བཙན་བྱོལ་ནས་ཕྱིར་བོད་དུ་ལོག་པའི་བོད་མི་གུ་རུ་སྐྱབས་ལགས་འདི་ལོའི་ཕྱི་ཟླ་ ༡༡ ནང་བཙོན་གྲོལ་བཏང་ཡོད་ཀྱང་མུ་མཐུད་ནས་རྟོག་ཞིབ་བྱས་ཏེ་འགྲོ་འདུག་ལ་རང་དབང་མེད་པ་རེད།
རྒྱ་ནག་གཞུང་གིས་བཙན་བྱོལ་ནས་ཕྱིར་བོད་དུ་ལོག་མཁན་ཚོར་ཡང་ཡང་འདྲི་རྩད་དང་འགྲོ་འདུག་ལ་རྟོག་ཞིབ་བྱས་ཏེ་སུན་གཙེར་སྣ་ཚོགས་བཟོ་བཞིན་པ་ལྟར། ཕྱི་ལོ ༢༠༡༦ ཡས་མས་ཤིག་ལ་ཕྱིར་བོད་དུ་ལོག་པའི་མགོ་ལོག་གཅིག་སྒྲིལ་རྫོང་དཔལ་ཡུལ་རུ་ཁག་གསུམ་པའི་གུ་རུ་སྐྱབས་ཞེས་པ་ཞིག་ས་གནས་ཉེན་རྟོག་ཁང་གིས་ལན་མང་འབོད་འགུགས་བྱས་ཏེ་འདྲི་རྩད་བྱས་རྗེས། ཁོང་གིས་བཙན་བྱོལ་ནང་གི་བོད་མི་མང་པོར་འབྲེལ་འདྲིས་བྱས་པའི་ཉེས་མིང་གཡོགས་ཏེ་ལོ་ ༡ ལྷག་རིང་བཙོན་འཇུག་བྱས་ཡོད་འདུག
འདི་གའི་གསར་འགོད་པར་གནས་ཚུལ་མཁོ་སྤྲོད་པས། གུ་རུ་སྐྱབས་ལགས་འདི་ལོའི་ཕྱི་ཟླ ༡༡ ནང་ཁུ་སིམ་པོའི་ཐོག་ནས་ཀློད་གྲོལ་བྱས་ཏེ། ད་ལྟ་རང་ཁྱིམ་དུ་ཡོད་ཀྱང་། ཉེན་རྟོག་པའི་ཆོག་མཆན་མེད་པར་གང་བྱུང་ཡར་མར་འགྲོ་མི་ཆོག་པའི་ཁར། རྒྱ་ནག་གཞུང་ཉེན་རྟོག་པ་དང་། ལས་བྱེད། སོ་ཉུལ་བས་མུ་མཐུད་དུ་ཁོང་གི་འགྲོ་འདུག་སྤྱོད་གསུམ་ལ་རྟོག་ཞིབ་བྱེད་མུས་ཡིན་སྐོར་སོགས་བརྗོད་བྱུང་།
ཡང་ཁོང་གིས། བཙན་བྱོལ་ནས་བོད་དུ་ལོག་པའི་བོད་མི་ཕལ་མོ་ཆེ་དོགས་གཟོན་བྱ་དགོས་པའི་ཁུངས་སུ་བཅུག་ནས་ཁ་པར་ཨང་གྲངས་དང་། ཐོབ་ཐང་དཔང་ཡིག་སོགས་ཐོ་འགོད་བྱ་བཅུག་གི་ཡོད་འདུག་ལ། རྒྱལ་ཁབ་ཀྱི་ཁྲིམས་ལུགས་སློབ་གསོ་ཟེར་བར་སློབ་སྦྱོང་བྱེད་དུ་བཅུག་སྟེ། མི་རིགས་ཁ་བྲལ་གྱི་བསམ་བློ་རྨང་ནས་དོར་ཏེ། རྒྱ་ནག་རྒྱལ་ཁབ་ལ་དགའ་ཞེན་དང་བརྩེ་འདང་དགོས་པའི་སྐུལ་འདེད་གཏོང་གི་ཡོད་སྐོར་བརྗོད་བྱུང་།
ད་ལྟ་རང་ལོ ༣༦ ཡིན་པའི་བོད་རིགས་གཞོན་སྐྱེས་གུ་རུ་སྐྱབས་ལགས་ནི་མགོ་ལོག་གཅིག་སྒྲིལ་རྫོང་དཔལ་ཡུལ་རུ་ཁག་གསུམ་པ་ནས་ཡིན་ཞིང་། ཕྱི་ལོ་ ༢༠༡༦ ཙམ་ལ་རྒྱ་གར་ནང་བཙན་བྱོལ་དུ་ཡོང་སྟེ་ཡུན་རིང་མ་བསྡད་པར་ཕྱིར་བོད་དུ་ལོག་ཡོད་འདུག ཉེ་ཆར་ཁོང་ཀློད་གྲོལ་བྱས་རྗེས་མ་གཏོགས་འཛིན་བཟུང་བཙོན་འཇུག་བྱས་པའི་གནས་ཚུལ་ཕྱིའི་བརྒྱུད་ལམ་དུ་བསླེབས་ཐུབ་མི་འདུག
གསར་འགོད་པ། དཔལ་ལྡན།
