ཨ་རིའི་གྲོས་ཚོགས་རྒྱ་ནག་ལས་དོན་ཚོགས་ཆུང་གིས་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཁང་ལ་རྒྱ་གཞུང་གིས་བཙན་གྱིས་བོད་ནང་གི་ཕ་མ་བུ་ཕྲུག་ཁ་བྲལ་དུ་གཏོང་བའི་སྲིད་ཇུས་ལག་བསྟར་བྱེད་པའི་གནད་དོན་ཐོག་ཞིབ་འཇུག་ནན་མོ་བྱ་དགོས་པའི་འབོད་སྐུལ་ཞུས་འདུག
ཕྱི་ཟླ་ ༡༡ ཚེས་ ༣༠ ཉིན་ཨ་རིའི་གྲོས་ཚོགས་ཀྱི་རྒྱ་ནག་ལས་དོན་ཚོགས་ཆུང་གི་ཚོགས་གཙོ་དང་གྲོས་ཚོགས་གོང་མའི་འཐུས་མི་སྐུ་ཞབས་ཇེ་ཧྥི་རེ་ཨ་མེར་ཁི་ལེས་(Jeff Merkley)ལགས་དང་། གྲོས་ཚོགས་འོག་མའི་འཐུས་མི་ཇེམ་མེག་གྷོ་ཝིན་(Jim McGovern)་ལགས་རྣམ་གཉིས་ཀྱིས། རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཁང་གི་འགན་འཛིན་སྐུ་ཞབས་ཝོལ་ཁེར་ཌུར་ཀ་(Volker Turk)མཆོག་གི་མཚན་ཐོག་ཏུ་བོད་ནང་གི་བྱིས་པ་རྣམས་བཙན་གྱིས་ཁྱིམ་དང་ཁ་བྲལ་དུ་བཅུག་སྟེ། རྒྱ་ནག་གཞུང་གི་བཅའ་སྡོད་སློབ་གྲྭར་སྐྱེལ་བཞིན་པའི་གནད་དོན་ཐོག་ཞིབ་འཇུག་ནན་པོ་གནང་དགོས་པའི་སྙན་ཞུ་ཕུལ་འདུག
ཨ་རིའི་རྒྱ་ནག་ལས་དོན་ཚོགས་ཆུང་གི་སྙན་ཞུ་དེའི་ནང་དུ། རྒྱལ་ཚོགས་འགྲོ་བ་མིའི་ཐོང་ཐང་ལྷན་ཁང་གིས་བོད་ནང་གི་བྱིས་པ་རྣམས་ཁྱིམ་མི་དང་ཁ་བྲལ་ནས་རྒྱ་གཞུང་གི་བཅའ་སྡོད་སློབ་གྲྭར་སྐྱེལ་བཞིན་ཡོད་པའི་སྙན་ཐོའི་ཐོག་དོ་སྣང་གནང་དགོས་པའི་རེ་འདུན་ཞུས་ཡོད། ང་ཚོས་སྲིད་ཇུས་འདི་ནི་འགྲོ་བ་མིའི་ཐོབ་ཐང་རྡོག་རོལ་དང་། སྐད་ཡིག་རིག་གཞུང་རྩ་གཏོར་གཏོང་བའི་ཉེན་ཚབས་ཆེ་བའི་གནད་དོན་ཞིག་ཏུ་ངོས་འཛིན་བྱེད་ཀྱི་ཡོད་ལ། རྒྱལ་ཚོགས་ནས་ཞིབ་འཇུག་ནན་མོ་བྱ་དགོས་པའི་རེ་བ་ཞུ་བཞིན་ཡོད། ཨ་རིའི་གྲོས་ཚོགས་རྒྱ་ནག་ལས་དོན་ཚོགས་ཆུང་གིས་རྒྱ་གཞུང་གི་གྲངས་ཉུང་མི་རིགས་ཀྱི་དབང་ཚད་ཐད་ཀྱི་གནད་དོན་རྣམས་རྒྱལ་སྤྱིའི་འགྲོ་བ་མིའི་ཐོབ་ཐང་ཚོགས་ཁག་ལ་སྙན་སེང་ཞུས་ཡོད་སྐོར་དང་། ཕྱི་ལོ་༢༠༢༢ ཟླ་ ༤ ཚེས་ ༥ ཉིན་རྒྱ་གཞུང་གི་གྲངས་ཉུང་མི་རིགས་ཀྱི་སྐད་ཡིག་ཐོབ་ཐང་དང་བོད་ནང་གི་བཅའ་སྡོད་སློབ་གྲྭའི་སྙན་ཞུ་འབྱོར་ཡོད་སྐོར་བཀོད་འདུག
ཕྱི་ལོ་༢༠༢༡ ལོའི་རྒྱལ་སྤྱིའི་བོད་དོན་ལས་འགུལ་བསྟི་གནས་ཁང་གི་སྙན་ཐོའི་ནང་དུ། རྒྱ་ནག་དམར་ཤོག་ཚོགས་པས་རང་ལོ་ ༦ ནས་ ༡༨ བར་གྱི་བོད་པའི་བྱིས་པ་བརྒྱ་ཆ་ ༨༠ ཙམ་རང་གི་ཁྱིམ་ཚང་ཕ་མ་དང་ཕ་ཡུལ། སྐད་ཡིག་སོགས་དང་བཙན་གྱིས་ཁ་བྲལ་དུ་བཅུག་སྟེ། རྒྱ་གཞུང་གིས་མི་སེར་སྤེལ་ལུགས་ཀྱི་སྲིད་ཇུས་སྤེལ་སའི་བཅའ་སྡོད་སློབ་གྲྭར་རྒྱ་བསྒྱུར་གྱི་སློབ་གསོ་སྤྲོད་བཞིན་ཡོད་པ་མ་ཟད། བོད་ཀྱི་སྐད་ཡིག་རིག་གནས་འཆད་སའི་བོད་པའི་སློབ་གྲྭ་ཁག་སྒོ་བརྒྱབ་པ་དང་གཏོར་བཤིག་གཏོང་གི་ཡོད། ཅེས་དང་། རྒྱ་ནག་གཞུང་གི་མགོ་ཁྲིད་ཚོས་བོད་མིའི་ཕ་མ་དང་བྱིས་པ་གཉིས་ཀྱི་རང་དབང་དང་ཐོབ་ཐང་ནག་གསུབ་གཏོང་བཞིན་ཡོད་པ་མ་ཟད། བོད་ཀྱི་ཕ་མ་རྣམས་ཀྱི་རང་ཉིད་ཀྱི་བྱིས་པའི་མ་འོངས་པའི་འཚར་ལོངས་དང་ཤེས་ཡོན་སྤྲོད་ཕྱོགས་ཀྱི་ཐོབ་ཐང་ཡོད་ཚད་བཙན་འཕྲོག་བྱས་ཡོད་པ་དང་། ལོ་ཆུང་བྱིས་པའི་ཐོབ་ཐང་ལའང་རྩིས་མེད་རྡོག་རོལ་གཏོང་པའི་གནད་དོན་དེར། ཕྱི་ལོ ༢༠༢༣ ཟླ་ ༣ པའི་ནང་འཚོག་རྒྱུ་ཡིན་པའི་འགྲོ་བའི་ཐོབ་ཐང་ལྷན་ཚོགས་སྐབས་སུ་རྒྱ་ནག་ནང་གི་བོད་པའི་ཤེས་ཡོན་ཐོབ་ཐང་དང་། ཆོས་ལུགས་དད་མོས་རང་དབང་། གྲངས་ཉུང་མི་རིགས་ཀྱི་གནད་དོན་ཐོག་ངེས་པར་དུ་གླེང་སློང་བྱེད་དགོས་པ་མ་ཟད། བོད་ནང་གི་སློབ་གྲྭ་ཁག་དང་། ཕ་མ་བུ་ཕྲུག་གི་ཐོབ་ཐང་གནད་དོན་ཐད་ཞིབ་འཇུག་བྱེད་པའི་ཚོགས་ཆུང་གསར་འཛུགས་ཀྱིས་གང་མགྱོགས་ཞིབ་འཇུག་བྱེད་དགོས་སྐོར་བཀོད་འདུག
གནད་དོན་དེའི་ཐོག་ཉེ་སྔོན་སྟོབས་ཆེན་རྒྱལ་ཁབ་བདུན་གྱི་མགོ་ཁྲིད་ཚོགས་ཆེན་ཐོག་ཏུ་རྒྱལ་སྤྱིའི་བོད་དོན་ལས་འགུལ་བསྟི་གནས་ཁང་གིས་འབོད་སྐུལ་ཞུས་པའི་ནང་། རྒྱ་ནག་གཞུང་གིས་བོད་པའི་སློབ་གྲྭ་ཁག་སྒོ་རྒྱག་པའི་སྲིད་ཇུས་མཚམས་འཇོག་དགོས་པ་དང་། བོད་པའི་སློབ་མ་རྣམས་བཅའ་སྡོད་སློབ་གྲྭ་དང་བྱིས་གཉེར་ཁང་དུ་བཙན་འཇུག་བྱེད་བཞིན་པ་མཚམས་འཇོག་དགོས་པ། རྒྱ་ནག་གཞུང་གིས་བོད་ཀྱི་སྐད་ཡིག་རིག་གཞུང་དང་ལོ་རྒྱུས། ངོ་བོ་སོགས་རྩ་མེད་བཟོ་ཐབས་ཀྱི་སྲིད་ཇུས་མཚམས་འཇོག་དགོས་པ་སོགས་རྒྱ་ནག་གཞུང་ལ་གླེང་སློང་དང་འགན་འཁུར་དུ་འཇུག་དགོས་པའི་འབོད་སྐུལ་ཞུས་འདུག
ཕྱི་ཟླ ༡༡ ཚེས་ ༢ ཉིན་རྒྱལ་སྤྱིའི་བོད་དོན་ལས་འགུལ་ཁང་གིས། འདི་ལོའི་སྟོབས་ཆེན་རྒྱལ་ཁབ་བདུན་གྱིས་མཉམ་འབྲེལ་བསྒྲགས་གཏམ་ནང་རྒྱ་ནག་གི་འགྲོ་བ་མིའི་ཐོབ་ཐང་དང་དམིགས་བསལ་བོད་དང་ཡུ་གུར་གྱི་འགྲོ་བ་མིའི་ཐོབ་ཐང་གི་གནས་སྟངས་གླེང་སློང་གནང་བར་བསྔགས་བརྗོད་དང་སྦྲགས། ད་རེས་སྟོབས་ཆེན་རྒྱལ་ཁབ་བདུན་གྱི་མགོ་ཁྲིད་རྣམས་ནས་ཚོགས་ཆེན་ཐོག ༧སྐུའི་ཡང་སྲིད་ཀྱི་དབུས་པའི་ཆོས་དད་རང་དབང་དང་བོད་མིའི་འགྲོ་བ་མིའི་ཐོབ་ཐང་གི་གནས་སྟངས། བོད་ནང་རང་དབང་ཞིབ་འཇུག་དང་རྒྱལ་སྤྱིའི་གསར་འགོད་པ་བསྐྱོད་ཆོག་པ་སོགས་རྒྱ་ནག་གཞུང་དང་ལྷན་གླེང་སློང་དགོས་པའི་ཞུ་ཡིག་བསྐུར་ཡོད་འདུག
རྒྱལ་སྤྱིའི་བོད་དོན་ལས་འགུལ་བསྟི་གནས་ཁང་གི་སྙན་ཐོ་ནང་དུ་། རྒྱ་ནག་གཞུང་གིས་བོད་པའི་སློབ་ཕྲུག་བརྒྱ་ཆ་བདུན་ཅུ་ལྷག་དང་། བོད་པའི་སློབ་མ་བཞིའི་ནང་གི་སློབ་མ་གསུམ་བཙན་གྱིས་རྒྱ་ནག་གི་བཅའ་སྡོད་སློབ་གྲྭ་ཁག་ཏུ་འཇུག་གི་ཡོད་པ་དང་། ད་སྔ་བར་ལོ་ ༦ ནས་ ༡༨ བར་ཡིན་པའི་བོད་པའི་སློབ་མ་ཁྱོན་འབུམ་ ༨ ནས་ ༩ བར་དབང་སྒྱུར་ལམ་ལུགས་ཀྱི་བཅའ་སྡོད་སློབ་གྲྭའི་ནང་གཏན་སྡོད་བྱེད་མུས་ཡིན་པ་དང་། བྱིས་པ་ལོ་བཞི་དང་ལྔ་ཅན་ཡང་སློབ་གྲྭ་དེ་དག་གི་ནང་བཙན་གྱིས་འཇུག་གི་ཡོད་སྐོར་སོགས་བཀོད་འདུག
གསར་འགོད་པ། བྱམས་པ་ཚེ་རིང་།
