རྒྱ་ནག་གཞུང་གིས་རྒྱ་ནག་ནང་ལོགས་ཀྱི་ཏོག་དབྱིབས་ནད་པའི་གྲངས་འབོར་སོགས་གསང་རྒྱ་བྱེད་བཞིན་ཡོད་པ་དང་ཏོག་དབྱིབས་ཀྱི་བཀག་སྡོམ་ཕྱོགས་ཡོངས་ནས་ཀློད་རྒྱུ་ཡིན་པའི་གསལ་བསྒྲགས་སྤེལ་བར་བརྟེན། འཛམ་གླིང་རྒྱལ་ཁབ་མང་པོས་རྒྱ་ནག་གི་འགྲིམ་འགྲུལ་ལ་དོ་ནན་སྟངས་འཛིན་བྱེད་མགོ་བརྩམས་འདུག
རྒྱལ་སྤྱིའི་གསར་ལམ་ཁག་ཏུ་ཐོན་པའི་གནས་ཚུལ་ལྟར་ན། ད་ལྟའི་ཆར་རྒྱ་ནག་ནང་ཏོག་དབྱིབས་གཉན་རིམས་ཀྱི་བཀག་རྒྱ་ཀློད་པར་བརྟེན་ནས་ཉིན་རེར་ཏོག་དབྱིབས་ནད་པའི་གྲངས་འབོར་ཤུགས་ཆེན་འཕར་གྱིན་ཡོད་སྟབས། འཛམ་གླིང་རྒྱལ་ཁབ་ ༡༦ གིས་རྒྱལ་ཁབ་རང་རང་གི་གནམ་ཐང་ཁག་ཏུ་རྒྱ་ནག་ནས་ལོགས་ཡོང་མཁན་དང་ཡུལ་སྐོར་བ་དག་ལ་ཏོག་དབྱིབས་ནད་རྟགས་མེད་པའི་གཏན་འཁེལ་བརྟག་དཔྱད་གཏོང་མགོ་བརྩམས་དང་རྩོམ་མུས་ཡིན་པ་མ་ཟད། འཛམ་གླིང་འཕྲོད་བསྟེན་སྒྲིག་འཛུགས་ཀྱིས། རྒྱ་ནག་གཞུང་གིས་རྒྱ་ནག་ནང་གི་ནད་སྲིན་གྱི་ངོ་བོ་དང་ནད་པའི་གྲངས་འབོར། འདས་གྲོངས་སུ་ཕྱིན་པ་དང་འགོག་ཁབ་བརྒྱབ་ཟིན་པ་སོགས་ཏོག་དབྱིབས་སྐོར་གྱི་གནས་སྟངས་དངོས་དེ་མཁོ་སྤྲོད་དགོས་པ་ནན་སྐུལ་བྱས་ཡོད་འདུག
ཨ་རིའི་དུས་བབ་དུས་དེབ་ཀྱི་གནས་ཚུལ་ལྟར་ན། ད་ལྟ་ཡུ་རོབ་རྒྱལ་ཁབ་ཨི་ཊ་ལི་དང་ཨ་རི། སི་པན། ཧྥ་རན་སི། ཉི་ཧོང་། རྒྱ་གར། ཐའེ་ཝན། མ་ལི་ཞི་ཡ། ཨི་ཟི་རལ། མོ་རོ་ཁོ། ཁཱ་ཊར། སྦེལ་ཇམ་སོགས་ཀྱིས། རྒྱ་ནག་ནས་ཕྱིར་ལོགས་པ་དང་ཡུལ་སྐོར་སླད་ཡོང་བའི་འགྲིམ་འགྲུལ་པར་ཏོག་དབྱིབས་ནད་རྟགས་ཡོད་མེད་བརྟག་དཔྱད་གཏོང་མུས་ཡིན་པ་དང་། དབྱིན་ཡུལ་དང་ཨོ་གླིང་། ཁེ་ན་ཌ། ལྷོ་ཀོ་རི་ཡ་བཅས་ཀྱིས་སང་ཉིན་ཕྱི་ཚེས་ ༥ ཉིན་ནས་རྒྱ་ནག་ནས་ལོགས་པའི་མི་ཚང་མར་ཏོག་དབྱིབས་གཉན་རིམས་འགོས་ཡོད་མེད་ཀྱི་བརྟག་དཔྱད་གཏང་རྒྱུ་ཡིན་པ་དང་། རྒྱ་གར་གྱིས་རྒྱ་ནག་ཙམ་དུ་མ་ཟད་ཧོང་ཀོང་དང་ཉི་ཧོང་། ལྷོ་ཀོ་རི་ཡ། སིན་གྷང་པོར་དང་ཐའེ་ལན་ཌི་སོགས་ནས་ལོགས་པའི་མི་ཚང་མར་ཏོག་ནད་བརྟག་དཔྱད་གཏོང་གི་ཡོད་ཅིང་། འདས་ལོའི་ཕྱི་ཟླ་ ༡༢ ཚེས་ ༢༨ ཉིན་ནས་ཨི་ཊ་ལི་རྒྱ་ནག་གི་ཏོག་དབྱིབས་འགོས་ཁྱབ་ལ་འཕྲོད་བསྟེན་སྲིད་ཇུས་ཀྱི་ཐོག་ནས་གདོང་ལེན་བྱེད་མཁན་ཐོག་མར་གྱུར་ཡོད་འདུག
ཡང་ཟླ་འདིའི་ཕྱི་ཚེས་ ༡ ཉིན་ཧྥ་རན་སིས་རྒྱ་ནག་ནས་ལོགས་མཁན་ཚང་མར་ཏོག་ནད་ཡོད་མེད་ཀྱི་བརྟག་དཔྱད་གཏོང་མགོ་བརྩམས་པ་དང་བསྟུན། ཧྥ་རན་སིས་ཡུ་རོབ་མཉམ་འབྲེལ་མཐུན་ཚོགས་ཀྱིས་ཀྱང་རྒྱ་ནག་ནས་ལོགས་མཁན་ཡུལ་སྐོར་བ་དང་ཡུ་རོབ་ཀྱི་མི་སེར་དག་ལ་ཏོག་དབྱིབས་འགོས་ཁྱབ་བྱུང་ཡོད་མེད་བརྟག་དཔྱད་གཏོང་དགོས་པ་ནན་བརྗོད་བྱས་ཡོད་སྟབས། དེ་རིང་ཕྱི་ཚེས་ ༤ ཡི་ཉིན་རྒྱབ་ཏུ་གསར་འགྱུར་བརྒྱུད་ལམ་ཁག་གིས་གནས་ཚུལ་སྤེལ་བ་ལྟར་ན། དེ་རིང་ཡུ་རོབ་མཉམ་འབྲེལ་མཐུན་ཚོགས་ཀྱི་ཚོགས་མི་རྒྱལ་ཁབ་ ༢༧ ཐུན་མོང་གིས་གོ་རིམ་ལྡན་པའི་ངང་རྒྱ་ནག་ནས་ལོགས་མཁན་གྱི་མི་ཚང་མར་ཏོག་ནད་བརྟག་དཔྱད་བྱེད་སྟངས་ཐད་ཚོགས་འདུ་ཞིག་འཚོགས་ཡོད་ཀྱང་། ད་སྔ་བར་ཚོགས་འདུའི་ཐོག་ཐག་གཅོད་ཅི་ཞིག་བླངས་ཡོད་མེད་ཀྱི་གསལ་བསྒྲགས་གང་ཡང་སྤེལ་མི་འདུག
འཛམ་གླིང་རྒྱལ་ཁབ་མང་པོས་རྒྱ་ནག་གཞུང་ལ་འཕྲོད་བསྟེན་གྱི་སྲིད་ཇུས་ཐོག་ནས་ཁ་གཏད་གཅོག་གི་ཡོད་པའི་གནད་དོན་དེའི་ཐད། ཁ་སང་རྒྱ་ནག་གཞུང་འབྲེལ་གོ་ལའི་དུས་བབ་ཟེར་བའི་སྟེང་། འཛམ་གླིང་རྒྱལ་ཁབ་ ༡༢ ལྷག་གིས་རྒྱ་ནག་གི་འགྲིམ་འགྲུལ་ཐོག་བརྟག་དཔྱད་གཏོང་དགོས་པའི་སྒྲིག་ཁྲིམས་བཟོས་པར་དགོས་མཁོ་མཐོང་གི་མེད་པ་དང་དེ་ནི་གནས་སྐབས་ཙམ་ཡིན་པ་མ་ཟད། ཚན་རིག་གི་གཞི་རྩ་གང་ཡང་མེད་སྐོར་བཀོད་འདུག་པ་དང་། ཡང་རྒྱ་ནག་ཕྱི་སྲིད་ལྷན་ཁང་གིས། འཛམ་གླིང་རྒྱལ་ཁབ་དེ་དག་ལ་ཡ་ལན་གཅིག་མཚུངས་བསློག་རྒྱུའི་ཉེན་བརྡའང་བཏང་ཡོད་པ་མ་ཟད། རྒྱལ་སྤྱིའི་ངོས་ནས་རྒྱ་ནག་གི་འགྲིམ་འགྲུལ་ཐོག་དོ་དམ་གྱི་སྲིད་ཇུས་ལག་བསྟར་བྱེད་པར་ཆབ་སྲིད་ཀྱི་དམིགས་འབེན་བཟུང་ཡོད་སྐོར་བརྗོད་འདུག
བྷི་བྷི་སི་གསར་ཁང་སོགས་ཀྱི་གནས་ཚུལ་ལྟར་ན། ད་ལྟ་འཛམ་གླིང་རྒྱལ་མང་པོས་རྒྱ་ནག་གི་འགྲིམ་འགྲུལ་ཐོག་དོ་ནན་གྱིས་བརྟག་དཔྱད་བྱེད་དོན་ནི། ཟླ་འདིའི་ཕྱི་ཚེས་ ༨ ཉིན་ནས་རྒྱ་ནག་གཞུང་གིས་ཏོག་དབྱིབས་གཉན་རིམས་ཀྱི་བཀག་སྡོམ་ཡོངས་ཀློད་རྒྱུ་ཡིན་སྐོར་བསྒྲགས་ཡོད་པ་དང་གཅིག གཉིས་ནས་རྒྱ་ནག་ནང་ཐོན་པའི་ནད་སྲིན་གྱི་ངོ་བོ་གསར་པ་ཞིག་ཡིན་པའི་དོགས་གཞི་ཡོད་པ་དང་། གསུམ་ནས་རྒྱ་ནག་གཞུང་གིས་རྒྱ་ནག་ནང་ལོགས་ཀྱི་ཏོག་དབྱིབས་ནད་པ་དང་འདས་གྲོངས་སུ་ཕྱིན་པའི་གྲངས་འབོར་སོགས་གསང་བ་བྱེད་བཞིན་ཡོད་པས་ཡིན་པ་རེད།
འཛམ་གླིང་འཕྲོད་བསྟེན་སྒྲིག་འཛུགས་ཀྱི་རྒྱལ་སྤྱིའི་ཏོག་དབྱིབས་ནད་པའི་གྲངས་འབོར་ཁྲོད། འདས་པའི་ཆུ་ཚོད་ ༢༤ རིང་རྒྱ་ནག་ནང་ཏོག་དབྱིབས་ནད་པ་དང་འདས་གྲོངས་སུ་ཕྱིན་པའི་གྲངས་འབོར་བཀོད་མི་འདུག་ལ། རྒྱ་ནག་འཕྲོད་བསྟེན་ལྷན་ཁང་གི་དྲ་ཐོག་ཏུ། འདས་ལོའི་ཕྱི་ཟླ་ ༡༢ ཚེས་ ༢༤ ཉིན་ནས་དེ་རིང་བར་ཏོག་དབྱིབས་ནད་པའི་གྲངས་འབོར་སོགས་ཀྱི་གནས་ཚུལ་གང་ཡང་སྤེལ་མི་འདུག འོན་ཀྱང་། བྷི་བྷི་སི་གསར་ཁང་གི་གནས་ཚུལ་ནང་། དབྱེ་ཞིབ་པ་ཁ་ཤས་ཀྱིས། རྒྱ་ནག་ནང་ཉིན་རེར་ཏོག་དབྱིབས་ནད་པ་ཁྱོན་ས་ཡ་གཉིས་ལྷག་ཡོད་པ་དང་། ཟླ་འདིའི་ནང་ཉིན་རེའི་ཏོག་དབྱིབས་ནད་པའི་གྲངས་འབོར་ས་ཡ་ ༤ ཙམ་ཆགས་རྒྱུ་ཡིན་སྐོར་བརྗོད་འདུག
གསར་འགོད་པ། སྐལ་བཟང་སྦྱིན་པ།
