ཨ་རིའི་གྲོས་ཚོགས་འོག་མའི་ཚོགས་གཙོ་དང་དམངས་གཙོ་ཚོགས་པའི་མགོ་འཁྲིད་གཉིས་ལ་འཚམས་འཕྲིན་སྩལ།

༧གོང་ས་མཆོག་གིས་ཨ་རིའི་གྲོས་ཚོགས་འོག་མའི་ཚོགས་གཙོ་དང་གྲོས་ཚོགས་ཀྱི་གྲང་ཉུང་ཚོགས་པའི་མགོ་འཁྲིད་བདམས་ཐོན་བྱུང་བར་འཚམས་འདྲི་གསུང་འཕྲིན་སྩལ་གནང་འདུག

ཁ་སང་ཕྱི་ཚེས་༨ ཉིན་གོང་ས་རྒྱལ་བ་རིན་པོ་ཆེ་མཆོག་གིས་ཨ་རིའི་གྲོས་ཚོགས་འོག་མའི་ཚོགས་གཙོར་བདམས་ཐོན་བྱུང་བ་སྐུ་ཞབས་ཁེ་ཝིན་མེག་ཁཱར་ཐི་ (Kevin McCarthy) ལགས་དང་། གྲོས་ཚོགས་འོག་མའི་དམངས་གཙོ་ཚོགས་པའི་ཚོགས་གཙོ་གསར་པ་སྐུ་ཞབས་ཧ་ཁེམ་ཇའེ་ཧྥར་སི་ (Hakeem Jeffries) ལགས་རྣམ་གཉིས་ལ་འཚམས་འདྲིའི་གསུང་འཕྲིན་སྩལ་གནང་འདུག

༧མགོན་པོ་གང་ཉིད་མཆོག་གིས་འཚམས་འཕྲིན་ནང་། ངོས་ཡུན་རིང་ནས་ཨ་རིའི་དམངས་གཙོ་དང་ཁྲིམས་ཀྱི་དབང་སྒྱུར་སོགས་འགྲོ་བ་མིའི་གཞི་རྩའི་རིན་ཐང་ལ་འཛིན་བཞིན་པར་ཡི་རངས་བྱེད་མཁན་ཞིག་ཡིན། ཨ་རི་ནི་རང་དབང་ལྡན་པའི་འཛམ་གླིང་འདིའི་ནང་གི་སྟོབས་ཆེན་རྒྱབ་ཁབ་ཅིག་ཡིན་སྟབས། ཨ་རིས་རྒྱལ་སྤྱིའི་ཚོང་འབྲེལ་དང་སྤྱི་ཚོགས་ཀྱི་དཀའ་ངལ། དེ་བཞིན་གནམ་གཤིས་འགྱུར་ལྡོག་སོགས་ཀྱི་དཀའ་ངལ་སེལ་བར་རམ་འདེགས་བྱས་ཏེ་སྔར་ལྷག་གིས་འཛམ་གླིང་ཞི་བདེ་བསྐྲུན་ཐུབ་པའི་ནུས་པ་ཡོད་པ་མ་ཟད། ཨ་རིས་རང་གི་མི་མང་ཡོངས་ལ་རང་དབང་དང་གོ་སྐབས་སྤྲོད་ཀྱི་ཡོད་པ་དེས་ཨ་རི་རེ་བའི་སྒྲོན་མེ་ཞིག་ཡིན་པ་མངོན་ཡོད།

ཕྱི་ལོ་ ༡༩༧༩ ནས་བཟུང་ངོས་ཐེངས་མང་ཨ་རིར་བསྐྱོད་རྒྱུའི་གོ་སྐབས་བྱུང་བ་དང་། སྐབས་དེར་ངོས་ནས་གྲོས་ཚོགས་ཀྱི་ཚོགས་གཙོ་ཟུར་པ་རྣམས་ཚུད་པའི་གནད་ཡོད་མགོ་འཁྲིད་ཁག་དང་ལྷན་དུ་གནད་དོན་མང་པོའི་ཐོག་བསམ་ཚུལ་བརྗེ་ལེན་བྱ་རྒྱུ་བྱུང་ལ། དམིགས་བསལ་ངོས་ལ་རེ་བ་དང་ཡིད་ཆེས་བཅོལ་མཁན་གྱི་བོད་ནང་གི་གཞིས་ལུས་རྒྱ་ཆེ་མི་མང་གི་དཀའ་ངལ་གྱི་སྐོར་ཁོང་རྣམས་ལ་ཞུ་རྒྱུ་བྱུང་། བོད་མི་རྣམས་ལ་ཨ་རིའི་ཆབ་སྲིད་ཚོགས་པ་ཐུན་མོང་གིས་རྒྱབ་སྐྱོར་གནང་བར་བཀའ་དྲིན་ཆེན་པོ་ཡིན། ང་ཚོའི་འཐབ་རྩོད་ནི་ང་ཚོའི་མི་མང་གིས་འགྲོ་བ་མིའི་རིགས་ཡོངས་ལ་ཕན་ནུས་ལྡན་པའི་བོད་མི་རིགས་ཀྱི་བྱམས་སྙིང་རྗེ་དང་འཚེ་བ་མེད། ཞི་བདེའི་གནའ་བོའི་རིག་གཞུང་སྲུང་སྐྱོབ་དང་བདག་གཅེས་གནང་རྒྱུ་དེ་ཡིན།

༧གོང་ས་མཆོག་གིས་མུ་མཐུད་གསུང་དོན། ངོས་ནས་རྒྱ་ནག་ནང་གི་གནས་སྟངས་རིམ་པས་འགྱུར་བ་འགྲོ་ཡི་ཡོད་པ་དང་དེ་ལ་བརྟེན་ནས་བཟང་ཕྱོགས་ཀྱི་འགྱུར་བ་ཡོང་བའི་རེ་བ་དང་ཡིད་ཆེས་བྱེད་ཀྱིན་ཡོད།  དེ་དང་ཕྱོགས་མཚུངས་བོད་གཞིས་ལུས་རྒྱ་ཆེ་མི་མང་གི་སྙིང་སྟོབས་ཞུམ་པ་མེད་པར་གནས་ཡོད་ཅེས་དགའ་སྤོབས་ཆེན་པོའི་ངང་ནས་ཞུ་རྒྱུ་ཡིན།

ངོས་ཀྱི་མི་ཚེ་འདིའི་ནང་འགྲོ་བ་མིའི་བཟང་སྤྱོད་གོང་མཐོར་དང་ཆོས་ལུགས་མཐུན་འབྲེལ། བོད་ཀྱི་ནང་པའི་རིག་གཞུང་དང་རང་འབྱུང་ཁོར་ཡུག་སྲུང་སྐྱོབ། དེ་བཞིན་རྒྱ་གར་གྱི་གནའ་བོའི་སེམས་ཁམས་རིག་པའི་རྣམ་གཞག་སྐོར་ལ་གོ་རྟོགས་སྤེལ་བར་བརྩོན་པ་བྱེད་བཞིན་ཡོད། ཅེས་དང་། ཨ་རིའི་གྲོས་ཚོགས་འོག་མའི་ཚོགས་གཙོ་དང་དམངས་གཙོ་ཚོགས་པའི་དབུ་ཁྲིད་རྣམ་གཉིས་ནས་ཨ་རིའི་མི་མང་གི་རེ་བ་དང་མངོན་འདོད་འགྲུབ་པ་དང་། ཞི་བདེ་དང་བདེ་སྐྱིད་ལྡན་པའི་འཛམ་གླིང་ཞིག་བསྐྲུན་པའི་ལས་དོན་ལམ་ལྷོངས་ཡོང་བའི་ཐུགས་སྨོན་བཅས་མཛད་ཡོད་པ་རེད།

ཡང་དེ་རིང་ཕྱི་ཚེས་ ༩ ཉིན་དཔལ་ལྡན་བོད་མི་མང་སྤྱི་འཐུས་ཚོགས་གཞོན་སྒྲོལ་མ་ཚེ་རིང་མཆོག་གིས་གཞིས་བྱེས་བོད་མི་ཡོངས་དང་བོད་མི་མང་སྤྱི་འཐུས་ལྷན་ཚོགས་ཀྱི་ཚབ་ཞུས་ཏེ། གསར་དུ་བདམས་ཐོན་བྱུང་བའི་ཨ་རིའི་གྲོས་ཚོགས་འོག་མའི་ཚོགས་གཙོ་སྐུ་ཞབས་ཁེ་ཝིན་མེག་ཁཱར་ཐི་ (Kevin McCarthy) ལགས་སུ་དགའ་བསུའི་འཚམས་འདྲི་ཞུས་པའི་ནང་། ངས་བོད་མི་མང་སྤྱི་འཐུས་ལྷན་ཚོགས་དང་འཛམ་གླིང་གང་སར་བཞུགས་པའི་བོད་མི་ཡོངས་ཀྱི་ཚབ་ཞུས་ཏེ། སྐུ་ཉིད་ཨ་རིའི་གྲོས་ཚོགས་འོག་མའི་སྐབས་ ༥༥ པའི་ཚོགས་གཙོར་བདམས་ཐོན་བྱུང་བར་དགའ་བསུའི་འཚམས་འདྲི་ཞུ་རྒྱུ་ཡིན།

ཨ་རིའི་གཞུང་མང་གཉིས་ནས་ད་བར་བོད་ཀྱི་བདེན་དོན་དང་། བོད་མི་རྣམས་ལ་མཐུན་འགྱུར་རྒྱབ་སྐྱོར་ཤུགས་ཆེ་གནང་བར་ང་ཚོས་ཐུགས་རྗེ་ཆེ་ཞུ་རྒྱུ་དང་། སྐུ་ཉིད་ཀྱི་དབུ་འཁྲིད་འོག འབྱུང་འགྱུར་ཡང་མུ་མཐུད་དེ་ལྟར་མཐུན་འགྱུར་རྒྱབ་སྐྱོར་གནང་བའི་རེ་བ་དང་ཡིད་ཆེས་ཡོད། ངས་སླར་ཡང་སྐུ་ཉིད་ལ་དགའ་བསུའི་འཚམས་འདྲི་ཞུ་རྒྱུ་དང་། སྐུ་ཉིད་ཀྱི་ལས་ཡུན་རིང་མི་མང་གི་མངོན་འདོད་འགྲུབ་རྒྱུ་སོགས་མ་འོངས་པའི་ལས་དོན་མཐའ་དག་ལམ་ལྷོངས་དང་ལྡན་པ་ཡོང་བའི་སྨོན་འདུན་ཞུ་རྒྱུ་ཡིན་ཞེས་གསུངས་འདུག

གྲོས་ཚོགས་འོག་མའི་ཚོགས་གཙོ་སྐུ་ཞབས་ཁེ་ཝིན་མེག་ཁཱར་ཐི་ (Kevin McCarthy) ལགས་ནི་ཕྱི་ལོ་ ༡༩༦༥ ལོར་ཨ་རིའི་མངའ་སྡེ་ཁ་ལི་ཧྥོ་ནེ་ཡའི་ (Bakersfield) གྲོང་ཁྱེར་ནང་སྐྱེས་ཤིང་།  ཕྱི་ལོ་ ༡༩༨༩ ལོར་ཚོང་ལས་ཐོག་ཉེ་བའི་གཙུག་ལག་རབ་འབྱམས་པ་ཐོན་པ་དང་ཕྱི་ལོ་ ༡༩༩༤ ལོར་ཁ་ལི་ཧྥོ་ནེ་ཡ་མངའ་སྡེ་གཙུག་ལག་སློབ་ཆེན་ནས་དཔལ་འབྱོར་རིག་པའི་ཐོག་གཙུག་ལག་རབ་འབྱམས་པ་ཐོན། ཕྱི་ལོ་ ༡༩༩༠ ནང་ཐོག་མར་མངའ་སྡེ་ཁ་ལི་ཧྥོ་ནེ་ཡའི་སྤྱི་མཐུན་ཚོགས་པའི་འོས་མི་ལངས་པ་དང་། ཕྱི་ལོ་ ༢༠༠༦ ལོར་ཨ་རིའི་གྲོས་ཚོགས་འོག་མའི་ནང་གི་སྤྱི་མཐུན་ཚོགས་པའི་འཐུས་མིར་གྱུར་བ་ནས་ད་སྔ་བར་གྲོས་ཚོགས་འོག་མའི་ནང་ཕྱག་ལས་གནང་མུས་ཡིན་ཁར། ཟླ་འདིའི་ཕྱི་ཚེས་ ༧ ཉིན་གྲོས་ཚོགས་འོག་མའི་ཚོགས་གཙོར་འདེམས་ཡོད་འདུག ཁོང་དང་བཟའ་ཟླ་ (Judy Wages) གཉིས་ལ་བུ་གཅིག་དང་བུ་མོ་གཅིག་བཅས་ཡོད་འདུག

གསར་དུ་འོས་འདེམས་བྱུང་བའི་ཨ་རིའི་གྲོས་ཚོགས་འོག་མའི་གྲངས་ཉུང་དམངས་གཙོ་ཚོགས་པའི་དབུ་འཁྲིད་སྐུ་ཞབས་ཧ་ཁེམ་ཇའེ་ཧྥར་སི་ (Hakeem Jeffries) ལགས་ཕྱི་ལོ་ ༡༩༧༠ ནང་ཨ་རིའི་མངའ་སྡེ་ནེའུ་ཡོག་བྷི་རོག་ལིན་(Brooklyn) གྲོང་ཁྱེར་དུ་སྐྱེས་ཤིང་། ཕྱི་ལོ་ ༡༩༩༢ ལོར་ནེའུ་ཡོག་མངའ་སྡེ་གཙུག་ལག་སློབ་ཆེན་ནས་ཆབ་སྲིད་ཚན་རིག་ཐོག་ཉེ་བའི་གཙུག་ལག་རབ་འབྱམས་པ་ཐོན་པ་དང་། ཕྱི་ལོ་ ༡༩༩༤ ལོར་ (Georgetown University) གཙུག་ལག་སློབ་ཆེན་ནས་སྤྱི་དམངས་སྲི་ཞུའི་ཆེད་སྦྱོང་ཐོག་རབ་འབྱམས་པ་ཐོན། ཕྱི་ལོ་ ༢༠༠༦ ལོར་ནེའུ་ཡོག་མངའ་སྡེ་གྲོས་ཚོགས་ནང་ཞུགས་ཏེ་ཆབ་སྲིད་ཀྱི་སྡིངས་ཆའི་སྟེང་གོམ་སྟབས་ཐོག་མ་དེ་སྤོས་ཤིང་། ཕྱི་ལོ་ ༢༠༡༢ ལོར་གྲོས་ཚོགས་འོག་མའི་འཐུས་མིར་བདམས་ཐོན་བྱུང་། ཕྱི་ལོ་ ༢༠༡༩ ལོར་དམངས་གཙོ་ཚོགས་པའི་ (House Democratic Caucus) ཞེས་པའི་ཚོགས་གཙོར་འདེམས་རྗེས། ཁོང་གྲོས་ཚོགས་འོག་མའི་ནང་གི་དམངས་གཙོ་ཚོགས་པའི་འཐུས་མི་མཐོ་ཤོས་ཨང་ལྔ་པ་དེ་ཆགས་ཡོད་པ་དང་། ད་ལྟ་ཁོང་དང་བཟའ་ཟླ་ (Kennisandra Arciniegas-Jeffries) གཉིས་ལ་ཕྲུ་གུ་གཉིས་ཡོད་འདུག

གསར་འགོད་པ། སྐལ་བཟང་སྦྱིན་པ།