༧གོང་ས་མཆོག་ནས་ཏོག་དབྱིབས་གཉན་རིམས་ཀྱིས་དཀའ་ངལ་འཕྲད་བཞིན་པའི་བོད་ནང་གི་བོད་མི་ཚོར་བཀའ་སློབ་སྩལ།

དེ་རིང་༧གོང་ས་རྒྱལ་བ་རིན་པོ་ཆེ་མཆོག་གི་གསུང་ཆོས་ཉིན་གཉིས་པར་ཏོག་དབྱིབས་གཉན་རིམས་ཀྱིས་བོད་ནང་གི་བོད་མི་ཚོར་དཀའ་ངལ་འཕྲད་བཞིན་ཡོད་ཀྱང་འཕྲལ་གྱི་རྐྱེན་ངན་དེ་འདྲ་ཤར་ཡོང་དུས་ཚང་མས་སེམས་མ་ཞུམ་པ་བྱོས་ཞེས་བཀའ་སློབ་སྩལ་འདུག

བོད་ནང་ཏོག་དབྱིབས་གཉན་རིམས་འགོས་ཁྱབ་དང་འབྲེལ་ཏེ་རྒྱ་ནག་གཞུང་ནས་དཀའ་ངལ་ཧ་ཅང་ཆེན་པོ་བཟོ་བཞིན་ཡོད་པའི་སྐོར་ལ་༧གོང་ས་རྒྱལ་བ་རིན་པོ་ཆེ་མཆོག་གིས། བོད་ནང་དུ་ནད་ཡམས་ཀྱི་རྐྱེན་གྱིས་བཀག་སྡོམ་དང་དམ་དྲག་ཤུགས་ཆེན་བྱས་ཏེ། མི་མང་ལ་དཀའ་ངལ་ཆེན་པོ་འཕྲད་བཞིན་ཡོད་སྐོར་རྗོད་ཀྱི་འདུག གང་ལྟར་རྒྱ་དང་བོད་ཀྱི་འཐབ་རྩོད་དེ་གཙོ་བོ་སངས་རྒྱས་པའི་ཆོས་དང་ཡང་འབྲེལ་བསྡད་ཡོད་རེད། རྒྱ་མིས་བོད་རྒྱ་ཆེའི་མི་མང་གི་ལྟ་བ་དང་སྤྱོད་པ་བསྒྱུར་ཐུབ་རྒྱུ་གཏན་ནས་ཡོད་མ་རེད། ང་ཚོ་བོད་ལ་ཡོད་པའི་སངས་རྒྱས་པའི་ཆོས་དང་། དེ་དང་འབྲེལ་བའི་རིག་གཞུང་འདི་རྒྱ་ནག་ནང་རིམ་པས་དར་ཁྱབ་ཇེ་ཆེར་འགྲོ་བཞིན་ཡོད་པ་རེད། དེར་བརྟེན། འཕྲལ་གྱི་རྐྱེན་ངན་དེ་འདྲ་ཤར་ཡོང་དུས། ཚང་མས་སེམས་མ་ཞུམ་པ་བྱོས། ཞེས་གསུངས་སོང་།

༧མགོན་པོ་གང་ཉིད་མཆོག་གིས། ང་ཚོ་བོད་གངས་ཅན་དེ་འཕགས་པ་སྤྱན་རས་གཟིགས་ཀྱི་གདུལ་ཞིང་ཆགས་བསྡད་ཡོད་རེད། ལྷ་སའི་ཇོ་་བོ་དང་ལོ་ཀེ་ཤོ་ར་སོགས་ཇོ་ཤཱཀ་རྣམ་གསུམ་ལ་ཚང་མས་སྨོན་ལམ་ཡག་པོ་བརྒྱབ། ངོས་རང་ས་ཁད་འགྱངས་ནས་བསྡད་ཡོད་རེད་དེ། ལས་དང་འབྲེལ་བ་ཐུན་མོང་མ་ཡིན་པ་ཡོད་པར་བརྟེན། ༧རྒྱལ་བ་རིན་བོ་ཆེ་ཏཱ་ལའི་བླ་མ་དྲན་པར་བྱས་ཏེ། གཙོ་བོ་ང་ཚོའི་བདེན་པའི་མཐའ་གསལ་གྱི་རེད་བསམ་སྟེ། སོ་སོ་བློ་བདེ་བོ་བྱས་ནས་བསྡད་ཤོག་ཨ། ངོས་རང་ལ་ཆ་བཞག་ནའང་། ལོ་བརྒྱད་ཅུ་གྱ་བདུན་ལ་སོན་ཡོད་ཀྱང་གཟུགས་པོ་བདེ་ཐང་ཡིན། ཨེམ་ཆིས་བརྟག་དཔྱད་བྱེད་སྐབས། ངོས་རང་ད་དུང་ལོ་བཅོ་ལྔ་ཉི་ཤུར་སྡོད་ཀྱི་རེད་ཟེར་གྱི་འདུག དེར་བརྟེན་བོད་རྒྱ་ཆེའི་མི་མང་ཚོ་བློ་བདེ་པོ་བྱས་ནས་བཞུགས་ཨ། རིམ་པས་རྒྱ་ནག་ནང་དུ་འགྱུར་བ་འགྲོ་བཞིན་འདུག དེར་བརྟེན་རིམ་པས་ང་ཚོ་གཞིས་བྱེས་མཉམ་འཛོམས་ཀྱི་ཐོག་ནས་བྱང་ཆུབ་ཀྱི་སེམས་དང་སྟོང་ཉིད་ཀྱི་ལྟ་བ་བསྒོམ་ཐུབ་པ་ཏན་ཏན་ཡོང་གི་རེད། ཚང་མ་བློ་བདེ་བོ་བྱས་ནས་བསྡད་ཤོག་ཨ། བཀྲ་ཤིས་བདེ་ལེགས། ཞེས་གསུངས་སོང་།

ཐའེ་ཝན་གྱི་དད་ལྡན་མང་ཚོགས་ཀྱིས་ཇི་ལྟར་གསོལ་བ་བཏབ་པ་ལྟར་ཁ་སང་དང་དེ་རིང་། སང་ཉིན་བཅས་ཉིན་གསུམ་རིང་༧གོང་ས་རྒྱལ་བ་རིན་པོ་ཆེ་མཆོག་གིས་བཞུགས་སྒར་ཐེག་ཆེན་གཙུག་ལག་ཁང་དུ་དཔལ་ཆོས་ཀྱི་གྲགས་པས་མཛད་པའི་ཚད་མ་རྣམ་འགྲེལ་གྱི་ལེའུ་གཉིས་པའི་གསུང་ཆོས་སྩལ་བཞིན་ཡོད་པ་ལྟར། སང་ཉིན་ཉིན་མཐའ་མ་ཆགས་ཀྱི་ཡོད་པ་རེད།

གསར་འགོད་པ། བསྟན་འཛིན་ཕུར་བུ།