རྔ་བ་ཀིརྟི་དགོན་པའི་དགེ་བཤེས་བསོད་ནམས་རྒྱ་མཚོ་ལགས་ཀྱིས་ཕྱི་ཕྱོགས་ཀྱི་མི་ལ་འབྲེལ་འདྲིས་བྱས་པ་དང་སྒོར་མོ་བསྐུར་བའི་ཉེས་མིང་གཡོགས་ཏེ་ལོ་གཉིས་ཀྱི་བཙོན་འཇུག་ཁྲིམས་ཐག་བཅད་ཡོད་འདུག
འདི་ག་བོད་ཀྱི་དུས་བབ་གསར་ཁང་ལ་བོད་ནས་ཁུངས་ལྡན་གནས་ཚུལ་འབྱོར་བ་ལྟར་ན། ཕྱི་ལོ་ ༢༠༢༡ ཟླ་ ༤ ཚེས་ ༣ ཉིན་རྔ་བ་ཀིརྟི་དགོན་པའི་དགེ་བཤེས་བསོད་ནམས་རྒྱ་མཚོ་ལགས་སི་ཁྲོན་ཁྲིན་ཏུའུ་གྲོང་ཁྱེར་ནས་འཛིན་བཟུང་བྱས་ཡོད་པ་དང་། འདི་ལོའི་ཕྱི་ཟླ་ ༧ པའི་ནང་༧གོང་ས་རྒྱལ་བ་རིན་པོ་ཆེ་མཆོག་དང་༧སྐྱབས་རྗེ་ཀིརྟི་རིན་པོ་ཆེ་མཆོག་རྣམ་གཉིས་ལ་སྐྱབས་ཞུ་བསྔོ་རྟེན་ཕུལ་བ་དང་ཕྱི་ཕྱོགས་སུ་འབྲེལ་འདྲིས་བྱས་པའི་ཉེས་མིང་གཡོགས་ཏེ། ཁོང་ལ་ལོ་གཉིས་ཀྱི་བཙོན་འཇུག་ཁྲིམས་ཐག་བཅད་ཡོད་པ་མ་ཟད། ཁོང་གི་སྲིང་མོ་རྒན་པ་ཚེ་རིང་ལྷ་མོ་དང་སྲིང་མོ་ཆུང་བ་བཅས་འཛིན་བཟུང་བྱས་ཏེ། ད་སྐབས་གར་ཡོད་འདིར་ཡོད་ཀྱི་གནས་ཚུལ་གང་ཡང་ཤེས་རྟོགས་ཐུབ་ཀྱི་མེད་པ་རེད།
འདི་གའི་གསར་འགོད་པར་འབྲེལ་ཡོད་བོད་མི་ཞིག་གིས། འདས་ལོར་དགེ་བཤེས་བསོད་རྒྱ་མཚོ་ལགས་དང་ཁོང་གི་སྲིང་མོ་གཉིས། དེ་བཞིན་རྔ་བ་ཀིརྟི་དགོན་པའི་དགེ་འདུན་པ་ཁྱོན་ ༣༠ ལྷག་འཛིན་བཟུང་བྱས་ཡོད་པ་དང་། སྐབས་དེར་དགེ་བཤེས་བསོད་ནམས་རྒྱ་མཚོ་མིང་སྲིང་གསུམ་ལ་ཕྱི་ཕྱོགས་སུ་འབྲེལ་བ་བཟུང་བའི་ཉེས་འཛུགས་བྱས་ཏེ། སྲིང་མོ་གཉིས་ཀྱི་སྲིད་གཞུང་གི་ལས་ཀ་འཕྲོག་ཡོད་འདུག ཁོང་ཚོར་གཙོ་བོ་༧སྐྱབས་རྗེ་ཀིརྟི་རིན་པོ་ཆེའི་གྱ་སྟོན་ལ་སྒོར་མོ་བསྐུར་བའི་ཉེས་འཛུགས་བྱས་ཡོད་ཀྱང་། དེ་ནི་རྒྱ་ནག་གི་ཁ་གཡར་ས་ཙམ་ལས་དོན་དངོས་མ་རེད། ཅེས་འགྲེལ་བརྗོད་གནང་བྱུང་། ཡིན་ནའང་། བོད་ནང་དུ་རྒྱ་ནག་གཞུང་གིས་དམ་དྲག་ཤུགས་ཆེན་བྱེད་བཞིན་ཡོད་པའི་རྐྱེན་གྱིས་ཞིབ་ཕྲའི་གནས་ཚུལ་ཤེས་རྟོགས་ཐུབ་ཀྱི་མི་འདུག་པས་མུ་མཐུད་རྩད་གཅོད་བྱེད་མུས་ཡིན།
ལོ་གཉིས་ཀྱི་བཙོན་འཇུག་ཁྲིམས་ཐག་བཅད་པའི་དགེ་བཤེས་བསོད་ནམས་རྒྱ་མཚོ་ལགས་ནི། རྔ་བ་ཡུལ་ཀིརྟི་དགོན་པའི་དགེ་བསྐོས་དང་ཆོས་ལུགས་དོ་དམ་ཨུ་ཡོན་ལྷན་ཁང་ཟེར་བའི་འགན་འཛིན་གཞོན་པའི་ལས་འགན་འཁུར་མྱོང་ཡོད་པ་མ་ཟད། ནམ་རྒྱུན་དགོན་པ་དང་འབྲེལ་བའི་རྫོང་དང་ཆབ་སྲིད་ཀྱི་དཀའ་ངལ་མང་དག་ཅིག་ལ་གདོང་ལེན་གནང་སྟེ། ཀིརྟི་དགོན་པའི་དགེ་བཤེས་ཤེས་འཇོན་གཉིས་ལྡན་ཞིག་ཡིན་འདུག
དགེ་བཤེས་བསོད་ནམས་རྒྱ་མཚོལགས་པ་ལགས་ཀྱི་མཚན་ལ་ཚེ་རིང་ཟེར་ཞིང་རྔ་བ་རྫོང་གི་ཉེན་རྟོག་པ་ཞིག་ཡིན་ཞིང་། ད་ཆ་རྒས་གཡོལ་དུ་བཞུགས་ཡོད་འདུག དགེ་བཤེས་ལགས་སུ་ཕུ་ནུ་མིང་སྲིང་ཁྱོན་ ༦ ཡོད་འདུག དགེ་བཤེས་བསོད་ནམས་ལགས་ཆུང་དུས་ནས་རྔ་ཡུལ་ཀིརྟི་དགོན་དགེ་ལྡན་ལེགས་བཤད་གླིང་གི་ཆོས་སྒོར་ཞུགས་ཏེ་དགེ་བའི་བཤེས་གཉེན་ཆེན་པོ་ཨ་ཁུ་བློ་བསྟན་སོགས་བསྟེན་ནས་གཞུང་ཆེན་བཀའ་པོད་ལྔ་ལ་ཐོས་བསམ་སློབ་གཉེར་རིམ་པ་གནང་མཐར་རྔ་བ་ཀིརྟི་དགོན་ནས་དགེ་བཤེས་ཀྱི་མཚན་བཏགས་བཞེས་ཡོད་འདུག
གསར་འགོད་པ། སྐལ་བཟང་སྦྱིན་པ།
