྡེ་ཁག་གི་དབུ་འཛིན། བཙུན་དགོན་རཏྣ་སྨན་གླིང་གི་བཙུན་མ་བཅས་ཕེབས་ཡོད་འདུག

འདི་གའི་གསར་འགོད་པས་ཁ་པར་བརྒྱུད་ཀུན་བཟང་སྒྲོལ་མ་ལགས་ལ་ཁོང་མོའི་བསྒྱུར་དེབ་སྐོར་དྲིས་པར། མེ་སྟོན་ཤེས་རབ་འོད་ཟེར་གྱིས་མཛད་པའི་བོན་གྱི་ལམ་དེ་ཁོང་མོས་དབྱིན་སྐད་དུ་བསྒྱུར་ནས་དེ་འབྲེལ་ལམ་རིམ་གྱི་མ་ཡིག་ཁག་དང་ལམ་རིམ་གྱི་འགྲེལ་བའི་མ་ཡིག་རྣམས་ཕན་ཚུན་དཔྱད་བསྡུར་ལོ་མང་བྱས་པའི་ཁྲོད་ནས་གནད་དོན་འགའ་ཞིག་གི་སྐོར་དབྱིན་སྒྱུར་བྱས་ཡོད་ཅིང་། དེ་བཞིན་མེ་སྟོན་གྱི་ལམ་རིམ་དེ་ལ་ཤློོཀ་སུམ་བརྒྱ་ཉི་ཤུ་ཅན་ཞིག་དང་ཤློོ་ཀ་སུམ་བརྒྱ་སུམ་ཅུ་ཅན་བཅས་གཉིས་ཡོད་ཅིང་། ལམ་རིམ་འདི་ཡི་ཁྱད་ཆོས་ནི་གཞུང་ཚིག་རྣམས་བརྗོད་བདེ་ཞིང་། ངག་ལ་འཛིན་སླ་བ། མངོན་བརྗོད་འདྲ་མིན་སྣ་ཚོགས་དང་བརྡ་རྙིང་སོགས་གོ་དཀའ་བའི་མིང་ཚིག་གིས་བཅིངས་མེད་པར་མ་ཟད། ཡུལ་སྐད་དང་། སྐད་རིགས་གཞན་གྱི་མིང་ཚིག་མེད་པ། དེ་བཞིན་མཚུངས་བསྡུར་བྱས་ཚུལ་ནི་གོང་ཞུས་བཞིན་གཤེན་སྟོན་གྱི་ལམ་འགྲེལ་ནས་ཟུར་དུ་ཕྱུང་བའི་ལམ་རིམ་སུམ་བརྒྱ་ཉི་ཤུ་པ་དེ་གཞི་ལ་བཞག་ནས་འགྲེལ་པ་དཔེ་གཞུང་ཁག་ལྔ་ཙམ་དང་། རྩ་བ་དཔེ་གཞུང་ཁག་གསུམ་ཙམ་ལ་དེང་རབས་ཀྱི་ཉམས་ཞིབ་ཐབས་ལམ་དང་འབྲེལ་ནས་མཚུངས་བསྡུར་བྱས་ཡོད། ཅེས་བརྗོད་བྱུང་།

ཀུན་བཟང་སྒྲོལ་མ་ལགས་ནི་བོད་རྔ་བར་སྐྱེས་ཤིང་། རྒྱ་གར་ལ་ཡོང་ནས་ཝཱཎ་བོད་ཀྱི་ཆེས་མཐོའི་གཙུག་ལག་སློབ་གཉེར་ཁང་ནས་བོན་གྱི་ལྟ་གྲུབ་དང་ནང་པའི་མཚན་ཉིད་རིག་པའི་སྐོར་ལ་ཤཱསྟྲི་དང་ཨཅཱརྱ་ཐོན་ཞིང་། ཉེ་ཆར་ནང་པའི་སེམས་ཁམས་རིག་པའི་སྐོར་ལ་རྒྱ་གར་ཝཱཎའི་ཧིན་རྡུའི་གཙུག་ལག་སློབ་གཉེར་ཁང་དུ་འབུམ་རམས་པའི་སློབ་གཉེར་བྱེད་བཞིན་ཡོད་འདུག  འདས་པའི་ལོ་བཅུ་ཙམ་གྱི་རིང་ལ་བོན་གྱི་ལམ་རིམ་སྐོར་ལ་དཔྱད་ཞིབ་དང་བོད་ཡིག་ནས་དབྱིན་སྒྱུར་བྱས། ད་ལྟའི་བར་དཔྱད་རྩོམ་དང་སྒྱུར་རྩོམ། ལྷུག་རྩོམ། སྙན་ངག་མང་པོ་བྲིས་པའི་ཁོངས་ནས་བྱ་དགའ་ཐོབ་མྱོང་བའི་དཔྱད་རྩོམ་བཅོ་བརྒྱད་ཕྱོགས་བསྒྲིགས་བྱས་ཏེ་<<བསམ་གཞིག་དང་ལྟ་ཚུལ་>>ཞེས་པའི་དེབ་ཅིག་བོད་ཀྱི་དཔེ་མཛོད་ཁང་ནས་དཔར་བསྐྲུན་བྱས་ཡོད་འདུག

བྱམས་པ་ཚེ་རིང་།