འབྲོག་མང་བཙན་གྱིས་གནས་སྤོར་དུ་བཅུག་རྗེས་ཤུལ་དུ་ཨར་ལས་འཛུགས་སྐྲུན་རྒྱ་ཆེན་པོ་བྱེད་ཀྱི་འདུག   

 རྒྱ་ནག་གཞུང་གིས་བཙན་གྱིས་བོད་ནག་ཆུ་ས་ཁུལ་ཤན་རྩ་རྫོང་མཚེའུ་ཡུལ་ཚོའི་དུད་ཁྱིམ་བརྒྱ་ཕྲག་འགའ་གནས་སྤོར་དུ་བཅུག་རྗེས་ས་གནས་དེར་ཨར་ལས་འཛུགས་སྐྲུན་རྒྱ་ཆེན་པོ་བྱེད་བཞིན་ཡོད་འདུག

ཕྱི་ལོ་ ༢༠༢༡ ལོའི་ཕྱི་ཟླ་དྲུག་པ་བདུན་པ་ཙམ་ནས་རྒྱ་ནག་གཞུང་གིས་བོད་ནག་ཆུ་ས་ཁུལ་ཤན་རྩ་རྫོང་མཚེའུ་ཡུལ་ཚོའི་དུད་ཁྱིམ་བརྒྱ་ཕྲག་ཁ་ཤས་ལྷོ་ཁ་རྩེད་ཐང་རྫོང་ཁོངས་ཀྱི་སྲིན་པོ་རིར་བཙན་གྱིས་གནས་སྤོར་དུ་བཅུག་ཡོད་རྗེས། ས་རྡོ་སྔོག་འདོན་འཕྲུལ་ཆས་མང་པོ་མངག་ནས་མཚེར་ཤུལ་དང་ལྷས་ར། གྲོང་མིའི་ཁང་ཆག་སོགས་ས་འོག་ཏུ་མནན་ནས་རྗེས་ཤུལ་ཙམ་ཡང་མཐོང་རྒྱུ་མེད་པ་བཟོས་ཡོད་པ་མ་ཟད། ད་ལྟ་མཚེའུ་ཡུལ་ཚོ་རུ་བཟོ་དབྱིབས་མི་འདྲ་བའི་ཁང་པ་སོགས་ཨར་ལས་འཛུགས་སྐྲུན་རྒྱ་ཆེན་པོ་ཞིག་བྱེད་བཞིན་ཡོད་འདུག 

དེའི་ཐད་ས་གནས་ཀྱི་གནས་ཚུལ་མཁོ་སྤྲོད་པ་ཞིག་གིས་འདི་གའི་གསར་འགོད་པར། ཉེ་ལམ་ནས་བཟུང་ས་གནས་དེར་ཁང་པ་མང་པོ་ཞིག་རྒྱག་བཞིན་ཡོད་ཅིང་། ཁང་པའི་བཟོ་དབྱིབས་ལ་བལྟས་ན་མང་ཚོགས་དཀྱུས་མའི་སྡོད་ཁང་ཞིག་མིན་པར་གཞི་རྒྱ་ཆེ་བའི་དམག་སྒར་ཞིག་འདྲ་བོ་ཡོད་པ་དང་། ཨར་ལས་བ་དང་ལས་བྱེད་ལ་སྐད་ཆ་འདྲི་དུས། གོང་རིམ་གྱི་བཀའ་ལྟར་ཁང་པ་རྒྱག་གིན་ཡོད་པ་ལས། གཞན་གང་ཡང་ཤེས་ཀྱི་མེད་ལུགས་བརྗོད་ཡོད་སྐོར་བཤད་བྱུང་ལ། ད་དུང་ཡང་ཤན་རྩ་རྫོང་ཁོངས་ཀྱི་བོད་མི་མང་པོ་ཞིག་གནས་སྤོར་དུ་འཇུག་ཉེན་ཡོད་པ་མ་ཟད། རྩྭ་ཆུ་འཛོམས་ཤིང་མཛེས་སྡུག་གི་མཐོ་སྒང་དེར་རྒྱ་ནག་གི་དམག་སྒར་ཆེན་པོ་ཞིག་འཛུགས་ཉེན་ཡོད་སྐོར་འགྲེལ་བརྗོད་བྱས་བྱུང་།   

 འདི་ལོའི་ཕྱི་ཟླ་ ༦ པའི་ནང་རྒྱ་ནག་གཞུང་གིས་རང་བྱུང་ཁོར་ཡུག་དང་སྐྱེས་ཁམས་ལ་གནོད་འཚེ་གཏོང་བ་འགོག་ཐབས་ཀྱི་མིང་ཐོག་ནས་བོད་རང་སྐྱོང་ལྗོངས་ཀྱིས་ལོ་ངོ་ ༨ རིང་ལ།  གཞིས་ཀ་རྩེ་དང་ནག་ཆུ། མངའ་རིས་བཅས་ས་ཁུལ་ཆེན་མོ་གསུམ་ནས་རྫོང་ཁག་ ༢༠ དང་། ཡུལ་ཚོ་ ༩༧ གྱི་མི་གྲངས་ཁྲི་ ༡༣ ལྷག་ས་བབ་མཐོ་ས་ནས་དམའ་སར་གནས་སྤོ་བྱེད་པའི་ལས་གཞི་ལག་བསྟར་བྱེད་ཀྱི་ཡོད་སྐོར་བསྒྲགས་ཡོད་པ་ལྟར།  འདི་ལོའི་ཕྱི་ཟླ་ ༣ ནང་། རྒྱ་ནག་གཞུང་ཕྱོགས་ནས་བོད་སྟོད་ལུང་བདེ་ཆེན་ནས་འབྲོག་མང་ ༡༢༦༨ གནས་སྤོ་བྱས་ཚར་ཡོད་པ་དང་། དེ་བཞིན་ནག་ཆུ་ས་ཁུལ་གྱི་མཚོ་གཉིས་རྫོང་དང་ཨ་མདོ་རྫོང་། ཉི་མ་རྫོང་བཅས་ནས་དུད་ཁྱིམ་ ༦༣༠༦ གི་མི་གྲངས་ཁྲི་ ༢(༢༦༣༠༤)ལྷག་ལྷོ་ཁ་ས་ཁུལ་དུ་གནས་སྤོར་དུ་འཇུག་བཞིན་ཡོད་སྐོར་ཡོངས་བསྒྲགས་བྱས་ཟིན་པ་ལྟར། འདི་ལོའི་ཕྱི་ཟླ ༧ ནང་རྒྱ་ནག་གཞུང་གིས་ནག་ཆུ་ཉི་མ་རྫོང་གི་སྔོ་ཆུ་གྲོང་བརྡལ། རོང་དམར་གྲོང་བརྡལ། ཨ་ཟུར་གྲོང་བརྡལ། འབྲོང་ཚང་གྲོང་བརྡལ་བཅས་ཀྱི་དུད་ཁྱིམ་ལྔ་བརྒྱ་ཙམ་བཙན་དབང་གིས་ལྷོ་ཁ་རྩེད་ཐང་རྫོང་ཁོངས་སུ་གནས་སྤོར་དུ་བཅུག་ཡོད་པ་རེད།

དེའི་ཐོད་འབྲེལ་ཡོད་བོད་མི་ཞིག་གིས་འདི་གའི་གསར་འགོད་པར། གནས་སྤོར་བྱས་པའི་བོད་མི་དུད་ཚང་རེ་རེར་རྒྱ་སྒོར་ཁྲི་གཅིག་རེ་ཡི་རོགས་སྐྱོར་སྤྲོད་རྒྱུའི་ཁས་ལེན་བྱས་ཡོད་ཀྱང་ཕྱིས་སུ་སྤྲད་མེད་པ་དང་།  ཏོག་དབྱིབས་རིམས་ནད་ཁྱབ་གདལ་དང་ཕར་ཚུར་འགྲོ་འོང་བཀག་སྡོམ་བྱས་པའི་རྐྱེན་གྱིས། དུད་ཁྱིམ་མང་པོའི་ནང་མི་རེ་འགའ་མཚེར་རྙིང་དུ་ལྷག་ཡོད་པ་དང་། རེ་འགའ་མཚེར་གསར་དུ་འབྱོར་ཏེ་ཁ་གྱེས་ཡོད་སྟབས། ལས་ཀ་མ་རག་པ་སོགས་ཀྱིས་འཚོ་བར་དཀའ་ངལ་ཆེན་པོ་འཕྲད་བཞིན་ཡོད་སྐོར་བརྗོད་བྱུང་། 

འདས་པའི་ལོ་མང་ནས་བཟུང་རྒྱ་ནག་གཞུང་གིས་བོད་ཡུལ་གང་སར་རོང་འབྲོག་མང་ཚོ་ཁྲི་ཚོ་མང་པོ་བཙན་གྱིས་གནས་སྤོར་དུ་བཅུག་པ་དང་། མཁར་གྲོང་གསར་པའི་ནང་སྡེབ་གཅིག་ཏུ་འཇོག་པའི་སྲིད་ཇུས་ཚ་ཚ་འུར་འུར་གྱིས་ལག་བསྟར་བྱེད་བཞིན་ཡོད་པ་དང་བསྟུན། རྩི་ཤིང་ནགས་ཚལ་འཛོམས་ཤིང་ལྟ་ན་སྡུག་པའི་མཛེས་ལྗོངས་མང་པོ་ཞིག་རྒྱལ་ཁབ་སྤྱི་གླིང་དང་ནགས་ཚལ་གླིང་ཟེར་བ་སོགས་ཀྱི་མིང་བཏགས་ནས་ཡུལ་སྐོར་ས་ཚིགས་སུ་བསྒྱུར་དང་སྒྱུར་མུས་ཡིན་པ་རེད།

གསར་འགོད་པ། དཔལ་ལྡན།