སྲིད་སྐྱོང་སྤེན་པ་ཚེ་རིང་མཆོག་ནས་ཚོགས་ཟུར་ལྕམ་སྐུ་ནན་སི་པེ་ལོ་སི་མཆོག་སོགས་ལ་མཇལ་འཕྲད་གནང་།

སྲིད་སྐྱོང་སྤེན་པ་ཚེ་རིང་མཆོག་ནས་གྲོས་ཚོགས་འོག་མའི་ཚོགས་གཙོ་ཟུར་པ་ལྕམ་སྐུ་ནན་སི་པེ་ལོ་སི་ (Nancy Pelosi) མཆོག་དང་གྲོས་ཚོགས་འོག་མའི་འཐུས་མི་སྐུ་ཞབས་ཇིམ་མེག་གྷོ་ཝན་ (Jim McGovern) མཆོག་སོགས་གྲོས་ཚོགས་འཐུས་མི་ཁག་ཅིག་ལ་མཇལ་འཕྲད་གནང་སྟེ་བོད་དོན་སྐོར་གོ་བསྡུར་ལྷུག་པོ་གནང་ཡོད་འདུག

ཟླ་འདིའི་ཕྱི་ཚེས་ ༡ ནས་བཟུང་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་ཨ་རི་གྲོས་ཚོགས་འཐུས་མི་དང་རོགས་ཚོགས་ཀྱི་གནད་ཡོད་མི་སྣ་སོགས་ལ་མཇལ་འཕྲད་གནང་བཞིན་ཡོད་པ་ལྟར། ཕྱི་ཚེས་ ༨ ཉིན་སྲིད་སྐྱོང་མཆོག་ནས་གྲོས་ཚོགས་འོག་མའི་ཚོགས་གཙོ་ཟུར་པ་ལྕམ་སྐུ་ནན་སི་པེ་ལོ་སི་ (Nancy Pelosi) མཆོག་དང་། གྲོས་ཚོགས་འོག་མའི་འཐུས་མི་སྐུ་ཞབས་ཇིམ་མེག་གྷོ་ཝན་ (Jim McGovern) མཆོག་རྣམ་གཉིས་དང་མཇལ་འཕྲད་གནང་བ་དང་། སྐབས་དེར་སྲིད་སྐྱོང་ནས་བོད་ནང་གི་ཛ་དྲག་གནས་སྟངས་དང་། ༧གོང་ས་རྒྱལ་བ་རིན་པོ་ཆེ་མཆོག་གི་སྐུའི་འཕྲོད་བཞེས། དེ་བཞིན་བོད་མིའི་སྒྲིག་འཛུགས་ཀྱི་བོད་རྒྱའི་དཀའ་རྙོག་སེལ་ཐབས་ཀྱི་མ་འོངས་ལས་འཆར་ཁག་ཅིག་བཅས་སྙན་སེང་ཞུས་ཡོད་འདུག་ལ། ཚོགས་ཟུར་ལྕམ་སྐུ་ནན་སི་པེ་ལོ་སི་མཆོག་ཁོང་རྣམ་ནས་བོད་དོན་ལ་རྒྱབ་སྐྱོར་མུ་མཐུད་གནང་རྒྱུའི་ཞལ་བཞེས་གནང་ཞིང་མ་འོངས་ལས་འཆར་ཁག་གི་སྐོར་བཀའ་བསྡུར་ལྷུག་པོ་གནང་ཡོད་འདུག

དེ་བཞིན་སྲིད་སྐྱོང་སྤེན་པ་ཚེ་རིང་མཆོག་གིས་ཨ་རིའི་གྲོས་ཚོགས་ཀྱི་རྒྱ་ནག་ལས་དོན་ཚོགས་ཆུང་གི་ཚོགས་གཙོ་གསར་པ་གྲོས་ཚོགས་འཐུས་མི་ཁིར་སི་ཊོ་ཕར་སི་མིཌ་ (Christopher H. Smith) མཆོག་དང་མཇལ་འཕྲད་གནང་སྟེ། ཨ་རིའི་གྲོས་ཚོགས་སུ་བོད་རྒྱའི་དཀའ་རྙོག་སེལ་ཐབས་ཀྱི་རྒྱབ་སྐྱོར་ཁྲིམས་འཆར་གཏན་འབེབས་གནང་ཐུབ་ཚེ། ཡུ་རོབ་མཐུན་ཚོགས་ཀྱི་ཚོགས་ཞུགས་རྒྱལ་ཁབ་རྣམས་ཀྱིས་ཀྱང་དེ་ལྟ་བུའི་ཁྲིམས་འཆར་གཏན་འབེབ་གནང་རྒྱུར་སྒུལ་ཤུགས་ཐེབས་ངེས་ཡིན་སྐོར་དང་། སྐུ་ཞབས་ཁོང་ནས་རྒྱ་ནག་ལས་དོན་ཚོགས་ཆུང་གི་འགན་བཞེས་པའི་སྐབས་གྲོས་ཚོགས་སུ་བོད་དོན་དང་འབྲེལ་བའི་ཉན་ཞིབ་གོ་སྒྲིག་གནང་སྐྱོང་ཡོང་བའི་རེ་སྐུལ་ཞུས་ཡོད་འདུག

ཕྱི་ཚེས་ ༧ ཉིན་སྲིད་སྐྱོང་སྤེན་པ་ཚེ་རིང་མཆོག་གིས་ཨ་རིའི་གྲོས་ཚོགས་འོག་མའི་འཐུས་མི་དང་གྲོས་ཚོགས་ཀྱི་དགོས་དངུལ་ཆ་བགོས་ཚོགས་ཆུང་གི་ཚོགས་མི་སྐུ་ཞབས་མཱ་རེའོ་ཌཱ་ཛི་བྷ་ལར་ཊི་(Mario Diaz-Balart)མཆོག་དང་མཇལ་འཕྲད་གནང་སྟེ་རོགས་དངུལ་དང་འབྲེལ་བའི་ཐོག་བཀའ་མོལ་ལྷུག་མོ་གནང་ཡོད་འདུག ཉིན་དེའི་ཉིན་རྒྱབ་ཏུ་ཨ་རིའི་གྲོས་ཚོགས་འོག་མའི་འཐུས་མི་ལྕམ་ (Young Kim) མཆོག་དང་གྲོས་ཚོགས་གོང་མའི་འཐུས་མི་སྐུ་ཞབས་ (Brian Schatz) མཆོག་རྣམ་གཉིས་དང་མཇལ་འཕྲད་གནང་།

གཞན་ཡང་། ཨ་རིའི་གྲོས་ཚོགས་འོག་མའི་འཐུས་མི་དང་གྲོས་ཚོགས་ཀྱི་ཕྱི་སྲིད་ལས་དོན་ཚོགས་ཆུང་གི་ཚོགས་གཙོ་སྐུ་ཞབས་མཱ་ཡི་ཀེལ་མེག་ཁོལ་ (Michael McCaul) མཆོག་དང་། ཨ་རིའི་གྲོས་ཚོགས་འོག་མའི་འཐུས་མི་སྐུ་ཞབས་ཇིམ་མེག་གྷོ་ཝན་ (Jim McGovern) མཆོག གྲོས་ཚོགས་གོང་མའི་འཐུས་མི་སྐུ་ཞབས་ཇེ་ཧྥ་མེར་ཁི་ལེ་ (Jeff Merkley) མཆོག གྲོས་ཚོགས་གོང་མའི་འཐུས་མི་སྐུ་ཞབས་ཊོ་ཌི་ཡང་ (Todd Young) མཆོག་བཅས་ནས་ཨ་རིའི་གྲོས་ཚོགས་ནང་བོད་རྒྱའི་དཀའ་རྙོག་སེལ་ཐབས་སུ་རྒྱབ་སྐྱོར་གྱི་ཁྲིམས་འཆར་ (Promoting a Resolution to the Tibet-China Conflict Act) བསྐྱར་དུ་ངོ་སྤྲོད་གནང་ཡོད་པ་ལྟར། ཕྱི་ཚེས་ ༨ ཉིན་སྲིད་སྐྱོང་མཆོག་ནས་ཁྲིམས་འཆར་ངོ་སྤྲོད་གནང་མཁན་སྐུ་ཞབས་མཱ་ཡི་ཀེལ་མེག་ཁོལ་ (Michael McCaul) མཆོག་དང་། གྲོས་ཚོགས་འཐུས་མི་སྐུ་ཞབས་ཊོ་ཌི་ཡོང་(Todd Young) མཆོག་རྣམ་གཉིས་ལ་མཇལ་འཕྲད་གནང་སྟེ་ཐུགས་རྗེ་ཆེ་ཞུས་ཡོད་འདུག

ཟླ་འདིའི་ཕྱི་ཚེས་ ༨ ཉིན་ཨ་རིའི་གྲོས་ཚོགས་འོག་མའི་སྐུ་ཞབས་ཇིམ་མེག་གྷོ་ཝན་ (Jim McGovern) མཆོག་དང་། གྲོས་ཚོགས་འོག་མའི་འཐུས་མི་སྐུ་ཞབས་མེ་ཁེལ་མེ་ཀུལ་ (Michael McCaul) མཆོག གྲོས་ཚོགས་གོང་མའི་འཐུས་མི་སྐུ་ཞབས་ཇེ་ཧྥ་མེར་ཁི་ལེ་ (Jeff Merkley) མཆོག གྲོས་ཚོགས་གོང་མའི་འཐུས་མི་སྐུ་ཞབས་ཊོ་ཌི་ཡང་ (Todd Young) མཆོག་བཅས་ཀྱིས་ཨ་རིའི་གྲོས་ཚོགས་སུ་བསྐྱར་དུ་བོད་རྒྱའི་དཀའ་རྙོག་སེལ་ཐབས་ཀྱི་རྒྱབ་སྐྱོར་ཁྲིམས་འཆར་བཏོན་གནང་ཡོད་འདུག

དེ་བཞིན་ཁ་སང་བོད་མིའི་སྒྲིག་འཛུགས་ཀྱི་ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག་གིས་གོང་ཞུས་ཨ་རིའི་གྲོས་ཚོགས་འཐུས་མི་རྣམ་པས་བསྐྱར་དུ་ཁྲིམས་འཆར་བཏོན་པར་བསྔགས་བརྗོད་དང་འབྲེལ།  ཨ་རིའི་གྲོས་ཚོགས་གོང་འོག་གཉིས་ཀྱི་སྲིད་དོན་ཚོགས་པ་མཉམ་འབྲེལ་གྱིས་གདུང་སེམས་མཉམ་བསྐྱེད་ཀྱི་ཚོར་ཤུགས་དྲག་པོས་བོད་དོན་ཁྲིམས་འཆར་བསྐྱར་འདོན་གནང་བ་དེ་བོད་རྒྱའི་དཀའ་རྙོག་སེལ་བར་ནན་སྐུལ་གནང་བ་ཞིག་ཡིན་ལ། ཨ་རིའི་གཞུང་ནས་ནམ་རྒྱུན་ཞི་བདེ་དང་། དམངས་གཙོ། རང་དབང་། འགྲོ་བ་མིའི་ཐོབ་ཐང་གི་རིན་ཐང་སྲུང་སྐྱོབ་བཅས་གནང་གི་ཡོད་པ་མ་ཟད། ཁྲིམས་འཆར་འདིས་བོད་ནང་དུ་དཀའ་སྡུག་མྱོང་བཞིན་པའི་བོད་མི་རྣམས་ལ་རེ་བ་ཆེན་པོ་ཞིག་བསྐྲུན་ཡོད་ངེས་རེད། ཅེས་གསུངས་འདུག

གསར་འགོད་པ་བསྟན་འཛིན་ཕུར་བུ་དང་བྱམས་པ་ཚེ་རིང་གིས་བོད་མིའི་སྒྲིག་འཛུགས་ཀྱི་དྲ་རྒྱ་ལས་བཏུས།