བོད་རང་སྐྱོང་ལྗོངས་ཟེར་བའི་མགོ་ཁྲིད་གཞོན་པར་རྒྱ་རིགས་གཉིས་གསར་དུ་བསྐོས་ཡོད་པ་དང་བསྟུན་བོད་རིགས་དམར་ཤོག་མགོ་ཁྲིད་ལྔའི་གོ་གནས་ཕྱིར་འཐེན་བྱས་ཡོད་ཟེར།
ཟླ་འདིའི་ཕྱི་ཚེས་ ༩ ཉིན་བོད་རང་སྐྱོང་ལྗོངས་མི་དམངས་འཐུས་མིའི་ཚོགས་ཆེན་སྐབས་བཅུ་གཅིག་པའི་རྒྱུན་ལས་ཀྱི་ཚོགས་འདུ་ཐེངས་ ༤༤ པ་འཚོགས་ཡོད་ཅིང་། ཚོགས་ཐོག་ཏུ་ལོ་མང་རིང་རྒྱ་ནག་གི་དྲ་ལམ་འབྲེལ་མཐུད་ཁང་དུ་བྱ་བ་སྒྲུབ་མྱོང་བའི་ཝེ་ཞིའུ་ཁྲང་ (韦秀长) དང་རྒྱ་ནག་དབུས་འཐབ་ཕྱོགས་གཅིག་གྱུར་ཁང་སྐབས་བདུན་པའི་འགན་འཛིན་དང་འཐབ་ཕྱོགས་གཅིག་གྱུར་ཁང་གི་བོད་ཀྱི་ལས་དོན་སྐབས་གཉིས་པའི་ཚན་པ་གསུམ་པའི་འགན་འཛིན་གཞོན་པ་ཞུས་ཀྲི་ཐའོ་ (徐志涛) གཉིས་བོད་རང་སྐྱོང་ལྗོངས་མི་དམངས་སྲིད་གཞུང་ཟེར་བའི་མགོ་ཁྲིད་གཞོན་པར་བསྐོ་གཞག་བྱས་ཡོད་འདུག
གཞན་ཡང་བོད་རང་སྐྱོང་ལྗོངས་མི་དམངས་འཐུས་མིའི་ཚོགས་ཆེན་སྐབས་བཅུ་གཅིག་པའི་རྒྱུན་ལས་ཀྱི་ཚོགས་འདུ་ཐེངས་ ༤༤ པ་ཟེར་བའི་ཚོགས་ཐོག་ཏུ། བོད་རང་སྐྱོང་ལྗོངས་འཕེལ་རྒྱས་དང་སྒྱུར་བཅོས་ལྷན་ཁང་གི་འགན་འཛིན་བསོད་ནམས་ཉི་མ་དང་། བོད་རང་སྐྱོང་ལྗོངས་ཚན་རིག་ལག་རྩལ་ཁང་གི་འགན་འཛིན་འཕྲིན་ལས་དབང་རྒྱལ། བོད་རང་སྐྱོང་ལྗོངས་སྡོད་ཁང་དང་གྲོང་ཁྱེར་གྲོང་གསེབ་འཛུགས་སྐྲུན་ལྷན་ཁང་གི་འགན་འཛིན་སྐལ་བཟང་། དེ་བཞིན་བོད་རང་སྐྱོང་ལྗོངས་རིག་གཞུང་ལྷན་ཁང་གི་འགན་འཛིན་འཇིགས་མེད་དབང་མཚོ་དང་། བོད་རང་སྐྱོང་ལྗོངས་མི་དམངས་ཉེས་དོན་ཞིབ་དཔྱོད་ཁང་གི་ཞིབ་དཔྱོད་དཔོན་གཞོན་པ་དང་ཞིབ་དཔྱོད་ཁང་གི་རྒྱུན་ལས། ཉེས་དོན་ཞིབ་དཔྱོད་པ་བཅས་ཡིན་མིག་དམར་ཚེ་རིང་བཅས་བོད་རིགས་མགོ་འཁྲིད་ལྔ་དང་། བོད་རང་སྐྱོང་ལྗོངས་དམངས་སྲིད་ལྷན་ཁང་གི་འགན་འཛིན་རྒྱ་རིགས་ཁྲེན་ཧྥན་ཡན་བཅས་ཀྱི་གོ་གནས་ཕྱིར་འཐེན་བྱ་རྒྱུ་གཏན་འཁེལ་བྱུང་ཡོད་སྐོར་བརྗོད་འདུག འོན་ཀྱང་། ད་སྔ་བར་རྒྱ་ནག་གཞུང་འབྲེལ་དང་བོད་རང་སྐྱོང་ལྗོངས་ཟེར་བའི་དྲ་ཚིགས་ཁག་གི་ཐོག་ཏུ་ཁོ་ཚོའི་གོ་གནས་ཕྱིར་འཐེན་བྱེད་དོན་དང་གོ་གནས་ཕྱིར་འཐེན་བྱས་རྗེས་ལས་བགོས་གཞན་ཡོད་མེད་སོགས་རྒྱབ་ལྗོངས་ཀྱི་གནས་ཚུལ་ཁ་གསལ་གཅིག་ཀྱང་བཀོད་མི་འདུག ཡང་ཚོགས་འདུ་དེའི་ཐོག་ཝེ་ཞིའུ་ཁྲང་ (韦秀长) དང་ཞུས་ཀྲི་ཐའོ་ (徐志涛) གཉིས་དང་ལྷན་དུ་བོད་རིགས་ཚེ་རིང་རྡོ་རྗེ་བོད་རང་སྐྱོང་ལྗོངས་གཞིས་ཀ་རྩེ་གྲོང་ཁྱེར་མི་དམངས་ཞིབ་དཔྱོད་ཁང་གི་ཞིབ་དཔྱོད་དཔོན་ལ་བསྐོ་གཞག་བྱ་རྒྱུའི་གཏན་འབེབ་བྱུང་ཡོད་འདུག
ད་ལྟ་གསར་དུ་བསྐོ་གཞག་བྱུང་བའི་བོད་རང་སྐྱོང་ལྗོངས་ཀྱི་མགོ་ཁྲིད་གཞོན་པ་ཝེ་ཞིའུ་ཁྲང་ནི་ཕྱི་ལོ་ ༡༩༧༣ ཟླ་ ༡༢ ནང་རྒྱ་ནག་ཨན་ཧྥོ་ཞིང་ཆེན་གྱི་ཧི་ཧྥེ་གྲོང་ཁྱེར་དུ་སྐྱེས་ཤིང་། ད་ལྟ་རང་ལོ་ ༥༠ ཡིན་པས། རྒྱ་ནག་གི་མགོ་ཁྲིད་རིམ་པའི་ཆབ་སྲིད་ཀྱི་སྡིངས་ཆའི་སྟེང་ཁོ་ལོ་ཧ་ཅང་ཆུང་ཆུང་ཡིན་པར་ངོས་འཛིན་བྱེད་ཀྱིན་འདུག ཆེད་ལས་ཀྱི་ཐད་ནས་ཝེ་ཞིའུ་ཁྲང་གིས་ཕྱི་ལོ་ ༡༩༩༥ ལོར་ཧི་ཧྥེ་གཙུག་ལག་བཟོ་རིགས་སློབ་ཆེན་ (合肥工业大学) ནས་བཟོ་རིགས་དོ་དམ་དང་འཆར་འགོད་རིག་པའི་ཐོག་ཉེ་བའི་གཙུག་ལག་རབ་འབྱམས་པ་ཐོན། ཕྱི་ལོ་ ༡༩༩༨ ལོར་ཧི་ཧྥེ་བཟོ་རིག་དོ་དམ་སློབ་གླིང་ནས་ཆ་འཕྲིན་མ་ལག་དོ་དམ་ཐོག་རབ་འབྱམས་པ་ཐོན། ཕྱི་ལོ་ ༢༠༠༧ ལོར་ཝེ་ཞིའུ་ཁྲང་གིས་ཀྲུང་ཧྲན་(中山大学) གཙུག་ལག་སློབ་ཆེན་ནས་ཚོང་ལས་དོ་དམ་ཐོག་འབུམ་རམས་པ་ཐོན། ཕྱི་ལོ་ ༢༠༠༥ ནས་ ༢༠༡༠ བར་ཧྲང་ཧེ་རྒྱལ་ཁབ་རྩིས་ཞིབ་སློབ་གླིང་ནས་ནོར་སྲིད་ལྷན་ཁང་གི་རྒྱལ་ཡོངས་རྩིས་ཞིབ་དམག་དོན་མི་སྣ་སྐྱེད་སྲིང་གི་ལས་དོན་ཐོག་ཆེད་ལས་སློབ་སྦྱོང་བྱས། དེ་རྗེས་སློབ་གླིང་དེ་ནས་དམག་དོན་མི་སྣ་སྐྱེད་སྲིང་གི་ལས་དོན་ཐད་དམིགས་བསལ་འཆར་འགོད་ཀྱི་སློབ་སྦྱོང་བྱས། ཕྱི་ལོ་ ༢༠༠༦ ནས་ ༢༠༠༨ བར་ཀང་ཤིའི་རྒྱ་ནག་མཉམ་འབྲེལ་ཆ་འཕྲིན་ཚད་ཡོད་ཚོང་གཉེར་ཁང་དུ་སྤྱི་ཁྱབ་འཆར་འགོད་པའི་བྱ་བ་བསྒྲུབས། ཕྱི་ལོ་ ༢༠༡༠ ནས་ ༢༠༡༡ ཀོང་ཏུང་ཞིང་ཆེན་གྱི་རྒྱ་ནག་མཉམ་འབྲེལ་ཆ་འཕྲིན་ཚད་ཡོད་ཚོང་གཉེར་ཁང་དུ་སྤྱི་གཉེར་བ་གཞོན་པའི་འགན་ཁུར། ཕྱི་ལོ་ ༢༠༡༡ ནས་ ༢༠༡༤ ཧི་པའི་ཞིང་ཆེན་གྱི་རྒྱ་ནག་མཉམ་འབྲེལ་ཆ་འཕྲིན་ཚད་ཡོད་ཚོང་གཉེར་ཁང་དུ་སྤྱི་ཁྱབ་ལྟ་སྐུལ་བ། ཕྱི་ལོ་ ༢༠༡༤ ནས་ ༢༠༡༦ བར་རྒྱ་ནག་དབུས་མཉམ་འབྲེལ་ཆ་འཕྲིན་ཚད་ཡོད་ཚོང་གཉེར་ཁང་དུ་ཁྲོམ་རའི་ཚོང་གཉེར་དོ་དམ་ཚན་པའི་སྤྱི་ཁྱབ་ལྟ་སྐུལ་བ། ཕྱི་ལོ་ ༢༠༡༦ ནས་ ༢༠༡༨ བར་རྒྱ་ནག་མཉམ་འབྲེལ་ཆ་འཕྲིན་ཚད་ཡོད་ཚོང་གཉེར་ཁང་གི་ཚོང་ལས་འཕེལ་རྒྱས་ཚན་པ་དང་བཅའ་ཁྲིམས་ཚན་པའི་སྤྱི་ཁྱབ་ལྟ་སྐུལ་བ། ཕྱི་ལོ་ ༢༠༡༨ ནས་ཅང་ཤེས་ཞིང་ཆེན་གྱི་མ་དངུལ་ལྟ་ཞིབ་དོ་དམ་ཁང་གི་འགན་འཛིན་དང་དམར་ཤོག་དྲུང་ཆེ་སོགས་ཀྱི་འགན་ཁུར་ཡོད་པ་རེད།
བོད་རང་སྐྱོང་ལྗོངས་ཀྱི་མགོ་ཁྲིད་གཞོན་པ་གསར་པ་ཞུས་ཀྲི་ཐའོ་ (徐志涛) ཕྱི་ལོ་ ༡༩༧༣ ལོར་སྐྱེས་པ་དང་མན་ཇུ་རིགས་ཡིན་པ་རེད། ཁོས་ད་སྔ་བར་རྒྱ་ནག་དབུས་འཐབ་ཕྱོགས་གཅིག་གྱུར་ཁང་སྐབས་བདུན་པའི་འགན་འཛིན་དང་སྤྱི་ཁྱབ་ལྟ་ཞིབ་པ། རྒྱ་ནག་དབུས་འཐབ་ཕྱོགས་གཅིག་གྱུར་ཁང་གི་བོད་ཀྱི་ལས་དོན་སྐབས་གཉིས་པའི་ཚན་པ་གསུམ་པའི་འགན་འཛིན་གཞོན་པ་བཅས་ཀྱི་འགན་འཁུར་མྱོང་སྟབས། ཝེ་ཞིའུ་ཁྲང་དང་བསྡུར་ཚེ་ཞུས་ཀྲི་ཐའོ་བོད་ཀྱི་གནས་སྟངས་ལ་རྒྱུས་མངའ་ཆེ་བ་ཡོད་པར་བསྟན་ཡོད།
གསར་འགོད་པ། སྐལ་བཟང་སྦྱིན་པ།
