རྒྱ་ནག་གཞུང་གིས་ཆོས་དད་རང་དབང་རྡོག་རོལ་གཏོང་བཞིན་པ་འདས་ལོ་ལས་ཚབས་ཆེ་རུ་ཕྱིན་ཡོད་པས་ཨ་རིའི་གཞུང་ནས་དམིགས་བསལ་ལྟ་ཞིབ་དགོས་པའི་རྒྱལ་ཁབ་ཏུ་ངོས་འཛིན་དགོས་པའི་རེ་སྐུལ་ཞུས་འདུག
ཁ་སང་ཕྱི་ཚེས་ ༡ ཉིན་ཨ་རིའི་རྒྱལ་སྤྱིའི་ཆོས་དད་རང་དབང་ལྷན་ཁང་ནས་ཕྱི་ལོ་ ༢༠༢༣ ལོའི་རྒྱལ་སྤྱིའི་ཆོས་དད་རང་དབང་གི་གནས་སྟངས་སྐོར་གྱི་སྙན་ཐོ་ཤོག་ངོས་ ༩༨ ཅན་ཞིག་ཕྱིར་བསྒྲགས་གནང་ཡོད་པ་དང་། སྙན་ཐོའི་ནང་འཛམ་གླིང་རྒྱལ་ཁབ་ཁག་གི་ཕྱི་ལོ་ ༢༠༢༢ ལོའི་སྙན་ཐོ་གཞིར་བཟུང་ཞིབ་འཇུག་བྱེད་སྐབས། རྒྱ་ནག་ནང་གི་ཆོས་དད་རང་དབང་གི་གནས་སྟངས་ད་ལོར་ཇེ་སྡུག་ཏུ་ཕྱིན་ཡོད་པར་བརྟེན། ལྷན་ཁང་གིས་ཨ་རིའི་རྒྱལ་སྲིད་ལྷན་ཁང་ནས་རྒྱ་ནག་གཞུང་གིས་ཆོས་དད་རང་དབང་རྡོག་རོལ་དུ་གཏོང་བཞིན་པའི་ཛ་དྲག་གནས་སྟངས་ཐད་དམིགས་བསལ་ལྟ་ཞིབ་དགོས་པའི་རྒྱལ་ཁབ་ཏུ་ངོས་འཛིན་བྱེད་དགོས་པའི་འབོད་སྐུལ་ཡང་ཞུས་འདུག་པ་མ་ཟད། ཨ་རིའི་གཞུང་དང་གྲོས་ཚོགས་ལ་གནད་དོན་དེའི་ཐད་ཁ་གཏད་རང་བཞིན་གྱི་བསམ་འཆར་གང་ཙམ་ཞིག་ཀྱང་བཏོན་གནང་ཡོད་འདུག
ལྷན་ཁང་གི་སྙན་ཐོའི་ནང་དུ། རྒྱ་ནག་གཞུང་གིས་བོད་མིའི་ཆོས་དད་རང་དབང་ལ་ཚབས་ཆེ་བའི་དྲག་གནོན་བྱེད་བཞིན་ཡོད་པ་དང་། དམིགས་བསལ་བོད་མི་རྣམས་དུས་ཆེན་སོགས་ཀྱི་སྐབས་སུ་དགོན་པ་དང་ལྷ་ཁང་སོགས་སུ་མཆོད་མཇལ་བྱེད་དུའང་གཏོང་གི་མེད་པ་མ་ཟད། དགོན་པ་དང་ལྷ་ཁང་། མཆོད་རྟེན་སོགས་གཏོར་བཤིག་བཏང་བ་དང་། གྲྭ་བཙུན་རྣམས་སློབ་གསོ་བསྒྱུར་བཀོད་ཁང་དུ་འཁྲིད་ནས་ཆབ་སྲིད་ཀྱི་སློབ་གསོ་སྤྲོད་ཀྱི་ཡོད་སྐོར་དང་། གྲྭ་རིན་ཆེན་ཚུལ་ཁྲིམས་ལགས་དང་སྒོ་ཤེས་རབ་རྒྱ་མཚོ་ལགས་གཉིས་ཀྱི་གཙོས་གྲྭ་བཙུན་དང་ཆབ་སྲིད་བཙོན་པ་མང་པོ་ཞིག་ལ་བཙོན་ཁང་དུ་རྡུང་རྡེག་ཚབས་ཆེན་བཏང་བ་ལ་བརྟེན་ནས་ནད་མནར་ཅན་དུ་གྱུར་དང་འགྱུར་བཞིན་ཡོད་སྐོར་དང་། རྒྱ་ནག་གིས་བོད་མི་མང་པོ་ཞིག་༧གོང་ས་མཆོག་གི་མཛད་འཕྲིན་བརྒྱུད་སྐུར་དང་༧མགོན་པོ་གང་ཉིད་ཀྱི་སྐུ་པར་ཉར་བ་ཙམ་གྱིས་འཛིན་བཟུང་བཙོན་འཇུག་བྱེད་ཀྱི་ཡོད་པའི་ཁར། རྒྱ་ནག་གཞུང་གིས་༧གོང་ས་མཆོག་གི་ཡང་སྲིད་ཀྱི་གནད་དོན་ཐོག་ཇུས་གཏོགས་བྱེད་བཞིན་ཡོད་པ་དང་། དེ་བཞིན། ཕྱི་ལོ་ ༢༠༢༢ གཅིག་པུར་བོད་མི་གསུམ་ཙམ་གྱིས་རྒྱ་གཞུང་གི་ཇུས་སྲིད་ལ་ངོ་རྒོལ་བྱས་ཏེ་རང་ལུས་མེར་བསྲེགས་ཡོད་པ་དང་། རྒྱ་གཞུང་གིས་བོད་མིའི་རིགས་རྫས་བསྡུ་རུབ་ཀྱི་མཚོན་པའི་གསང་བའི་པར་ཆས་མང་པོ་ཆེད་འཛུགས་ཀྱིས་བོད་མིའི་འགྲོ་འདུག་ལ་ཕྱོགས་ཡོངས་ནས་སྟངས་འཛིན་དང་རྟོག་ཞིབ་ནན་པོ་བྱེད་མུས་ཡིན་སྐོར་བརྗོད་འདུག
ཡང་སྙན་ཐོའི་ནང་ཨ་རིའི་གཞུང་ངོས་ནས་རྒྱ་ནག་ལ་ནག་ཉེས་ཀྱི་འགན་འཁུར་ཏུ་འཇུག་དགོས་པའི་དོན་ཚན་ཁག་ཅིག་བཀོད་འདུག་པའི་ནང་། གཅིག་རྒྱ་ནག་ནི་འཛམ་གླིང་ནང་ཆོས་ལུགས་རང་དབང་ཐོག་སྒྲིག་འཛུགས་རང་བཞིན་གྱིས་དྲག་གནོན་བྱེད་མཁན་ཡིན་པར་བསྐྱར་དུ་ངོས་འཛིན་དང་། གཉིས་ཨ་རིས་གཞུང་འབྲེལ་གྱི་ཐོག་ནས་ཆོས་དད་རང་དབང་དེ་ཕྱི་སྲིད་ཀྱི་སྲིད་ཇུས་ལྟེ་བ་ཞིག་ལ་ངོས་བཟུང་ནས་རྒྱ་ནག་དང་ལྷན་དུ་འབྲེལ་ལམ་ཡོངས་ཀྱི་ཐོག་ནས་གླེང་སློང་དགོས་པ། མུ་མཐུད་ཆོས་དད་རང་དབང་ལ་དྲག་གནོན་གཏོང་མཁན་གྱི་རྒྱའི་དཔོན་རིགས་ཚོར་ཉེས་ཆད་གཏོང་དགོས་པ་སོགས་བརྗོད་འདུག
འདས་ལོའི་རྒྱལ་སྤྱིའི་ཆོས་དད་རང་དབང་གི་སྙན་ཐོ་ཕྱིར་བསྒྲགས་གནང་སྐབས། ཨ་རིའི་གྲོས་ཚོགས་འོག་མའི་ཚོགས་གཙོ་ཟུར་པ་ལྕམ་སྐུ་ནན་སི་པེ་ལོ་སི་མཆོག་གིས། འདི་ལོར་ང་ཚོས་ཆོས་དད་རང་དབང་ཐོག་བཀག་སྡོམ་དང་ཉེས་འཛུགས། བཙན་གནོན་བྱས་པའི་གནས་སྟངས་སྔར་ལས་རྒྱ་ཁྱབ་ཏུ་ཕྱིན་ཡོད་པ་དང་། མི་ལ་རྨས་སྐྱོན་ཚབས་ཆེན་བཟོ་ཡི་ཡོད་པ་མཐོང་ཡོད་ལ། རྒྱ་ནག་གཞུང་གིས་ཡུ་གུར་བ་ཁྲི་ཕྲག་ལ་མི་རིགས་རྩ་མེད་བཟོ་ཐབས་དང་། ཨུ་རུ་སུའི་དཔུང་དམག་གིས་ཡུ་ཁེ་རིན་གྱི་ཆོས་ལུགས་བྱེད་སྒོ་སྤེལ་ཡུལ་དུ་གཏོང་སྐྱོན་བཏང་བ། ཊ་ལི་བྷན་གྱིས་བུད་མེད་དང་ན་ཚོད་མ་ལོན་པའི་བུ་མོ་རྣམས་ལ་བཙན་གནོན་ཐུབ་ཚོད་བཏང་བ་བཅས་མངོན་གསལ་དུ་ཕྱིན་ཡོད་སྐོར་དང་། ཆོས་དད་རང་དབང་ནི་འགྲོ་བ་མིའི་གཞི་རྩའི་ཐོབ་ཐང་ཞིག་ཡིན་པར་བརྟེན། ཨ་རིར་འོས་འགན་ཡོད་པ་བཞིན་གནད་དོན་འདིའི་ཆེད་དུ་སྐད་ཤུགས་ཆེན་པོ་འདོན་དགོས་སྐོར་གསུངས་ཡོད་པ་རེད།
ད་ལོའི་སྙན་ཐོའི་ནང་སེམས་འཚབ་དགོས་པའི་རྒྱལ་ཁབ་ ༡༧ ནང་དུ་རྒྱ་ནག་དང་ཨུ་རུ་སུ། བྱང་ཀོ་རི་ཡ། འབར་མ། སི་རི་ཡ། རྒྱ་གར་སོགས་ཚུད་འདུག་ལ། དམིགས་བསལ་ལྟ་ཞིབ་དགོས་པའི་རྒྱལ་ཁབ་ ༡༡ ནང་མ་ལི་ཞེ་ཡ་དང་སིངྒ་ལ། ཨིན་རྡུ་ཉི་ཞེ་ཡ། ཨེ་རག་སོགས་འདུག ཕྱི་ལོ་ ༡༩༩༩ ལོ་ནས་རྒྱལ་སྤྱིའི་ཆོས་དད་རང་དབང་ལྷན་ཚོགས་ནས་སྙན་ཐོ་བཏོན་པ་ནས་བཟུང་སྟེ་འདས་པའི་མི་ལོ་ ༢༤ རིང་རྒྱ་ནག་དེ་ཆོས་དད་རང་དབང་གི་གནས་སྟངས་སྡུག་ཤོས་ཨང་དང་པོའི་ནང་དུ་འཇོག་དགོས་པའི་རེ་འདུན་བཏོན་ཡོད་འདུག
གསར་འགོད་པ། བྱམས་པ་ཚེ་རིང་། སྐལ་བཟང་སྦྱིན་པ།
![FILE - Venezuelan opposition leader Maria Corina Machado gestures at a protest ahead of the Friday inauguration of President Nicolas Maduro for his third term, in Caracas, Venezuela January 9, 2025. [File photo: Reuters/Maxwell Briceno]](https://tibettimes.net/wp-content/uploads/2025/10/Maria-Corina-Machado--360x180.jpg)
